Mak 6

Ba Naŋ Zagre Yeezu Naazɛrɛ Poɔ

(Mat 13:53-58; Luk 4:16-30)

1A Yeezu da yi la a be a wa O meŋɛ teŋɛ poɔ, ka a O potuuribo da tu O wa. 2A pɛnnoo bebiri daare a Yeezu da piili kanna la a puoruudie poɔ. Noba yaga naŋ da be a be a woŋ a O kannoo nɔɛ da maaɛ la ka ba yele, “Yeŋ ka a dɔɔ ŋa pɔge a yɛlɛ ama zaa? Boŋ yɛmbammo la ŋa ka ba de ko O? Yɛ nyɛ a O nuuri naŋ tonɔ toŋkpeɛne lɛ! 3Aŋa naane a kapenta, a Mareya bie be? A O yɔɔmine naane Gyimisi, Yuzɛb, Gyudase ane Saamon be? Te ne a o yɔɔpuuli zaa naane be a kyɛ be?” Ka ba suuri da iri ne O. 4Lɛ la ka a Yeezu da yeli ko ba, “Ŋmen-yelmanneba maŋ nyɛ la emmo zie zaa ka bamenne teŋɛ poɔ ane bamenne noba zie naane ka ba ba taa emmo.” 5O da ba toɔ̃ toŋ toŋkpeɛŋaa zaa a be, ka a naŋ ba e O naŋ da de O nuuri pare baalba bawola mine eŋɛ ka ba da nyɛ ba sammo yoŋ naane. 6Kyɛ O noɔre da maaɛ la ne ba naŋ ba taa yeldeebo.

A Potuuribo Pie Ne Bayi Tonnoɔre

(Mat 10:5-15; Luk 9:1-6)

Lɛ la ka a Yeezu da yɔ yoɔrɔ a tembilii zaa poore, a kanna a noba. 7O da boɔle la a O potuuribo pie ne bayi a da piili tonɔ ba bayi bayi, a ko ba kpeɛ̃õ sefaare zu. 8O da kpãã ba la ka ba ta wa derɛ bonzaa a ba sori kyɛmmo poɔ, ka daŋgbale yoŋ naane. Ka ba ta wa derɛ bondirii, bee woɔ, bee libie eŋnɛ ba kɔɛ poore; 9kyɛ ba eŋ nɔɔteɛ, a kyɛ ta wa derɛ kparre ayi suuro dɔglɔ taa#6:9 Kparre ayi suuro dɔglɔ taa: A saŋ na a Gyuumine poɔ ka dɔɔ wa su kparre ayi dɔgle taa wuli ka o ba taa faŋ.. 10O da yeli ko ba la, “Zie zaa yɛ naŋ wa ta a te kpɛ yiri kanzaa poɔ, yɛ kpeɛrɛ a be a te ta saŋ na yɛ naŋ na yi a be. 11Ka teŋɛ zaa ba wa de yɛ saanoŋ kyɛ zagre ka ba kyɛlle woŋ a yɛ kannoo, ka yɛnee wa yire a be yɛ piŋ a yɛ gbɛɛ uuruŋ bare ka a e danseɛ do ba.” 12A lɛ la ka ba da yi moɔle ka neɛzaa leɛ o eebo a yi o yelbebe poɔ. 13Ba da digi la sefaare yaga ka a yi, kyɛ sɔ baalba yaga kããsoŋ ka ba da nyɛ sammo.

Gyɔɔn Bati Kũũ Yɛlɛ

(Mat 14:1-12; Luk 9:7-9)

14A Yeezu yuori da yaare la a zie zaa a te kpɛ Naa Hɛrɔde naŋ da e Galili teŋɛ naa tobo. A noba mine da yelee la, “Gyɔɔn Bati la leɛ yi a kuuni poɔ, lɛnso ka o taa a kpeɛ̃õ a tonɔ ne a toma ama.” 15Kyɛ ka ba mine meŋ yeli, “Elaagya la.” Ka ba mine meŋ naŋ yeli, “O waa la Ŋmen-yelmanna, aŋa a dakoroŋ Ŋmen-yelmanna na kaŋ.” 16Kyɛ a Hɛrɔde naŋ da woŋ a yɛlɛ ama, O da yelee la, “A Gyɔɔn na zu N naŋ da ŋmaa la ka ba e ka o leɛ-iri yi a kuuni poɔ.”

