Mak 5

Yeezu Naŋ Digi Sefaare Bare Dɔɔ Kaŋ Eŋɛ

(Mat 8:28-34; Luk 8:26-39)

1Ba da ŋmaa la a mane wa a Gɛrasene paaloŋ seŋ. 2A Yeezu naŋ da wa yire a gbori poɔ, daadaalɛ ka dɔɔ kaŋ naŋ da taa sefaa wa yi a yaare poɔ a tuori O. 3A sefaa dɔɔ ŋa da kpeɛrɛ la a yaare poɔ, ka neɛzaa da kontoɔ̃ leŋ o ne banzɔlɔ gba; 4bonso, gbɛɛ yaga ka ba da maŋ eŋ o la kpule kyɛ leŋ o ne bɔnzɔlɔ kyɛ ka o da maŋ ŋmaare a bɔnzɔlɔ bare, kyɛ kɔɔre a kpule puropuro. Neɛzaa da ba taa faŋ a na toɔ̃ nyɔge o leŋ biŋ. 5Ŋmenaa ne tensogɔ zaa ka o da maŋ yɔ yoɔrɔ a yaare poɔ ane a tanne zuri, a ŋmeɛrɛ kpɛlle kyɛ ŋmaara o meŋɛ ne kubo. 6O naŋ da wa nyɛ a Yeezu ka O be tɔɔre zaa, o da zo te le vɔgle la muro O niŋesogɔ; 7kyɛ kyeere ne kɔkɔkpeɛŋaa, “N ne fo meŋ boŋ, Yeezu, a Naaŋmen Kpeɛ̃õ Zaa Daana Bie? N de la Naaŋmen sɔrɔ fo, ta dɔgre ma.” 8O da yeli la a ŋaa, bonso, a Yeezu da yeli ko la a sefaa, “Wa yi a dɔɔ eŋɛ, fõõ sefaa ŋa!” 9Lɛ la ka a Yeezu soore o, “Fo yuori la boŋ?” Ka o yeli sɔge, “N yuori la Ligyin#5:9 Ligyin: A Hiburu kɔkɔre poɔ, a Ligyin tɛgɛ la gyamaa., bonso, te waa la yaga.” 10O da sɔre la a Yeezu ne nimizeɛ zaa ka O ta digi a ka a yi a paaloŋ poɔ. 11Dobasugo mine da are la a taŋ seɛŋ a dire bondirii; 12ka a sefaare sɔre a Yeezu a yeli, “Vɛŋ ka te yi te kpɛ a dobaare ama.” 13Lɛ la ka a Yeezu da ko a sefaare sori ka a wa yi a dɔɔ eŋɛ a te kpɛ a dobaare. A dobasugo naŋ da ta turaayi zaa da ŋmore sigi kpɛ la a mane poɔ a te kpi.

14A dobakyeenemɛ da zo gaa la a teŋɛ poɔ, a te manne a yɛlɛ naŋ e a ko a noba, lɛ la ka ba da yi zo gaa ka ba te nyɛ bon naŋ e. 15Ba da wa la a Yeezu zie, a wa nyɛ ka a dɔɔ na naŋ da taa a sefaare ka o zeŋ a be a nyɛ o meŋɛ, a su boma, ka dabeɛ̃ da kpɛ ba zaa. 16A banaŋ naŋ da nyɛ a yɛlɛ naŋ e kyaare ne a sefaare dɔɔ ŋa ane a dobaare da gaa te manne ko la a noba. 17Lɛ la ka ba da piili sɔrɔ a Yeezu ka O yi a ba teŋɛ poɔ. 18A Yeezu naŋ da wa leɛ te kpeɛrɛ a gbori la ka a dɔɔ na eŋɛ a sefaare naŋ da yi wa sɔre ka O vɛŋ ka o tuuro O. 19Kyɛ ka a Yeezu da ba sage kyɛ yeli ko o, “Leɛ kuli a fo yiri a te manne ko fo yideme, bonna a Daana naŋ e ko fo, a manne lɛnɛɛ O naŋ zo fo nembaaloŋ.” 20A dɔɔ da kuli te yoɔrɔ la Dekapoli paaloŋ poɔ a manne bonna a Yeezu naŋ da e ko o; ka banaŋ zaa naŋ da woŋ a yɛlɛ nɔɛ da maa.

