Salmos 35
35
Woli' contrajintel che' ma'anic i mul
1C Yum, yom ma' contrajiñob mu' bʌ i contrajiñon.
Cha'len guerra yic'otob.
2Chajpan a bʌ, ch'ʌmʌ a mʌctʌjib.
La' tic t'ejl cha'an ma' coltañon.
3Loc'san e'tʌjibʌl cha'an guerra ti' yotot,
Cha'an ma' mʌctʌbeñob i bijlel mu' bʌ i yajñesañoñob.
4La' toj sajticob i pusic'al. La' i cha'leñob quisin mu' bʌ i tic'lañoñob.
La' sujticob, la' yajlicob.
5La' sujticob bajche' i sujl pʌc'ʌbʌl mu' bʌ i wejlan ic'.
La' ajñesʌnticob cha'an i yAngel lac Yum.
6La' ochic ac'ʌlel ti' bijlel, la' bojy'ac.
La' ajñesʌnticob cha'an i yAngel lac Yum.
7Tsi' top'oyob ch'en cha'an mi yʌcoñob che' bajche' bʌte'el.
8La' jisʌnticob che' mach yʌxʌlobic i yo.
La' to wʌlʌc chujquicob ti' yac tsa' bʌ i meleyob.
La' wʌlʌc jisʌnticob ya'i.
9Mi caj cubin i tijicñʌyel c pusic'al ti lac Yum.
Tijicña mi caj cubin che' mi' coltañon.
10Mi caj c pejcañet che' c'oc'on to.
C Yum, ¿majqui lajal bajche' jatet?
Ma' chuc loq'uel jini p'ump'un bʌ ti' c'ʌb jini ñumen p'ʌtʌl bʌ.
Ma' loc'san jini tic'lʌbil bʌ yic'ot jini pobre bʌ ti' p'ʌtʌlel jini yom bʌ i jisan.
11Tsa'ix caji i jop'ob c mul xlotob.
Tsi' jop'oyob jini mach bʌ c'ajalic c cha'an.
12Mi' sutq'uibeñoñob jontolil cha'an c wenlel.
Wen ch'ijiyem tsa' cʌleyon.
13Pero mach che'ic tsac melbeyob.
Che' c'amob tsac lʌpʌ coxtal i yejtal i ch'ijiyemlel c pusic'al.
Tsac cha'le ch'ajb, tsac peq'uesa c bʌ.
Tsac lon cha'le oración.
14Ch'ijiyemon tsac liji c bʌ che' bajche' mi la cuc'tan lac ña' yic'ot la queran.
15Mach che'ic tsi' melbeyoñob.
Che' c'uñon ti xʌmbal tijicñayob.
Tsi' tempayob i bʌ jini xjop't'añob tij contra yic'ot jini mach bʌ cʌmbilobic c cha'an.
Tsi' cha'leyob u'yaj. Ma'anic tsa' lujb'ayob ti p'ajoñel.
16Tsi' wajleyoñob, tsi' p'ajayoñob.
17C Yum, ¿jayp'ejl to q'uin mi caj a q'uel?
Loc'sañon ti' p'ʌtʌlel jini mu' bʌ i jisañon,
Loc'sañon ti' tojlel tac bajlum.
18Mi caj c subeñet wocolix a wʌlʌ ba' mi' tempañob i bʌ cabʌlob.
Mi caj c sub a ñuclel ti' tojlel cabʌl winicob x'ixicob.
19Mach ñuc'ac i pusic'al j contrajob mu' bʌ i jop'ob c mul.
Anquese ma'anic c mul mi' ts'a'leñoñob.
20Mach utsic i t'an, mi' techob a'leya.
Mi' jop'ob lot cha'an mi' yʌc'ob ti wocol jini ñʌch'ʌlo' bʌ ti pañimil.
21Ts'a' mi' q'ueloñob.
Tsi' yʌlʌyob: Jajaja, tsa'ix j q'uele lojon, che'ob.
22C Yum, tsa'ix a q'uele bajche' mi' melob. Mach yomic che jach ma' q'uelob.
La', c Yum, mach yomic ma' jalijel ti ñajtʌl.
23Wa'i' ti meloñel,
C Dios, c Yum, tsictesañon ti toj.
24C Yum Dios, yom ma' tsictesan toj bʌ c pusic'al.
Mach mi' mʌjlel i cha'añob tic tojlel
25Ame mi' lon ña'tañob ti' pusic'al wolic yajlel che' bajche' yomob.
Ame mi' yʌlob: Tsa'ix lac mʌlʌ, ame che'obic.
26La' i yubiñob quisin. La' toj sajticob i pusic'al mu' bʌ i mulan i tic'lañoñob.
La' i yubiñob quisin.
Chilbeñob i ñuclel jini mu' bʌ i chañ'esañob i bʌ tij contra.
27La' i cha'leñob c'ay mu' bʌ i q'ueloñob ti toj.
La' ñuc'ac i pusic'al.
La' i yʌlob ti pejtelel ora: La' sujbic i ñuclel lac Yum, che'ob
Come tijicña lac Yum che' wen chumul i winic.
28Mi caj c sub toj bʌ a melbal yic'ot a ñuclel, c Yum, ti pejtelel ora.
Currently Selected:
Salmos 35: CTU77
Highlight
Share
Copy
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
