SAN MARCOS 6

Jesús apha Nazaret

(Mt 13.53-58; Lc 4.16-30)

1Apxegkek axta Jesús apmeyákxo apchókxa apkenyekto mók nekha. Apkeltámeséyak axta apkelxegexma'a. 2Xama axta ekwokmo ekhem apkellókasamakxa axta apkelyampé énxet'ák judíos, apkelxekmósek axta Jesús énxet'ák kañe' apchakneykekxexa judíos. Aptahak axta apkelpakmeta énxet apxámokma ekpelakkasa apkelwet'a s'e:

—¿Háxko eltámegweykenxa ekyókxoho apya'áseyak xa énxet nak? ¿Háxko kexaha eñamakxa xa apya'áseyak nak, tén han xa apmopwána nak elának aksok sempelakkaso nak agweta'? 3¿Háweya yántéseksek apkelanél'a xa, María étchel'a, Santiago apepmal'a, tén han ma'a José, Judas, tén han ma'a Simón? ¿Enxoho anhan kaxneykha apkelyáxeg so negyeseksa nak negko'o?

Axta keñamak megkólhaxno apkeltenneykha Jesús xa.

4Wánxa agkok, aptahak axta Jesús apkeláneya s'e:

—Ekyókxoho yókxexma cha'a kóltehek kéláyo m'a énxet Dios appeywa aplegaso nak, keñe méko katnehek eyáyo m'a apchókxa,#Jn 4.44. cham'a nepyeseksa apnámokkok nak, tén han ma'a ekheykha nak apxagkok.

5Mopwanchek axta apkelana Jesús aksok sempelakkaso agweta' ma'a, wánxa axta aksa apkeltakmelchesekmo apkántawók apkelháxamap ma'a ektaha axta appaknegweykmoho. 6Apkenatchesek axta apwet'a Jesús metnaha melya'áseyam xa énxet'ák nak.

Jesús apkeláphaso apkeltámeséyak yakwayam eltennaha m'a aptémakxa nak Wese' apwányam Dios

(Mt 10.5-15; Lc 9.1-6)

Apweynchámeyha axta Jesús nátegma eyágketexa apkelxekmósama cha'a énxet'ák. 7Apkelwóneyha axta Jesús doce apkeltámeséyak, apkánet axta cha'a apkeláphásak, apkelmések axta apkelmopwancha'a elántekkesek espíritu elmasagcha'a. 8Apmések axta appeywa meltamhok elsók xama aksok ámay neyseksa apkelxega, aptaskapeykha axta aksa cha'a apkeltamhok elsók. Axta eltamhok elsók aksok apxata, tén han ma'a pan, tén han ma'a selyakye.#Lc 10.4-11. 9Wánxa axta aksa apkeltamho elatchásekxak ma'a apkeltéto apmagkok nak, keñe meltamho eswok apkelnakta yakwayam eyakmagkasek pók. 10Aptahak axta apkeláneya s'e:

—Kélántaxnegwokmek sat agkok kéxegke xama tegma, kólhamho sat ma'a ekwokmoho kélxegákxo makham mók nekha. 11Agkok kólmaxchek takha' mók yókxexma kélwánxa enxoho, mopmenyék agkok nahan yeyxhok kéltenneykha énxet, kólántep sat ma'a, kólpalches sat kélmagkok xóp ánek, yakwayam enxoho metnatchesek peya ellegásesagkohok Dios xa énxet'ák nak.#Hch 13.51.

12Apkelxegkek axta Jesús apkeltámeséyak natámen xa, yakwayam enxoho yának etnekxak melya'áseyam Dios énxet'ák. 13Xámok axta anhan apkelántekkeso kelyekhama' énxet apwáxok, apxámok axta anhan apkeltakmelcheseyam énxet apkelháxamap yetlo apkeltexnéyak pexmok.#Stg 5.14.

