Hilassi Ergaano 9

Saawulo Yeesso rummeesta

(Hilassi Ergaano 22:6-16, 26:12-18)

1Geeddaas tuumman la Saawulo abattiti Kamur uliba ogoose ꞌdoona. Kuhaanihi weyti ween iirte, 2ulla khaadaabbeti us ꞌdooꞌdi minassi weysiite ilkerengeetti Damaasko iwewween ileeirti ꞌdee eti us yahe cheekto daahe. ꞌDeerka chirri us ꞌdooꞌdi jit Yeesso raaho ꞌhele, mejel ommos deyyeho eheetteey ka ba, a sookhabta ilkerengeetti weene Yeerusaleem keena. 3Chirri us ilkerengeetti Damaasko idowwaate ka, koloo kalday on banay serey ka soobaheene ankhadeen. 4Ulla il guꞌdde, hooyi, “Saawulo! Saawulo, at a iꞌdoh ani sina iomhissa?” idowo daage.

5Saawulo la wihi us worsate, “Kamur, at a ayyo?”

Kamur wihi us ilaabe, “An a Yeessohi at sina omhisso. 6Toollaka kahe ilkerengeet gele ꞌdee wihi at yeesso a lakicheeko.”

7ꞌDooꞌdi kootte usu walhicho yeyyeed agaafte. Hooyi yeyyeede a daageene, iꞌdaasenyi et icho argeen mele. 8Saawulo sookahe, iꞌdaasenyi chuꞌus indo bakkaahicho, walah us argo mele. Etoo ꞌdeerka dahan khabte angaamiche, ilkerengeetti weene Damaasko geeche. 9Maan seyyah tuumman il ma argo, ma golossati, wohoo rucchul laka ma yabhuub.

10Ilkerengeetti Damaasko ka etoo abatti Kiriisteenye Anaaniya layadeeh a jira. Kamur la fooltabcho ka wahe “Anaaniya,” iyidah.

Wihi us ilaabe, “Kamur an kalla.”

11Kamur la wihi us iyidah, “Kahe, ilkerengeet ka min Yuudaki jiti, Jiti Fissan layadeeh kajiro iro, etoo ilkerengeetti Taarso Saawulo layadeeh sooworso, iꞌdi tahe usu Waakhe wahtaa. 12Usu fooltabcho ka etoo Anaaniya layadeehe yimiyye usu dahan korche ꞌdee ulla il iargo a arge.”

13Anaaniya wihi us ilaabe, “Kamur, ꞌdooꞌdi ittaawe wori eta a isiiche, suujoonki noole us ꞌdooꞌdi Waakhe ilkerengeetti weene Yeerusaleem kijiro yeele a daage. 14Ulla antohi kuhaaniyyohi wewween siicheene us ebbaaw ati kiwahti us kakhabti leeyimiy.”

15Iꞌdaasenyi Kamur wihi us Anaaniya iyidah, “Nyaam iiro, iꞌdi tahe an usu a soobahsade, ꞌdee ulla yaafohi Yaꞌhuud ieheynan ichoow karnatteticho ichoow ꞌdooꞌdi Issiraayele woreey igeechaa. 16Anna sinati usu latuso jeenteti us keey iyahuu iche tusa.”

17Anaaniya ꞌdeerka irte minki Saawulo kajiro gele. Anaaniya la dahano korche, “Saawulo, walaalaaw, Yeessohi Kamurenye jit ka atihi inta isoosohatti kisoobahe iche isooergate, ꞌdee il agarta toro Rubeyti Munyee kibuuhissa,” iyidah. 18Chirraas on wohoo khadaabbee indo kasoodiheene, ulla il arge. Tolossate labaattissiye.

Saawulo ilkerengeetti Damaasko ka Yeedi Waakh cheeka

19Saawulo la inkoo us golossate ka, miigowe.

Ibeennetoo Damaasko ka abatti Kiriisto leejire. 20Dowwa on minassi weysiit irte, saggi Yeesso Weeli Waakh iyahe cheeke. 21ꞌDooꞌdi usu daage tuumman la weyti girmeeste, “Eta ki goorat ilkerengeetti weene Yeerusaleem ka ꞌdooꞌdi magaha waho ꞌdabbaacho menya? Ulla intane yimiyye ꞌdee icho hida, khaata kuhaaniyyohi wewween igeecha menya?” worsateen. 22Iꞌdaasenyi Saawulo jiti miige ka wori Waakh cheeke. Ulla wahanyeyyohi ittaawe ka saggi Yeesso rumanka Ki Lasubhe iyahe tuse, ichoowka ꞌdooꞌdi Yaꞌhuude Damaasko yaal malaliche.

