SAN MATEO 19

Jesús apkeltenneykha ektémakxa negyamasma entáwa

(Mr 10.1-12; Lc 16.18)

1Apxegkek axta Jesús apkeñama yókxexma Galilea natámen apkeltenneykha, apwokmek axta yókxexma Judea, ekpayho nak ekteyapmakxa ekhem, mók nekha wátsam Jordán. 2Apxámok axta énxet apyetlákxo, apkeltakmelchesekmek axta nahan apkelháxamap ma'a.

3Nápakha fariseos axta apyo'ókmok Jesús yakwayam ékkónek. Aptahak axta apkelmaxneyeyncha'a s'e:

—¿Hẽlhoya agyenyók entáwa megkalcha enxoho egwáxok ektahakxa?

4Aptahak axta apchátegmowágko Jesús se'e:

—¿Yagkólyetseteyk kéxegke ektémakxa nak ekxeyenma eknaktáxésamaxche m'a aptaha axta apkelané kéxegke sekxo' agko', ‘apkelanak axta énxet tén han kelán'a’?#Gn 1.27; 5.2. 5Aptahak axta anhan Jesús se'e: ‘Ekeso eñamakxa peya nak ényók cha'a apyap énxet, tén han ényók ma'a egken, yakwayam enxoho épetchaha m'a aptáwa, xama nahan katnekxak xa ánet nak.’#Gn 2.24. 6Kamaskok ektaha ánet, xama katnekxa'. Ekeso eñamakxa megkeyméxko nak kéxegke kólyenyókasek mók ma'a Dios apyepetcheso nak.

7Aptahak axta apkelmaxneyeyncha'a énxet'ák se'e:

—¿Yaksak ektéma apkeltémo axta Moisés kólmések kelán'a weykcha'áhak ekxeyenma negyamasma entáwa, keñe kólaphaksek?#Dt 24.1-4; Mt 5.31.

8Aptahak axta apkeláneya Jesús se'e:

—Kalyéha'ak kélwáxók kéxegke, ékeso eñamakxa apchahayo axta aksa Moisés kólyenyók kéxegke kéltáwa; axta eyke katneyk sekxo' agko' xa ektaha nak. 9Wánxa agkok, eltennásek ko'o kéxegke ektahakxa enxoho kélyamasma kéltáwa, megkatnaha enxoho elánegwayam pók énxet, keñe emekxak ma'a mók kelán'a, kéltawáseyha elyamhopma kéltaha enxoho xa.#Mt 5.32; 1 Co 7.10-11.

10Aptahak axta apkeltámeséyak apcháneya Jesús se'e:

—Temék agkok sẽlyamhopma xa ektaha nak, tásek mantegyek entáwa.

11Aptahak axta apchátegmowágko Jesús se'e:

—Háwe apyókxoho énxet apmopwána ey'asagkohok se'e, wánxa m'a ektahakxa enxoho apméso Dios yakwayam ey'asagkoho'. 12Yetneyk ektémakxa megkahayo nak etegyek aptáwa énxet: nápakha énxet cha'a mopwanchek etegyagkok apnakteyegka'a eñama m'a sekxo' appaleykmo, yetneyk nahan ma'a énxet ektaha nak kélteméseso megkalmopwancha'a etegyagkok apnakteyegka'a, yetneyk nahan nápakha énxet megkamopwancha'a nak etegyagkok apnakteyegka'a eñama apkelyetlo m'a aptémakxa nak Wese' apwányam Dios. Enxet apmopwána enxoho ey'asagkohok xa, ey'asagkoho'.

Jesús apkelmaxnéseso aksok eltakmela sakcha'a létkók

(Mr 10.13-16; Lc 18.15-17)

13Kélnaklókasakmek axta Jesús sakcha'a létkók, yakwayam enxoho enegkenek apmék étseksa'ák elmaxnésesek; wánxa agkok, apkelpakhetchesek axta Jesús apkeltámeséyak ma'a énxet'ák ektaha axta apnaklo apketchek. 14Aptahak axta Jesús apkeláneya apkeltámeséyak se'e:

—Kólho hey'ótak sakcha'a létkók, nágkólnókasha, hakte appáxakweykmek aptémakxa nak Wese' apwányam Dios énxet'ák aphawo nak se'e sakcha'a létkók nak.

15Apnegkenchek axta apmék Jesús étseksa'ák sakcha'a létkók apkelmaxnésesa, keñe axta apxega.

