METIYU 5

Puutu Aoho Jisug Tomswrnam

1Jisu nyi acam mam kaapa tvl mwv puutu ao golo caal doonum, hoo mwwg buu tulungv mwwg ogumho mwam hwwiywql doonum. 2Ho mwv bulam tomswr banv benum;

Jvqtw Hemp

(Lk 6:20-23)

3“Yal jwwgwbo nyi tulungv xinam jaqkv,

hoggab ao Lvpw-hativ bulug gab doodwn!

4“Nyiqs tanap dil mwwrbo nyi tulungv xinam jaqkv,

hoggab Pwnbov bulam hemp podwb jitayin!

5“Mvnyi-moiyul swwnbo nyi tulungv xinam jaqkv;

hoggab Pwnbov hognvkam bir pakun ham bulam jitayin!

6“Pwnbog hang mwwlwqkob bon nyinbo nyi tulungv xinam jaqkv,

hoggab Pwnbov bulam hang xumdwb jitayin!

7“Nyi asaqkam aya yaanbo nyi tulungv xinam jaqkv;

hoggab Pwnbov bulam aya tayin!

8“Hang dvrwqbo nyi tulungv xinam jaqkv,

hoggab bulv Pwnboam kaapa tayin.

9“Swrsomalo pagoq gab bon nyinbo nyi tulungv xinam jaqkv;

hoggab Pwnbov bulam mwwg ko tulungv hvl goqtayin!

10“Pwnbog bon nyim dvb jinam mam bon nyik gab mvnyi-mviyanam nyi tulungv xinam jaqkv;

hoggab ao gvdag Lvpwngv bulug gab doodwn!

11“Nulv ngoqg buu swwgam gab nulam nyi tulungv deedy luuxib hvnyw-har bepal, nulam mvnyi-mviyal ceebio baloqkam nulv hemp poto. 12Hemp poto ho mwwngam alwb mwwto hoggab ao gvda tol nulug amin koi albov nulgab doodwn. Nulug otuqb swwnbo kolwg nyiqry benbo tulungam soq sib mvnyi-mviyal mvnum.

Dvnam Alv la Huto

(Mk 9:50; Lk 14:34-35)

13“Nulv swcw nvg aoso nyia ko gab al hvb nyidwn. Hvbmabde alv tiinam hoqgv niik baloqkam ham lokta tiidkub mvla kuram, ho hoqhv xidkub niqtuq dookram, hoqgab ham hurpaq dukub nyitayin ho nyiv hoq aoho caatam wtayin.

14“Nulv gvda gvt mwlw gab huto hvb nyidwn, yorn aoho doonbo nampamv kvsil doolaram. 15Hiyvkam muram rwgab tvl pwcwngv kulub ap maadwn, hvbmabde mur tvtamnan aoho tvptvl nam uraho doonbo nyi mwlw gab huto mvdwb jidwn. 16Hoq hvbkalam nulug hutongam nyiam kaakin to, ho nulug albo bonam nyinam mam kaapa tvl ao gvda tolo doonbo nulug Abam paqtayin.

Pvvb Pagoqkam Tomswrnum

17“Nulv ngam Mojesg Pvvbam ho nyiqry benbo tulug tomswrnam mam mvpaqtab haadwn mwwmab, ngo hoq tulu ham mvpaqtab haama, hvbmabde hoq tomswrnam torab ham niqtuq nyilin taab haaiyin. 18Mwwgabto, ao gvdangv ho gvda gvt si doody deedib, ho hog mwlwngv Pvvb uraho doonbo agam gomcwr axor cigkam niiram, hoq xeqpnam niqtuqkv lengma deedib. 19Hoqgab hiyv nyiv mwlwngam anyo yaanbo gaml gok jaqkam bugil tamab nyib nyiloqkam ho asaqkam hvb nyitwk hvl tomswr baloqkam, mwv ao gvda tol mwlwngam anyo yaanbo nyiib nyitayin. Hvbmabde hiyv nyiv pvvbam bugil tadwn ho asaqkam hoqhvb kalam nyim dvb tomswr dvn, mwv ao gvda lvpw tolo mwv mwlwngam koi yaanbo nyiib nyitayin. 20Hoqgab ngo nulam bedwn, nulug mwwjwnamv pvvbam tomswrbo hoo nyijwq-nyegam nyi tulungam la Parisi nyi tulungam koi yaama balo hoo no Pwnbog mwwlwqkob nyima baloqkam nulv hoggub nyilakam ao gvdag Lvpwngam kaapa nyoram.