17A Hɛrɔde meŋɛ la da toŋ noba ka ba te nyɔge a Gyɔɔn, a leŋ o, a kyɛ de o te eŋ nempagdie poɔ. Bonso a Hɛrɔde da faa la o yɔɔ Filipi pɔge yuori naŋ da di Hɛrɔdeya a yi o zie. A pɔge ŋa yɛlɛ zuiŋ la ka a Hɛrɔde da nyɔge a Gyɔɔn page. 18Bonso, a Gyɔɔn da maŋ yele korɔ la a Hɛrɔde, “A ba tu sori ka fo faa a fo yɔɔ pɔge ka o leɛ fo pɔge.” 19A yeli ŋa zuiŋ, a Hɛrɔdeya da taa la a Gyɔɔn ne dɔŋ, a boɔrɔ sori ka o ko o, kyɛ da kontoɔ̃, 20bonso, a Hɛrɔde da zoro la a Gyɔɔn dabeɛ̃, o naŋ da baŋ ka o waa la nemmeŋɛ, a e neɛ naŋ ba taa faaloŋ zaa. A Hɛrɔde da guuro o la velaa ka ka yelzaa ta wa e o. Ka a Hɛrɔde wa woŋ a Gyɔɔn kannoo o yɛŋ da maŋ gyɛre la, kyɛ anealɛzaa o da maŋ nɔŋ ka o kyɛllɛ a Gyɔɔn kannoo. 21A Hɛrɔdeya pãã da nyɛ la sori, saŋ na a Hɛrɔde dɔgebo bebiri naŋ da wa ta ka o maale tigri a boɔle o tontonema nembɛrɛ, ane a sogyɛre nembɛrɛ ane a Galili teŋɛ wederebɛ. 22A Hɛrɔdeya pɔgeyaa da yi wa seɛ la a noba niŋesogɔ, ka a Hɛrɔde ne a saama zaa poore da pɛle ka a naa yeli ko a pɔgsarlee, “Sɔre bonzaa fo naŋ boɔrɔ n zie, N na ko fo la.” 23O da pɔ ne la o poɔ zaa a yeli, “Bonzaa fo naŋ sɔre, N na ko fo la, haali gba ka n napaaloŋ kyɛlee la.” 24Lɛ la ka a pɔgsarlee da zo yi gaa te soore o ma a yeli, “N sɔre boŋ a naa zie?” Ka a o ma yeli sɔge, “A Gyɔɔn Bati zu.” 25A daadaalɛ ka a pɔgsarlee leɛ ŋmore kpɛ a naa zie a te yeli ko o, “N boɔrɔ la ka fo ko ma Gyɔɔn Bati zu laa poɔ pampana ŋa.” 26A naa poɔ da sãã la yaga, kyɛ a noɔre o naŋ da pɔ ane a saama zaa zuiŋ, o da ba boɔrɔ ka o mɔŋ a pɔgsarlee a Gyɔɔn zu. 27A daadaalɛ ka o toŋ a sogyɛ kaŋ naŋ maŋ guuro o ka o te ŋmaa a Gyɔɔn zu wa ne. Ka a sogyɛ gaa te ŋmaa a Gyɔɔn zu a nempagdie poɔ, 28a de o eŋ laa poɔ a wa ne a wa de ko a pɔgsarlee. Lɛ la ka a pɔgsarlee meŋ leɛ taa te ko a o ma. 29A Gyɔɔn Bati potuuribo naŋ da wa woŋ ka ba ko o la, ba da wa de la a o eŋɛ te ũũ.

Yeezu Naŋ Ko Noba Turi Anuu Bondirii Ka Ba Di

(Mat 14:13-21; Luk 9:10-17; Gyn 6:1-14)

