SAN MATEO 21

Jesús aptaxnegwayam tegma apwányam Jerusalén

(Mr 11.1-11; Lc 19.28-40; Jn 12.12-19)

1Xama axta apkelágketchesekmo tegma apwányam Jerusalén, apkelwokmek axta nátegma ekwesey axta Betfagé, keto' axta egkexe Olivos ma'a, apkeláphásek axta Jesús apkánet apkeltámeséyak. 2Aptahak axta apkeláneya s'e:

—Kólmohok hana nátegma egmonye nak. Kólwetagwók sat yámelyeheykok kelwána kélteté táma yetlo étkok ma'a. Kóllekes sat táma, helnaklókásenta sat ko'o. 3Appakhetchesek sat agkok xama énxet, kólteme sat kólának se'e: ‘Wese' egegkok xeyk apmokók elmaha, kaxwo' hek xeyk eláphásekxak makham.’

4Cháxa ektahakxa axta ektaha m'a aptémakxa axta apkeltenneykha Dios appeywa aplegaso, cham'a aptéma axta aptáxéso s'e:

5“Etne yának énxet apheykha tegma apwányam Sión se'e:

‘Kóllano, apya'awak kéxegke Wese' kélagkok,

yetlo megyeymákpoho,

yámelyeheykok étkok apchánte,

cha'a étkok ma'a

yámelyeheykok kélpátegkesamol'a aksok.’ ”#Zac 9.9.

6Apkelxegkek axta Jesús apkeltámeséyak, aptemék axta anhan ma'a aptahakxa axta apkeláneya Jesús. 7Apyentamákxeyk axta yámelyeheykok kelwána yetlo étkok, apkelaklamap axta apkeltahanchásak, keñe axta apchánta Jesús. 8Apxámok axta énxet ma'a. Nápakha énxet axta apkelpeykásegkok apkelaklamap ámay awáxok, keñe axta nápakha apnegkenágko yámet aktegák apkelyaktónma axta. 9Apsawhekpók axta apkelyennaktésawo apkelpeywa apkelxega axta apmonye'e, tén han ma'a apkelxega axta neptámen. Aptahak axta s'e:

—¡Kólpeykesho wese' apwányam David Apketche! ¡Tásek sat katnehek apxénamap xa apwa'a nak yetlo apsayam Dios apwesey!#Sal 118.25-26. ¡Apcheymákpoho Dios apha nak néten!

10Xama axta aptaxna Jesús tegma apwányam Jerusalén, yennegkek axta exma apyókxoho tegma kañe' Jerusalén, apxámok axta énxet aptaha cha'a aptegyeyncha'a amya'a s'e:

—¿Yaksak énxet xa?

11Aptahak axta apkelátegmowágko énxet'ák se'e:

—Cháxa Jesús, aptaha nak Dios appeywa aplegaso apkeñama nátegma Nazaret yókxexma Galilea xa.

Jesús apcháxñeso kañe' tegma appagkanamap

(Mr 11.15-19; Lc 19.45-48; Jn 2.13-22)

12Aptaxnegwokmek axta Jesús kañe' tegma appagkanamap, apsawhawók axta apkelántekkesa énxet apkelyanmagkásamap axta m'a. Apkelyaknegkesásegkek axta mésa m'a énxet'ák apyakmagkáseykekxa axta cha'a mók selyakye, tén han ma'a kélchexakhamakxa axta wáx'ay. 13Aptahak axta apkeláneya s'e:

—Temék eknaktáxésamaxche weykcha'áhak se'e: ‘Ektamhomaxchexa nempeywa nelmaxnagko sat ko'o eltamhakpok exagkok’,#Is 56.7. apkelyexánegweykenxa apkelmenyexma eyke kéltemesásak kéxegke.#Jer 7.11.

14Apya'awak axta apkenmágkaxa Jesús énxet meyke apakta'ák tén han meyke aptapnák. Apkeltakmelchesekmek axta anhan. 15Xama axta apwet'a apkelana Jesús aksok sempelakkaso agwetak ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso axta ektémakxa segánamakxa, xama axta anhan apkelleg'a elyennaktésawo elpeywa sakcha'a létkók kañe' tegma appagkanamap, entahak axta se'e: “¡Apcheymákpoho wese' David Apketche!”, apkellókek axta. 16Aptahak axta apcháneya Jesús se'e:

—¿Apleg'aya ektahakxa nak sakcha'a létkók?

Aptahak axta Jesús apchátegmowágko s'e:

—Ehay, ekleg'é'. ¿Yagkólyetseteyk kéxegke weykcha'áhak eknaktáxésamaxche ekxeyenma xa, ektéma nak ekxeyenma s'e:

‘Xép keñamak xa elmeneykmasa nak sakcha'a létkók,

tén han ma'a sakcha'a létkók

megkayamasma nak neme

eltemésesa apcheymákpoho Exchep.’#Sal 8.2.

17Keñe axta apkexaya aksa Jesús ma'a, apmahágkek axta tegma apwányam Betania. Axta aphakmok xama axta'a m'a.

