METIYU 18

Hiyv Mwlwngam Koi Yaadwn

(Mk 9:33-37; Lk 9:46-48)

1Hoq agarho buu tulungv Jisug dookub haabnv mwam toxnum, “Ao gvdag Lvpw tolo hiyv mwlwngam koi yaadwn?”

2Ho Jisu himy ko ak goqa banv bulug agahv daqm tvl bulam 3mwv benum, “Ngo jvqtw jaqb bedwn nulv nulug hangam mwwkurl himy tulug hang hvb nyima baloqkam nulv nywywngam ao gvda Lvpwngam kaapa nyoram. 4Ao gvdag Lvpw tolo mwlwngam koi yaady bo akv atam anyo dvb mvsul soq himy ak sib nyinbo ak gab doodwn. 5Hiyv nyiv soq svk himy ko akgon ngoqg emin gab svgagvrwq dvn hoq nyi akv ngam svgagvrwq dvn.

Nyic Nyim dvb Pwqnam

(Mk 9:42-48; Lk 17:1-2)

6“Ho hiyv akgon soq svk anyo akam, ngam mwwjw boam nyic nyidwb jitayin hoq nyi akam lwwpo ho wlw pvqlwqtvl mwam sa-svlo urajaq golo tuulwqnamv mwwg gab altayin. 7Gvda gvt si nyi tulungam bulug mwwjwnam hoqgv duleql geqm dvb jinbov soq svkv nyikil doos tayin, hvbmabde soq sam nyigbo ak gab mwwdwqnamv!

8“Noqg alaqngv hvbmab lvpiangv nam nyic nyim dvb jipa loqkam ham pal hurxa to! Lvpia lwnyi bwbwngam la alaq lvqnyiam baqtwl ui nyookub nywywngam miqmabo wm mvramho nwrba cwtam gob haal doom mam lingsam all alaq akwn baqmakam swwgam kaapal swwnamv alyatayin. 9Noqg vnyiq nyiqgwn nam nyic nyim dvb jipa loqkam ham harlin harpaqto! Hoggab vnyiq nyiqnyi bwbwngam baqtwl ui nyookub nywywngam miqmabo wm mvramho nwrba cwtam gob doom mam lingsam vnyiq cikin gon baqtwl swwgam kaapal swwnamv altayin.

Niikbo Sviyangam Doocnam

(Lk 15:3-7)

10“Mwwgabto, nulv anyobo torab sam hiyv nvkam mwwnyi maabv. Ngo nulam jvqtw jaqb bedwn, ao gvda tolo bulug ao gumtwngv looxiam ao gvda tolo doonbo ngoqg Abwg kaagalo doodwn. 11Nyia Ko Tuupv niinboam ywwtab haadwn.

12“Sviya lwwg daqgbo nyi akwg sviya doorgin nyiiba loqkam hoq nyi ak hv hoggub mwv ham nyidwn ham nulv cens i? Mwv sviya cam kiya leq kiyangam puutu bviywrg ww hwwtaqho apaqpel mwv gaqxarl niikbo sviya dooram meekar ram i? 13Ham mwv kaapa yukam, ngo bedwn, mwv sviya cam kiya leq kiya niimabo gab hemp ponam mam laabo yaab hoq dorkin gab hemp pobin yaadwn. 14Soq sib kalam Ao gvda tolo doonbo nulug Abv nulug pengko lo anyo akgon hiyv nvkam niim dvb mwwma dvn.

15“Noqg bor akv nyic nyipa loqkam no mwwg dookub ogum haal mwwg nyixiaqnam mam mwam kaakin to. Hvbmabde no sam nunyig pengko lo vpwb nyisil nyis-kaasto. Mwv noqg benam mam tabaloqkam noqg boram kaapa pakun. 16Hvbmabde noqg benam mam tama baloqkam dvrwqbo potangv benam hvb vnyi go noqg lvgab ho agam gamxiam nyi vnyi oum mam tvdy mvdwb ho hvvky swwm dvb nyito. 17Hookam mwv bulam tama baloqkam dvrwq namlongam pui bekinto. Hoq kokw jaqb dvrwq namlo benam mam tak mabaloqkam mwam Nyoodo nyi ho nwd xipa maadwb mvtku, gvda nyooga kokarbo ak gob mvto.

