METIYU 17

Jisug Swlynam

(Mk 9:2-13; Lk 9:28-36)

1Aal looxwg kokw so Jisu mwwg lvgab Pitor, Jems hoo mwwg bor Jonnvn puutu ao golo bulam vpwb boobwql boocal caagnum. 2Bulv Jisun kaagabl doodu dukho mwwg nyuqmv doonyi huunam hvbjaq huunum hoo mwwg vj koonamv kwlwq-kvlaqb puulu rusub huurabnum. 3Hoq kokwb Jisug buu oumv Mojes la Ilijanvn Jisug lvgab goorwq dvb kaapanum. 4Hoqgab Pitor Jisun agam goobnv benum, “At Sw, ngulug so doonam si aljaq pa! No mwwlwq dvnyiloqkam, ngo tombu lo oum go mvtayin, akwn noqg gab, akwn Mojes gab ho akwn Ilija gab.”

5Mwv goodul doodu dukho huuda kvlabo doomwq ak bulam pulubnum, ho hoq doomwq ura hoqgv agam yal ak dulinv benum, “Soq ak si ngoqg tumanam Ko Tuupv, mwwg lvgab ngoqg hangv xumtw-twiya dvn mwwg benam mam tagabto!”

6Kokw so buu tulungv soq agam yal sam tapa tvl boswl loma lomtwram lomnum, hoqgab kedib nyuqm mam pvxwtvl doonum. 7Jisu bulug dookub haal bulam idaql mwv benum. “Gorab tuku. Bos maabv!” 8Kokw so nywrab bulv kaanamv Jisun aron kaapanum hvbmabde hiyv nvkam kaapa maanum.

9Bulv puutu hoqgv ipoq dukho Jisu bulam gaml jil benum, “Nulv hiyv nvkam nulug soq nyiqry kaanam sam Nyia Ko Tuupam sinam hoqgv swwgwb purab maad deedib bekin maabwk hvnum.”

10Kokw so buu tulungv Jisun toxnum, “Hoggab Pvvb tomswrbo tulungv Ilija otuqb haaco tainvk hvl bedwn?”

11Jisu birwqnum, “Ilija jvqtw jaqb haaco tayin, ho mwv haacol hog mwlwngam mwx-mvaql aptayin. 12Hvbmabde ngo nulam bekin dvn Ilija oyu maadab haapa kun hvbsujaqkam nyi tulungv mwam kaacin maanum, hvbmabde mwam bulug hang mwwlwqkob hang xumdwb mvnum. Hoqhvb kalam Nyia Ko Tuupam mvnyi-mviyal mvtayin.”

13Ho buu tulungv Jon Baptistg pagoqkam bulam mwv benam gob tacinum.

Sony Cenam Himy Ak Jisu Mwpnam

(Mk 9:14-29; Lk 9:37-43)

14Kokw so nyi tulug pvtw pengko ho hookur dwkho nyi ak Jisug dookub haabnv mwwg agahv lvpia kumbwl 15hoo benum, “Tomswrbo, ngoqg ko tuup sam aya mwwpa tvb! Mwv svmeqdo ho hentwr jaqb vc do hoggab mwv lokam wm urahv ho iss uraho haadwn. 16Ngo mwam noqg buu tulug dook bvkam baqanum hvbmabde mwam mwp nyomanum.”

17Jisu birwqnum, “Mwwjw maanbo ho almanbo nyi tulu! Ngo hog hwdgo nulug lvgab dootayin? Hog hwdgo ngo nulug lvgab dooba dvb nyitayin? Nyega ko akam soq ngoqg dookub baqato!” 18Jisu sonyiam yolu ruqxy kalam, sonyiv nyega ko hoqgv lengknum ho nyega ko akv al kunum.

19Kokw so buu tulungv Jisug dookub haal mwam toxnum, “Ngulv hog nyitwl sonyiam ruqxa nyomanum?”

20Jisu birwqnum, “Soq si nulug mwwjwngv koi maagam gab nyinum. Ngo nulam jvqtw jaqb bedwn, nulug mwwjwngv ywwm aaxy hwdgo doonyiloqkam, nulv soq puutu sam ‘Soqgv alo wn!’ hvl bebaloqkam soq puutu si wtayin. Nulv hog nyinyi maanam dooram!” 21Hvbmabde dvmab vrrw rwl xumnamv sam ruqlin tayin.

Jisu Mwwg Sinam Pagoqkam Bekinam

(Mk 9:30-32; Lk 9:43-45)

22Kokw so buu tulu mwlwngv olum gob Galiliho hookum dukho Jisu bulam benum, “Nyia Ko Tuupam nyi tulug alaqho gvqlwq tagdo, 23“hoo bulv mwam meng tayin hvbmabde aal loum kokwngam swwgwb turab mvtayin.”

Buu tulungv ham tatwl vcjaqb mwwdwqnum.

Xumk Nam gab Nyooga Jinam

24Kokw so Jisu la mwwg buu tulungv Kaparnahum haadwk ho xumk nam gab nyooga konbo tulungv Pitor dookub haal toxnum, “Nulam tomswrbo akv xumk nam gab nyooga jis i?”

25Pitor birwqnum, “Vv, jidwn.”

Kokw so Pitor nam urab haada kalam, Jisu otuqjaqb toxnum, “Simon, no hoggub mwwdwn? Soq gvda gvt soq lvpw at tulungam hiyv nyooga jidwn? Gvt at nyiv jid nvi yv ma hvbmabde nyoodo nyiv jidwn?”

26Pitor birwqnum, “Nyoodo nyi tulu galoqkv.” “Hv alpa, Jisu birwqnum, “Hvnyiloqkam gvt atv atwg gvda lo nyooga jidwb nyima dvn yv? 27Hvbmabde ngulv soq nyi tulu sam nyimur nwma. Hoqgab swnyiqb wgdvl vkar paqta, ho vkar gamconam ngui ciram agam kuqkoql kaab nyiloqkam no tayin taqg kaapa tayin, ham bvvlayil noqg gab xumk namho nyooga jita. Ham bvvlayil ngulug nyoogangam jita.”

Currently Selected:

METIYU 17: NYISBSI

Highlight

Copy