METIYU 8

Tviyiq Nyinbo Nyi Ak Mwpnam

(Mk 1:40-45; Lk 5:12-16)

1Kokw so Jisu puutu ao hoqgv ipoq kunum, ho mwwg kokwb nyi acam camt algo wmin gvnum. 2Ho Kaato, tviyiq nyinbo nyi ak mwwg ogum haabnv mwwg agaho lwbw kumbwl xuml benum, “At Sw, no ngam mwp dvb mwwb nyiloqkam no ngam mwp nyotayin.”

3Jisu alaqkv irab banv mwam idaq banv benum, “Ngo mwp dvb mwwdwn. Dvrwq tuku!” Ho twqda hoq nyi akv mwwg tviyiq vc hoqgv al kunum. 4Kokw so Jisu mwam benum, “Tagabto! Sam hiyv nvkam bekin maab, hvbmabde ws wdal nyub dookub wgdvl mwam no hindib kvvdy kota; hoq kokwb noqg al kunam mam nyi mwlwngam kaakin dvb Mojesg gaml jikjaqb Pwnboam pwr jita.”

Roman Sipai Saabwg Nyerangam Mwpnam

(Lk 7:1-10)

5Kokw so Jisu Kaparnahum nampam urab haaikam Roman sipai saab ak mwam kaapa tvl xuml svka konum. 6At Sw, ngoqg nyera akv vcil nam alo doodwn, giqkub-geqxeq nyokmab sisv twqb vcil dood deen.”

7Jisu mwam birwqnum, “Ngo wgdvl mwam aldvb mwptayin.”

8Saab akv birwqnum, “At Sw, hvbma. Ngoqg nam uraho ngo nam svgagvrwq dvb nyinbo nyi yooma. No gaml jitwq bolo ngoqg nyerangv al sutayin. 9Ngo kam ngam koi yaanbo saab tulug uraho bon nyidwn, hoo ngoqg alaqlo sipai tulu go doodwn. Ngo bulug akgon ‘Wto!’ hvl gaml jiyikam mwv wdwn; hoo akgon ‘Haato!’ hvl gaml jiyikam mwv haadwn hoo ngoqg nyera gon, ‘Soq sam nyito!’ hvikam mwv ham nyidwn.”

10Soq benam sam tatwl Jisu mwv lomnum, ho mwwg kokwb wmin gvnbo nyi tulungam benum, “Ngo jvqtw jaqb nulam bedwn, ngo Israel nyi tulug pengko hoqgv kam soq sib mwwjwbo nyi nywywngam kaapa ma. 11Ngo nulam bitwjaqb bedwn, vigo dou-caga hoqgv la haaga hoqgv haalayil Abraham, Aisak ho Jakub lvgab doal ao gvdag lvpw durum ho dvbatayin. 12Hvbmabde Lvpwg ko tulungam kan urab hurlwq tayin ho kan uraho xabtayin hoo bulug exiv dvxeql dootayin.” 13Kokw so Jisu sipai saab akam benum, “Nammwb wnku, no hognvkam mwwjwdvn ham noqg gab nyidwb nyitayin.”

Hoo hoq saab ak hoqg nyerangv hoq bed mood jaqho al kunum.

Jisu Vcbo Nyiam Vigo Mwpnum

(Mk 1:29-34; Lk 4:38-41)

14Jisu Pitorg nammwb wnum, ho namho Pitorg ai akam dooily vc kordul doonam mam kaapanum. 15Mwv nyem akwg alaqngam gvbwl gaqdaq kalam dooiyv mwnwn apaq kunum, kokw so mwn gorab kunv Jisun ocum paqlaqlwl nyiknum. 16Kokw so ariyum nyi tulungv Jisug dookub vigo vcboam, bulug pengko lo tuugin sony cenamv doonum. Jisu hog mwlw ig-oram mam agam gamg bitwq kalam lengknum hoo vcbo mwlwngam bulam mwp jiknum. 17Mwv soq nyinam si hvbnyiloqkam nyiqry kaanbo Aijaya hoqgv benum ham niqtuq lengm dvb. “Mwv at jaqkv ngulug vcam ho ngulug laanyi maanam mam baqg nukun.”

