Yohane 13

Yesu fɔ e kaseli ɔmɛ a nane he

1Loko Hetsɔmi nyami ligbi ɔ maa su ɔ, akɛnɛ Yesu le kaa e ngmlɛfia nɛ e kɛ maa je je ɔ mi kɛ ya Tsɛ ɔ ngɔ ɔ su he je ɔ, bɔ nɛ e suɔ e nihi nɛ ngɛ je nɔ mi ɔ, ja e suɔ mɛ kɛ pi si.

2Nɛ benɛ a ngɛ ni yee ɔ, blɔɔ abosiami ngɔ wo Yuda Iskariot, Simon bi ɔ, tsui mi momo kaa e tsɔɔ Yesu se blɔ. 3Nɛ Yesu le kaa Tsɛ ɔ tu nihi tsuo kulaa ngɔ wo e dɛ, nɛ kaa Mawu ngɔ e je nɛ e kpale yaa Mawu ngɔ ɔ, 4e te si ngɛ niyeni ɔ si, nɛ e je e tade ɔmɛ ngɔ pue si, nɛ e ngɔ papahu ngɔ muɔ e mlɛ mi. 5Lɔ ɔ se ɔ, e plɛ nyu ngɔ wo tsɛsi mi, nɛ e bɔni e kaseli ɔmɛ a nane he fɔmi, nɛ e kɛ papahu nɛ muɔ e mlɛ mi ɔ tsu. 6Kɛkɛ nɛ e ba su Simon Petro nɔ, nɛ lɛɛ e de lɛ ke: “Nyɔmtsɛ, mo lɛ o ngɛ ye nane he fɔe nɛ ɔ?” 7Yesu he nɔ nɛ e de lɛ ke: “Nɔ́ nɛ i ngɛ pee nɛ ɔ ɔ, amlɔ nɛ ɔ o li, se ke pee se ɔ o maa le.” 8Petro de lɛ ke: “Ko fɔ ye nane he kɔkɔɔkɔ.” Yesu he nɔ ke: “Ke i fɔ we o he ɔ, o be blɔfami nɔ́ ko ngɛ ye ngɔ.” 9Simon Petro de lɛ ke: “Nyɔmtsɛ, lɛɛ pi ye nane he kɛkɛ, se mohu ye nine kɛ ye yi mi hulɔ.” 10Yesu de lɛ ke: “Nɔ nɛ a du e he ɔ, e hia we lɛ he fɔmi, ja e nane he kɛkɛ, se e he je kɛ pi si. Nyɛɛ lɛɛ nyɛ he je mohu, se pi nyɛ tsuo.” 11Ejakaa e le nɔ nɛ maa tsɔɔ e se blɔ ɔ; lɔ ɔ he nɛ e de ke: ‘Tsa pi nyɛ tsuo nɛ nyɛ he je’ ɔ.

12Jeha nɛ ɔ, benɛ e fɔ a nane ɔmɛ a he nɛ e kukuɔ e tade ɔmɛ nɛ e ya hi si ekohu ɔ, e ke: “Nyɛ le nɔ́ nɛ i pee ha nyɛ nɛ ɔ lo? 13Nyɛɛ lɛɛ nyɛ tsɛɛ mi tsɔɔlɔ kɛ Nyɔmtsɛ, na nyɛ tɔ we, ejakaa ja ji mi. 14Jeha nɛ ɔ, ke imi tsɔɔlɔ kɛ Nyɔmtsɛ ɔ, i fɔ nyɛ nane he ɔ, e sa kaa nyɛ hu nyɛ fɔɔ nyɛ sibi a nane he. 15Se okadi i to nyɛ, konɛ bɔ nɛ i pee ha nyɛ nɛ ɔ, nyɛ hu nyɛɛ pee ja. 16I ngɛ nyɛ dee anɔkuale mi ke: Nyɔguɛ pa we e nyɔmtsɛ, nɛ jeha nɛ ɔ hu tsɔlɔ pa we nɔ nɛ tsɔ lɛ ɔ. 17Ke nyɛ le ni nɛ ɔmɛ ɔ, a gbaa nyɛ ke nyɛ ye nɔ.

18“Pi nyɛ tsuo nyɛ he munyu nɛ i ngɛ tue ɔ; imi lɛɛ i le nihi nɛ i hla; se mohu benɛ pee nɛ nɔ́ nɛ a ngma a nɛ ba mi ke: Nɔ nɛ yeɔ ye dɛ mi abolo ɔ, e wo e nane seja nɔ ngɔ si mi. 19Jeha nɛ ɔ i ngɛ nyɛ dee ngɔ to loko e ba mi, konɛ ke e ba mi ɔ nɛ nyɛɛ le kaa ami ʼi. 20I ngɛ nyɛ dee anɔkuale mi ke: Nɔ nɛ heɔ nɔ nɛ i tsɔ ɔ, imi nɔuu e heɔ ɔ nɛ. Nɛ nɔ nɛ heɔ mi ɔ, e heɔ nɔ nɛ tsɔ mi ɔ hulɔ.”

