Hilassi Ergaano 7

Isiteefano jaldaab orche ka isiyeyyeeda

1Kuhaanihi weyti ween la wihi us Isiteefano worsate, “Waha lakaacheekti a rum a?” 2Waha ka wihi us laabe, “Yaafeey idagansada. Waakkhi weynaane tiis tahe, aabbaheenki Aburaaham layadeeh geeddi goorat archiiy us ilkerengeetti weene Haaran igelin, ili Messabotaamiya ka a isoobahe. 3Waakh wihi us Aburaaham iyidah, ‘Ilaah ichoow ꞌdooꞌdaah kaguure ili an kidowdowo iro.’#7:3 Uumaccho 12:1.

4“Aburaaham la ilaas kaguure ili Haaran furte. Inkoo aabbahiis buje ka, Waakh ilaas kaguuriche ila toolla atin taalliin furte. 5Waakh harratoo rucchule us alaassati ma siin, iꞌdaasenyi chirri Aburaaham weel ikhabin laka, harrataas usu ichoow nyaakhut nyaakhutiis alaal ka a igooche. 6Waakh wihi us Aburaaham iyidah, ‘Nyaakhutaah ꞌdee berri iloo yeelane gela, ilaas ka la guꞌh kud affar iche bowꞌda yateehe weyti la sina lakawaaricha. 7Iꞌdaasenyi an ili icho bowꞌdaticho keeheet sina tusa. Yomboka ilaas a kasoobahaane, yamiitiine inta ka ani iwahtaan.’#7:7 Uumaccho 15:13-14. 8ꞌDeerka ayyinti Waakh Aburaaham igooche a ti mejel lakhandiyo. Aburaaham la Isakh dele ibeenki siyyeennaatteet ka khandiye. Isakh la Yaakoobo dele Yaakoobo la yaafoheenki tomon ichoow lammee uume.

9“Aacchinyeteentaas la walaalichoki Yuussuf layadeeh inaafte ili Miissiri iororisse, ilaas ka bowꞌda yitah. Iꞌdaasenyi Waakh Yuussuf a leejire, 10sinayyohiis tuumman karibe. Waakh la Yuussuf khara siiche Faraawohi karnati ili Miissiree jilhaache, ꞌdeerka ili Miissiri ichoow urantiis tuumman iweynaache.

11“Maantooka abaare ꞌdeerka ili Miissiri ichoow ili Kaanaan leekahte, sina buuraatte, aacchinyeteen laka golol waayte. 12Maanti Yaakoobo saggi golol ili Miissiri ikajiro daage ka, yeeletiisti aacchinyeteene kolooraat ili Miissiri ierge. 13Maanti lammaatteete iche toro ili Miissiri imuuꞌdde ka, Yuussuf walaalinyetiis isicheeke, Faraawo laka Yuussuf goobicho abte. 14Waha ꞌdubicho ka Yuussuf aabbahiiski Yaakoobo layadeeh ichoow minkicho tuumman ili Miissiri isoowahe. Ichohi sooguure isgoya a et tomon teeba ichoow et chan. 15Yaakoobo ꞌdeerka goobiis tuumman khabaayi ili Miissiri ikhubte. Intaas ka usu ichoow aacchinyeteen yumaateen. 16Sarticho lakhaate inti ilkerengeetti Cheekem layadeeh ka, goꞌddi goorat Aburaaham yeele Haamor kasoogatte lakahawwaale.

17“Maanti ibeenki Waakh ayyinti us Aburaaham igooche buuhicho soodowwaate ka, ꞌdooꞌdeen ili Miissiri ka weyti kakhayme. 18Karnatoo addane Yuussuf ichoow wihiis tuumman igaran la ili Miissiri ka soobahe. 19Ulla aacchinyeteen weyti sina kawaariche, toro ekkeeste, nyaakhutichoki ladele icho khar isoorogaane ꞌdee tuumo ihosse.

20“Maantaase Muusa desse. Ulla weyti haagganeet. Goobicho ka hay seyyah mujjum lawoywoye. 21Maanti khar liisoobahche ka, inám Faraawo khaatte iꞌdi weelichuu weyneysatte. 22Muusa la kharati ꞌdooꞌdi Miissiri laabche, etoo harrab ka ichoow walah tuumman ka atah yitah.

