SAN MATEO 27

Jesús kélyentama aphakxa Pilato

(Mr 15.1; Lc 23.1-2; Jn 18.28-32)

1Xama axta elsaka, apheyásók axta mók apkeláneykekxa apkelpakmeyesma yakwánxa etnehek yakhek Jesús ma'a apyókxoho énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak apchakneykekxexa énxet'ák judíos. 2Kélnaktetchesek axta apmék Jesús kélyentama aphakxa Pilato, aptaha axta wese' Roma apchásenneykha apkeláneykha yókxexma.

Judas apketsapma

3Xama axta apwet'a Judas yakwánxa kóltemésesek kólakhek Jesús, cham'a aptaha axta appelakkaseso apkeltémo emakpok Jesús, xénwokmek axta apwáxok eyesagko aptahakxa, apkelmeyásekxeyk axta treinta sawo selyakye m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak apchakneykekxexa énxet'ák judíos.#Hch 1.18-19. 4Aptahak axta Judas apkeláneya s'e:

—Asagkók agko' ko'o sektahakxa nápakto' Dios seltamho emátog xama énxet meyke aptémakxa.

Wánxa agkok, aptahak axta apkelátegmowágko énxet'ák se'e:

—¿Mageyxek eyke negko'o? ¡Xép apkelané!

5Keñe axta apkexaya Judas sawo selyakye kañe' tegma appagkanamap, apxegkek axta aptetwokmo apyespok táma apchakhákpekxo.

6Apyekhákxeyk axta selyakye m'a énxet'ák apkelámha apmonye'e nak appasmo apkelmaxnéseso Dios énxet'ák apagkok. Aptahak axta apkelpakmeta s'e:

—Magwanchek ampekkenek kañe' yántéseksek eknegkenamaxchexa nak se'e selyakye nak, hakte penchásexchek kélyanmagkaso éma.

7Apheyások axta mók apkelpakmeyesma xa énxet'ák nak yakwayam emok ma'a yókxexma étkok eltamhomaxchexa axta Apkelánamákpexa Yátegwáxwa, yakwayam enxoho keytek yakwánxa kólatawónek ma'a énxet apkeleñama nak mók nekha metnaha nak judíos. 8Ekeso eñamakxa eltamhomaxko nak makham Ema Yókxexma Agkok xa yókxexma nak. 9Cháxa ektahakxa axta ektaha m'a aptémakxa axta apkeltenneykha Jeremías, aptaha axta Dios appeywa aplegaso, aptéma axta appeywa s'e: “Treinta sawo selyakye axta apkelmak, cham'a ekwánxa axta apkelxéna ekwánxa ekyanmaga m'a énxet'ák Israel. 10Axta apyanmagkásak aptegya'a yókxexma étkok ekwesey axta Apkelánamákpexa Yátegwáxwa m'a selyakye nak, ekhawo aptahakxa axta seyáneya Wese' egegkok.”#Zac 11.12-13.

Jesús kélchenegkeseyam nápakto' Pilato

(Mr 15.2-5; Lc 23.3-5; Jn 18.33-38)

11Kélyentegkek axta Jesús aphakxa Pilato, aptaha axta wese' apwányam Roma apchásenneykha apkeláneykha yókxexma. Aptahak axta apkelmaxneyeyncha'a Pilato s'e:

—¿Xépya judíos Wese' apwányam apagkok?

—Cháxa aptahakxa nak appeywa sexéna exchep —axta aptahak apchátegmowágko Jesús.

12Apwanmakkek axta aksa Jesús, neyseksa apxeyenma ekmaso m'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak apchakneykekxexa énxet'ák judíos. 13Ekeso eñamakxa aptaha axta apkelmaxneyeyncha'a Pilato s'e:

—¿Ya eña'ak ektahakxa nak apxénamap ekmaso exchep?

14Wánxa agkok, axta eyke yátegmowágkok Jesús xama enxoho; Pelakkasek axta apwet'a aptahakxa m'a wese' apwányam Roma apchásenneykha apkeláneykha yókxexma.

Jesús apxénamap yakwayam emátog

(Mr 15.6-20; Lc 23.13-25; Jn 18.38—19.16)

15Enyekxohok axta cha'a xama énxet apmomap wese' apwányam Roma apchásenneykha apkeláneykha yókxexma ekhem melwagkayam axta énxet'ák judíos, kéltéma axta Pascua, cham'a ektahakxa enxoho apkelyéseykha énxet'ák. 16Yetneyk axta xama énxet apmomap apwesey axta Jesús Barrabás, apyókxoho énxet axta apya'ásegkohok ma'a. 17Xama axta apchaknákxo énxet'ák, aptahak axta Pilato apkelmaxneyeyncha'a s'e:

—¿Yaksak énxet kélámenyého kéxegke ayenyekxa': Jesús Barrabasya, enxeykel'a m'a Jesús kéltéma nak Mesías?