Yesu gba e seblɔtsɔɔmi ngɔ to

(Mateo 26.20-25; Marko 14.17-21; Luka 22.21-23)

21Benɛ e de ni nɛ ɔmɛ ɔ, e hao ngɛ mumi mi, nɛ e gba mi kpoo nɛ e de ke: “I ngɛ nyɛ dee anɔkuale mi ke: Nyɛ ti nɔ kake maa tsɔɔ ye se blɔ.” 22Kɛkɛ nɛ e kaseli ɔmɛ hyɛ a sibi a hɛ mi, se a nɛ nɔ tutuutu he munyu nɛ e ngɛ tue ɔ. 23Se kaseli ɔmɛ a ti nɔ kake nɛ Yesu suɔ ɔ kpasa e gugue. 24Lɔ ɔ he ɔ Simon Petro ma lɛ hɛ̃ ke e bi lɛ nɔ he munyu nɛ e ngɛ tue ɔ. 25Se lɛɛ e be nɔ Yesu gugue mi nɛ e bi lɛ ke: “Mawetsɛ, mɛnɔ ʼi? 26Yesu be nɔ nɛ e de lɛ ke: “Lɛ ji nɔ nɛ i kɛ nyamiwo bɔ ɔ maa sɔ mi ngɔ ha a nɛ.” Nɛ e kɛ nyamiwo bɔ ɔ sɔ mi nɛ e ngɔ ha Yuda Iskariot, Simon bi ɔ. 27Nɛ nyamiwo bɔ ɔ se pɛ nɛ Satan sɛ e mi. Jeha nɛ ɔ Yesu de lɛ ke: “Nɔ́ nɛ o ngɛ pee ɔ, pee nɛ e sɔ!” 28Se nihi nɛ hii si ngɛ okplɔɔ ɔ he ɔ a ti nɔ ko nɔ ko li nɔ́ he je nɛ e de lɛ ja a. 29A ti ni komɛ susu kaa, akɛnɛ Yuda lɛ toɔ sika kpɛɛ ɔ he nɛ Yesu de lɛ ke: “Ya he nihi nɛ he hia wɔ ngɔ to nyami ligbi ɔ,” aloo kaa e ngɔ nɔ ko ngɔ ha ohiafohi. 30Kɛkɛ nɛ benɛ e he nyamiwo bɔ ɔ nɔuu ɔ, e je kpo. Se je jɔ.

Kita he ɔ

31Benɛ Yuda je kpo se ɔ, Yesu ke: “Jeha nɛ ɔ a wo Nɔmlɔ Bi ɔ hɛ mi nyami, nɛ a wo Mawu hɛ mi nyami ngɛ e mi. 32Ke a wo Mawu hɛ mi nyami ngɛ e mi ɔ, Mawu hu maa wo e hɛ mi nyami ngɛ lɛ nitsɛ e mi, nɛ e maa wo e hɛ mi nyami oya. 33Bimɛ tsɔwi, be bɔɔ kɛkɛ e piɛ nɛ i kɛ nyɛ maa hi si; nyɛ ma hla mi, nɛ bɔ nɛ i de Yudafo ɔmɛ ke: ‘He nɛ i yaa a, nyɛɛ lɛɛ nyɛ be lejɛ ɔ nyɛe maa bɛ’ a, jã i ngɛ nyɛ hu dee jeha nɛ ɔ nɛ. 34Kita he i ngɛ nyɛ woe, kaa nyɛɛ suɔ nyɛ he. Kaa bɔ nɛ i suɔ nyɛ ɔ, jã nyɛ hu nyɛɛ suɔ nyɛ he. 35Ke nyɛ suɔ nyɛ he ɔ, lɔ ɔ nihi tsuo kɛ maa le kaa ye kaseli ji nyɛ.”

Yesu gba Petro kuami

(Mateo 26.31-35; Marko 14.27-31; Luka 22.31-34)

36Simon Petro bi lɛ ke: “Nyɔmtsɛ, jije o yaa?” Yesu he nɔ ke: “He nɛ i yaa a, o be nyɛe ye se maa nyɛɛ amlɔ nɛ ɔ, se o maa nyɛɛ ye se hwɔɔ se ko.” 37Petro de lɛ ke: “Mawetsɛ, mɛni he je i be o se nyɛe ma nyɛɛ amlɔ nɛ ɔ ɔ? Ye wami tete ma ngɔ fɔ si ngɛ o he.” 38Yesu he nɔ ke: “O maa ngɔ o wami ngɔ fɔ si ngɛ ye he lo? I ngɛ mo dee anɔkuale mi ke: Kungwɔ be nɔ kpae nɛ o ma kpa ngɛ ye se si etɛ.”

Currently Selected:

Yohane 13: DAN77

Highlight

Copy