23“Maanti us guꞌh tomon affar eleele ka, ꞌdooꞌdiiski Issiraayele us idaahicho gooche. 24Etoo Miissiri koo Issiraayel il itakho arge, ꞌdeerka ki Issiraayel igele, aal gutte ki Miissiri yigis. 25Muusa kol ꞌdooꞌdiis saggi Waakh usú isooerge, usu icho iribo ikaso koogyahe, iꞌdaasenyi icho ma kasin. 26Ibeenki kaas sooraaho ka, Muusa reeroo lammeenye Issiraayele isjaho arge, isineybin leheete, ‘Era, atin a walaal, a iꞌdoh isgaameerin iꞌdoontaan?’ iyidah.

27“Iꞌdaasenyi eti kootte ki addan gaameero Muusa ꞌdol itakhe, ‘Ayyo eti nah iween ichoow eti nah hukkumo kaayeele?’ iyidah. 28‘Saggi at chele eti Miissiri itigisye ani laka ogoos iꞌdoonta?’ 29Chirri Muusa yeedaas daage ka, ili Miidiya ifirde. Inkoo us intaas geeddoo fiddiye ka ínam lamma dele.

30“Inkoo guꞌh tomon affare kutte ka, herti Waakh Muusa hidaaddi Hali Sinnaay ka isoobahte. Saggi iche ikasoobahte la a geeyi ꞌdab kabolkho toro ꞌdab iumhan. 31Muusa chirri us waha arge ka wahaas kagirmeeste. Chirra us meel isohti, us mujjum fiiricho ka, hooyi Kamur daage. 32‘Ani a Waakh aacchinyetaahha, a Waakh Aburaaham ichoow Isakh ichoow Yaakoobo.’ Muusa nahtim ka harme intaas yeyin laka karoore.

33“Kamuri Waakhe ꞌdeerka wihi us Muusa iyidah, ‘Kobohaah duumi, a mehe inta at tolosso a harrati lagan. 34Rumanka sinati ili Miissiri ka ꞌdooꞌdeey lakawaaricho a arge, ooytinticho la a daage. Toolla la a isooyage icho riba. Toollaka kaale ati ili Miissiri toro kiergadaa.’

35“Waha a Muusahi goorat icho ꞌdiiꞌdeene, icho, ‘Ayyo eti nah iween ichoow eti nah hukkumo kaayeele?’ idoween. Herti Waakhe geeyi gubti goyaka isoobahte ka, Waakh rubeytiis usu a ergate eti icho iween ichoow eti icho soofuro kayeele. 36Muusahaase ꞌdooꞌd ili Miissiri kasoobahche. Usuhaas on guꞌh tomon affar tuummamba girmo ichoow wahanyeyyohi miigti Waakh tuso ili Miissiri ka ichoow Beyti Buurenye Guuꞌddan ka ichoow hidaad ka haaggiche.

37“Muusaha a ki goorat ꞌdooꞌdi Issiraayel, ‘Waakh ꞌdee berri etiinkoo Waákh íyeyyeedo iꞌdeye a atin isooerga,’ iyidah.#7:37 Deewutoronomi 18:15. 38Maanti ꞌdooꞌdi Issiraayel hidaad ka iskafurte, Muusahaase leejire. Muusahaase Hali Sinnaay ka, Waakh iꞌdi herti Waakh u isoobahe, leeyyeede. Ulla Waakh ichoow aacchinyeteen dahcho kajire. Muusa la Yeedi Waakhe jirtuu tuumman imassan Waakh kaꞌhele inno laka inno isookucche.

39“Iꞌdaasenyi aacchinyeteen Muusa a daagiwwaayte, usu ꞌdiiꞌdde uurassicho ka ili Miissiri iche inokhatti dowdowte. 40Aacchinyeteen wihi iche Haruun itidah, ‘Iyookkoyyohi waakkhi orteenyo raaho nah ihaaggi. Iꞌdi tahe wihi Muusahi goorat ili Miissiri nah kasoobahche kayitah ma garanni.’ 41Maantaase iyookkotoo iꞌdi maartoo u haaggicheene, iyookkotaas soorriyo igoorraheen. Wihi icho dahanohicho ka haaggicheen inkaanyiteene kahamaadeen. 42Iꞌdaasenyi Waakh icho adah kakhabte ꞌdiiche, yiyyihimo Waakh kayeesseene, wahteen. Waha ichoow wihi buuggoo etoo Waákh íyeyyeedo chiire a israahaan.

