Gyn 9

Yeezu Naŋ Saŋ Neɛ Kaŋ Ba Naŋ Dɔge Ne Zɔnnoŋ

1A Yeezu naŋ da wa tɔlɔ gɛrɛ, O da nyɛ la dɔɔ kaŋ ba naŋ da dɔge ka o zɔŋ. 2A Yeezu potuuribo da soore O la, “Wulwullo, a dɔɔ ŋa yelbieri la so ka ba dɔge o ka o zɔŋ bee a o dɔgrebɔ yelbieri la so?” 3Ka a Yeezu da yeli sɔge, “A o meŋɛ bee o dɔgrebɔ ba e yelbieri. Ba da dɔge o la ka o zɔŋ ka ka Naaŋmen toma na tu o zie sãã. 4Zie naŋ naŋ waa veɛloŋ a ferɛɛ la ka te toŋ a soba na naŋ toŋ te toma. Zie sɔɔrɔ la ka neɛzaa koŋ la toɔ̃ toŋ toma. 5N naŋ naŋ be a teŋɛzu, maa la a teŋɛzu kyaane” 6A Yeezu naŋ da wa yeli a ŋaa baare, O da toore la nentaare lɔɔ teŋɛ, a bu tɛne ne a nentaare, a de sɔ ne a zɔŋ nimie, 7kyɛ da yeli ko o, “Gaa te pɛge a Silom koɔ̃-puu zie koɔ̃ poɔ” (a Silom tɛgɛ la: Ba Naŋ Toŋ Neɛ). Lɛ la ka a dɔɔ-zɔŋ da gaa te pɛge o niŋe a da leɛ wa a Yeezu zie, a nyɛrɛ. 8A dɔɔ ŋa laŋkpɛtaaba ane banaŋ naŋ da maŋ nyɛ o ka o sɔrɔ boma da piili soorɔ la taa, “A dɔɔ ŋa naane da maŋ zeŋ sɔrɔ na be?” 9Ka ba mine da yele, “Ona la.” Ka ba mine meŋ da yele, “Ai, ona naane, yitaa la.” Ka a dɔɔ meŋɛ da yele, “Maa la.” 10Kyɛ ka ba da naŋ soorɔ O, “Wola ka a fo nimie pãã e yuori?” 11Ka a dɔɔ da yeli sɔge, “A dɔɔ na ba naŋ boɔlɔ Yeezu la da bu tɛne a de sɔ n nimie, kyɛ da yeli ko ma, ‘Gaa te pɛge a Silom gbɛtɛre koɔ̃ poɔ.’ Lɛ la ka N da gaa te pɛge a deɛ nyɛrɛ.” 12Ka ba da soore a dɔɔ, “Yeŋ ka O be?” Ka a dɔɔ da yeli, “N ba baŋ.”

A Faraziimine Naŋ Peɛre A Dɔɔ-zɔŋ Sammo Yɛlɛ

13Ba da taa la a dɔɔ na naŋ da waa zɔŋ wa ne a Faraziimine zie. 14A pɛnnoo bebiri kaŋ daare la ka a Yeezu da bu a tɛne sɔ ne a dɔɔ-zɔŋ nimie ka a yuori. 15Lɛ la ka a Faraziimine meŋ da piili soorɔ a dɔɔ lɛ o naŋ da e nyɛrɛ. Ka a dɔɔ da yeli ko ba, “A Yeezu la da bu tɛne sɔ a n nimie, ka n da te pɛge ne koɔ̃ a nyɛrɛ.” 16Ka a Farazii noba mine da yeli, “A dɔɔ ŋa ba yi Naaŋmen zie, bonso, O ba tuuro a pɛnnoo bebiri daare tuulo.” Kyɛ ka ba mine meŋ da yeli, “Wola ka neɛ naŋ e yelbe-erɛ na toɔ̃ e a yelwulii ama?” Wɛltaa da kpɛ la a noba poɔ. 17Lɛ la ka a Faraziimine da laboreŋ soore a dɔɔ, “Boŋ ka fo na yeli kyaare ne a dɔɔ ŋa naŋ yuo a fo nimie?” Ka a dɔɔ da yeli, “O waa la Ŋmen-yelmanna.”