Juan el Bautista apmatña

(Mt 14.1-12; Lc 9.7-9)

14Apleg'ak axta amya'a wese' Herodes apxénákpo Jesús, hakte payhekxeyk axta amya'a apxénamap Jesús ekyókxoho yókxexma. Aptahak axta Herodes se'e:

—Juan el Bautista apxátekhágwokmok, la'a apkepwagko nak apkelana aksok sempelakkaso nak agweta'.

15Keñe axta pók énxet aptaha apxéna s'e:

—Elías ma'a, aptaha axta Dios appeywa aplegaso.

Keñe axta nápakha énxet'ák aptaha cha'a apxéna s'e:

—Xama Dios appeywa aplegaso, cha'a aphawo m'a nano' Dios appeywa apkellegaso axta.#Mt 16.14; Mr 8.28; Lc 9.19.

16Xama axta apleg'a Herodes ektaha amya'a xa, aptahak axta s'e:

—Juan neykhe m'a. Eltamhok axta ko'o kólyakténchesek apyespok, apxátekhágwokmek eyke kaxwo'.

17Herodías axta keñamak apkeltamho Herodes emakpok Juan, apkeltamhok axta kóltétek cadenas kañe' sẽlpextétamakxa. Felipe axta aptáwa Herodías, aptaha axta Herodes apyáxeg, keñe axta Herodes aptamheykekxo aptáwa xa kelán'a nak. 18Aptemegkek axta Juan apkenagkama Herodes se'e: “Megkapayhawok etnehek xép aptáwa apyáxeg aptáwa.”#Lc 3.19-20.

19Ekeso eñamakxa ektaknagkama axta Herodías ma'a Juan, máheyok axta eykhe kakhek, yawanchek axta eyke. 20Apcháyak axta wese' Herodes ma'a Juan, hakte apya'ásegkok axta aptaha énxet appéwomo, tén han aptaha appagkanamap, apmasmeyk axta anhan cha'a Herodes. Atsek axta cha'a yeyxhok Herodes Juan apkeltenneykha, apleg'ak axta agkok cha'a, mey'asagkek axta cha'a ektahakxa elchetamso apwáxok. 21Wokmek axta ekhem yakwánxa kalyentamaxkohok Herodías, cham'a apkelánesa axta ektámáxche ekwányam apkelámha apmonye'e apagkok Herodes, tén han ma'a sẽlpextétamo kelwese'e nak, tén han ma'a kelwese'e apkeleñama nak Galilea, cham'a ekwokmo axta ekhem apteyékemxa Herodes. 22Taxnegwokmek axta Herodías étche m'a neyseksa ektámáxche nento, keltayha axta ekneywencha'a m'a, leyawok agko' axta apwáxok Herodes ektahakxa eknéweykha Herodías étche, leyawok axta anhan apwáxók énxet'ák aptóko axta xamo' aptéyak Herodes. Ekeso eñamakxa aptaha axta apcháneya kelán'a étkok wese' s'e:

—Hélmaxna aksok eyámenyéxa enxoho, agkések sat.

23Ekmámnaksoho agko' axta anhan aptemesásak appeywa peya egkések ma'a aksok elmaxneyakxa enxoho, wokmók axta anhan apxeyenma egkések ma'a nekha yókxexma aptémakxa nak wese'. 24Tekkek axta xa kelán'a étkok nak. Entahak axta elmaxneyeyncha'a egken se'e:

—¿Yaksak sat almaxnak ko'o wese'?

Entahak axta eyátegmowágko egken se'e:

—Kalmaxna Juan el Bautista apkátek.

25Ñohok axta ektakhawo ektaxnegwákxo aphakxa wese' m'a kelán'a étkok nak. Entahak axta eyáneya s'e:

—Emenyék ko'o heyakxegkesesek sokpayhe Juan el Bautista apkátek hegkések keso kaxwo' nak.