Xama wokma'ák ekxákma aksok apagkok appakhetcheso Jesús

(Mr 10.17-31; Lc 18.18-30)

16Apyo'ókmek axta xama wokma'ák ekxámokma aksok apagkok Jesús. Aptahak axta apkelmaxneyeyncha'a se'e:

—Sẽlxekmóso, ¿Yaksak aksok ektakmela eyéméxko ko'o alának yakwayam ótak ekyennakte egkenyek megkatnegwayam enéxa?

17Aptahak axta apchátegmowágko Jesús se'e:

—¿Yaksak ektaha selmaxneyeyncha'a nak xép ma'a aksok eltakmela nak? Wánxa eyke xama apyetna m'a aptaha nak aptakmela. Apmenyék agkok xép etxek ma'a ekyennaktamakxa nak egnenyek, elyahakxoho sat apkeltémókxa nak antehek Dios.

18—¿Háxko ekteme m'a? —axta aptahak apkelmaxneyeyncha'a xa wokma'ák nak.

Aptahak axta Jesús apchátegmowágko s'e:

—‘Nágyakha pók,#Ex 20.13; Dt 5.7. ná etwasha elyamhopma,#Ex 20.14; Dt 5.18. ná emenyex,#Ex 20.15; Dt 5.19. ná etne aksa apmopwána amya'a exének pók,#Ex 20.16; Dt 5.20. 19etne apcháyo apyap, tén han ma'a egken,#Ex 20.12; Dt 5.16. yásekhoho pók ekhawo ektémakxa nak apchásekhamakpoho apagko' xép.’#Lv 19.18.

20—Ektemegkek ko'o ekyókxoho xa, —axta aptahak wokma'ák— ¿Yaksak eyéméxko kaxwo'?

21Aptahak axta apchátegmowágko Jesús se'e:

—Apmokók agkok xép etnehek appéwomo, exeg, ekxeykxa m'a aksok apagkok ekyetna nak xép, elmésák ma'a énxet meyke nak aksok apagkok, keñe sat keytek ekxákma aksok apagkok xép ma'a néten. Keñe sat exyók, hétlawha sat nahan.

22Xama axta apleg'a wokma'ák xa, kelapwámegkakxék axta aptakhákxo, hakte xámok axta aksok apagkok.

23Keñe axta aptaha apkeláneya Jesús apkeltámeséyak se'e:

—Askehe' yakwayam etxek énxet ekxákma aksok apagkok ma'a aptémakxa nak Wese' apwányam Dios.#Pr 11.28. Nakso' xa sektahakxa nak sekpeywa seláneya kéxegke. 24Keñe yeskohok etxek yágyatnáxeg ma'a sóketáma aktek, keñe m'a énxet ekxákma nak aksok apagkok askehe' etxek ma'a aptémakxa nak Wese' apwányam Dios.

25Pelakkásók agko' axta apkelleg'a apkeltámeséyak xa. Aptahak axta apkelpakmeta s'e:

—¿Yaksak sat kawának kawagkasaxchek teyp?

26Apkelanawók axta Jesús, aptahak axta apchátegmowágko s'e:

—Mopwanchek ewagkasakpohok apagko' teyp énxet, Dios aksa apwanchek ewagkasek teyp.

27Aptahak axta apcháneya Pedro s'e:

—Negkexakkek axta negko'o ekyókxoho aksok egagkok, keñe negyetlawa exchep. ¿Yaksak sat anxawak negko'o?

28Aptahak axta apchátegmowágko Jesús se'e:

—Wokmek sat agkok ekhem yakwánxa katnekxak axnagcha'ák ekyókxoho aksok, cham'a apha sat néten aptaháno eyeymáxkoho#Mt 25.31. m'a aptaha nak Apketche énxet, kólhakha sat nahan kéxegkáxa doce taháno, kéxegke kéltaha nak sétleykha, yakwayam enxoho kóltehek kélyekpelchémo m'a doce pók aptémakxa nak énxet'ák Israel.#Lc 22.30. Nakso' xa sektahakxa nak seláneya kéxegke. 29Kéxegke ektahakxa enxoho kélyamasma kélxagkok, kélyepma, kélyáxa, kélyepmeyk, kélchána, kélketchek, xóp kélagkok esenhan, eñama selyetlo ko'o, kayeykhágwomhok sat kélxawé aksok, kólxawak sat nahan ekyennakte kélnenya'ák megkatnegwayam enéxa. 30Wánxa agkok, kónegók sat eyke kóltemesásekxak nápakha énxet apteme nak apkelámha apmonye'e keso kaxwo' nak, keñe sat kóltemesásekxak apkelámha apmonye'e m'a nápakha énxet apteme nak kónegók keso kaxwo' nak.#Mt 20.16; Lc 13.30.

Currently Selected:

SAN MATEO 19: LEGN

Highlight

Copy