Yeezu Naŋ Seŋ Pɔgsarlee Kaŋ Kuuni Poɔ Ane Pɔge Kaŋ Naŋ Nyɛ O Sammo

(Mat 9:18-26; Luk 8:40-56)

21A Yeezu naŋ da la kpɛ a gbori a ŋmaa a mane gaa a lambori kaŋ na la ka neŋyaga da wa ŋmaagyili O ka O da are a mane noɔreŋ. 22Lɛ la ka a puoruudie neŋkpoŋ kaŋ yuori naŋ di Gyaruse da wa a be. O naŋ da wa nyɛ a Yeezu, o da wa le la O puliŋ 23kyɛ sɔre O yããyãã a yele, “N pɔg-yalee ŋmaara la vooroŋ. Wa de fo nuuri pare o ka o nyɛ sammo, a ta kpi.” 24Lɛ la ka a Yeezu ne o da gaa.

Nembeɛoŋ da tuuro O la, a fogle O. 25Pɔge kaŋ naŋ da taa pɔg-pɛge baaloŋ a da maŋ kyire zẽẽ faa zaa, yuomo pie ne ayi, da be la a be. 26O da yɔ la tẽẽ-erebɛ yaga zie, a di dɔgɛɛ yaga ba nuuriŋ, a sãã o libie zaa kyɛ ka a o baaloŋ da maaleŋ waa faa gaŋ a koroŋ. 27O naŋ da woŋ a Yeezu yɛlɛ la ka o da gyeere O puori a neŋyaga poɔ a te seene O kparoo, 28bonso, a pɔge da yelee la, “Ka maa seene O bonsuuri yoŋ gba, kyɛ N na nyɛ la n sammo.” 29A daadaalɛ ka a o zẽẽ deɛ ŋmaa, ka o eŋɛ da leɛ lantaa ka o da baŋ ka a o baaloŋ baarɛɛ la. 30A paretɛloŋ lɛ la ka a Yeezu da baŋ ka kpeɛ̃õ yi la O eŋɛŋ, ka O leɛ kaa a noba gyeere, a soore, “Aŋ la seene N bonsuuri?” 31Ka a O potuuribo da yeli ko O, “Fo nyɛ la neŋyaga naŋ fogle fo lɛ kyɛ ka fo soorɔ, ‘Aŋ la seene ma?’ ” 32A Yeezu da kaa la ba zaa gyeere ka O nyɛ neɛ na naŋ la e a lɛ. 33Kyɛ a pɔge naŋ da baŋ bonna naŋ e o zie, da yi waɛ la ne dabeɛ̃ a miine o zaa, a wa le a Yeezu niŋesogɔ, kyɛ manne a yɛlɛ yelmeŋɛ zaa a ko O. 34Ka a Yeezu yeli ko o, “N pɔgeyaa, a fo yeldeebo saŋ fo la, gɛrɛ ne emmaaroŋ, fo nyɛ la sammo.”

35A Yeezu naŋ da naŋ kyɛnɛ yele a yɛlɛ la ka noba mine da yi a Gyaruse yiri wa, a wa yeli, “A fo pɔgeyaa kpie la. Bonso ka fo naŋ kyɛnɛ dɔɔnɔ a wulwullo weɛlɛ?” 36Kyɛ a Yeezu naŋ da wa woŋ a ba yɛlɛ ba naŋ yeli, O da yeli ko la a puoruudie neŋkpoŋ, “Ta zoro dabeɛ̃, fõõ eŋ sage de.” 37O da ba sage ka neɛzaa la tu O, ka Piita, Gyimisi ane o yɔɔ Gyɔɔn yoŋ naane. 38Ba naŋ da wa te ta a puoruudie neŋkpoŋ na yiri, a Yeezu da nyɛ la neŋyaga ka ba mine kono ŋmeɛrɛ kpɛlle, ka a zie zaa dɔɔnɔ. 39O naŋ da wa te kpɛ a die, O da yeli ko la a noba, “Bonso ka yɛ dɔɔnɔ a zie kyɛ kono lɛ? A bie ba kpi, goɔŋ la ka o gbire!” 40Ka a noba da e O la. Lɛ la ka a Yeezu da e ka ba zaa yi yeŋ poɔ, kyɛ ka O taa a bie saa ane o ma ane a O potuuribo banaŋ naŋ da tu O, ka ba te kpɛ a benee a bie naŋ da gaŋ. 41A Yeezu da nyɔge la a bie nu kyɛ yeli, “Talita Kum,” a lɛ tɛgɛ la, “Pɔgsarlee, vaa-iri!” 42A daadaalɛ ka a pɔgsarlee vaa-iri a piili kyɛnɛ (a pɔgsarlee da nyɛ la yuomo pie ne ayi). A noba nɔɛ da maaɛ la a ŋaa naŋ da e zuiŋ. 43A Yeezu da kpãã ba la yaga zaa ka ba ta wa erɛ ka neɛzaa wa baŋ ne a yeli ŋa, kyɛ yeli ko ba, ka ba ko a pɔgsarlee bondirii ka o di.

Currently Selected:

Mak 5: DNTTP

Highlight

Copy