SAN MATEO 28

Kéltenneykha Jesús apxátekhágwayam

(Mr 16.1-8; Lc 24.1-12; Jn 20.1-10)

1Yeyk'ak axta ekhem sábado apkellókasamakxa axta apkelyampé énxet'ák judíos, xama axta peya kalsé' eyeynókxa ekxega ekhem semanal'a, kelmeyákxeyk axta ekteyánegwákxoho takhaxpop María Magdalena, tén han ma'a mók María. 2Pelakkasek axta ektepa ekyennakte agko' ekyawheykha xóp, hakte Dios apchásenneykha axta apweywenták apkeñama m'a néten. Apyo'ókmek axta takhaxpop, keñe axta apleya átog takhaxpop ma'a Dios apchásenneykha. Apheyk axta anhan néten meteymog kélapma axta átog takhaxpop. 3Apkelyenmawók axta m'a Dios apchásenneykha nak, máxa axta takha apkelyenmal'a, keñe axta aptaxno aptaha apmopé apagko' máxa axta m'a yeyam appokla'a. 4Xama axta apkelwet'a sẽlpextétamo xa, apkelpexyenegkek axta apkelaka, máxa aphopák axta aptamhágkok. 5Aptahak axta Dios apchásenneykha apcháneya kelán'ák se'e:

—Náhelé'. Ekya'ásegkok ko'o kélchetama kéxegke Jesús, cham'a kélyepetchesa axta aksok ektegyéso. 6Méko s'e. Apxátekhágwokmek xeyk, ekhawo m'a aptémakxa axta appeywa. Kólchempoho, kólteyánegwoho s'e kélpekkenakxa axta. 7Kóltakhoho heykxa, kólteme sat kólának apkeltámeséyak se'e: ‘Apxátekhágwokme', exnek peyk emyekxak ma'a Galilea yakwayam yanchásekxak makham kéxegke; exnek kólwetágwakxak ma'a.’ Cháxa sekmoko exchek ko'o altennaksek kéxegke xa.

8Kelpekheyásók axta eltakhémo kelán'ák elenyekto m'a takhaxpop, yetlo elmeneykha axta, tén han yetlo elpayheykekxa awáxók, naktémagkakxók axta anhan eltennáseykxo apkeltámeséyak. 9Neyseksa elxega axta apxekmowásekpoho Jesús xa kelán'ák nak. Apkelpeykesek axta anhan. Yepetchegwokmók axta Jesús xa kelán'ák nak, kelpeykásók axta anhan, keñe axta elpaknegkesekmoho apmagkok. 10Aptahak axta apkeláneya Jesús se'e:

—Néhelé', kóltennásekxa elyáxeg'a, kólána elmeyekxak ma'a Galilea, sat heteyágwakxak ma'a.

Sẽlpextétamo kéltémo etnahagkok apmopwancha'a amya'a

11Neyseksa elxega kelán'ák axta, apkelwákxo nápakha sẽlpextétamo apkeláneykha takhaxpop ma'a tegma apwányam, apkeltennáseyha axta anhan apkelámha apmonye'e appasmo apkelmaxnéseso Dios énxet'ák apagkok ma'a ektahakxa axta takhaxpop. 12Apkelya'aweykxek axta énxet'ák apkelámha apmonye'e apchakneykekxexa judíos xa énxet'ák apkelámha apmonye'e nak appasmo apkelmaxnéseso Dios énxet'ák apagkok, yakwayam enxoho exnéshok mók apkelpakmeyesma xamo' xa énxet'ák nak. Apyanchásók axta anhan selyakye apméso m'a sẽlpextétamo. 13Aptahak axta apcháneya apkeltamho etnehek apkeltenneykha s'e:

—Kólteme sat kólána kéxegke, axta'a exchek apkelwa'a Jesús apkeltámeséyak, keñe apmeñexa Jesús aphápak neyseksa kélnakteyenma kéxegke. 14Apleg'ak sat agkok wese' apwányam Roma apchásenneykha apkeláneykha yókxexma xa, negko'o sat ólpakhetchesaxkoho, keñe sat megkólwetyek ekyentaxno kéxegke.

15Apkelxakak axta selyakye m'a sẽlpextétamo nak, aptamhágkek axta anhan ma'a ektahakxa axta amya'a apkeláneyákpo. Cháxa ektepeykencha'a nak cha'a amya'a nepyeseksa énxet'ák judíos ekxénamaxko xa ekwokmoho keso kaxwo' nak.

Jesús apméso appeywa apkeltámeséyak

(Mr 16.14-18; Lc 24.36-49; Jn 20.19-23)

16Apkelmeyákxeyk axta Galilea#Mt 26.32; Mr 14.28. once Jesús apkeltámeséyak, cham'a egkexe apkeltennasamakxa axta elmeyekxak Jesús. 17Xama axta apwet'a Jesús xa énxet'ák nak, apkelpeykásók axta. Nápakha axta eyke apya'ásekmok. 18Apyepetchegwákxók axta Jesús xa énxet'ák nak. Aptahak axta apkeláneya s'e:

—Egkések ko'o Dios yakwayam hetnehek selyaheykekxoho ekyókxoho aksok ma'a néten tén han keso náxop. 19Kólmohok sat apheykegkaxa nak énxet ekyókxoho yókxexma keso náxop, kólteméses nahan seltameséyak ko'o m'a,#Hch 1.8. kólyakpásesák nahan yegmen yetlo kélxeyenma apwesey m'a Táta, Apketche, tén han ma'a Espíritu Santo. 20Kóltamesák nahan yakwayam enxoho elyahakxohok ma'a ekyókxoho seltémókxa nak kóltehek kéxegke. Axek sat eyke cha'a ko'o kélnepyeseksa kéxegke ekyókxoho ekhem ekwokmoho ektemegwánxa néxa ekhem.

Currently Selected:

SAN MATEO 28: LEGN

Highlight

Copy