26Teyekmek axta apwáxok wese'; wánxa agkok ekmámnaksoho agko' axta eyke aptemesásak appeywa nápakta'awo' ma'a énxet'ák ektaha axta apkeláneyeykha, kennókek axta etakheksoho ektahakxa. 27Keñe axta apcháphasa heykxa xama sẽlpextétamo yetlo apkeltémo esantámho Juan apkátek. 28Apmeyákxeyk axta negmomaxchexa m'a sẽlpextétamo nak, apyaktenchesákxeyk axta apyespok Juan, sokpayhe axta anhan apchakxegkásak apsanto Juan apkátek, apmések axta m'a kelán'a étkok nak, keñe axta eksákxésa egken.

29Xama axta apkelleg'a amya'a Juan apkeltámeséyak, apwokmek axta Juan aphápak, apsákxeyk axta anhan yakwayam yatawónek.

Jesús apkeléyak aptéyak cinco mil énxet'ák

(Mt 14.13-21; Lc 9.10-17; Jn 6.1-14)

30Apchaknákxeyk axta xamo' Jesús énxet'ák seykha amya'a natámen xa. Apkeltennáseyha axta ektahakxa apkeltamheykha, tén han ektahakxa apkelxekmóso cha'a énxet'ák. 31Aptahak axta apkeláneya Jesús se'e:

—Nók, ólmahagkok negko'o enxakcha'awók mók nekha yakwayam óllókasók sekxo' nelyampé m'a meykexa nak énxet.

Hakte apyakmagákpek axta énxet apkelwokmo aphágkaxa, mopwanchek axta apmoko etawagkok aptéyak. 32Ekeso eñamakxa apkelchánta axta yántakpayhe Jesús yetlo apkeltámeséyak apkelmahágko mók yókxexma meykexa énxet. 33Wánxa agkok, apxámok axta eyke énxet apweteykegkoho apkelxega, apkelyekpelchawók axta anhan; keñe axta apnaktémágko apkelmahágko apyókxoho énxet apkeleñama nepyeseksa tegma apwányam, axta ewokmohok Jesús neyáwa, apkelwokmo apmonye'e xa énxet'ák nak. 34Xama axta aptepa Jesús kañe' yántakpayhe, apwet'ak axta énxet apxámokma, apyósekak axta anhan apkelano xa énxet'ák nak, hakte máxa axta aptamheykegkok ma'a nekkések meykel'a eltakmelcheso;#Nm 27.17; 1 R 22.17; 2 Cr 18.16; Jer 50.6-7; Ez 34.5; Zac 10.2; Mt 9.36. xámok axta aksok apkelxekmóso m'a. 35Taxnakmek axta apkelmeyákxo aphakxa Jesús apkeltámeséyak. Aptahak axta apcháneya s'e:

—Taxnakme', méko énxet se'e yókxexma nak. 36Eláphés énxet, yakwayam enxoho elmeyekxak ma'a nátegma, tén han elmeyekxak ma'a apheykegkaxa nak, yakwayam enxoho etegyagkok aptéyak.

37Wánxa agkok, aptahak axta apchátegmowágko Jesús se'e:

—Kólmés kéxegke aptéyak.

Aptahak axta apkelátegmowágko apkeltámeséyak se'e:

—¿Apkeltamhoya negko'o antegyasók aptéyak se'e doscientos ekhem nak ekyanmaga nentamheykha, yakwayam enxoho agagkok aptéyak xa énxet'ák nak?

38Aptahak axta apkelmaxneyeyncha'a Jesús se'e:

—¿Háxko apwánxa apyetna kéxegke pan? Kóllano hana. Xama axta apkelya'ásegwokmo apwánxa, aptahak axta apcháneya s'e:

—Cinco apyókxoho pan, keñe ánet kelasma.

