METIYU 6

Nyiam Kaakdvb Nyinam

1“Hvvminto, nulv nyi tulug kaagaho nyiam kaamdvb nulug atwg dormongam kaaga tagab nyimabv. Nulv hvb nyi tulug kaagab nyibaloqkam ao gvda tolo doonbo nulug Ab galoqkv nulv nyijo amin akukam kaaparam.

2“Hoqgab hwdlo no dwc-twwpw maanboam jiyikam, noqg jima taab dupur maabv, hoggub kaak-takdvb nyinbo nyi tulungv Sinagog uralo hoo lamta bvvx lo soq sam nyidwn, nyi asaqkam paqk dvb mwwl nyidwn. Ngo nulam bitwl bekin dvn, bulam jidynam mam mwv bulug nyijongam hoolum jaqb jipa kun. 3Hvbmabde no dwc-twwpw maanbo nyiam svka yukam noqg ajin mwlwngam ho ajin jinbw ngamkam noqg nyinam mam cengdwb ham jimabv. 4Ho soq nyinam si kvsil nyinamv. Hoo noqg Abv no hognvkam kvsil nyidwn ham kaapa tvl noqg nyijo aminam nam jitayin.

Swgwnam Pagoqkam Bekinam

(Lk 11:2-4)

5“Hoo hwdlo nulv swgw yikam, kaak-takdvb nyinbo nyi tulungv nyinam hvb nyimabv! Bulv Sinagog uralo hoo nyi lamta bvvxig cuukiq bvrwlo daqtwl xumkwr yvdwb aby dvn. Soq sam nyiam kaala bvs mwwl nyidwn. Ngo nulam bitwl bekin dvn, bulam jidynam mam bulug nyijongam hoolum jaqb bulam jipa kun. 6Hvbmabde no swgw yikam no noqg cwrw urab haato, viyap pam ciqtumto, ho kaapa maanam noqg Abam xuml koto, ho noqg kvsil swgwnam mam kaapa bo noqg Abv nam nyijongam jitayin.

7“No swgw yikam Nyoodo nyi tulug nyinam hvb niqtuq doomabo agam rooxob goonam hvb nulv goomabv, 8hoggab nulv koma daab mwv nulug kodynam mam Ab mwv cengcol doodwn. 9Hoqgab nulv swgw yikam soq sib swgwto;

‘Ao gvda tolo doonbo ngulug Ab,

Noqg dvrwqbo eminv koi al nvka;

10Noqg Lvpwngam haamto;

Ao gvda tolo nyinam hvbkalam gvda gvt so noqg mwwlwqkob nyimto.

11Ngulug looxiam dvsam soolo ngulam jitbv.

12Ngulam nyimurbo nyi asaqkam ngulv apaq jinam hvbkalam ngulug nyimur kunam mam ngulam apaq tukub.

13Ngulam pooka-yirka mvdwb jimab,

hvbmabde ngulam Almanbo ak hoqgv ywwlin tukub.’ (Noqg lvpwngv, hoo atorv, hoo yuunamv nwrba cwtam gob dooky nvka. Amen).

14“Nulam nyimurbo asaq nyi tulungam bulug nyimuram nulv apaq jibaloqkam, ao gvda tolo doonbo nulug Abv kam nulug nyimuram apaq jitayin. 15Hvbmabde nulv nyi tulungam bulug nyimur kunam mam apaq jima baloqkam ao gvda tolo doonbo Abv nulug nyimurnam mam apaq jiram.

Dvmab Vrnam Pagoqkam Tomswrnam

16“Kaak-takdvb nyi tulug nyinam hvb nulv dvmab vrr yukam nulug nyuqm mam moiya dvb mvma bv, hoggab dvmab vrnam mam nyi tulungam kaakin dvb bulug nyuqtuq-mooram nyimdvn. Ngo nulam bitwl bekin dvn, bulam jidynam mam bulug nyijongam hoolum jaqb jipa kun. 17Hvbmabde no dvmab vrr yukam noqg dumpo dummam kuty paqtwl texy tuqto ho nyuqm mam moomiqto. 18Hvb nyib nyiloqkam nyi asaqkv noqg dvmab vrnam mam cengram, hvbmab noqg kaapa maanam Abv cingtwqtayin. Ho Abv kaapa maadwb noqg kvsil nyinam mam kaapa tvl nam nyijongam jitayin.

