Gyn 10

Yeezu La A Pekyee-meŋɛ

1“Yelmeŋɛ zaa ka N yele korɔ yɛ, neɛ na zaa naŋ ba tu a pezage dendɔre kpɛ, kyɛ tu ziyuo do kpɛ, o soba e la nannyige ane fafaara. 2A soba na naŋ tu a dendɔre kpɛ la a peere kyeenɛ. 3A dendɔ-guuro maŋ yuo la a dendɔre ko o, ka a peere maŋ woŋ a o kɔkɔre. O maŋ boɔle la a o peere kanzaa yuori, a taa a yi ne. 4Ka o naŋ wa taa a o peere zaa yi ne baare, o maŋ de la a weɛ, ka a tuuro o, bonso, a baŋ la o kɔkɔre. 5A koŋ tu saana puori, kyɛ a na zo yi la a saana zie, bonso, a ba baŋ a saana kɔkɔre.” 6Bana la ka Yeezu da yele a yelseŋkpegɛ ŋa terɛ kyɛ ba da ba baŋ bonna O naŋ da yele korɔ ba tɛgɛ.

7Lɛ la ka Yeezu da laboreŋ yeli ko ba, “Yelmeŋɛ zaa ka N yele korɔ yɛ, maa la a dendɔre ko a peere. 8A banaŋ zaa naŋ daŋ de N weɛ wa, waa la nannyigri ane fafareba, kyɛ a peere da ba kyɛlle woŋ ba yɛlɛ. 9Maa la a dendɔre. Soba na zaa naŋ tu N zie kpɛ na nyɛ la faabo. O na maŋ kpɛ la kyɛ yi, a nyɛ mɔmaara. 10A nannyige maŋ wa la ka o zu, a ko, a kyɛ sãã yoŋ. Maa eŋ waɛ la ka ka noba na taa nyɔvore, a taa o ka o gore.”

11“Maa la a pekyee-meŋɛ. A pekyee-meŋɛ maŋ de la o nyɔvore biŋ ko a peere. 12Kyɛ pekyeenɛ ba naŋ de ka o kyeenɛ a peere kyɛ ka ba yɔɔrɔ o, ka a peere ba e o soobo, maŋ zo la kyɛ bare a peere ka o naŋ wa nyɛ gboŋgbori ka o waana. A gboŋgbori pãã maŋ nyɔge la a peere ŋmɛyaare. 13A pekyeenɛ ba naŋ de maŋ zo la kyɛ bare a peere bonso, o ba taa a peere yɛlɛ. 14Maa la a pekyee-meŋɛ. N baŋ la N peere, ka a N peere meŋ baŋ ma, 15aŋa lɛ N Saa naŋ baŋ ma ka N meŋ baŋ O. Kyɛ N de la N nyɔvore tere a N peere zuiŋ. 16N taa la a peere mine naŋ ba e a zage ŋa peere. A ferɛɛ la ka N taa a meŋ wa poɔ a zage ŋa peere poɔ, ka a na kyɛlle woŋ a N kɔkɔre. A lɛ la ka a pãã na e zage yeni peere ane pekyee-yeni. 17A ