Yohane 14

Yesu ji blɔ nɛ a kɛ yaa Tsɛ ɔ ngɔ

1“Nyɛ ko ye nyɛ tsui; nyɛ he Mawu nɔ nyɛɛ ye, nɛ imi hu nyɛ he ye nɔ nyɛɛ ye. 2Sihi hehi fuu ngɛ Tsaatsɛ we ɔ; ke pi ja jinɛ, i de nyɛ momo; ejakaa i yaa nɛ ma ya dla blɔ he ngɔ to nyɛ. 3Nɛ ke i ya nɛ i ya dla blɔ he ngɔ to nyɛ ɔ, ma ba ekohu nɛ ma ba ngɔ nyɛ kɛ ya he nɛ imi nitsɛ i ngɛ ɔ, konɛ he nɛ i ngɛ ɔ, nyɛ hu nyɛɛ hi lejɛ ɔ. 4Nɛ he nɛ i yaa a, nyɛ le, nɛ blɔ ɔ hu, nyɛ le.” 5Toma de lɛ ke: “Mawetsɛ, wa li he nɛ o yaa, nɛ kɛ wa maa pee kɛɛ nɛ wa maa le blɔ ɔ?” 6Yesu de lɛ ke: “Ami ji blɔ ɔ kɛ anɔkuale ɔ kɛ wami ɔ; nɔ ko bɛ́ Tsɛ ɔ ngɔ, kaa ja e gu ye nɔ. 7Kaa nyɛ le mi jinɛ, nyɛ ko le Tsaatsɛ hulɔ; nɛ kɛ je mwɔnɛ kɛ yaa nɛ ɔ, nyɛ le lɛ, ejakaa nyɛ na lɛ.”

8Filipo de lɛ ke: “Nyɔmtsɛ, tsɔɔ wɔ Tsɛ ɔ, nɛ lɔ ɔ hiɛ ha wɔ.” 9Yesu de lɛ ke: “Pi mwɔnɛ nɛ i kɛ nyɛ ngɛ nɛ ɔ, o li mi lolo lo, Filipo? Nɔ nɛ na mi ɔ, e na Tsɛ ɔ, nɛ kɛ pee kɛɛ nɛ o deɔ ke: ‘Tsɔɔ wɔ Tsɛ ɔ?’ 10Anɛ o he we yi kaa i ngɛ Tsɛ ɔ mi nɛ Tsɛ ɔ hu ngɛ ye mi lo? Munyu nɛ i kɛ nyɛ tuɔ, pi imi nitsɛ ye yi mi nɛ i toɔ nɛ i deɔ; se Tsɛ ɔ nɛ hii ye mi ɔ, lɛ lɛ e tsuɔ ni tsumi ɔmɛ ɔ nɛ. 11Nyɛ he mi nyɛɛ ye kaa i ngɛ Tsɛ ɔ mi nɛ Tsɛ ɔ hu ngɛ ye mi; se ke pi ja a, nyɛ he mi nyɛɛ ye ngɛ jamɛ a ni tsumi ɔmɛ nitsɛmɛ a he. 12Anɔkuale mi, i ngɛ nyɛ dee ke: Nɔ nɛ heɔ ye nɔ yeɔ ɔ, ni tsumihi nɛ i tsuɔ ɔ, lɛ hu e ma tsu, nɛ e ma tsu nihi nɛ pe kɔlɔ ɔmɛ tete, ejakaa i yaa Tsɛ ɔ ngɔ. 13Nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, lɔ ɔ ma pee, konɛ Tsɛ ɔ hɛ mi nɛ ba nyami ngɛ Bi ɔ mi. 14Ke nyɛ kpa nɔ ko he pɛɛ ngɛ ye biɛ mi ɔ, ma pee.”

Mumi Klɔuklɔu ɔ he siwomi

15“Ke nyɛ suɔ mi ɔ, nyɛ maa ye ye kita amɛ a nɔ. 16Nɛ imi lɛɛ ma bi Tsɛ ɔ, nɛ e ma ha nyɛ Hepiɛlɔ kpa, konɛ e kɛ nyɛ nɛ hi si kɛ ya neneene; 17anɔkuale mumi ɔ nɛ je ɔ nyɛ we lɛ nɛ e ngɔ ɔ, mɛni he je ɔ, e nɛ́ lɛ, nɛ pohu e li lɛ; se nyɛɛ lɛɛ nyɛ le lɛ, ejakaa e kɛ nyɛ lɛ ngɛ, nɛ e maa hi nyɛ mi.