18Hakte apyekpelchágwokmek axta Pilato kélmésa Jesús eñama kélnathé.

19Apheyk axta makham Pilato néten aptaháno segyekpelchémókxa, cham'a eltamho axta kóltennásekxak aptáwa. Entahak axta eyáphásesa ekpeywa s'e: “Ná etnésesamho aksa exma exchep xa énxet appéwomo nak, hakte asagkók agko' xeyk ko'o ektahakxa sewanmeso xa.”

20Wánxa agkok apkellekwokmok axta eyke énxet apxámokma aptahakxa apkelpeywa m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak apchakneykekxexa énxet'ák judíos, yakwayam enxoho yának kólyenyekxak Barrabás, keñe kólának emátog ma'a Jesús. 21Aptahak axta wese' apwányam Roma apchásenneykha apkeláneykha yókxexma apkelmaxneyeyncha'a énxet'ák se'e:

—¿Yaksak kéltamho kéxegke ayenyekxak xama xa apkánet nak?

—¡Enyekxa Barrabás! —axta aptahak apkelátegmowágko xa énxet'ák nak.

22Aptahak axta Pilato apkelmaxneyeyncha'a s'e:

—¿Háxko sat atnésesek ko'o Jesús kéltéma nak Mesías?

Apyókxoho énxet'ák axta aptahak apkelátegmowágko s'e:

—¡Epetches aksok ektegyéso!

23Aptahak axta Pilato apkeláneya s'e:

—¿Yaksak aksok ekmaso apkeláneya s'e énxet nak?

Wánxa agkok, aptahak axta apkelyennaktésawo makham apkelpeywa énxet'ák se'e:

—¡Epetches aksok ektegyéso!

24Xama axta apyekpelcha Pilato megkóltaha aptahakxa, yágwokmok axta aksa apwet'a apyenegkesáxma énxet'ák, apkeltamhok axta Pilato kólyekwakxések yegmen, keñe axta apkelyenyesa apmék nápakta'awo' apyókxoho énxet'ák.#Dt 21.6-9. Aptahak axta Pilato s'e:

—Háwe ko'o seltémo emátog xa énxet nak; kéxegke eyke kéltémo emátog.

25Apyókxoho énxet axta aptahak apkelátegmowágko s'e:

—¡Negko'o neltémo emátog xa énxet nak, tén han ma'a egketchek nak!

26Keñe axta apyenyekxo Pilato m'a Barrabás, apkeltamhok axta anhan kóltekpagmakha Jesús, apmések axta anhan yakwayam kólyepetchesek aksok ektegyéso.

27Kélyentegkek axta Jesús wese' apxagkok, wese' apwányam Roma apchásenneykha apkeláneykha yókxexma sẽlpextétamo apagkok axta apyentama. Apwakha'ak axta anhan apkenmágkaxa Jesús xa apyókxoho nak. 28Kéllekkesek axta aptaxno Jesús, kéltaxneyásekxeyk axta apáwa apyexwasé, 29kélpekkenchesek axta anhan am'ák apkátek kélláneso apteté apkátek. Kélmések axta anhan yámet ekyakwaté apmek ekpayhókxa nak apkelya'asamakxa. Keñe axta apkeltekxeyágko aptapnák xóp sẽlpextétamo apkenmágkaxa Jesús. Aptahak axta apcháneya yetlo apkesméso s'e:

—¡Memassegwomek sat judíos wese' apwányam apagkok!

30Apkexpakha'ak axta nahan cha'a apyamánog, axta anhan cha'a kéltekpagkásak apkátek ma'a yámet ekyakwaté kélmésa axta. 31Kéllekkesek axta apchaklamap apyexwasé natámen ekteme apkesmésamap Jesús xa ektaha nak, keñe axta kélantaxneyásekxo makham apkelnakta, kélyentegkek axta anhan kélya'asa m'a yakwánxa axta kólyepetchesek aksok ektegyéso.

Jesús kélyepetcheso aksok ektegyéso

(Mr 15.21-32; Lc 23.26-43; Jn 19.17-27)

32Xama axta apkelántepa tegma apwányam kélyentama Jesús, kéltahanya'awók axta xama énxet apwesey axta Simón, aptaha axta apkeñamakxa apagko' ma'a Cirene. Kélyáteyagkok axta kéltamho epatmok Jesús aksok ektegyéso apagkok.