Jesús appakhetcheso ekmaso yámet ekwesey higo meyke ekyexna

(Mr 11.12-14,20-26)

18Meyk axta chakhak Jesús aptakháwo axta makham tegma apwányam. Axto'o axta m'a. 19Apwet'ak axta higo yámet nekha ámay, apyo'ókmek axta enmakxa, wánxa axta aksa áwa' apwet'a. Aptahak axta apcháneya higo yámet se'e:

—¡Megkeyxnekxék sat cha'a exche'!

Yetlókók axta anhan ekyamaye. 20Xama axta ekpelakkasa apkelwet'a apkeltámeséyak ektahakxa, aptahak axta s'e:

—¿Háxko enxoho ektahakxa ekyamaka nak heykxa higo yámet?

21Aptahak axta apchátegmowágko Jesús se'e:

—Yetneyk agkok kéxegke megkólya'áseyam, cham'a megkólya'ásekmo enxoho, kélwanchek kóltehek xa sektemésesakxa exchek ko'o higo yámet, kélwanchek nahan kóltehek kólának egkexe s'e: ‘Kapatyep xa, kataxnegwom wátsam ekwányam’, katnehek han xa.#Mt 17.20; 1 Co 13.2. 22Kólxawak sat kéxegke ekyókxoho aksok kélmaxné enxoho yetlo megkólya'áseyam, cham'a kéltaha enxoho nempeywa nelmaxnagko.

Jesús apxawé apmopwána elának aksok

(Mr 11.27-33; Lc 20.1-8)

23Aptaxnegwákxeyk axta Jesús tegma appagkanamap natámen xa. Neyseksa apkelxekmóso énxet'ák axta m'a, apya'awa axta apkelámha apmonye'e nak appasmo apkelmaxnéseso Dios énxet'ák apagkok, tén han ma'a judíos apkelámha apmonye'e apagkok nak. Aptahak axta apkelmaxneyeyncha'a s'e:

—¿Yaksak eyásenneykha exchep eltémo elának xa aksok nak? ¿Yaksak ekméso apmopwána?

24-25Aptahak axta apchátegmowágko Jesús se'e:

—Peyk ko'o xa almaxneyha kéxegke: ¿Yaksak axta eyáphaso Juan yakwayam eyakpásesagkok yegmen énxet? ¿Diosya axta apcháphaso, énxet'ák enxoho axta eykel'a apcháphaso? Elátegmowágkek agkok kéxegke, altennaksek sat ko'o eñamakxa nak sekmowána alának xa.

Aptahak axta apkelpakhetchásekpoho s'e: “Nentemék agkok negátegmowágko Dios apcháphaso, keñe sat etnehek hegána', ‘¿yaksak ektéma kélya'aseykmo axta aptémakxa axta apkeltenneykha?’ 26Magwanchek nahan anxének ektaha énxet apcháphaso Juan, negakak negko'o énxet'ák, hakte apyókxoho énxet melya'aseykmok aptaha Juan Dios appeywa aplegaso.” 27Aptahak axta apkelátegmowágko énxet'ák se'e:

—Magya'ásegkok.

Keñe axta anhan aptaha apchátegmowágko Jesús se'e:

—Maltennaksek nahan ko'o xa eñamakxa sekmowána alának xa.

Jesús apyetcháseykekxoho apkánet apketchek énxet

28Aptahak axta apkelmaxneyeyncha'a Jesús se'e:

—¿Háxko katnehek kéxegke elchetamso kélwáxók se'e peya nak axének? Apkánet axta apketchek xama énxet. Aptahak axta apcháneya xama apketche s'e: ‘Emhok hana etneykha m'a seneykekxexa nak ko'o anmen yámet.’ 29Aptahak axta apchátegmowágko apketche s'e: ‘¡Mamokok axog!’ Keñe axta apyakmagkasa elchetamso apwáxok, apxegkek axta anhan. 30Apya'aweykxeyk axta anhan apyap pók apketche, hawók axta anhan aptahakxa apcháneya. ‘Hoy, axog sat’, axta eyke aptahak apchátegmowágko m'a, keñe axta mexña. 31¿Yaksak axta apkelyahákxoho aptahakxa appeywa apyap xa apkánet nak?

—Cham'a apmonye exchek —axta aptahak apkelátegmowágko xa énxet'ák nak.

Aptahak axta apkeláneya Jesús s'e:

—Apmonye'e sat elántexek aptémakxa Wese' apwányam Dios ma'a énxet'ák apkelmomo nak selyakye yakwayam egkések wese' Roma, tén han ma'a kelán'ák ekyakmagkáseyak nak pók énxet ekpathetéyak ektegye selyakye. Axayok sat eyke kólántexek kéxegke. Nakso' xa sektahakxa nak seláneya kéxegke. 32Hakte apwa'ak axta Juan el Bautista apkelxekmósa kéxegke eyéméxchexa nak kóltehek nápakto' Dios, kélya'aseykmek axta eyke; keñe axta melya'aseykmo m'a énxet'ák apkelmomo nak selyakye yakwayam egkések wese' Roma, tén han ma'a kelán'ák ekyakmagkáseyak nak pók énxet ekpathetéyak ektegye selyakye.#Lc 3.12; 7.29-30. Wánxa agkok, kélwetayók axta eykhe kéxegke ekyókxoho xa, axta eyke kólyakmagkasók ektémakxa elchetamso kélwáxók yakwayam megkólya'aseme'.

