METIYU 24

Jerusalem Lyudynam Pagoqkam Bekinnum

(Mk 13:1-2; Lk 21:5-6)

1Jisu Xumk nam hoqgv lengknv wdkub nyitanum, hoq ditaqho buu tulungv mwwg dookub hvvnwq banv Xumk nam hoqg rwwpum mam kaakin banv mwam benum, 2Mwv benum, “Vv, nulv soq tulu sam hind alwb kvvdy to, ngo nulam sam bedwn soq wlw tulug pwggin aoho pwggin doonbo wlw pwkin gonkam hurpaq maanam akukam dooram, mwlwngam hurpaq dvb nyitayin.’’

Hentwr-kaas hoo Mvnyi-mviyanam

(Mk 13:3-13; Lk 21:7-19)

3Kokw so Jisu Olib Puutu aoho doodwkho mwwg buu tulungv vpwb mwwg dookub haabnv soq mwlw si hwdam nyitayin ham ngulam bekin tvb hvl benum, “Ho noqg haata yukam hoqgv soq gvda so nyiid kunam pagoqkam kaacin dvb hog nvkvxeq nyitayin.’’

4Jisu bulam birwqnum, “Nulv hiyv nvkam pwqk maab hengab jaqb dooto. 5Nyiv vigo ngoqg eminb haal, ‘Ngo Kristok!’ hvl betayin hoo nyi tulungam pwqtayin. 6Ho nulv ogumho nyob panam mam tapa tayin hoo aado ho nyob patanam puiyam kam tapa tayin. Hingkwq-kvwq maabv, hengab to hoggab soq si nyiky dvb nyitayin, hvbmabde soq si nyigam gab moodv ku hvdwb nyiram. 7Gvdangv akwn ceebiob akwn baqrab tayin. Ho lvpw akwn lvpw akwnam patayin. Gvda mwlw hoo dwr buliv wtayin, nyiobiv hwqtayin. 8Soq mwlw si ko cinc cirabnam hvb nyinam mwxiq su.

9“Hoq moodam nyi tulungv hentwr laqm mam hendwb nulam nootul nyi tulu alaqho gvqlwq jitayin, hoo mengm dvb jitayin, hoo ngoqg emin gab mwlwngv nulam oyum tayin. 10Hoq moodam nyi tulungv vigo bulug mwwjwngam paqxia tayin, akwn akwn nyepin pimin sutayin, ho akwn akwn oyum mins tayin. 11Hoq kokwb xaalyob nyiqry benbo tulungv lengtayin hoo nyi tulungam vigo mvvxa tayin. 12Almanbov vigo nyigam gab nyi tulug abynamv hviyiq taikun. 13Hvbmabde hiyv kokw namgob cwql dootayin hoqham ywwtayin. 14Ho soq tugu pui sam gvda mwlwho hvvkib nyi mwlwngam betam tamxongam swcw nyodongv twrta yikun.

Bos Alnam Mood

(Mk 13:14-23; Lk 21:20-24)

15“Ho nulv ‘nyiqry kaanbo’ Daniyelwg boswl lomdwb dvrwqbo nyookho daqdwb benam mam kaapa tayin.’’ (Sam poory bov si hognvkam bedwn ham tacinto). 16“Judiya ho doonbo nyi tulungv puutu aob keleqdvb nyitayin. 17Ho mwwlo aoho doonbo nyiv ipoql mwwg dvrab pam naatab nam urab haamabv. 18Rongo lo doonbo nyiv mwwg kamtam naatab nammwb wkur maab. 19Hoq ko gvnbo nyem tulu ngvla ko vjwbo nyem tulu gab hentwr jaqb mwwpanam go. 20Nulug hoq kenam ham tapam poolam, ho doonu dvk aalam nyim mvma dvb Pwnboam xumto. 21Hoqgab hoqhvk hentwr go gvda gvtam pwdwk hoqgv nyi tulungam hoqhvk hentwr henam sija godab cengka ma. Ho kokwngam kam hoqhvk nywywngam cengka ram. 22Hvbmabde Pwnbov hoq moodam anyo dvb mvma nyiloqkam hiyvg nyivkam swwram. Hoggab xuqnam nyi tulu gab hoq aalam loodw dvb mvtayin.

23“Ho hiyv akgon nam ‘Kaato, Kristo si doodo hvbmab!’ ‘Vv doodo hvl bejaqkam!’ nulv mwam tvjw maabv. 24Hoggab xaalyo bo kristo ho xaalyo bo nyiqry benbo tulungv lengtayin. Bulv kaama tamanam swrdorxeq nyimanam mam nyil Pwnbog xuqknam nyi tulungam xaalyo lyopaq tayin. 25Tagabto ngo moodiv haama daab nulam bekin pakun.