30Apostoliimine da wa laŋ la taa a Yeezu zie a manne ko O toma na zaa ba naŋ toŋ ane a kannoo ba naŋ kanne a noba. 31Noba yaga da waana la ba zie kyɛ leɛrɛ gɛrɛ, a zuiŋ a Yeezu ne O potuuribo da ba taa vuo a na di bonzaa. Lɛ la ka a Yeezu yeli ko a O potuuribo, “Yɛ e ka te gaa a wɛgyɛŋ poɔ te yoŋ a te pɛnne belaa.” 32Lɛ la ka ba kpɛ gbori a gaa zie neɛzaa naŋ ba kye. 33Noba yaga da nyɛ ba la ba naŋ gɛrɛ ka ba da baŋ ka ba na la. Lɛ la ka ba da yi a tenne zaa a zo ne gbɛɛ a te daŋ ba ta a zie na ba naŋ da gɛrɛ. 34A Yeezu naŋ da wa ta a mane noɔre, O da nyɛ la nembeɛoŋ, ka ba nembaaloŋ da kpɛ O, bonso, ba da waa ŋa peere naŋ ba taa kyeenɛ; ka O da piili kanna ba yɛlɛ yaga. 35Saŋ naŋ da wa te faa, a O potuuribo da wa yeli ko O la, “A zie ŋa e la zie yiri zaa naŋ ba peɛle kyɛ ka saŋ meŋ faa; 36bare a noba ka ba gaa a tenne naŋ peɛle a te da bondirii di.” 37Kyɛ ka a Yeezu yeli sɔge ba, “Yɛ bɔ bonkaŋ ko ba ka ba di.” Ka a potuuribo da soore O, “Te mɔɔ na de la yuoni gbuli san-yɔɔ te da ne bondirii a wa ko ba ka ba di be?” 38Ka a Yeezu soore ba, “Boroboro awola la ka yɛ taa? Yɛ te kaa nyɛ.” Ba naŋ wa te kaa nyɛ la ka ba da yeli, “Boroboro anuu ane zoma ayi la bebe.” 39Lɛ la ka a Yeezu da yeli ko a potuuribo ka ba e ka a noba zeŋ gbulo gbulo a mɔmaara zu. 40Lɛ la ka a noba da zeŋ a gbulo gbulo ka ba mine ta kɔɔ, ba mine meŋ lezaayi ne pie. 41A Yeezu naŋ da wa de a boroboro anuu ane a zoma ayi, O da gbole kaa la sazu a puori, kyɛ maale a kyɛ nyɔge a boroboro ŋmaare, a de ko a O potuuribo ka ba de poŋ ko a noba, kyɛ la de a zoma ayi meŋ poŋ ko ba. 42Ka a noba zaa da di tege; 43kyɛ ka ba da wuo a boŋkpaa ka a pa pɛre pie ne ayi. 44A noba naŋ da ɔɔ a boroboro da waa la dɔbɔ turi anuu.

Yeezu Naŋ Kyɛŋ Koɔ̃ Zu

(Mat 14:22-33; Gyn 6:15-21)

45A daadaalɛ ka a Yeezu da e ka a O potuuribo kpɛ gbori a de O weɛ a ŋmaara a mane gɛrɛ a Bɛsaada lambori, kyɛ ka O na bare a noba sori ka ba kuli. 46O naŋ da wa eŋ a noba sori baare, O da leɛ do la taŋ kaŋ zu ka O te puori.

47Zie naŋ da wa te maa, a gbori da be la a mane sogɔŋ, kyɛ ka a Yeezu yoŋ da naŋ be a dondoli zu. 48O naŋ da wa nyɛ ka a O potuuribo moɔrɔ ne la a gbori a koɔ̃ zu, sasekpeɛŋaa naŋ da fuuro tuoro ba zuiŋ, a Yeezu da iri kyɛnɛ la a koɔ̃ zu a gɛrɛ ba zie bagu-pipi saŋ, a wa e ŋa O naŋ zuoro ba bara. 49Kyɛ ba naŋ da wa nyɛ O ka O kyɛnɛ a koɔ̃ zu, ba da teɛre ka nenseɛ la, ka ba da ŋmeɛrɛ kpɛlle yaga zaa; 50bonso, ba zaa da nyɛ O la ka dabeɛ̃ da kpɛ ba yaga zaa. Kyɛ wieouŋ lɛ ka a Yeezu yeli ko ba, “Yɛ nyɔge yɛmenne, maa la, yɛ ta zoro dabeɛ̃.” 51Lɛ la ka O pãã te do kpɛ a ba gbori poɔ, ka a saseɛ da ŋmaa. A potuuribo nɔɛ zaa da maaɛ la, 52bonso, ba da ba baŋ a boroboro na yɛlɛ tɛgɛ, a ba sukyie naŋ da dare zuiŋ.

Yeezu Naŋ Saŋ Baalba Gyɛnesarɛ Teŋɛ Poɔ

(Mat 14:34-36)

53Ba naŋ da wa ŋmaa a mane wa a Gyɛnesarɛ teŋɛ lambori, ba da leŋ la a gbori a be. 54Ba naŋ da wa yi a gbori poɔ, noba da nyɛ ba la a baŋ a Yeezu wieouŋ lɛ, 55ka ba da zoro yire a paaloŋ lamboe zaa a piili tuoro ba baalba ane pama a waana ne a Yeezu zie, benee zaa ba naŋ woŋ ka a Yeezu na tu la a be tɔle. 56A ziiri na zaa Yeezu naŋ da gaa, a tembilii bee a teŋkponni, bee wɛre poore, ba da maŋ taa la a baalba a wa biŋ ba dare poore, a kyɛ sɔre O ka O vɛŋ ka ba seene O kparoo nɔzoɔrɔ yoŋ; ka a baalba na zaa naŋ da seene O da nyɛ ba sammo.

Currently Selected:

Mak 6: DNTTP

Highlight

Copy