METIYU 19

Nyem mam Apaqnam

(Mk 10:1-12)

1Jisu soq tulu sam bexo kokw so mwv Galili gvdangam apaqpel Jordon pobu ked gonwb Juhudi gvdab wnum. 2Nyi nyicam camtjaqgo mwam wmin gvnum, mwv bulam mwpnum.

3Parisi ata go mwwg dookub haabnv mwam pookal tamnum, “Ngulug Pvvbv nyegangam twq mwwg mwwlwqkob nywxwngam apaqdvb gamlv doos i?”

4Jisu birwqnum, “Nulv Dvrwqbo potalo kol otuqjaqho Pwnbo akv nyi tulungam nyem gola nyegab pwnum hvl xeqpwl apnam mam kaapa ma i? 5Hoqgab Pwnbov benum, ‘Soq pagoq gab nyiv mwwg atwg ab annam apaqpel mwwg nywxw lvgab lokub dooba tayin, ho vnyi si akin gob nyitayin.’ 6Hoqgab bulv sija vnyi maadkun hvbmabde akin gob nyidkun. Pwnbov akin gob mvknam mam nyiv mvpin mvra dvb nyiram.”

7Parisi tulungv mwam toxnum, “Hvnyiloqkam Mojes hoggub nyegangam mwwg nywxwngam apaq kunam pota jitwl wwm tukuk hvl pvvb sam jipan?” 8Jisu birwqnum, “Mojes ngulam nywxwngam apaq mvdwb gaml jinam si hvbaloqkam nulam tomswr lama ko-gab, hvbmabde bvl pwdwkho hoqhvb nyimanum. 9Hoqgab ngo nulam bekin dvn, yocu-yabio nyima mvtwl, hiyv mwwg nywxwngam apaqdvn, hoo nyem asaq ak naadwn, mwv bwwxin bob nyidkun.”

10Mwwg buu tulungv mwam benum, “Soq sib nywxw-nyol pengko ho nyim mam lingsam nywxw-nyol booma kam apaqnamv alya, nyem naamanamv alya.”

11Jisu birwqnum, “Mwlwngv soq sam nyila maadwn, hvbmabde Pwnbov lvqcnam nyi tulungv aro sam nyiladvn. 12Hoggab nyi tuugin nyem naamanam hv pagoq asaq asaqkv doodwn. Nyi tuugin bulam annwg kepo hoqgv dwr buqtaqnam gab nyidwn, ho nyi tuugin nyiv hvb mvnam gab nyidwn, ho nyi tuugin Ao gvda Lvpw gab nyem naama dvn. hiyv nyiv soq tomswrnam sam tal nyib mwwdwn mwam sam nyimto.”

Jisu Himy Tulungam Lvqcnam

(Mk 10:13-16; Lk 18:15-17)

13Nyi tulungv himy ko tulungam Jisug dookub boal mwam bulug aoho alaq idaql bul gab xumdvb haagnum, hvbmabde buu tulungv nyi tulungam yolu ruqnum. 14Jisu benum, “Himy ko tulungam ngoqg dookub haamto, bulam bitur maabv, hoggab Pwnbog Lvpwngv bulug hvb nyinbo nyi tulu gab doodwn.”

15Mwv bulug aoho alaqngv idaq peekul hoqgv wleq kunum.

Nyetbo Yaapa Nyi

(Mk 10:17-31; Lk 18:18-30)

16Lok nyi ak Jisug dookub haal mwv toxnum, “Tomswrbo, ngo nwrba cwtam swwgam kaapa dvb hognvk albo bonam nyidwb nyitayin?”

17Jisu birwqnum, “No ngam hoggab albo pagoqkam toxdvn? Albo akin gotwq doodwn, nwrba cwtam swwgam kaapa dvb no mwwd nyiloqkam gaml tulu sam bugil swwto.”

18Mwv toxnum, “Hognvk gamlam?”

Jisu birwqnum, “Nyi mengmabv, nywxw-nyol bwwxin maabv, dvco comabv xaalyob hvvky swwmabv, 19noqg ab annam xito, ho noqg door-doopwngam no atam aby sunam hvb bulam aby boto.”

20“Ngo soq mwlw gaml sam bugil tal swwpa kun, hvl yaapa akv birwqnum, soq aoso ngoqg hognvkv nyis-nyipw maanamv doodwn?”

21Jisu mwam benum, “No niqtuq nyilin dvb mwwd nyiloqkam wg dukul noqg doognam hog mwlwngam puqta ho jwwgw homabo nyi tulungam jipaqta, ho ngoqg kokwb wmin gvto.”

22Kokw so yaapa nyi akv tatwl hangv mwwdwq kunv wleq kunum, hoggab mwv vigo nyetbo nyiib nyinum. 23Jisu mwwg buu tulungam benum, “Ngo bitwjaqb nulam bekin dvn, Ao gvda Lvpw lo nyetbov haanyiram. 24Ngo lokta betin dvn, nyet nyiv Pwnbog Lvpwb haanamv peqs silo ukob svjin ngwcoqnamv nyingam yaatayin.”

25Buu tulungv sam tatwl swrjaqb mwwl lomnum, ho toxnum, “Hvb nyiloqkam hiyv ywwt ywwnam sam kaapa nyotayin?”

26Jisu bulam rogab lalal kaabnv benum, “Soq si nyia ko gab nyila maanamv, hvbmabde Pwnbog gab soq si nyipw maanamv.”

27Ho Pitor birwqnum, “Kaato, ngulv hog mwlwngam apaqpel noqg kokwb wmin gvikun ngulv hognvkam kaapa tayin?”

28Jisu bulam benum, “Ngo nulam jvqtw jaqb bedwn, Nyia Ko Tuupv mwwg yuunam Dootam pwqlw Nitbo Gvdaho dooikam nulv ngoqg kokwb wmin gvnbo wyw leq vnyiv nulv Israel nyob wyw leq vnyiam pw-hwwdwb dootam ho dootayin. 29Hoo hiyv ngoqg pagoq gab nammam, vbw-bor tulungam, any-bwrm tulungam, ab-annam, nywxw-koam hoo noosu rongongam apaqpel wmin gvnbo nyi tulu ham laabo yaab lwwyw go kaapa tayin hoo bulam nwrba cwtam swwgam jitayin. 30Hvbmabde nulug pengko lo vigo otuqb wnbov kokwb wtayin, hoo kokwb nyinbo otuqb nyitayin.

Currently Selected:

METIYU 19: NYISBSI

Highlight

Copy