Hilassi Ergaano 8

1Saawulo laka intaas a kijire, ullaka Isiteefanohi layagiis a ayyiche.

Saawulo urur Kiriistoki ilkerengeetti weene Yeerusaleem sina kawaaricha

Maantaas on urur Kiriistoki ilkerengeetti weene Yeerusaleem kajiro sinati weyti loomhicho lasookhabte. Ergaano on menye, ꞌdooꞌd Kiriisto tuumman ilassi Yaꞌhuudiya ichoow ki Saamariya iche liitaaꞌhiche. 2ꞌDooꞌdoo Waakh karooro Isiteefano khaate hawwaale, toro weyti kooyeen. 3Iꞌdaasenyi Saawulo urur Kiriisto massin ꞌdoona, kolba minkoo gela mejel ichoow deyyeho sookhabta sookhaata jeela gessa, hida.

Fiilif Wori Haaggan ilkerengeetti Saamariya ka cheeka

4ꞌDooꞌda taaꞌhe la a irte, Wori Haaggan enenyet tuumman icheeke. 5Fiilif a khubte ilkerengeetti weene ili Saamariya irte wori Ki Lasubhe miinsan intaas ka cheeke. 6Ururi mujjum Fiilif dagansate, wahanyeyyohi ittaawenye miigti Waakh tuso us yeelo arge tuumman la, waha Fiilif essi raahe. 7ꞌDooꞌdi ittaawenye ginnayyo dakhtaan, riirit ka ginnayyo kabaheene, ꞌdooꞌdi sare hanjaawte ichoow ꞌdooꞌdi luhlo laa laka a lasamaache. 8ꞌDeerka ilkerengeettaas tuumman a hamaad kaldach on.

9Etoo Siimon layadeehe ilkerengeettaas ka moreenye, ꞌdooꞌdi ili Saamariya tuumman weyti girmaache a jira. Ulla a isatahnooche etoo khumman iskayeele. 10ꞌDooꞌdi ilkerengeeteet tuumman, ki wewween ichoow ki nunnugul laka yeediis a raaha, toro la mehe yadeehiin ya, “Eta a miigti Waakhe miigti buure layadeeh.” 11Wihi icho karaahaan la a jeenteti us goycho ka geeddi deer morotiis ka girmo iyeele. 12Iꞌdaasenyi chirri icho Wori Haaggane dakhi Waakh ichoow Yeesso Kiriisto miinsane Fiilif cheeko rummeesteen ka, mejel ichoow deyyeho ba labaattissiye. 13Siimon laka awtiis u Yeesso rummeeste, inkoo labaattissiye ka Fiilif meel tuumman leeirte. Wahanyeyyohi miigti Waakh tuso ichoow wihi ittaawenye weeli enenyet yeelin iubaaꞌdane us arge kagirmeeste.

14Ergaanoti ilkerengeetti weene Yeerusaleem kajirto maanti iche saggi ꞌdooꞌdi Saamariya kajiro Yeedi Waakh iraaho daagte ka, Beetero ichoow Yoohana Saamariya ieregte. 15Iche la timiyye iꞌdoo ꞌdee ꞌdooꞌdaas Rubeyti Munyee iꞌhelo u, ꞌdooꞌdaas Waakh iwahte, ꞌdooꞌd la Rubeyti Munyee ꞌhele. 16Iꞌdi tahe ꞌdooꞌdaas magah Yeessohi Kamure on lakabaattissiye menye, Rubeyti Munyee uliba ma isooyagin. 17ꞌDeerka Beetero ichoow Yoohana ba dahano korcheene, ꞌdooꞌd la Rubeyti Munyee ꞌhele.

18Siimon la ergaanoti dahan enenyet korisso enenyetaas Rubeyti Munyee ꞌhelo arge, ergaano chilimme a atin siicha iyidahye, 19toro “Ani laka miigtaas isiicha, ꞌdee eti an dahan korcho tuumman Rubeyti Munyee a ꞌhelo,” iyidah.

20Beetero wihi us ilaabe, “Chilimmetaah a kileebaabaato. Wihi tahe at wihi Waakh kisiicho, kol at chilimme kagatatti, iche koogtahe. 21At hileenyo ka meessoor rucchul laka ma khabto, a mehe uuraah Waakh ortiis ka ma fissanee. 22Uskeela kasoonokho, Kamur waho. Kolossoo ꞌdee Kamur mala suujenye at uuraah kakhabto ikaakutaayi. 23Wihi at tahe an kaargo, a atihi inaaf lehe, rubeytaah la uskeel kalday on anti.”