33Xama axta kélwagkasa Jesús yókxexma ekwesey axta Gólgota, (cham'a kéltémakxa axta anhan “Yókxexma ekyetnamakxa Kélpátek Axchapok”), 34kélmések axta Jesús vino yetlo kélenchahe aksok égmenek ekmáske; wánxa agkok, xama axta apyekkóna Jesús, axta emokok ének.

35Xama axta kélyepetchesa aksok ektegyéso Jesús, keñe axta aptawásegkok xama aksok sẽlpextétamo, yakwayam enxoho elyápetchesakpok Jesús apkelnakta.#Sal 22.18. 36Keñe axta apheyncha'a sẽlpextétamo apkeláneyncha'a m'a kélchexnakxa axta aksok ektegyéso Jesús. 37Kélchexneyk axta nahan kéltáxéso néten apyetseksek Jesús, ekyetnakxa axta kéltáxéso aksok eksexnenagko Jesús. Axta entemék kéltáxéso s'e: “Keso Jesús, énxet'ák judíos Wese' apwányam apagkok se'e.”

38Kélyepetchásók axta anhan xamo' Jesús aksok ektegyéso apkánet énxet elmasagcha'a apkeltémakxa. Xama axta kélchexnak ekpayhókxa apkelya'asamakxa Jesús, keñe axta pók kélchexna ekpayhókxa nak nepsagkalwa. 39Apwanyeyha axta cha'a énxet'ák ektaha axta apkelyeykhágwayam ma'a apyexnakxa, apkelyeykáseyha axta anhan cha'a apkatkók.#Sal 22.7; 109.25. 40Aptahak axta anhan cha'a apcháneya s'e:

—¡Apmokók axta exchep etegkesek tegma appagkanamap, keñe apmoko epenchásekxak makham ekweykmoho antanxo ekhem!#Mt 26.61; Jn 2.19. Dios Apketche agkok xép, ewagkasakpoho' apagko' teyp, etyep xa!

41Hawók axta anhan aptamhágkaxa m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelxekmóso nak apnámokkok ektémakxa segánamakxa, tén han ma'a apkelámha apmonye'e nak apchakneykekxexa énxet'ák judíos. Aptahak axta apkelpakmeta s'e:

42—Apkelwagkasegkek axta cha'a teyp apnámokkok, wánxa agkok mopwanchek eyke apmoko ewagkasakpoho' apagko' teyp. Israel Wese' apwányam apagkok xa, magya'ásemek sat negko'o m'a aptepa enxoho xa néten aksok ektegyéso nak. 43Apcháyo agkok Dios, Dios sat nahan ewagkasek teyp kaxwo' nak, eyámnaksoho enxoho apkepmenyého Dios ewagkasek teyp.#Sal 22.8. ¿Yaxta hẽltennásak negko'o aptaha Dios Apketche xa?

44Wokmók axta anhan apwanyeykha Jesús ma'a énxet'ák kélyepetcháso axta xamo' aksok ektegyéso.

Jesús apketsapma

(Mr 15.33-41; Lc 23.44-49; Jn 19.28-30)

45Yetseksókhem axta chénawók ekyaktesóxma ekyókxoho xa yókxexma nak ekweykmoho las tres taxnam. 46Chakhawók axta anhan las tres ma'a aptaha axta apyennaktésawo appeywa Jesús se'e: “Elí, Elí, ¿lema sabactani?” (nentéma nak negko'o nempeywa: “Dios ahagkok, Dios ahagkok, ¿yaksak ektaha seyenyawa nak?”)#Sal 22.1.

47Nápakha énxet'ák axta anhan apkelleg'ak xa, cham'a apchakneyncha'a axta m'a. Aptahak axta apkelpakmeta s'e:

—Elías Dios appeywa aplegaso nak apwóneyha.

48Ñohok axta anhan apkenyaha xama xa énxet'ák nak, aksok ekhó sogweygke kélleklo apwáxok axta aptegyáha, apyásesek axta nahan vino yetlo kélenchahe aksok égmenek ekmáske, keñe axta apteta naw'a yámámok apya'ásesa apátog Jesús yakwayam enxoho ének.#Sal 69.21. 49Wánxa agkok, aptahak axta apkelpakmeta nápakha énxet'ák se'e:

—Kólho aksa, ewak sat kex'a Elías yakwayam ewagkasek teyp.