Jisug Kokwb Wmin Gvl Buu Swwdy bo

(Lk 9:57-62)

18Kokw so Jisu mwam nyi tulungv taqg-loosaqb hwwiyum nammam kaatwl, mwv mwwg buu tulungam swnyiq kvtin gonwb rabtwk hvl benum. 19Pvvb tomswrbo nyi ak mwwg dookub haanv mwv benum, “Tomswrbo, hogloq xeqb no wtayin ngo noqg kokwb wmin gvtayin.”

20Jisu mwam birwqnum, “Siyal gv ungngv pvta gv osupv doodwn, hvbmabde Nyia Ko Tuupwg dumpo tvpko gokam dooma dvn.”

21Buu swwnbo nyi akwnv benum, “At Sw, ngam otuqb ngoqg abwg svmangam wkurl liico mvdwb jitwb.”

22Jisu birwqnum, Ngoqg kokwb kokwb wmin gvto sikbo tulungam bulam atv atv sinbo tulungam svma liimto.”

Jisu Doogum Dooiyam Mvturnam

(Mk 4:35-41; Lk 8:22-25)

23Kokw so Jisu swp uraho cao yukam mwwg buu tulungv mwwg lvgab wbanum. 24Ho cema lvpab swnyiq aoho doogum dooi ak vc-jaqb yvnum hoo swpv iss urab jvvlwq tasv vcwrgo doonum. Hvbmabde Jisu yubngaql doonum. 25Buu tulungv mwwg ogum haabnv mwam muunum, benum “At Sw, ngulam ywwtbv, ngulv sita duku.” 26“Nulv hvkam bvxeq boswl lomdwn? Nulug mwwjwngv hwiyw gotwq i doodwn?” Kokw so mwv gorab kunv dooiyam la swnyiqngam yolu ruqxy kalam, hoo hoqho nyum-nyum jaqb dooknum.

27Nyi tulu mwlwngv swrjaqb mwwnv, benum, “Soq nyi aksi hognvk nyiv yu? Mwwg benam mam dooiyvkam ho swnyiq ngvkam tadwn.”

Sony Cenam Nyi Vnyi go Jisu Mwpnam

(Mk 5:1-20; Lk 8:26-39)

28Kokw so Jisu swnyiq kvtin gonwb Gadara gvdab haadwk ho nyubu butaq hoqgv nyi vnyi go leng layil mwam wrwqnum. Soq nyi tulu si bulug uraho sonyiv doonum ho mwlwngv bos soma vrram bulam bosnum; hoqgab hoq lamtab hiyvkam wdwb hampeq maanum. 29Ho sogoq kiirl sogoql benum, “Pwnbog Ko Tuup, no ngulam hoggub nyitwk hvl? No ngulam moodv haama daab laqm-baqmtab haaiyin i?”

30Hoq ditaq hoqgv aado yooma golo iriq pvtw twwt algo dvkar yvnum, 31Hoqgab sony cetwl rugaqbo nyi tulungv Jisun xuml benum, “No ngulam ruqpaq baloqkam aloq iriq riqtwg urab haam dvb jitwbv.” 32Jisu bulam benum, “Wn,” hoqgv lengknv hoq iriq tulug urab haanum. Ho hoq iriq riqcam cvmpwngv bwdw yornwb xaabo kunv swnyiq uraho yoqlwl siknum. 33Iriqngam rvkybo nyi tulungv kelayil nampam wknv sony cenam nyi vnyiv hoggub nyiknum hoq mwlwngam nyi tulungam bekinnum. 34Kokw so nampam hoqg nyi tulu mwlwngv Jisun kaatab nampam agab lengnum. Kokw so mwam kaapa tvl xumbnv bulug gvdangam apaqpel wnkuk hvl benum.

Currently Selected:

METIYU 8: NYISBSI

Highlight

Copy