SAN MARCOS 7

Aksok ekteméseso nak ekmanyása apwáxok énxet nápakto' Dios

(Mt 15.1-20)

1Apyo'ókmek axta énxet'ák fariseos Jesús tén han ma'a énxet apkelxekmóso axta ektémakxa segánamakxa, apkelwokmo axta apkeleñama m'a Jerusalén. 2Xama axta apkelwet'a aptókagko aptéyak nápakha Jesús apkeltámeséyak yetlo elpeysamxoho apmék xa énxet'ák nak, apkelpakhetchesek axta, hakte axta elyenyeyásegkok apmék aptókagko, ekhawo m'a apkeltémókxa axta kóltehek énxet'ák fariseos. 3(Apkelyetleykekxeyk axta apkeltémakxa apyepmeyk nano' ma'a énxet'ák fariseos tén han ma'a apyókxoho énxet'ák judíos, yakwayam enxoho metawagkek aptéyak melyenyesa enxoho sekxo' apmék, cham'a apkelánémakpexa axta etnahagkok cha'a. 4Apkelwákxeyk axta agkok cha'a apxanák apkelenyekto enxoho m'a apkelyanmagkásamákpexa, metawagkek axta aptéyak melyenyesa enxoho apmék, ekhawo m'a kéltémókxa axta etnahagkok. Xámok makham ekyetna apkeltémakxa xa énxet'ák nak, cham'a nelyenyeso nak kelyenmagétkók, tén han ma'a egheykok, tén han ma'a egheykok elánamáxche nak sawo, tén han ma'a negyetnamakxa nak néten.) 5Axta keñamak apkelmaxneyeyncha'a axta énxet'ák fariseos Jesús xa, tén han ma'a énxet'ák apkelxekmóso nak apnámokkok ektémakxa segánamakxa. Aptahak axta s'e:

—¿Yaksak ektaha métlawa nak apkeltámeséyak ma'a apkeltémakxa axta ẽlyepmeyk nano', aptókagkek aksa aptéyak yetlo elpeysamxoho apmék?

6Aptahak axta apchátegmowágko Jesús se'e:

—Apchakhásesamok apxeyenma Isaías, aptaha axta Dios appeywa aplegaso kéltémakxa nak kéxegke kélmeyókásamáxkoho nak kéltémakxa, cham'a aptéma axta aptáxéso s'e:

‘Appeywa aksa heyawhok ko'o

xa énxet'ák nak.

keñe m'a apwáxók nak

megkaxegkáseykencha'a heyawhok ko'o.

7Chakhémok selpeykesamo xa énxet'ák nak;

hakte énxet apkeltémókxa antehek ma'a

ektémakxa nak kélxekmóso.’#Is 29.13.

8Kélyenseykmek kéxegke kélyetlo apkeltémókxa nak antehek Dios, yakwayam enxoho kólyetlakxak ma'a apkeltémókxa nak antehek énxet.

9Aptahak axta anhan apkeláneya Jesús énxet'ák se'e:

—Megkólyaheykekxohok kéxegke apkeltémókxa nak antehek Dios, yakwayam enxoho megkólmasésemek ma'a kéltémakxa nak. 10Hakte aptemegkek axta appeywa s'e: ‘Kólteme kéláyo kélyepmeyk tén han ma'a kélchána’,#Ex 20.12; Dt 5.16. apxeyenmék nahan ‘Kéxegke ektahakxa enxoho kéltémo kasók ektahakxa kélyepmeyk tén han kélchána, kólának sat kólmatñekxa'.’#Ex 21.17; Lv 20.9. 11Kélxénchek cha'a kéxegke apkepwagko etnehek yának apyap énxet esenhan egken se'e: ‘Mowanchek apasmok, hakte ekyókxoho aksok ahagkok ekteme corbán’ (nenteme nak negko'o nempeywa “Dios negméso aksok”); 12kólxénhok nahan cha'a kéxegke ektahakxa enxoho ekteme ekpeywa xa, megkólyáteyagkók yakwayam epasmok apyepmeyk esenhan ma'a enchána. 13Cháxa keñamak kéltemésesa mékoho m'a apkeltémókxa nak antehek Dios, eñama kélxekmowáseykekxa cha'a kélnámokkok ma'a kéltémakxa nak. Kóllának nahan cha'a ekxámokma aksok ekhawo nak xa.

14Keñe axta apkelwónencha'a Jesús ma'a énxet'ák. Aptahak axta apkeláneya s'e:

—Kóleyxho sekpeywa kélyókxoho nak, kólya'asagkoho nahan: 15Yawanchek katnésesek ekmanyása apwáxok énxet nápakto' Dios xama aksok ektaxnamol'a apátog, eyke katnéseshok ekmanyása apwáxok énxet nápakto' Dios ma'a ekteyapmol'a eñama kañók agko' apwáxok. 16Kéxegke ekha nak kélheyk'ák, kóleyxho

17Xama axta apkexaya aksa Jesús énxet'ák ma'a, aptaxnegwokmek axta xama tegma. Apkeltamhok axta ey'asagkohok Jesús apkeltámeséyak xa, ektahakxa axta apkelxekmóso Jesús. 18Aptahak axta apkeláneya Jesús se'e:

—Neykel'a kólya'ásegkok nahan kéxegkáxa. ¿Yagkólya'ásegkok megkatnésesamo ekmanyása apwáxok énxet nápakto' Dios ma'a ektaxnamol'a apátog? 19Hakte megkamhagkek nento m'a ekyetnamakxa nak elchetamso egwáxok, wánxa kamhagkok ma'a egwokmo', keñe natámen, katyepekxak makham ma'a egwáxok.

