METIYU 23

Pvvb Tomswrbo la Parisi Tulungam Hvvmintvk Hvl Benam

(Mk 12:38-39; Lk 11:43,46; 20:45-46)

1Kokw so Jisu mwwg buu tulungam la nyi tulungam benum. 2“Pvvb tomswrbo nyi tulungam la Parisi tulungam Mojesg Pvvbam tomswrl bekin dvb doodwn. 3Hoqgab hognvkam nulam bekin tayin ham bugil tal swwto hvbmabde bulug nyinam mam kaagmabv. Hoggab hognvkam agam bedwn ham bulv nyima dvn. 4Bulv igin vi baqla maanam mam nyi tulug gorbw aoho joobaq jidwn. Hvbmabde ham lvqcw ngvkam piikal bulug igin vi baqkho vcwr gokam svka maadwn. 5Bulv hog mwlwngam nyi tulungam kaakdvb nyidwn. Kaaka to bulug dumpo tuqt aoho la alaq laqpoho dvrwqbo pota agam mam xeqtwl baqnam ho kaato hoggub bulug vj jemiv aaso aldvb koodwn. 6Bulv durumko lo dook alboam ho Sinagog uraho dook doongam boam xuql doodwn. 7Bulv kwm-kor mvk urab bulam xuml xikdvb mwwdwn hoo bulam ‘Tomswrbo’ hvl nyi tulungam goqk dvb mwwdwn. 8Nulv ‘Tomswrbo’ hvl goqk maab, hoggam nulv akwn akwn vbw-borwb nyidwn hoo nulam Tomswrbo akin go twq doodwn. 9Ho nulv hiyv nvkam swcw nvg aoso ‘Aba’, hvl goqdwb nyima dvn, hoggab nulug Abv ao gvda tolo doonbo akin hvvtwq. 10Hvbmab nulam hiyv nvkam ‘Xilo’, hvl goqk maab, hoggab nulv xilongv akin go, mwv Kristo 11Nulug pengko lo xilo bov, mwv nulug nyerab nyil swwdwb nyitayin. 12Ho hiyv nyiv atam koigob mwwdwn, mwam anyo dvb mvtayin, ho hiyv atam anyo dvb mvsdvn, mwam koidvb mvtayin.

Kaak-Takdvb Nyinbo Nyi Tulungam Jisu Haqpaqnam

(Mk 12:40; Lk 11:39-42,44,52; 20:47)

13“Pvvb tomswrbo ho Parisi tulu, nulgab hwdgo bos sos go! Kaak-takdvb nyinbo nyi tulu nulam! Nulv ao gvdag viyap pam nyi tulungam haam maab cwqtum dvn, hvbmabde nulv atv kam urab haama, ho hiyv haab mwwdwn hoq nyi tulungam nulv haam ma! 14Pvvb tomswrbo la Parisi tulu, kaak-takdvb nyinbo nyi tulu nul! Nulgab oayo! Nulv xwwmiam hampeql bulug nammam hubreqdo hoo kaak yaadwb mwwl aaso jaqb xumnam mam mvdwn, hoqgab nulv laqm koi jaqgo baqtayin.

15“Pvvb tomswrbo ho Parisi tulu, kaak-takdvb nyinbo nyi tulu nul. Nulam oayo, hoggab nulv nyi ak Juhudi dormongam naamdvb nyitayikam nulv swnyiqngam jaakar do hoo gvdangam gvqyiql gaqdo, ho mwam nulv swwm tukul nulam atam hilayab ui nyookub wwm dukub mvdo.

16“Nyiqca tvl lamta kaakin bo. ‘Xumk nammam la idaql dings jaqkam hog niqtuq dooram, hvbmabde Xumk nam uraho doonbo hunam idaql dingb nyiloqkam ho mwwg dingnam mam mwv mwwgab tayin.’ 17Nyiqcal paca bo! Hunam dvrwq dvb mvnbov hun yangv yv hvbmab Xumk nam si ya yv? 18Nulv sam kam tomswr do, ‘Hiyv akgon yugwngam gvbwl dingn bov, mwv bos dvb nyima dvn, hvbmabde mwv yugw ho rwlwqnam akiam gvbwl dingb nyiloqkam, mwv ham bosdvb nyitayin.’ 19Nulv hoggub nyiqca cvvyiqdvn? Pvvbam dvrwq dvb mvnbo ho akwg pengko lo hogloq ak hv xidwb nyidwn? 20Hoqgab hiyv nyiv yugwngam idaql dingn bov mwv hoq aoho doonbo aky mwlwg aoho dingnum. 21Ho mwv Xumk nam eminb dingd nyiloqkam hoo mwam hoq uraho doonbo Pwnbog eminb dingdkun. 22Ho hiyv nyiv ao gvdag emin dingd nyiloqkam mwv Pwnbog pwqlw dootam ho doonbo Pwnbog emin gab dingdkun.

