SAN MATEO 20

Jesús apyetcháseykekxoho énxet'ák apkeltamheykha neyseksa anmen yámet

1“Máxa xama wese' namyep kélcheneykekxexa anmen yámet ma'a aptémakxa nak Wese' apwányam Dios, cham'a apxegama axta axto'o agko' aptegyeyncha'a énxet yakwayam eltemeykha neyseksa anmen yámet. 2Hawók axta mók apkelpakmeyesma yakwayam eyánmagkasek wese' m'a ekweykenxal'a ekyanmaga xama ekhem nentamheykha, keñe axta apkeláphasa yakwayam eltemeykha neyseksa anmen yámet. 3Apxegákxeyk axta makham axto'o las nueve axta m'a, apwet'ak axta apheyncha'a énxet meyke apkeltamheykha m'a apheykegkaxal'a cha'a énxet. 4Aptahak axta apkeláneya s'e: ‘Kólmohok nahan kéxegkáxa kóltemeykha m'a seneykekxexa nak anmen yámet, ayanmagkasesek sat ekyanmaga kéltamheykha.’ Apkelxegkek axta. 5Apxegákxeyk axta makham xa wese' nak, yetseksókhem axta m'a, keñe axta apxegákxo makham las tres taxnam. Hawók axta makham ma'a aptahakxa axta. 6Las cinco taxnam axta anhan apmeyákxo makham ma'a apheykegkaxal'a énxet, apkelwetágweykxek axta makham énxet meyke apkeltamheykha; aptahak axta apkelmaxneyeyncha'a s'e: ‘¿Yaksak ektaha kélheyncha'a aksa yókxoho ekhem meyke kéltamheykha s'e?’ 7Aptahak axta apkelátegmowágko s'e. ‘Méko eyke segmésama nentamheykha.’ Keñe axta aptaha apkeláneya s'e: ‘Kólmohok nahan kéxegkáxa kóltemeykha m'a seneykekxexa nak anmen yámet.’

8“Xama axta ekyaktésa, aptahak axta apcháneya wese' apkemha apmonye apkeláneykha s'e: ‘Elwónmakha hana énxet'ák ektaha nak apkeltamheykha, eyánmagkases nahan apkeltamheykha#Lv 19.13; Dt 24.15. yeynho apmonye'e m'a axayok xeyk apkeltamheykha, keñe sat axayok eyánmagkasesek ma'a apmonye'e exchek apkeltamheykha.’ 9Apkelwokmek axta m'a ektaha axta apchénamo apkeltamheykha las cinco taxnam, apyókxoho axta anhan apkexawágkok ekweykenxal'a kélyanmagkaso xama ekhem nentamheykha. 10Keñe axta ekpehewákxo m'a ektaha axta apchénamo apkeltamheykha apmonye'e axto'o, apkeneykek axta kólmokók kólyáncheseshok kélméso ekyanmaga apkeltamheykha; wánxa agkok apyókxoho axta eyke anhan apkexawágkok ma'a ekweykenxal'a kélyanmagkaso xama ekhem nentamheykha. 11Xama axta apkelmágko selyakye, apkelpakméteyha axta apxéna m'a wese'. 12Aptahak axta apkelpakmeta s'e: ‘Aphésawo nak segyanmagkaseso negko'o xa énxet'ák apkelwe exchek amonye nelwáteso nentamheykha, xama hora aksa apkeltamheykha, keñe negko'o neltamheyncha'a neyseksa ekmexanma mayahat ekyókxoho ekhem.’ 13Wánxa agkok, apchátegmowágkek axta eyke wese' appeywa xama xa énxet'ák nak. Aptahak axta apcháneya s'e: ‘Emók, matnesásak ko'o exchep ma'a megkapayhawo nak antehek. ¿Yaxchek kaxnawok mók nelpakmeyesma nenxéna ekwánxa ekyanmaga xama ekhem aptamheykha? 14Ema xa selyakye apagkok nak, etakhekxa'. Ekmokók agkok ko'o axnéseshok sekméso ekyanmaga aptamheykha exchep xa axayok apkeltamheykha exchek, 15hakte payhawók ko'o atnésesek selyakye ahagkok sekmokókxa enxoho atnésesek. ¿Apnatha'ak enxeykel'a exchep sektaha ko'o mamasma aksok ahagkok?’

16“Sat nahan katnehek énxet'ák apteme nak apkelámha apmonye'e keso kaxwo' nak, kónegók sat kóltemesásekxak, keñe sat kóltemesásekxak apkelámha apmonye'e m'a énxet'ák apteme nak kónegók keso kaxwo' nak.#Mt 19.30; Mr 10.31; Lc 13.30.

