Salmos 34
34
Dios mi' cʌntañonla#34.0 I Salmo David che' bʌ tsi' yʌñʌ i wut yilal ti tojlel Abimelec tsa' bʌ i choco loq'uel. Tsa' majli.
1Mi caj c ch'ujutesan lac Yum ti pejtelel ora.
Mi caj c chʌn sub i ñuclel c Yum.
2Mi caj i ñuc'an c pusic'al cha'an c Yum.
Tijicña mi caj i yubiñob jini utso' bʌ.
3Conla c sub i ñuclel lac Yum.
La' lac tem ñuq'uesʌben i c'aba'.
4Tsac sajca lac Yum. Tsi' yubiyon.
Tsi' loc'sʌbeyon pejtelel c bʌq'uen.
5Tsi' jac'beyob lac Yum jini winicob.
Tsiquil ti' wut, tijicñayob.
Ma'anic tsa' ajq'uiyob ti quisin.
6Che' bʌ tsi' cha'le uq'uel ili p'ump'un bʌ,
Lac Yum tsi' yubi. Tsi' colta loq'uel ti pejtelel i wocol.
7I yAngel lac Yum mi' joy mʌctan jini mu' bʌ i bʌc'ñañob lac Yum. Mi' coltañob.
8Ñopola uts'at lac Yum.
Ña'tanla, tijicña jini mu' bʌ i taj i coltʌntel ti lac Yum.
9Bʌc'ñan lac Yum jatetla i cha'añet bʌ la,
Come ma'anic chuqui an to yom i cha'añob mu' bʌ i bʌc'ñañob lac Yum.
10Jini alʌ bajlum mi' yubin wi'ñal.
Mach che'ic jini mu' bʌ i sajcan lac Yum.
Mi caj i taj pejtel chuqui tac wen.
11La'la, calobilob, ubibeñonla c t'an.
Mi caj j cʌntesañetla bajche' yom mi la' bʌc'ñan lac Yum.
12¿Majqui yom jalijel ti pañimil cha'an mi' taj tijicña bʌ?
¿Mach ba jatetic?
13Cʌntan a wac' ame ma' wʌl chuqui jontol.
Cʌntan a wej ame ma' cha'len lot.
14Cʌyʌ jontolil, mele chuqui uts'at.
Tsajcan majlel i ñʌch'tilel a pusic'al.
15Lac Yum mi' q'uel jini tojo' bʌ.
Lac Yum mi' ñich'tʌbeñob i yuq'uel.
16Pero mi' ts'a'len jini mu' bʌ i cha'leñob jontolil.
Mi caj i jisañob cha'an ma'anic mi' chʌn ña'tʌntelob ti pañimil.
17Jini tojo' bʌ mi' c'ajtibeñob lac Yum i coltʌntel.
Lac Yum mi' yubiñob. Mi' yʌc' ti ñumel pejtel i wocol.
18Lʌc'ʌl an lac Yum ba'an ch'ijiyemo' bʌ i pusic'al.
Mi' coltan jini woli bʌ i melob i pusic'al.
19Mi' taj cabʌl wocol jini toj bʌ.
Lac Yum mi' yʌc' ti colel ti pejtelel i wocol.
20Mi' cʌntʌben pejtel i bʌquel.
Ma'anic mi' c'ʌscujel mi junts'ijtic.
21Jini jontol bʌ mi caj i yubin cabʌl wocol.
Jini mu' bʌ i ts'a'leñob jini toj bʌ mi caj i tojob i mul.
22Lac Yum mi caj i mʌn i winicob cha'an mi' yʌc'ob ti colel,
Ma'anic mi caj i yʌjq'uelob ti toj mulil jini mu' bʌ i tajob i coltʌntel ti lac Yum.
Currently Selected:
Salmos 34: CTU77
Highlight
Share
Copy
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