Apxénchek axta Jesús ektaha eyáxñeyo ekyókxoho nento nak, cham'a aptaha axta appeywa xa. 20Aptahak axta anhan Jesús se'e:

—Aksok ekteyapma nak eñama kañe' apwáxok énxet, cháxa ekteméseso ekmanyása aptémakxa xa. 21Hakte cham'a eñama nak kañe', ekyetnamakxa nak elchetamso apwáxok énxet, katyapok cha'a ekmaso elchetamso kélwáxok, cham'a ekmaso kéltémakxa nak megkólmasexta, kélmenyexma, kélakhé kélmók, 22kéltawáseykha elyamhápeyak, tén han ma'a étsapma nak kélnenyek aksok, ekmaso kéltémakxa, kélyexancháseykha kélmók, aksok kélyespagko, kélnathaheyak aksok, kéltekkesáseykha apwesey kélmók, eyeymáxkoho kélwáxok, tén han ma'a kélyeykesamaxkohoxma nak. 23Cháxa aksok ektemésesamol'a ekmanyása aptémakxa énxet xa eñama nak apwáxok.

Kelán'a megkatnaha judía megkay'áseyam Jesús

(Mt 15.21-28)

24Apxegkek axta Jesús apkeñama m'a, yókxexma Tiro axta apmahágkok. Aptaxnegwokmek axta xama tegma meltamho étakpok; mopwanchek axta eyke apmoko exyenmok. 25Ñohok axta ekleg'a amya'a apxénamap Jesús xama kelán'a, ektawáseykencha'a axta étche espíritu ekmaso. Yo'ókmek axta. Keltekxekwokmek axta atapnák xóp apkenmágkaxa Jesús. 26Sirofenicia axta keñamék xa kelán'a nak. Keltamhok axta anhan etekkesesek kelyekhama' awáxok étche. 27Aptahak axta apcháneya Jesús se'e:

—Koho sekxo' etawagkok aptéyak ektaha nak kélketchek, hakte megkapayhawok kólyementók pan ma'a ektaha nak kélketchek, keñe kólmések ma'a semheg.

28Entahak axta eyátegmowágko kelán'a s'e:

—Wese', nakso' xa, kawomhok eyke ekto semheg ma'a nento ekpaleykha nak kóneg mésa kélketchek appalcháseykha.

29Aptahak axta apcháneya Jesús se'e:

—Tásek ektahakxa ekpeywa; awanchek katakhekxak kaxwo'. Tekkek kelyekhama' awáxok étche.

30Xama axta ekwákxo axagkok xa kelán'a nak, wetágweykxeyk axta ekyetna néten ektaháno étche kelwána, tekkek axta eyke kelyekhama' awáxok ma'a kelán'a étkok nak.

Jesús aptakmelcheseyam xama énxet meyke appeywa tén han meyke apeyk'ák

31Apxegákxeyk axta makham Jesús apkeñama m'a yókxexma Tiro, apyeykhágwokmek axta tegma apwányam Sidón, apkelyeykhágkek axta nahan tegma apwányam yókxexma Decápolis, apwokmek axta wátsam ekpayhegwayam Galilea. 32Kélyentegkesek axta xama énxet meyke apeyk'ák tén han meyke appeywa m'a, kéltamhok axta epaknegwomhok Jesús yakwayam etakmelwók xa énxet nak. 33Mók nekha axta apyentamak Jesús xa énxet nak, eyátépexa axta apchaknágkaxa énxet apxámokma, apkelatchesek axta apophék Jesús kañe' apeyk'ák, keñe axta aptaha apyamánog appaknegkesakmoho apaxkok. 34Keñe axta apkenmexo néten, aptekkásók axta apkennama. Aptahak axta apcháneya énxet se'e: “¡Efata!” (Nenteme nak negko'o nempeywa: “¡Kalyagkáxekxoho!”)

35Yetlókók axta anhan elyagkáxeykekxoho apeyk'ák xa énxet meyke apeyk'ák axta, takmelákxeyk axta anhan apaxkok, tásek axta ekteyapma appeywa. 36Apkeltamhok axta Jesús meltennaha énxet'ák ma'a ektahakxa axta; yágwokmok axta aksa apkeltenneykha énxet'ák meltamho eykhe kóltennaha Jesús. 37Aptahak axta apkelpakmeta énxet'ák ekpelakkasa apkelwet'a s'e: “Tásek cha'a katnehek aptamheykha. ¡Wokmók nahan apkellegáseykekxa exma énxet meyke apeyk'ák, tén han aptekkesáseykxo appeywa m'a énxet meyke appeywa nak!”

Currently Selected:

SAN MARCOS 7: LEGN

Highlight

Copy