18“I be nyɛ sie ahusa, i ma nyɛ ngɔ. 19E piɛ bɔɔ kɛkɛ nɛ je ɔ be mi nae hu; se nyɛ lɛɛ nyɛɛ ngɛ mi nae, ejakaa ye hɛ ngɛ, nɛ nyɛ hu nyɛ hɛ maa hi ngmengmle. 20Jamɛ a ligbi ɔ nɔ ɔ, nyɛ nitsɛmɛ nyɛ maa le kaa i ngɛ ye tsɛ mi nɛ nyɛ hu nyɛ ngɛ ye mi nɛ imi hu i ngɛ nyɛ mi.

21“Nɔ nɛ ngɔɔ ye kita amɛ nɛ e yeɔ nɔ ɔ, lɛ ji nɔ nɛ suɔ mi; nɛ nɔ nɛ suɔ mi ɔ, Tsaatsɛ maa suɔ lɛ, nɛ imi hu ma suɔ lɛ, nɛ ma je ye he si ngɔ tsɔɔ lɛ.” 22Yuda, pi Iskariot ɔ, bi lɛ ke “Nyɔmtsɛ, mɛni ba he je nɛ wɔ kɛkɛ o ma je o he si ngɔ tsɔɔ nɛ o be jee ngɔ tsɔɔ je ɔ?” 23Yesu he nɔ nɛ e de lɛ ke: “Ke nɔ ko suɔ mi ɔ, e maa ye ye munyu ɔ nɔ, nɛ Tsaatsɛ maa suɔ lɛ, nɛ wa maa ba e ngɔ, nɛ waa kɛ e ngɔ maa pee wa sihi he. 24Nɔ nɛ sume mi ɔ, e yi ye munyu nɔ. Nɛ munyu nɛ nyɛ ngɛ nue ɔ, pi ye nɔ, se mohu Tsɛ nɛ tsɔ mi ɔ nɔ ʼi.

25“I de nyɛ ni nɛ ɔmɛ be mi nɛ i kɛ nyɛ ngɛ nɛ ɔ. 26Se Hepiɛlɔ ɔ nɛ ji Mumi Klɔuklɔu ɔ, nɔ nɛ Tsɛ ɔ maa tsɔ ngɛ ye biɛ mi ɔ, lɛ e maa tsɔɔ nyɛ nihi kulaa, nɛ e ma kai nyɛ nihi tsuo nɛ i de nyɛ ɔ.

27“Hejɔmi i ngɛ sie ha nyɛ; hejɔmi nɛ ji ye nɔ ɔ i kɛ ngɛ nyɛ hae, pi bɔ nɛ je ɔ haa a nɛ i kɛ ngɛ nyɛ hae nɛ ɔ. Nyɛ ko ye nyɛ tsui, nɛ jeha nɛ ɔ hu nyɛ ko ye gbeye. 28Nyɛ nu kaa i de nyɛ ke: ‘I yaa, nɛ ma ba nyɛ ngɔ.’ Nyɛ suɔ mi jinɛ nyɛ ma na bua jɔmi kaa i yaa Tsɛ ɔ ngɔ, ejakaa Tsaatsɛ kle pe mi. 29Nɛ jeha nɛ ɔ, i de nyɛ loko e ba mi, konɛ ke e ba mi ɔ, nɛ nyɛ he nyɛɛ ye. 30I kɛ nyɛ be munyu tue fuu hu, ejakaa je ɔ mi matsɛ ɔ ma, se e be he wami ko nyɛ nyɛ nɔ. 31I peɔ bɔ nɛ Tsɛ ɔ fa mi ɔ konɛ je ɔ nɛ na le kaa i suɔ Tsɛ ɔ. Nyɛɛ te si, nyɛɛ ba waa je hiɛ ɔ!”

Currently Selected:

Yohane 14: DAN77

Highlight

Copy