Hilassi Ergaano 6
6
ꞌDooꞌdi teebeenye ergaano gargaaro lasoobahcha
1Saahka maanti tiri abatti Kiriisto kasookhayme ka, ꞌdooꞌdi Yaꞌhuude afi Giriig daago yaafohi Yaꞌhuude afi Ibiraaniya daago leeiriire. Wihi tahe muunkhoyyohicho gololi maan dakkhan enenyet lagiso ma ꞌhelaan. 2ꞌDeerka ergaanoti tomon ichoow lammee abatti tuumman isiwahte, wihi iche itidah, “Ma haaggan chirri nah Yeedi Waakh cheeknaan ꞌdiinno, ꞌdee nah golol ꞌdooꞌd gisno. 3Walaalinyeey, et teeba goytiin ka magah khabto, Rubeyti Munyee laka rubeyohicho buuhto toro la kharee soobahcha, hila a gelinno. 4Nah la ꞌdee awteenyuu, weysi ichoow hili Waakhe Yeedi Waakh lacheeko a gello.”
5Urur tuumman wihi ergaano tidah jilhaate. Etoo Isiteefano layadeehe, Rubeyti Munyee buuhisse toro Waakh weyti kakhuufo soobahsateen. Fiilif ichoow Burookoras ichoow Nikaanor ichoow Tiimon ichoow Barmena ichoow eti ilkerengeetti Antiyookhiya Nikolaawus layadeehe wihi ꞌdooꞌdi Yaꞌhuud wahti iurgiye laka soobahsateen. 6ꞌDooꞌda ergaano liikeene iche la iweysatte, toro la dahano korisse.
7Yeedi Waakh ꞌdeerka taaꞌhe orey isohte. Tiri abatti Kiriisto ilkerengeetti weene Yeerusaleem ka weyti kakhayme, kuhaaniyyohi ittaawe laka Wori Haaggan kakhuufeen.
Weynaanti Yaꞌhuud Isiteefano hidda
8Isiteefano weyti haaggi Waakhe buure ichoow miige buuhicheen. Ulla girmohi buure ichoow wahanyeyyohi miigti Waakh tuso ꞌdooꞌdi Yaꞌhuud goyaka haaggiche. 9Iꞌdaasenyi ꞌdooꞌdoo Isiteefano iriir leegele. ꞌDooꞌda a ayyo ya, a ꞌdooꞌdoo minkichoki weysiit, “ꞌDooꞌdi Lasoofure,” #6:9 ꞌDooꞌdi Lasoofure. Waha a ꞌdooꞌdi Yaꞌhuude goorat bowꞌda eheete, lasooꞌdiiche, ommos chilimme gute, lasoofure. layadeeh ichoow ꞌdooꞌdi Yaꞌhuude ili Kureene kayimiy ichoow ki Alekisaandariya ichoow ki Kiliikiya ichoow ki Aassiya. ꞌDooꞌda Isiteefano iriir leegele, 10iꞌdaasenyi Isiteefano kharati Rubeyti Munyee siisse ka yeyyeede, eticho yeed ilaabin yabuuꞌd mele.
11ꞌDeerka dagsi ka ꞌdooꞌdoo chasteene, icho la wihi icho yidaaheen, “Nah usuhi Muusa ichoow Waákh igafe a daagne.”
12ꞌDeerka ꞌdooꞌd ichoow ewweenki Yaꞌhuud ichoow tagaammeti amurre sootukkicheen. Isiteefano khabteene, khaateene Jaldaabti Weene Yaꞌhuud igeecheen. 13ꞌDooꞌdoo garti beenaat cheeko la soobahcheen. Icho la wihi icho cheekeen, “Eta kol dakkhan meessa lagan ichoow amurre Muusa igafa. 14Usuhi, ‘Yeessoha ilkerengeetti Naasaret a yamiite, minka Waakh jejjebcha, hugumme Muusa la urgiyicha,’ essi a daagne.”
15ꞌDooꞌdi kootte jaldaab goya fiddiye tuumman Isiteefano weyti yeye, usuhi fooliis iꞌdi fooli herti Waakh u ababo arge.
Currently Selected:
Hilassi Ergaano 6: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