Saawulo ilkerengeetti Damaasko kafirda

23Inkoo ibeennetoo kutte ka, ꞌdooꞌdi Yaꞌhuud Saawulo ogoos gooche. 24Iꞌdaasenyi Saawulo malicho abte. Ibeen ichoow maalim ba artohi ilkerengeeteete toorribaane ꞌdee usu yagiisiin. 25Iꞌdaasenyi ibeen ka ꞌdooꞌdi usu raaho usu enjeloo buure ka daddaabohi ilkerengeet kamarsan ka ꞌdohtoo gateene, il isoowoyeen.

Saawulo ilkerengeetti weene Yeerusaleem gela

26Saawulo chirri us ilkerengeetti weene Yeerusaleem yimiy ka, abatti Kiriisto ikhayin leheet. Iꞌdaasenyi iche tuumman usu weyti karoorte. A mehe usuhi rumanka abatti Kiriisto yitah ma rummeysatti. 27Iꞌdaasenyi Barnaba usu khaate ergaano Yeesso ikeene. Saggi sulhaassiis ka us Kamur iarge, Kamur usu ileeyyeede ichoow saggi us ilkerengeetti Damaasko ka roorro laan wor Yeesso icheeke laka ergaano icheeke. 28Saawulo ꞌdeerka ergaano wihi tuummane iche ilkerengeetti weene Yeerusaleem ka yeesse ka leejire. Ulla roorro laan wori Kamur cheeke. 29Ulla ꞌdooꞌdi Yaꞌhuude afi Giriig daago leeyyeede toro leeiriire, iꞌdaasenyi usu ogoos yowteen. 30Chirri ꞌdooꞌdi Kiriisto rummeeste waha abte ka, Saawulo khaateene ilkerengeetti Kaaysareya geecheene, intaas ka ilkerengeetti Taarso iergeen.

31ꞌDeerka urur Kiriistoki ilassi Yaꞌhuudiya ichoow Gaalilaaya ichoow Saamariya kajiro ba geeddoo ka sina laan nebey kafiddiyeen. Rubeyti Munyee la icho miigoosse, toro la uur miigoosse, toro ꞌdooꞌd laka kakhayme. Icho tuumman la Kamur karooreen.

Beetero Ayyenneya samaacha

32Geedda Beetero ilassaas tabe, us ꞌdooꞌdi Waakhe ilkerengeetti Ludda yaalle iirte. 33Intaas ka etoo Ayyenneya layadeehe sar tuumman hanjaawte guꞌh siyyeet siriir kajiife ꞌhele. 34Beetero la wihi us Ayyenneya iyidah, “Ayyenneya, Yeesso Kiriisto a kisamaacha, kahe ilaalaah khaat!” Ulla chirraas on sookahe. 35ꞌDooꞌdi tuummane ilkerengeetti Ludda ichoow ꞌdowhi Chaaron kajiro la Ayyenneya arge Kamur kakhuufe.

Beetero Tabiita omoot kasookahcha

36Ilkerengeetti Yooba ka makhaabassoo abatti Kiriisteenye Tabiita layadeeh a jirte. Magahiche afi Giriig ka a Dorkas. Afaf lammacho ka chiꞌ lalaabe a Hoól. Iche la kol tuumman ꞌdooꞌd wihi haaggane iyeesse, toro la miskiino gargaarte. 37Ibeennetaas ka khannatte, tumuyye, sartiche lamaaꞌde lakhaate min ka goonanki saraat lagesse. 38Yooba la ilkerengeetti Ludda ma kadeere, ꞌdeerka chirri abatti saggi Beetero ilkerengeetti Ludda ikajiro daagte ka, et lamma ergateene, hawwaasteene, “Bal dowwa nah sooeleel!” iyidaaheen.

39Beetero la icho raahe. Chirri us sooeleele ka, lakhaate goonankaas saraat lageeche. Deyyehoti ittaawenye muunkheyyee la intaase tolossa ooyta. Ubbaarreti derdeer ichoow kabuuꞌddeti iche geeddi iche jirte tosse, Beetero tuseen.

40Beetero la icho tuumman khar ibahche, jilbo il kaguꞌdde Waakh wahte. Makhaabassi bujje iurgiye wihi us iyidah, “Tabiita, sookah!” Iche la indo soobakkaahisse, chiꞌiche Beetero agarte ka soorrommatte. 41Ulla dahan sookhabte toolliche. ꞌDeerka muunkheyyo ichoow ꞌdooꞌdi Kiriisto rummeeste soowahe, ichehi nool dahanticho gesse. 42Yeedaas Yooba dakkhan kataaꞌhe, ꞌdooꞌdi ittaawe la Kamur rummeeste. 43Beetero la geeddoo ilkerengeetti Yooba ka min Siimonhi hili uktoot haaggicho fiddiye.

Currently Selected:

Hilassi Ergaano 9: rel

Highlight

Copy