24Siimon la wihi us ilaabe “Kamur isoowah uus wihi at itidah iraahinee.”

25Inkoo icho walah tuumman ꞌdooꞌd tuseene icho Yeedi Kamur cheekeen ka, ilkerengeetti weene Yeerusaleem inokhteene, goobassi ittaawenye ilkerengeetti Saamariya kijiro ka Wori Haaggan ꞌdooꞌd abcheen.

Fiilif eti ili Saaꞌdaame Yeesso rummeeste baattissiya

26Hertoo Kamur la wihi iche Fiilif itidah, “Sookahe, gurro tabe, jiti ilkerengeetti weene Yeerusaleem kakhubti ilkerengeetti Gaasa irti isoho.” Waha la a jiti hidaadeet. 27Ulla kahe irte. Jit ka etoo ili Saaꞌdaame sangꞌee ꞌhele, ulla a etoo khummane chilimmeti makhaabassi karnatenye ili Saaꞌdaam dakhatti Kandake layadeeh tuumman khuccho. Ulla ilkerengeetti weene Yeerusaleeme irte, Waakh wahte. 28Ulla garruhi faraꞌde jiitto kafiddiya, iliissa inokhta, chiirnaanneti eti Waákh íyeyyeedo Isaaya layadeeh chiire, iche sooma. 29Rubeyti Munyee la wihi iche Fiilif itidah, “Nyaame, garruhaas faraꞌde jiitto haggahiis fiddi.”

30Fiilif ꞌdeerka garruhi faraꞌde jiitto inyaame, et usuhi buuggi eti Waákh íyeyyeedo Isaaya layadeeh chiire soomo daage. Fiilif wihi us worsate, “Waha at soonto a kigelaan?”

31Ulla wihi us ilaabe, “Chirri etoo ikasoodowdowin saggoh igardi?” ꞌDeerka Fiilif wahe, ꞌdee garruhi faraꞌde jiitto a koro garabiis a orronti.

32Eti sangꞌee Chiirnaanneti Waakh goyaka wahane soome,

“Usu iꞌdi naffi iiyyaate inti lakagoorraho liiwoyuu,

toro la iꞌdi heleenki tim lagoggoocho iyeedin u,

afiis ma bukkhin.

33Maanti lakhaanyo lakadowe, jiti fissan ka ma lahukkumin.

Et nyaakhut nyaakhutiis kaayyeedo mele.

A mehe jirotiis harrata ka a lakakhaate.”#8:33 Isaaya 53:7-8.

34Eti sangꞌee wihi us Fiilif worsate, “Bal isoocheek, eti Waákh íyeyyeedo awtiissa kayeyyeeda bal etoo addan?” 35Fiilif ꞌdeerka chiirnaankaas Chiirnaanneti Waakh on kasookhabte, Wori Haaggane Yeesso miinsan icheeke.

36Jit ka ꞌdulaani bicchehoo ꞌheleene eti sangꞌee la wihi us yidah, “Yey, bicche kallaayo! A iꞌdoh ani liibaattissiyin?” #8:36 Chiirnaanneti Yeedi Waakhe uumacchee gaasoo mehe tadeeh ya, 37 “Fiilif la wihi us iyidah, ‘Chirri uuraah tuumman ka at Yeesso rummeysatte, a lakibaattissiya.’ Eti sangꞌee wihi us ilaabe, ‘An saggi Yeesso Weeli Waakh iyahe a rummeesda.’ ” 38Ulla amur bahche garruhi faraꞌde jiitto a latoollicho. Fiilif ichoow eti sangꞌee ba bicche goya iyageene Fiilif la usu baattissiye. 39Chirri icho bicche kasookoreen ka Rubeyti Kamur Fiilif chirraas on khaatte, eti sangꞌee la toro Fiilif ma argine, iꞌdaasenyi usu hamaad ka jitiis tabe. 40Iꞌdaasenyi Fiilif inkoo us ilkerengeetti Assotos ka issookase ka, ilkerengeeto tuumman dah kagooche, Wori Haaggan cheeke ichoowka Kaaysareya eleele.

Currently Selected:

Hilassi Ergaano 8: rel

Highlight

Copy