METIYU 22
22
Nyem Naal Durumnam mam Doocnam
(Lk 14:15-24)
1Jisu lokta nyi tulungam agam goodwkho doocil benum, 2“Pwnbog lvpwngv soq sibjaq nyidwn; Lok lvpw at ak mwwg ko tuup gab hvl nyem naal durum rumdwb mwx-mvaqbo hvb nyidwn. 3Durum kob haatwk hvl goql apnam nyi tulungam durum dvtab haatwk hvl goqm dvb mwwg nyera tulungam kanamnum, hvbmabde mwv haadwb mwwmanum. 4Hoqgab mwv nyera asaqngam soq pui sam bilwqtvl kanamnam, ‘Ngoqg durum mam munu pakun, ngoqg svv oxbo jaqkam patab pakun, ho hog mwlwngam mwx-mvaql jotv dukub mvpa kun. Nyem naal durum rumk so haato!’ 5Hvbmabde goqol apnam nyi tulungv tvmw-taiyonum ho bulug at ya bonam nyitab wnum, akwn mwwg rongob akwn mwwg noosub, 6ho tuugin mwwg nyera tulungam nootu tvl jwwl pal ho bulam mengnum. 7Hoqgab lvpw atv hang lingtwram lengknv mwwg sipai tulungam kanam tvl hoq nyi mengnyia bo tulungam mengm kunum, hoo bulug bopam mam wm tolwqnum. 8Kokw so mwv nyera tulungam goqbnv bulam benum. ‘Ngoqg goqdumnam nyiin tulungv durum dvtab haakma ngoqg durum mam munu supa ku, ngoqg durum sam dvdy maan bogo. 9Hoggab nulv nyob lamta paanwb lengdvl nyi gotwq bolo vigo soq durum gab goqta.’ 10Hoqgab nyerangv nyob lamta paanwb lengb nv nyi gotwq bolo albo ge alman ge kaapanam gotwqb al-koram xumab mwlwngam boanum, hoo nyem naak nammv bwwr kunum. 11Kokw so lvpw at akv nyiin tulungam kaatab nam urab haanum, ho mwv nyi ak nyem naal durumko lo vj koonam hvk vj kooma bo nyi ak kaapanum. 12Lvpw at akv mwam toxnum, ‘Ajin, no hoggub nyil nyem naal dvpaqko durum ho dvtab haaikam vj koonam mam koomab uraho haapan?’ 13Kokw so Lvpw atv mwwg nyera tulungam gaml jinum, ‘Mwwg al alaqngam leetwl aga kan twdwq alo hurpaqta, ho mwam alo exy dvxeql doomto.’”
14Jisu bitwr-benyaho benum, “Vigo goqnum, hvbmabde xuqnamv anyogo.”
Ngooga Jinam Pagoqkam Toxnam
(Mk 12:13-17; Lk 20:20-26)
15Parisi tulungv agam bexiaq baloqkam Jisun nootu dvb hvl ywrnum. 16Hoqgab mwwg dookub bulug nyi ata gola Herod dvpar hoqgv ata go kanamnum. Bulv benum, “Biswrbov ngulv cengdwn no jvqtw agam mam bekin dvn. Ho hvb Pwnbog jvqtw jaqb hang mwwnam mam nyi tulungam bekin dvn, ho hiyv nvkam no haagabl tama dvn, 17hoggub mwwdwn ham bekin tvb Romanam gvda nyooga jidwb nyid nvi yv ma nyima dvn?” 18Hvbsujaqkam bulug nyisil nyidynam pagoqkam Jisu mwv benum, “Kaak-takdvb nyil hang pwnyi bo nyi tulu, nulv ngam hog nyitwl pookal bwdwb baqgeq dvb nyidwn? 19Ngam nyooga jinam twngk taiyin lo taqg jitbv!”
Bulv twngk taiyin taqg jinum. 20Ho bulam mwv toxnum, “Soq si hiyvg eminv ho hiyvn kvvyw kacdvb mvnamv doodo?” 21Bulv birwqnum, “Sijargv.”
Hoqgab Jisu bulam benum. “Hoqgab Sijarnvn jidynam mam ham Sijarnvn, hoo Pwnbon jidynam mam Pwnbon jito.”