Hang Lengnam Pagoqkam Tomswrnam

21“Nulv tankun kolwg benam mam, ‘No nyi mengmabv hvl, hiyv lajaqkam nulv mengn bov mwam pw-hwwdwb nyitayin.’ 22Hvbmabde ngo nulam bedwn hiyv akgon mwwg bor lvgab hang lengdwn mwam pw-hwwdwb nyitayin, ho hiyv akgon mwwg atwg boram dooma boogub bedwn mwam kam nyel maqparho boa dvb nyitayin, hoo hiyv agamv atwg boram hvvtw maanbo gob, paca gob bedwn, mwv ui nyookwg wmmwb haadwb nyitayin. 23Ho xuml hog jis aky ak Pwnbog yugw ho jita dvloqkam no noqg borwg lvgab hog yolu bidy sv ak doopan hvl mwwpa baloqkam 24noqg aky jitanam mam Pwnbog yugw otuqho ap pel nyorib wkur gvdwl noqg bor akwg lvgab swrsomalo dvb bepaq cooto, hoqgv hookur gvdwl noqg Pwnboam jitanam akiam jito.

25“Hiyv akgon nam sorpa loqkam, hoo nam pw-hwwdwb bool wg baloqkam no mwwg lvgab vnwqb mood dooda dvkho nam nyel maqpar boa maadab yolungam swrsob simto, hvbmab nyiloqkam sornbo akv nam pw-hwwnbo akwg alaqb gvqlwq tayin, ho pw-hwwnbo akv nam sipai tulug alaqho gvqlwq tayin, kokwngam nam pvtwqho lwqtayin. 26Ngo nam jvqtw jaqb bedwn, noqg uddum mam hubjurl yolungam pwnyia maady deedib no pvtwq hoqgv lengyi kuram.

Nyiig Nywxw-Nyolam Bwwxinam Pagoqkam Tomswrnam

27“No nyiig nywxw-nyolam bwwxin maabv hvl benam mam nulv tankun. 28Hvbmabde sija ngo nulam bedwn, hiyv nyi akgon nyem mam kaapa tvl mwnwn hang uraho kaaby aldvn, nyi ak hv hoq nyem mam mwwg hang uraho kaabynamv nyiig nywxwngam bwwxin namhvb nyidkun. 29Noqg vnyiq nyiqbwqkv nam nyic nyim baloqkam ham hargdvl hurpaqto, hoggab noqg gv dorpwngv ui nyookub immam lingsam noqg vnyiq nyiqgwn harpaqnamv alyadwn. 30Noqg alaq lvqbwqkv nam nyic nyim baloqkam ham pagdvl hurpaqto, hoggab noqg gv dorpwngv ui nyookub immam lingsam noqg all alaqgon papaqnamv alyadwn.

Tumin sunam

(Mt 19:9; Mk 10:11-12; Lk 16:18)

31“Sam kam hvl benamv doodwn, ‘Hiyv nyiv atwg nywxwngam tudwn, mwv mwwg nywxwngam tubaloqkam pota xeql jidwb nyidwn.’ 32Hvbmabde nulam ngo sija bedwn, hiyv nyiv atwg nywxwngam yocu-yabio nyima kam asaq pagoqlo tudwn mwv hoq nyem ak ham bwwxin bob nyim dvn, ho hiyv nyi nyem akam nywxw boodwn mwv kam bwwxin bob nyidwn.