50Apyennaktések axta makham appeywa Jesús keñe axta apketsapa. 51Yetlókók axta nahan apyeptamap nepyeseksa m'a apáwa#Ex 26.31-33; 2 Cr 3.14. apyexnama axta kañe' tegma appagkanamap, waktamok axta apyeptamap kóneg. Yawheyha axta xóp, kelpakxeyk axta anhan meteymog. 52kelmayhekxeyk axta atña'ák takhaxpopeyk; wokmók axta anhan apnakxétekhágwayam apxámokma m'a énxet'ák apkelpéwomo apkeletsapma axta. 53Apkelántekkek axta apkelenyekto m'a kélatawañamakxa axta, cham'a, natámen apxátekhágwayam axta Jesús. Apkelántaxnegwákxeyk axta nepyeseksa tegma apwányam aptakmalma Jerusalén. Apxámok axta anhan énxet apkelwet'a xa.

54Apwet'ak axta ektahakxa ekyawheykha xóp ma'a sẽlpextétamo apkemha apmonye tén han ma'a apkelxegexma'a axta, cham'a ektaha axta apkeláneykha apyexnakxa Jesús. Apkelakak axta nahan ma'a ekyókxoho ektahakxa axta. Aptahak axta apkelpakmeta s'e:

—¡Nakso' neyke agkok aptaha Dios Apketche xa énxet nak.

55Xámok axta kelán'ák eyaknencha'a elenmexo makhawo', cham'a elyetlawa axta Jesús eleñama Galilea, pasmomchek axta anhan cha'a Jesús. 56María Magdalena axta eghak neyseksa xa kelán'ák nak, axta anhan ma'a María ektaha axta Santiago egken ektaha axta nahan egken ma'a José, Zebedeo aptáwa axta anhan elxegexma'a.#Lc 8.2-3.

Jesús kélatawaña

(Mr 15.42-47; Lc 23.50-56; Jn 19.38-42)

57Xama axta ekyaktésa, apwokmek axta xama énxet ekxákma aksok apagkok apwesey axta José, aptaha axta apkeñamakxa apagko' ma'a Arimatea, aptaha axta anhan Jesús apkelxekmóso. 58Apyo'ókmek axta José Pilato apkelmaxnegwokmo Jesús aphápak. Apkeltamhok axta anhan kólmések Pilato m'a José. 59Apmeyk axta anhan José Jesús aphápak, appextetchek axta anhan xama apáwa apkexyawé apmópeyo, 60appekkenwokmek axta anhan takhaxpop kaxwé elánamáxche ektaha axta apagkok José, apkeltémo axta kametmaxchek kañe' meteymog. Aptakhákxeyk axta anhan natámen apchápeykekxa átog takhaxpop meteymog ekyawe agko'. 61Wánxa agkok, hákxeyk axta eyke nekha takhaxpop María Magdalena, tén han ma'a mók María.

Sẽlpextétamo apchakneykha aptakmelcheso Jesús takhaxpop apagkok

62Mók ekhem axta entahak, cham'a ekhem sábado, apkellókasamakxal'a apkelyampé énxet'ák judíos, apkelmeyákxeyk axta aphakxa Pilato énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a fariseos. 63Entahak axta amya'a apcháneyákpo Pilato s'e:

—Wese', xénwákxók negko'o egwáxok aptémakxa axta appeywa apyennaktamakxa m'a énxet aptaha axta apmopwána amya'a apagko', apxeyenma axta exátekhágwók ekwokmo enxoho antanxo ekhem.#Mt 16.21; 17.23; 20.19; Mr 8.31; 9.31; 10.33-34; Lc 9.22; 18.31-33. 64Yána sat xép kólyennakteyásekxohok agko' átog takhaxpop ekweykmoho antanxo ekhem, elxegmak katnehek apkeltámeséyak axta'a, keñe emenyexwatak ma'a Jesús aphápak, keñe eltennasha énxet'ák apxátekhágwokmo Jesús. Temék agkok xa, apmopwancha'a amya'a apancha'awo' etnahagkok, megkaxók ma'a sekxo' axta.

65Aptahak axta Pilato apkeláneya énxet'ák se'e:

—Cháxa sẽlpextétamo apkelhaxneykhal'a xa. Kólnaklakxa', kóltakmelchesho sat kélyennaktéso átog takhaxpop.

66Apkelxegkek axta xa énxet'ák nak, aptakmelchások axta anhan apyennaktéso átog takhaxpop, keñe axta appekkena táma m'a meteymog takhaxpop átog kélapeykekxa axta. Keñe axta kélheyáseykxo nahan sẽlpextétamo yakwayam elanha m'a.

Currently Selected:

SAN MATEO 27: LEGN

Highlight

Copy