18A Gyuumine da ba sage de ka a dɔɔ da e la zɔŋ kyɛ leɛ nyɛrɛ, ka a lɛ vɛŋ ka ba da boɔle o dɔgrebɔ 19a da soore ba, “A yɛ bidɔɔ la a ŋa yɛ naŋ yeli ka yɛ dɔge ne o la zɔnnoŋ be? Wola ka a ta ka o nyɛrɛ pampana ŋa?” 20Ka a o dɔgrebɔ da yeli sɔge, “Te baŋ ka te bie la, ka te laŋ dɔge o ne zɔnnoŋ; 21kyɛ te ba baŋ lɛ a naŋ ta ka o nyɛrɛ pampana ŋa, bee a baŋ neɛ na naŋ yuo a o nimie. Yɛ soore o, o waa la nyembulo. Yɛ vɛŋ ka o yeli o meŋɛ yɛlɛ.” 22A dɔɔ dɔgrebɔ da yeli la a ŋaa ba naŋ da zoro a Gyuumine dabeɛ̃ zuiŋ. Bonso, a Gyuumine da laŋ la noɔre ka ka neɛzaa wa yeli ka Yeezu la a Mɛzaaya,#9:22 Mɛzaaya: A Mɛzaaya tɛgɛ la a ‘Kirista.’ ba na digi la o soba bare a ba puoruu die poɔ. 23Lɛnso ka a o dɔgrebɔ da yeli, “O waa la nyembulo, yɛ soore o.”

24Azuiŋ ba da leɛ boɔle la a dɔɔ ŋa naŋ da zɔŋ a boyi soba a yeli ko o, “Yeli a yelmeŋɛ Naaŋmen niŋesogɔ! Te baŋ ka a dɔɔ ŋa waa la yelbe-erɛ.” 25Ka a dɔɔ da yeli sɔge, “Maa eŋ ba baŋ ka O waa la yelbe-erɛ bee ka O ba waa. Yelyenaa yoŋ la ka N baŋ. N da zɔŋɛɛ la, kyɛ pampana, N nyɛrɛ la.” 26Ka ba da soore o, “Wola ka O da e fo. Wola ka O da e yuo a fo nimie?” 27Ka o da yeli sɔge ba, “N daŋ yeli ko yɛ la kyɛ ka yɛ koŋ kyɛlle woŋ. Boŋ la so ka yɛ la boɔrɔ ka N la maaleŋ manne ko yɛ? Yɛ meŋ boɔrɔ la ka yɛ leɛ O potuuribo be?” 28Lɛ la ka ba da to o, a yele, “Fõõ la waa O potuuro kyɛ tenee eŋ waa la Moozul potuuribo. 29Te baŋ ka Naaŋmen da yeli la yɛlɛ ko Moozul kyɛ a dɔɔ ŋa eŋ, te ba baŋ zie na O naŋ yi wa.” 30Ka a dɔɔ da yeli, “Nɔmaa yeli pãã la ŋa! Yɛ ba baŋ zie na O naŋ yi wa kyɛ Ona la yuo n nimie. 31Te baŋ ka Naaŋmen ba kyɛllɛ yelbe-erebɛ yɛlɛ, kyɛ O maŋ kyɛlle woŋ la neɛ naŋ puoro O kyɛ erɛ O poboɔbo yɛlɛ. 32A yi a teŋɛ piiluu saŋ a wa te ta zenɛ, te daŋ ba woŋ ka neɛzaa yuo la neɛ ba naŋ dɔge ne zɔnnoŋ nimie ka o nyɛrɛ. 33Ka a dɔɔ ŋa da ba yi Naaŋmen zie wa, O da kontoɔ̃ e yelzaa” 34Ka ba da yeli sɔge o, “A fõõ ba naŋ dɔge fo zaa gbuli yelbieri poɔ, fõõ la boɔrɔ ka fo wuli te be?” Ba da digi o la bare a puoruu die poɔ.

Seeloŋ Poɔ Zɔnnoŋ

35A Yeezu da woŋ ka ba da digi la a dɔɔ bare a puoruu die poɔ, kyɛ O naŋ da wa nyɛ a dɔɔ, O da soore o la, “Fo sage de la a Nensaala Bie yɛlɛ be?” 36Ka a dɔɔ da yeli sɔge, “Neŋkpoŋ, aŋ la O? Yeli ko ma, lɛ ka N na sage de O yɛlɛ.” 37Ka Yeezu da yeli ko o, “Fo nyɛ O la. Ona la a soba na naŋ yele a yɛlɛ korɔ fo.” 38Ka a dɔɔ da yeli, “Daana, N sage deɛ la.” O pãã da gbi la dumo a puori a Yeezu ne emmo. 39Ka a Yeezu da yeli, “N wa la a teŋɛ ŋa zu sɛrɛɛdiibu zuiŋ, ka ka banaŋ naŋ ba nyɛrɛ na nyɛrɛ, kyɛ ka banaŋ naŋ nyɛrɛ leɛ zɔnne.” 40A Farazii noba mine naŋ da peɛle a Yeezu a da woŋ a ŋaa O naŋ yeli, da yeli ko O la, “Fo sereŋ boɔrɔ ka fo yeli ka te zɔŋɛɛ la wɛ?” 41Ka a Yeezu da yeli ko ba, “Ka yɛnee da zɔŋ, yɛ da koŋ taa yelbieri. Kyɛ yɛ naŋ yeli, ‘Te nyɛrɛ la,’ a yɛ yelbebe na kyɛnɛ bebe la.”

Currently Selected:

Gyn 9: DNTTP

Highlight

Copy