39Keñe axta apkeltamho elyakyesagkok apheykha énxet néten pa'at ekpayhe. 40Cien axta cha'a apyókxoho énxet apkelyakyeyáseyak apheykha, tén han cincuenta. 41Keñe axta apkelma Jesús ma'a cinco pan nak, tén han ma'a ánet kelasma, apsekhákxok axta néten, apmések axta ekxeyenma apwáxok Dios, keñe axta apkelyepta Jesús ma'a pan nak, apkelmeyásegkek axta apkeltámeséyak yakwayam enxoho emlaskok ma'a énxet'ák. Apmelasseyk axta anhan énxet'ák ma'a ánet kelasma axta. 42Apyókxoho axta aptókagkok ekwokmoho apkelyakkanakmo, 43Doce axta anhan wokmok apxata pan nápakha'a apkeleymomap tén han ma'a kelasma eleymomaxche axta. 44Cinco mil axta apyókxoho énxet aptéyak xa pan nak.

Jesús apxega néten yegmen

(Mt 14.22-27; Jn 6.16-21)

45Apkeltamhok axta Jesús elchenátwakxak apkeltámeséyak yántakpayhe natámen xa, apkeltamhok axta elyeykhekxak apmonye'e neyp yakwayam elwakxak ma'a tegma apwányam Betsaida, keñe axta Jesús apkeláphasa énxet'ák. 46Xama axta appenchesa apkeláphaso énxet'ák Jesús, apkenátwokmek axta néten egkexe yakwayam enxoho etnehek nempeywa nelmaxnagko. 47Xama axta ekyaktesa, neyseksók wátsam ekpayhegwayam axta wákxak yántakpayhe. Apxakko' axta aphákxak Jesús ma'a néten xóp. 48Apwet'ak axta apkelwaskápekxoho apkelyekwe yegmen apkelpeynchámeygko yántakpayhe apkeltámeséyak, hakte apkenmexchek axta exchahayam. Amonye elsaye axta apkelamhágkakxo Jesús, néten yegmen axta apxegak, máxa axta aptahak Jesús apmoko enxoho eyeykhágwók ma'a. 49Xama axta apwet'a apkeltámeséyak apxegakmo néten yegmen, kélhagák axta apkeneyk, kelpayheyha axta apatña'ák, 50hakte apyókxoho axta apkelwet'ak, apkelyegwakkek axta anhan. Ñohok axta eyke apkelpakhetchesa Jesús. Aptahak axta apkeláneya s'e:

—¡Kólyennakteyásekxoho kélwáxok! ¡Náhelé', ko'o s'e!

51Apchánteyk axta Jesús yántakpayhe, massék axta anhan exchahayam; kelxegawók axta apnenya'ák apkeltámeséyak, 52hakte axta elyekpelchak ma'a apkelana axta Jesús aksok sempelakkaso nak agweta', cham'a, apxámáseykxo axta pan, hakte axta elyekpelchágweykmok xa énxet'ák nak.

Jesús apkeltakmelcheseyam énxet apkelháxamap yókxexma Genesaret

(Mt 14.34-36)

53Apkelyeykhákxeyk axta neyp wátsam ekpayhegwayam, apkelwokmek axta yókxexma Genesaret. Axta aptetwokmok nahan yántakpayhe neyáwa wátsam ma'a. 54Xama axta apkelántepa yántakpayhe, apyekpelchawók axta Jesús énxet'ák ma'a. 55Apsawhekpók axta apnaktémágko énxet'ák apkelmahágko m'a yókxexma nak, kélnaklókek axta anhan apkelháxamap ma'a, eklegáxchexa axta amya'a apha Jesús. 56Kélnegkenwokmek axta cha'a apkelháxamap ámay nepyeseksa tegma apmahágkaxa enxoho Jesús, cham'a nátegma nak, tén han ma'a apyawakxa nak tegma, tén han ma'a nepyáwa tegma nak, kéltamhok axta yohok aksa kólpaknegwomhok napwa'ék apchaklamap Jesús; apkeltakmelwokmek axta anhan apyókxoho apkelháxamap ektaha axta appaknegweykmoho Jesús apchaklamap.

Currently Selected:

SAN MARCOS 6: LEGN

Highlight

Copy