26“Hvbmabde nyi tulungv nulam mwv nyoro rokam uraho doodwk kaaka to hvjaqkam hoqb wmabv, hvbmab mwv si kvsil doodwk hvjaqkam ham tvjwmab. 27Hoggab Nyia Ko Tuupv haaikam doonyaqngv hoggub dou-caga hoqgv dou-haagab taiyam bioqnam hvbkalam nyitayin.

28“Hogloqho svmangv doodwn hoqho dookpulv jorkum tayin.

Nyia Ko Tuupwg Hookur Kunam

(Mk 13:24-27; Lk 21:25-28)

29“Hoqhvb hentwr hend moodv wxo kalam doonyi kam kan puta yukun ho poolv kam huukram, takarv doonyi ao toloqgv holtayin hoo doa aog atoram likub dvb mvtayin. 30Hoq kokwb Nyia Ko Tuupv haatanam mam kaacin dvb doonyi ao tos nyitayin, ho gvda soq nyob luuxiv nyix-riitayin, Nyia Ko Tuupwg doomwq aolo xitor-xilo gob nyil yuudub ipoqnam mam kaapa tayin. 31Ho mwv gvda gvt tuuly koi alboam miql mwwg ao gumtw mwlwngam taqg-loosaqb kanam tayin, ho mwwg xuqnam tulu mwlwngam gvda gvt tvpw hoqgam bookum tayin.

Taoq Svvnam Doocnam

(Mk 13:28-31; Lk 21:29-33)

32“Taoq svvn doocnam soqgv nulv hog ak cengto. Taoq svvn haqbv vjwl ok jurlin yukam dwr poolv hvvnwql haai kubo hvl nulv cengdwn. 33Hoq hvbkalam soq mwlw nyinam sam kaapa yukam moodv oguml nyidynam aalv nyirab yukbo mwwl cengto. 34Ngo nulam bitwjaqb bedwn, sam mwwgabto, so mwlw si nyima deedib apo soq nyi tulu si siram. 35Swcw nyodongv niitayin hvbmabde Pwnbog agamv nywywngam niiram.

Hiyvkam hoq Aalam hoo Moodam Cengma dvn

(Mk 13:32-37; Lk 17:26-30,34-36)

36“Hoq aalam la hoq mood hvvdam hwdlo haatayin hvl ham hiyvkam cengma dvn, ao gvda tol doonbo ao gumtw ngvkam ho Ko Tuupv kam cengma dvn, hvbmabde Abv aro cingtwqdvn. 37Nyia Ko Tuupwg haanamv Noag moodho hoggub nyinum hoq hvbkalam nyitayin. 38Diidwr issiv haama daadho nyi tulungv dvl-twwl, nyem naal, nyega bool, Noa hulu urab cao namgob nyil doonum. 39Hvbsujaqkam bulam diidwr issiv toal mwlwngam urab nuul wg namgob hog gokam mwwdar lamab doonum. Hoq hvbkalam Nyia Ko Tuupv haaikam nyitayin. 40Hoq moodam nyi vnyi go rongo ho rongo mudul dooikam, akwn ham naal wgtayin, akwn ham apaqpel wleq tayin. 41Nyem vnyi go dux cvngparho dux xudul dootayin, akwn nam bool wleq gvtayin, akwn dootayin.

42“Hoqgab nulv hengab dooto. Hoggab At Sw hwdam haatayin ham nulv cengma do. 43Dvcobov hwdam haatayin ham nam atv cengloqkam huul dootwl dvcobo nyi akv mwwg nammam pakol naamram. 44Hoqgab nulv ham looxiam hengab mwx-mvaql dooto, hoggab Nyia Ko Tuupv haaram bo nulv mwwd mood jaqkam mwv haatayin.

Mwwjwbo la Mwwjw Maanbo Nyera

(Lk 12:41-48)

45“Hvnyiloqkam hiyv mwwjwnam la mwwlaq bob nyidwn? Mwv at akv nyera asaqngam kvvyw-tada mvdwb ho bulam mood jaqkam dvsam jim dvb atv apnam. 46Bir atv nammwb haai kukam soq mwlw sam nyidu dvb kaapanam nyera ak hv jaqmolo paqnam nyerangv. 47Jvqtw jaqb ngo nulam bekin dvn, at akv hoq nyera akam mwwg gumnam mwlwngam rvky mvdwb jitayin. 48Hvbmabde almanbo nyerangv atam betayin ngoqg at sija haakram oyu tayin, 49hvl bel mwwg nyera swwbam asaqkam jwwrab baloqkam ho twwxum dviyaq bo lvgab dvl-twwl nyibaloqkam. 50Hoq nyera akv mwwg at akv haaram mwwl doodu dvk aalam cengmab hookur tayin. 51Bir atv mwam tunyi gob mvtayin ho mwam hang pwnyi bo kaak-takdvb nyinbo nyi tulu lvgab mwam jitayin. Ho mwv xabl mwwg exiam dvxeql dootayin.

Currently Selected:

METIYU 24: NYISBSI

Highlight

Copy