Mutumnam la Mvkonam

18“Ngo nulam mwlwngam bekin dvn, nulv hognvkam gvda so mutum tayin ham ao gvda tolokam mutum tayin, ho hog nvkam gvda so nulv mvko tayin ham ao gvda tolo kam mvko jitayin.

19“Ngo nulam akta bekin dvn, gvda so nulug pengko lo vnyi go hang pwkin gob mwwl loomin sul xuml hog ak kobaloqkam, ham ao gvda tolo doonbo ngoqg Abv nulam niqtuq lengdwb nyijtayin. 20Hoggab hogloqho vnyi oum go lvkin gob ngoqg emin gab dookum dvn hoqho ngo bulug lvgab dooba dvn.”

Apaq Jima bo Nyera Akam Doocnam

21Pitor Jisug dookub haanv, “At Sw, ngoqg bor akv ngam nyimur murdul dooba loqkam ngo hog hwdgo mwam hoo lukgo himwl apaq jitayin, kvn go i?”

22Jisu birwqnum, “Kvn gotwq ma, hvbmabde cam kvnleq kvn go. 23Hoggab Ao gvdag Lvpwngv sib nyidwn. Lok Lvpw at ak doonum, mwv mwwg nyera tulug nyinam wnam mam miidil kaaka dvb mwwnum. 24Mwv hvb nyirab dvkho mwwg galoqkv twngk lwwyw wyw go dvgo kunbo nyera ak mwwg ogumho boanum. 25Nyera ak hv mwwg dvgongam hiqn nan dook maab nyiknum. Hoqgab lvpw at akv mwam la mwwg nywxw ko tulungam hoo mwwg nam hoqg hog mwlwngam puqg dukul dvgongam hiqtkuk hvl gaml jilin kunum. 26Nyera akv lwbw kumbw tvl lvpw at agaho xuml benum, Ngam meeg kaaya tvb ngo noqg hog mwlwngam jikur tayin. 27Lvpw at akv mwam aya mwwpanv, mwwg nyera hoqg dvgongam apaq jitkul hoo mwam tooxa jiknum.

28“Hvbmabde kokw so hoq nyi ak hv agab lengnv mwwg nyera ak mwwg galoqkv twngk luum go dvgo bo akam kaapanum. Mwv hoq nyera hoqg dumpo lwwpongam swwgab tvl hiqcuq tanv ngoqg galoqkv noqg dvgongam vnwqb jitkuk hvl mwv benum. 29Mwwg nyera ajin akv lvpia nootul xumknv mwam benum, ngam meeg kaaya tvb, ngo nam mwlwngam jikur taikun. 30Hvbmabde mwv ham tamanum, mwam pvtwq uraho mwwg dvgongam pwma deedib tuml apkunum. 31Soq nyinam sam nyera asaq tulungv kaapanum, hoo lvpw at dookub wbnv hog mwlw luuxiam bekinnum. 32Ho mwv nyera ak ham urab goqanum hoo mwv benum, ‘Niqtuq doomabo nyera!’ ‘Ngo noqg dvgongam pw-hwwma, no mvnyi-moiyul betwl apaq jitkun. 33Ngo nam aya mwwpa namhvb no kam noqg nyera ajinam aya mwwpa kinum.’ 34Lvpw at akv hang lingtwr kunv nyera akam pvtwqhv dvgo mwlwngam jikur maad deedib laqm-baqm dvb pvtwqb kanam kunum.”

35Kokw so Jisu bitwr-benyaho benum, “Hoq hvbkalam nulug boram nulug hang ura hoqgv apaq jima baloqkam ao gvda tolo doonbo ngoqg Abv kam nulam vxiam hvbkalam nyitayin.”

Currently Selected:

METIYU 18: NYISBSI

Highlight

Copy