Hilassi Ergaano 5

Waakh Anaaniya ichoow Saffiira ba hukkuma

1Etoo Anaaniya layadeeh makhaabassiisti Saffiira layadeeh khabaayi gosiiskoo ororiche. 2Chilimme gaasoo laabte, iꞌdaasenyi wihi addan ergaano ikeene. Arantiis laka a leeogtahe.

3Beetero la mehe iyidah ya, “Anaaniya, saggoh Seytaan uuraah ibuuhiche, ichoowka Rubeyti Munyee been ikagoosse, chilimmeti gosaah bahe gaasoo ilaabatte? 4Gosaas geeddi at iororin kaahha on menya? Inkoo at ororisse la chilimme dahantaahha on menya kijirte? Mehe mali iꞌdee kiguꞌdde? At weeli enenyet ma ekkeysanne, iꞌdaasenyi Waakh rubeytiissa ekkeysatte.”

5Anaaniya chuꞌus yeedaas daage ka, il guꞌdde, yumuy. ꞌDooꞌdi yeedaas daage tuumman weyti roorro gesse. 6ꞌDooꞌdi nunnugul ꞌdeerka yimiyye, sartiis dafar kaayyube, khaate hawwaale.

7Geeddi sahaꞌdohoo seyyahe lafiddiye, arantiis wihi yitah ma garatti soogesse. 8Beetero la wihi us iche worsate, “Chilimmeti atin gosiin gatteen tuumman a tan on a?”

Iche la wihi iche tidah, “Aa, iche tuumman a geeddaas on.”

9Beetero wihi us arám iyidah, “Saggoh ati ichoow makhaabalaah isileegoossaane Rubeyti Kamur ikajjaan? ꞌDooꞌdi makhaabalaah hawwaale afafe toolla ati laka kikhaata.”

10Chirraas on ortiis ka il guꞌdubte tumuy. Reeri nunnugul ꞌdeerka min soogele, saggi iche itumuy arge. Iche laka khaateene makhaabaliche garabiis ka hawwaaleen. 11Urur Kiriisto tuumman ichoow ꞌdooꞌdi yeedaas daage tuumman, weyti nahtime gesse.

Ergaano ꞌdooꞌdi buure samaassa

12Ergaano ꞌdooꞌd goyaka wahanyeyyohi ittaawenye miigti Waakh tuso ichoow girmo yeesse. ꞌDooꞌdi Kiriisto rummeeste tuumman la orran Oosim Soolomone kakulma. 13Chirri enenyet icho weyti inkaanyito laka, et addane goycho leemeet iggo mele. 14Eheetteey laka, enenyeti buurenye Kamur rummeeste, mejel ichoow deyyeho liikasookhaye. 15Jeenteti wihi ergaano haaggissuu, enenyet ꞌdooꞌdichoki khakkhannan jitate keene, siriiro ichoow ilaalle kareeche. Iꞌdane yeeleene, ꞌdee kolossoo chirri Beetero sohti oosintiis ꞌdooꞌdoo khakkhannan oosimmoosse, samaataan. 16Enenyeti buure ilkerengeetohi Yeerusaleem idow tuumman ka soobahe, ꞌdooꞌdichoki khakkhannan ichoow ki ginnayyo dakhtaan sookhaate. Icho tuumman la lasamaache.

Ergaano sina lakawaaricha

17Kuhaanihi weyti ween ichoow ꞌdooꞌdiiski usú raaho rabitti Sadukaayo kijiro ba jeenteti ergaanuu inaaf gele. 18Ergaano sookhabatte jeelati ilkerengeeteet ka hidde. 19Iꞌdaasenyi ibeen ka, hertoo Kamur afafhi jeela furte, ergaano bihisse. 20Wihi iche itidah, “Nyaama, minki Waakhe buure irda, enenyet buuhi wora jiroti husub icheeka.”

21Ergaano la yeedaas liiyidah raahte, baryo ka, minki Waakhe buure gesse iꞌdi liiyidah u enenyet walah abisse.

Kuhaanihi weyti ween ichoow ꞌdooꞌdiis ba Jaldaabti Weene Yaꞌhuud tuummamba tol iwaheen, iskar ergeene ergaano jeela ka a lasookhaato yidaaheen. 22Iꞌdaasenyi chiꞌ iskare jeela tamiit, ergaano intaas ma kijirto. ꞌDeerka iratte cheekte mehe tidah ya, 23“Chiꞌ nah jeela iranni, iskarti afaf yaakhisso a tolossa one, min la afaf mujjum on hidanyihiin. Iꞌdaasenyi chiꞌ nah furro, nah goya gello, weeli enenyet min goya ma kijiro!” 24Eti iskarti minki Waakhe buure yaakhisso iween ichoow kuhaaniyyohi wewween chiꞌicho wora daageen ka wihi nool isworsateene, wihi soobaho kamalaleen.