23“Oayo Pvvb tomswrbo gab la Parisi tulu! Kaak-takdvb nyinbo nyi tulu! Nulv moodam swwnbo wj-oongam, taky-talapam ho honam-teywr mwlwngam wyw hoqgv akwn Pwnboam taky jidwn. Hvbmabde jvqtw jaqb xinam gamlam, jvqtwngam, ayangam ho lootwngam bugil swwma do. Soq tulu sam nulv alwb topaqmab nyil dootwl hoo asaqham kam nyidwb nyidwn. 24Nyiqca tvl tomswr bov nulug twwk pvtaq hoqgv twwny maatwl hvbmabde svjinam miqpw maab meqgdo.

25“Pvvb tomswr bov la Parisi tulu, kaak-takdvb nyinbo nyi tulu, nulv nulug huku pvtaqngam ao arongam deexaqtvl urangam almanbov la kacboam gutaqdvb doom dvn. 26Nyiqca bo Parisi tulu! Huku pvtaq urab hognvkv kacdvn ham otuqb deexaqto, hoq kokwb aga ngvkam dvrwq tayin.

27“Pvvb tomswrbo hoo Parisi tulu, Kaak-takdvb nyinbo nyi tulu, nulv hognvkv bos soma namgo sodwb nyido! Nulv nyubungam puulu bov neexaqnam hvb nyido, hoggab hoq tuluhv agaho kangam aldvn, hvbmabde urangv nyi svma yaaro ngvla alongv doodwn. 28Hoq hvbkalam, aolo nulv nyi kaagalo mwlwngv aldvb nulam kaado, hvbmabde nulug urangv asar tvl ho nyic rooxo dvn.

Jisu Bulug Laqm Baqdynam mam Bekinam

(Lk 11:47-51)

29“Pvvb tomswrbo Parisi tulu, nulgab hognvk bos somanam go sodwb nyido! Kaak-takdvb nyinbo nyi tulu! Nulv nyiqry benbo tulug nyubungam kangam aldvb mvtayin hoo simab doodwkho albo nyi tulug nyubungam nulv hind alwb kuiyum mam kaaky dvb oj amar mwlwqdvn. 30Ho nulv bedwn, ngulug ab-ann swwca ho dooloqkam ngulv hvb nyiram hoo nyiqry benbo tulungam mengram. 31Hoqgab nulv jvqtw jaqb nulug ab-ann tulug ko hosiv nyiqry benbo tulungam mengbov hvl atam bekin sudo. 32Hoqgab nulv wgdvl nulug ab-ann tulungv hognvkam nyirab pakun ham nyiyum ta, 33Tvbwg hoolu hoo tvbwg ko tuup tulu! Nulv hoggab nyil ui nyookub wnam hoqgv keleqdvb mwwdwn? 34Hoqgab ngo nulam bekin dvn, ngo nulam nyiqry benbo tulungam kanam tayin. nyijwq-nyegam boam hoo tomswr boam haam tayin. Ho nulv bulam tuugin mengtayin, tuugin daapo aoho mengtayin, hoo tuugin Sinagog uraho jwwtayin, hoqgv tuugin nam bopam vxib ruqkar tayin. 35Hoq hvb nyik gab, nyi cengmab doopaq boam meng gam gab hoq mwlwg laqm mam, Abel hoqgv Barakiya ko tuup Jakariya, hiyvn nulv Xumk nammwg yugw pengko ho mengnum, 36Ngo nulam bedwn, soq mwlw sam meng gam gab hoq laqmv swnyw-soolog nyi tulug aoho dootayin.

Jerusalem gab Jisug Mwwdwqnum

(Lk 13:34-35)

37“Jerusalem no! Nyiqry benbo tulungam hoo Pwnbog kanam mam pui baqnbo tulungam wlw hurx bo Jerusalema! Ngo hog hwdgo nulug nyi mwlwngam, poroq annv mwnwg pocungam alapho lobyumnam hvb ngoqg alaqngv gooyum dvb mwwl nyitar pakun, hvbmabde nulv ngam hvb nyim ma. 38Hoqgab nulug Xumk nam mam apaq dvb nyitayin hoo asar dootayin. 39Sija galoqkv nulv ngam kaapa kuram, hwdlo nulv hvl bema deedib ‘At Swg emin gab haanbo akam Pwnbov lvqc citka.’”

Currently Selected:

METIYU 23: NYISBSI

Highlight

Copy