Dingnam Pagoqkam Tomswrnam

33“Kol otuqho Israel nyi tulungam sam kam benam mam nulv tankun, ‘No xaalyob dingsam maabv, hvbmabde At Swg agaho no hognvkam nyidwb dingr pakun ham juqbo maab niqtuq nyilin to.’ 34Hvbmabde ngo nulam bedwn, no hog ak bir mins yukam akukam dingmab, ao gvdag emin bvkam dingmab, hoggab ao gvdangv Pwnbog dootam pwqlwngv, 35ho gvda gvtwg emin bvkam dingmab, hoggab gvda gvt si Pwnbog lvpia dvgwl datam nanv, ho Jerusalem emin bvkam dingmab, hoggab si koi albo Lvpw atwg nampamv. 36Hoo atwg dumpongam cing gab tvl hoqg emin bvkam dingmab, hoggab no noqg dumpo dummam soocw gonkam puulu dvb la kaaya dvb mvnyiram. 37Nulv ‘Vv’ hvma baloqkam ‘Ma’ hvl bitwqto, hoq aob hog bebin baloqkam hv almanbo yal hoqgv haadwn.

Ree Daqnam Pagoqkam Tomswrnam

(Lk 6:29-30)

38“Kolwg nyi tulungv, ‘Vnyiq kwliam vnyiq hoo exy kwliam exib,’ hvl benam mam nulv tankun. 39Hvbmabde ngo nulam bedwn, nulam hiyv akgon nyimur baloqkam ham ree daqmab, hvbmabde hiyv akgon nyuqm taqcgon pitaq baloqkam nyuqm taqcgon ham kam pitaq mvto. 40Hiyv akgon noqg lvlwqngam naadwb nyel maqparho sortab bool wg baloqkam mwam noqg kamt rummam kam naamto. 41Hoo hiyv nam mwwg igin viyam bininl lit tig baqtwk hvl benboam mwwg lvgab lit tinyi yaag wmin gvto. 42Hiyv nyi akgon nam hog ak kobaloqkam mwam ham jito, hiyv akgon noqg galoqkv hog ak ceeb nyiloqkam mwam ham cwwrwqto.

Ceebio Hang Baqnboam Abyto

(Lk 6:27–28,32–36)

43“Kolwg nyi tulungv ‘Noqg door-doopw ajinam abyto; nam ceebio hang baqnboam oyum to,’ hvl benam mam nulv tankun. 44Hvbmabde sija ngo nulam bedwn, nam ceebio hang baqnboam abyto ho nulam mvnyi-mviyao nyi tulu gab Pwnboam xumto. 45Hvb nyib nyiloqkam nulv ao gvda tolo doonbo nulug Abwg ko tuupwb nyitayin, hoggab mwv mwwg doonyiam albo nyi ge almanbo nyi ge bulug aoho doonyig lvlaqngam dudaq mvdwb jidwn. Nyodongam nyiidar albo hoo dvrwq maanbo nyi tulug mwlw aoho hom dvb jidwn. 46Hoggab nulv nulam aby bonbo nyi tulu arongam aby bobaloqkam hoggub Pwnbov nulam amin jitayin? Hoqham gvda nyooga kokarbo nyi tulu ngvkam nyido! 47Nulv nulug vbw-bor tulu ajin tulu arongam salam jil agam gotwq dvloqkam hvbnyiloqkam nulv nyi asaqkam hognvkam nyibin yaapan? Nyoodo nyi tulu ngvkam ham nyima dvn i? 48Hoqgab nulug ao gvda tolo doonbo nulug Abv hog mwlwho alnam hvbkalam nulvkam hvb alwl niqtuq nyil dooto.

Currently Selected:

METIYU 5: NYISBSI

Highlight

Copy