Jesús apyetcháseykekxoho énxet'ák ekmasagcha'a apkeltémakxa apkeltamheykha

(Mr 12.1-12; Lc 20.9-19)

33“Kóleyxho hana s'e mók sekyetcháseykekxoho nak: Apkenákxeyk axta xama wese' anmen yámet namyep apagkok,#Is 5.1-2. aphaxtegkesek axta anhan neyáwa; apkelanak axta anhan apkelyakhapmakxa anmen yámet ekyexna, apkelanak axta anhan tegma netno' yakwayam enxoho elanha, keñe axta apmasásencha'a xóp apagkok ma'a énxet'ák ekha axta apkeltamheykha yakwayam etakmelchesek, keñe axta apxega apmahágko mók nekha. 34Xama axta ekwokmo ekhem eknakxamáxchexa ekyexna, apkeláphásek axta apkelásenneykha wese', yakwayam enxoho elmaxnak ektaha apkeltamheykha namyep ma'a ekyexna ektahakxa enxoho apagkok. 35Wánxa agkok, apkelmeyk axta eyke énxet apkeltamheykha xa wese' apkelásenneykha nak; apchakháha axta xama, keñe axta apchakha m'a pók, keñe axta anhan apkelyetna'a meteymog ma'a pók. 36Apkeláphásekxeyk axta makham apkeláneykha xa wese' nak, apxámásók axta apkeláphaso, axta kaxnawok ma'a sekxo' axta: wánxa agkok, hawók axta eyke anhan aptemésesakxa énxet'ák apkeltamheykha xa apyókxoho nak.

37“Keñe axta apcháphasa anhan apketche. Entahak axta elchetamso apwáxok se'e: ‘Yeykpok sat eyke ko'o hatte.’ 38Xama axta apwet'a apwokmo wese' apketche xa énxet'ák ektaha axta apkeltamheykha, aptahak axta apkelpakhetchásekpoho s'e: ‘Cháxa peya nak exkekxak xóp xa; agakhek, keñe sat negko'o anxewekxak xóp apagkok.’ 39Apmákpek axta xa wese' apketche nak, kélya'ásek axta neyáwa kélcheneykekxexa anmen yámet, kélakhegwokmek axta nahan ma'a.

40“¿Háxko sat etnésesek wese' ektaha apagkok xóp kélcheneykekxexa anmen yámet xa énxet'ák apkeltamheykha nak, cham'a apkexyekmo sat? ¿Háxko ektahakxa elchetamso kélwáxók kéxegke?

41Aptahak axta apkelátegmowágko énxet'ák se'e:

—Elnápok sat wese' yetlo megkamopyósa elanok xa énxet'ák elmasagcha'a nak apkeltémakxa, keñe sat emásesha xóp kélcheneykekxexa anmen yámet ma'a pók énxet'ák apkeltamheykha nak. Egkések sat eyke wese' aksok ekyexna apnakxéyak ma'a ektahakxa enxoho apagkok ma'a wese', cham'a ekwokmo enxoho ekhem eknakxamáxchexa.

42Aptahak axta apkeláneya Jesús énxet'ák se'e:

—¿Yagkólyetseteyk makham kéxegke eknaktáxésamaxche ektéma nak ekxeyenma s'e?

‘Tamhákxeyk kaxwo' meteymog

kélmámenyého kólmaha m'a

meteymog apyamasma axta énxet'ák

apkeláneyak nak tegma.

Cháxa apkelana axta Wese' egegkok xa,

payhekxeyk egwáxok negko'o negwet'a.’#Sal 118.22-23.

43Ekeso eñamakxa seltennasa nak kéxegke peya kólwatésesek kélteme kélpáxakxo m'a aptémakxa nak Wese' apwányam Dios, keñe sat exkekxak ma'a énxet'ák aptekkesamo nak ekyexna apkelhaxanma nak Dios. 44Nápakha'a apketkók sat etnehek énxet aptegwa'a enxoho xa meteymog nak; keñe sat ektaha enxoho meteymog ektegweykta, kakpelkohok sat.

45Xama axta apkelleg'a apkelámha apmonye'e appasmo apkelmaxnéseso Dios énxet'ák apagkok ektahakxa apyetcháseykekxoho Jesús, tén han ma'a énxet'ák fariseos, apkelyekpelchágwokmek axta apkelxénágko Jesús xa énxet'ák nak. 46Keñe axta apmoko eykhe emok, apkelakak axta eyke, hakte apxámok axta énxet apteme mey'áseyam Jesús aptaha Dios appeywa aplegaso.

Currently Selected:

SAN MATEO 21: LEGN

Highlight

Copy