22Bulv soq benum sam tatwl lomnum. Bulv mwam apaq peekul hoo wleq kunum.
Sinam Hoqgv Turknam Pagoq
(Mk 12:18-27; Lk 20:27-40)
23Hoq aal lookin ho Sadusi nyi tulu go Jisug dookub haabnv nyi tulungv sik bolo turab kuram hvl benum. 24Bulv benum, “Tomswr bov, Mojes benum, ‘Nyi ak ko doomab sib nyiloqkam mwwg borv xwwmy akam nywxw sodwb nyidwn, hoo bulam ko dool hoq ko tulungam sikbo nyi hoqg kov hvl bedwb nyitayin.’ 25Soq otuqho vbw-bor kvngo doonum, vbw jaqhv nyem naanum, hvbmabde ko doomab sileq kunum. Hoq kokwb hoq bor akv xwwmy akam nywxw sonum, 26mwwg gab ko doomanum hoq kokwb oum deen borv doognum, hvb nyiknv kvn nagub mwlwngv vbw-borv doognum. 27Kokw jaqso nyem akv siknum. 28Ho sija sikbo tulungv swwgwb turab yukam hoq nyem akv hiyvg nywxwb swwtayin? Hoggab mwlwngv mwnwn nyem swwgnum.” 29Jisu bulam birwqnum, “Nulv hwdgo nyimur do! Nulv Dvrwqbo potangam kam cengma, ho Pwnbog atoram kam cengma nyi. 30Hoggab sikbo tulungv turab yukam ao gvdag ao gumtw hvb nyitayin, ho nyem naaram ho nyem jimin sukram. 31Sikbo tulungv swwgwb turab deeknam mam Pwnbov nulam bekin kunam mam nulv Dvrwqbo potalo poory ripa ma i? 32Pwnbov benum, ‘Ngo Abraham gv Aisak gv Pwnbov, ho Jakubg Pwnbov, mwv turl doonbo sima bo Pwnbov.’” 33Mwwg tomswrnam mam tatwl nyi tulungv lomnum.
Koi Albo Gaml
(Mk 12:28-34; Lk 10:25-28)
34Kokw so Parisi tulungv Jisu Sadusi tulungam gambeq maadwb agam mam bepak hvl tapa tvl dookum nyanum. 35Bulug pengko hoqg Pvvb tomswrbo akwn Jisun pooka banv toxnum. 36“Tomswrbo, gaml tulug pengko lo mwlwngam koi yaanbo Pvvb si hogloq ak hv?”
37Jisu birwqnum, “Noqg Pwnbo At Swn noqg hvvjw-hara lvgab, noqg yvj lvgab hoo noqg mwwnam lvgab aby boto. 38Soq si koi bvla otuqcob gaml jiknamv. 39Hoqg dvqsin koibo gaml akv si, ‘Noqg door-doopwngam no atam abynam hvb aby boto.’ 40Mojesg gamlv hoo nyiqry benbo tulug bvrwq niqtuqkv mwlwngv soq vnyi so doogw dvn.”
Ywwn bog Pagoq
(Mk 12:35-37; Lk 20:41-44)
41Lok Parisi ata go olum gob doqkum doolum dvkho Jisu bulam toxnum. 42“Ywwn bog pagoqkam nulv hoggub mwwdwn? Mwv hiyvg ko hosiv yu?”
Bulv birwqnum, “Mwv Debidg ko hosiv yukv.” 43Jisu bulam toxnum, “Hvbnyiloqkam hoggub Yalv Debidnvn bilwql mwam At Sw hvl benum?”
44“At Sw ngoqg nyiit atwn benum:
Ngoqg lvqbwq taqc so dooto
hwdlo ngo noqg nyemaqngam noqg lvpia niikumho doodwb mvma deedib.”
45Debid mwam ngoqg At Swv hvl goqn mvnyiloqkam Ywwnbo ak hv hoggub nyil Debidg ko hosiqb nyitayin?
46Hiyvkam Jisug toxnam mam akukam birwq nyomanum ho hoq aal jaq hoqgv hiyvkam mwam hog tox dvb hampeq lakmab nyiknum.
Currently Selected:
METIYU 22: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