Ao Gvda gab Nyet Tvnam

(Lk 12:33-34)

19“Nulug nyet tvnam gumnam swcw nvg aoso tukum yo, hogloqho topum mvla eexamnamv dvpaq dvn, ho dvcobov pakol dvcol naal wgdvn, 20hoq hvk nyetam nulgab ao gvda tolo nyet twnwr apto. 21Hoggab noqg gumnv hoglo doodwn hoqho noqg hangv kam doodwn.

Gvvg Huto

(Lk 11:34-36)

22“Noqg vnyiqkv noqg gv mur hutongv. Hoqgab noqg vnyiqkv alwl doob nyiloqkam, noqg gv dorpwngv swrsomalob huto tayin. 23Hvbmabde noqg vnyiqkv almab nyiloqkam noqg gv dorpwngv kam kan uraho doodwn hvb nyitayin. Hvbmabde noqg hangv kan twdwql huto mabnyiloqkam hoqho kan hv hog hwdgo kan tayin!

Pwnbo la Nyetnam

(Lk 16:13; 12:22-31)

24“Hiyv kam at vnyig nyerab swwnyiram, hoggab mwv akwn oyum tvl akwn aby tayin, ho akwn svqgw dvb mwwjw kotwl akwnam mwwnyi-saqya tayin, hoqgab nulv Pwnbog la twngkwg nyerab swwnyiram.

25“Hoqgab nulam ngo bedwn, nulv hognvkv dvsv dvtayin ho twwtayin hvbmab gv so hognvkv vjv kootayin hoq gab mwwdwq maabwk hvl bedwn. Hoggab swwnamv dvsam koi yaama dvn yv? 26Taqg-loosaqho jarkar yvnbo pvta tulungam kaaka to; bulv vly liima, dvn gokam naama ho ham noosu boqkuml bvqlwqma, hvbsujaqkam ao gvda tolo doonbo nulug Abv bul gab mwwdwq dwql bulam dvdwb jitayin. Nulv pvta tulungam hilayab xidwb nyima dvn yv? 27Soq pagoq gab mwwdwql nulug pengko hoqgv hiyv akgon aal loog swwyal swwbin nyotayin?

28“Hvb nyiloqkam hoggab vj koos gab mwwdwq dvn? Nyorog opu tulungam kaaka to, hoggub nyil swwdwn, bulv at gab bon nyima do, ho svcaq tan gokam caqma dvn. 29Hvbmabde ngo nulam bedwn, Lvpw at Solomon kam soq opu tulug hvb anyabo vj nywywngam kooka maanum. 30Pwnbov soolo dootwl aram kaapa maadwb nyiinbo wm mooram uraho parxianam nwmwngam kam vj koom dvnyiloqkam, hvbnyiloqkam mwv nulam ham xibin yaal vj koodwb jiram yv!? Nulug mwwjwngv hog hwdgo anyo dvn!

31“Hoqgab nulv hogloqkv ngoqg dvsv haatayin? ho hogloqkv ngoqg twwsv haatayin? ho hogloqkv ngoqg vj koosv haatayin? ham mwwdwq dwqnam mam apaqto. 32Hoggab soq sam Nyoodo nyi tulungv looxiam mwwdwq dvn. Ao gvda tolo doonbo nulug Abv nulam hognvkv pwwma dvn ham hog mwlwngam mwv cengdwn. 33Hvbmabde otuqcob Pwnbog Lvpwngam hoo mwwg jvqtwngam meeto, hoo mwv nulam hog mwlwngam vbw jitayin. 34Hoqgab aram gab hog mwwdwq maabv, hoggab aram gab aram mwwdwq dvb nyitayin. Hoq aal aal kalam gab hentwr nyelinamv jotkvl dvn.

Currently Selected:

METIYU 6: NYISBSI

Highlight

Copy