25Chirraas on etoo la yimiyye iiyeyye, “Reeri chele atin jeela gelisseen minki Waakhe buurenye goya kijira, enenyet walah abcha.” 26Eti iskarti minki Waakhe buure yaakhisso iween, iskartoo khabaayi bahe ergaano toro sookhabte. Iskartaas la ergaano ma tottoganne, afi haaggan on ka soobihisse. Wihi iche karoorte la a ꞌdooꞌdi ꞌdee dagah kachibo yagiis.

27Ergaano sookhaatte Jaldaabti Weene Yaꞌhuud ortiis keente, ꞌdee kuhaanihi weyti ween ergaano waha a iyidaahe. 28“Nah goorat a katirriinsanne, amur atin ibihinne, uus atin magahi reenkaas ichoow yeediis enenyet abin. Iꞌdaasenyi wori Yeesso miinsan ilkerengeetti weene Yeerusaleem tuumman a kataaꞌhisseene, toro diiggiis nahe nah korin ꞌdoontaan.”

29Beetero ichoow ergaanoti addan la mehe soolaabeen ya, “Wihi massan, nah Waakhe yeediis raahna, enenyet mee yeediis raahno. 30Inkoo atin Yeesso massalaaba kakaahteene atin tigaaseen, Waákh aacchinyeteen, Yeesso rubey a isoolaabe, omoot kasookahe. 31Waakh anki dahantiisti miigeet ka weynaache, Karnat ichoow ꞌDoorribe kayeele, ꞌdee yaafohi Yaꞌhuud uskeelicho kasoonokhtaane, Waakh la uskeelicho ikakuta. 32Nah ichoow Rubeyti Munyeenye Waakh eti yeediis raaho tuumman siicho a garti waha tuumman.”

33Jaldaabe la chiꞌiche wahaas daagte ka, weyti hollowte, ergaano ogoos ꞌdoonte. 34Iꞌdaasenyi etoo Farissaayeenye Gamaliyeel layadeehe, enenyet tuumman inkaanyito a jira. Usu a tagaanki amurre. Gamaliyeel Jaldaabti Weene Yaꞌhuud goycho ka tolossatte, amur bahche ergaano iꞌdaaru khar a liibahcho. 35ꞌDeerka wihi us jaldaab iyidah, “Mejeli Issiraayeloow, ꞌdooꞌda wihi atin sooyeessaan mujjum kamalda. 36Wihi inno orey agarre, Dewuudo a soobahe etoo ween iskayeele. Ullaka geeddi et kud affare raahte. Inkoo usu layigis ka, ꞌdooꞌdiiskaas ichoow yeediis tuumman ba baabe. 37Kaas ꞌdubiis ka, maanti enenyet leekkaacho ka Yuudahi boroofenhi Gaalilaaya inno gele. Ullaka ꞌdooꞌdoo usu raaho sirgaal ꞌdiiꞌdo ꞌhele. Inkoo usu layigis ka ꞌdooꞌdiis tuumman seley turraaꞌhe. 38Maantaka yeeda ka a atin waanicha, ꞌdooꞌda wohoo rucchul laka ayeelina! ꞌDiicha a irti! A mehe chirri wihi icho kamassaan ichoow wihi icho yeelaan weeli enenyet on kasoouummameen a baabaan on. 39Iꞌdaasenyi chiꞌ yeedicho Waakh kiyimiy, reera koloo kalday laka jeyin ma tabuuꞌdiine, atinhi Waakh rubeytiis ꞌdiiꞌddaan on isagartaan.”

40Yeed Gamaliyeel malicho urgiyiche. Ergaano min goya iwaheene, lajahe. ꞌDeerka amur ibahcheen, uus icho yombuu toro magah Yeesso kaayyeedin. ꞌDeerka laꞌdiiche.

41Ergaano Jaldaabti Weene Yaꞌhuud katabte. Weyti hamaadeen a mehe jeenteti icho koo Yeesso iyahiin u sinati lakawaaricho a muꞌdanyahiin. 42Maan dakkhan uranti minki Waakhe buure ka ichoow minan ka Wori Haaggane saggi Yeesso rumanka Ki Lasubhe iyahe iche enenyet abisso toro cheekto ma ꞌdiin.

Currently Selected:

Hilassi Ergaano 5: rel

Highlight

Copy