Jesús ekteme antanxo apxéneykekxoho yakwayam yetsapok

(Mr 10.32-34; Lc 18.31-34)

17Apxegkek axta Jesús apmahágko m'a tegma apwányam Jerusalén. Neyseksa apkelxega axta apkelpakhetchásak apxakcha'awók Jesús doce apkeltámeséyak. Aptahak axta apkeláneya s'e:

18—Kélwet'awók kéxegke nelmeyákxo kaxwo' ma'a tegma apwányam Jerusalén, cham'a yakwánxa sat kólmések aptaha nak Apketche énxet ma'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso nak apnámokkok ektémakxa segánamakxa. Yának sat nahan emátog, 19egkések sat nahan ma'a énxet'ák metnaha nak judíos yakwayam enxoho yesmaksek, tén han etekpagmakha, tén han épetchesek aksok ektegyéso; wánxa agkok, antanxo ekhem sat eyke exátekhágwók makham.

Santiago tén han Juan egken elmaxnagko aksok Jesús

(Mr 10.35-45)

20Yo'ókmek axta Jesús Zebedeo aptáwa, yetlo étchek, keltekxekwokmek axta atapnák apkenmágkaxa yakwayam enxoho kalmaxnak xama aksok. 21Aptahak axta apkelmaxneyeyncha'a Jesús se'e:

—¿Yaksak amenye'?

Entahak axta eyátegmowágko s'e:

—Yána exmakha ko'o étchek ma'a aptémakxa nak xép Wese', xama sat exnések ekpayhókxa apkelya'asamakxa, keñe sat nahan pók ma'a nepsagkalwa.

22Aptahak axta apchátegmowágko Jesús se'e:

—Megkólya'ásegkok kéxegke xa selmaxneya nak. ¿Kélwanchek enxeykel'a kóllegagkohok ma'a peya nak ko'o añegkoho' ekyetchesamaxkoho nak xama egheykok negyal'a aksok ekmáske?

Aptahak axta apkelátegmowágko s'e:

—Egwanchek.

23Aptahak axta apchátegmowágko Jesús se'e:

—Kóllegagkohok sat kéxegke xa nenlegeykegkoho nak, cham'a ekyetchesamaxkoho nak xama egheykok negyal'a aksok ekmáske, akke ko'o hepayhawok wának exek énxet ekpayhókxa nak selya'asamakxa tén han ma'a nésagkalwa. Appagkanchesek eyke Táta m'a énxet ektaha nak apkelyéseykha.

24Xama axta apkelleg'a nápakha Jesús apkeltámeséyak xa, diez axta apyókxoho m'a, apkellókek axta aptaknawé m'a apkánet énxet apyáxeg xamo' axta. 25Wánxa agkok, apkelwóneyha axta eyke Jesús ma'a apkeltámeséyak. Aptahak axta apkeláneya s'e:

—Kélya'ásegkok kéxegke apkeltémakxa nak énxet'ák melya'áseyak Dios kelwese'e apagkok. Ennaktésakpohok cha'a neyseksa apkelmeykha apnámokkok. Yának nahan cha'a kóltehek kéláyo agko' nepyeseksa apnámokkok. 26Akke kapayhawok katnehek kélnepyeseksa kéxegke xa ektaha nak.#Lc 22.25-26. Kélmokók agkok kéxegke kóltehek kélámha kélmonye'e, kéméxchek kóltemeykha aksa nepyeseksa kélnámokkok; 27Kélmokók agkok kéxegke kóltehek kélámha kélmonye'e, kéméxchek kóltemeykha aksa ektémol'a énxet apmomap.#Mt 23.11; Mr 9.35; Lc 22.26. 28Hakte hawók aptémakxa m'a aptaha nak Apketche énxet, axta eweyk yakwayam yának kólpasmok, wánxa aksa apwaya yakwayam epasmok énxet,#Lc 22.27; Jn 13.12-15. tén han ényók apyennakte yakwayam exámhok énxet apkelwagkaso teyp.

Jesús apkeltakmelcheseyam apkánet énxet meyke apakta'ák

(Mr 10.46-52; Lc 18.35-43)

29Xama axta aptepa Jesús yetlo apkeltámeséyak tegma apwányam Jericó, apxámok axta énxet apyetlákxo. 30Xama axta apkelleg'a amya'a apyeykhágwokmo Jesús aphágkaxa apkánet énxet meyke apakta'ák, aptahak axta apkelyennaktésawo apkelpeywa s'e:

—¡Wese', David Apketche, yepyósho henlanok negko'o!

31Apnókáseyha axta eyke énxet apkeltamho elwanmeyekxa', wánxa agkok, apyanchesekmok axta eyke apteme apkelpeywa s'e:

—¡Wese' David Apketche, yepyósho henlanok negko'o!

32Apkenegwokmek axta Jesús, apkelwóneyha axta m'a énxet meyke apakta'ák nak. Aptahak axta apkelmaxneyeyncha'a s'e:

—¿Yaksak kélámenyého atnésesek kéxegke?

33Aptahak axta apkelátegmowágko énxet'ák meyke apakta'ák se'e:

—Egmenyék negko'o agwetekxaxma.

34Apyósekak axta apkelano Jesús, appaknegkesakmok axta apakta'ák. Yetlókók axta apkelweteykekxaxma énxet meyke apakta'ák, apkelyetlákxeyk axta anhan Jesús.

Currently Selected:

SAN MATEO 20: LEGN

Highlight

Copy