“ ‘Minki Issiraayeloow, soorriyoyyohi atin guꞌh tomon affar

hidaad ka goorrahteen, ani igoorrahteen?

43Atin minki waakkhi beenaate Mooleg layadeeh

ichoow yiyyihintiinti waakh lakayeessi Reefan layadeeh iche siꞌddeen,

icho a iyookkoyyohi atin haagsatteene ꞌdee atin wahattaan.

Maantaka an a atin baabiicha ili Baabiloon ꞌdirihiis atin liibooliya.’

44“Aacchinyeteen goorat hidaad ka eemati saggi Waakh ileejiro tusso iche khabte sissiꞌdatte. Eemataas saggi goorat Waakh Muusa ihaaggi iyidah on liihaaggiche, toro iyookkoti goorat Muusa arge on lakahaaggiche. 45ꞌDaꞌddaboka aacchinyeteen eemataas ooyenyeticho kakhaatatte. Maanti iche Yoochuwa raahte, ili iche gelaan eemataas a isitteen. Waakh la orcho raahe yaafohi Waakh igaranne ilaas kajire rihe. Eemataas la ichoowka geeddi karnati Dawuud layadeeh jire tuumman ilaas a kasooꞌhadde. 46Waakh la weyti Dawuud a jilhaate. Dawuud la usuhi Waákh Yaakoobo fiddiito iyeelo daahe. 47Iꞌdaasenyi Soolomone Waákh min idise.

48“Iꞌdaasenyi Waakkhi Weyti Ween minki dahanohi enenyet diseen ma fiddiyo, iꞌdi ꞌdooꞌdi Waákh íyeyyeedo yadeeh u,

49“ ‘Sereye a komborteeyti buurenye antoote,

harra la a komborteeyti rucchule an luhlo korcho.

Minki iꞌdohenye idissaan?

iche Kamur essa.

Ommos inti an kanaso a intoh?

50Dahanohaaya on menya waha tuumman haaggiche?’

51“Atin a matah miig mehe? Uurassiin ichoow dogtiin a iꞌdi wihi ꞌdooꞌdi Waakh ikakhuufin. Atin a iꞌdi aacchinyetiinna, kol dakkhan Rubeyti Munyeenye tirrintaan. 52Eti Waákh íyeyyeedo aacchinyetiin sina iomhin a jira? ꞌDooꞌdi emeetti Eti Fissan cheeke laka a bakkisseen. Atin la usu ꞌdub a goosseene toro la dubunuunu tigaaseen. 53ꞌDooꞌdi goorat herti Waakh ka amurre liikeene a atine, iꞌdaasenyi atin amurretaas ma raahin.”

Isiteefano laseya layagiis

54Jaldaabe chirri iche waha daagte ka weyti hollowte, ichoowka indo gugguꞌduutteen. 55Iꞌdaasenyi Isiteefanohi chirraas Rubeyti Munyee buuhto, goobi Waakh serey iyeye, Waakkhi ababo arge, Yeessohi Waakh anki dahantiisti miigeet toollo arge. 56Wihi us yidah, “Yeya, goobi Waakhe furane Ínam Aadam usuhi Waakh anki dahantiisti miigeet toollo a arga.”

57Iche la weyti riirte, farro nabho isgelisse. Chiꞌiche nabho farro isgelisse ka iche tuummamba Isiteefano ioriite, 58khaatte, ilkerengeet khariche ijiitte, dagah ka saate. ꞌDooꞌdi gar laabe etoo nugule intaas kajire Saawulo layadeeh darfohichoki oroot tuumman ikatabeen.

59Geedda Isiteefano dagah lakachibo layagiis, usu Waakh on wahta, wihi us essi, “Yeessohi Kamure, rubeyteey a kitimaate.” 60Ulla jilbo il kaguꞌdde weyti riire, “Kamur! ꞌDooꞌda uskeela aleeraahin” yidah. Uus yeedaas massiche on rubey gooche, yumuy.

Currently Selected:

Hilassi Ergaano 7: rel

Highlight

Copy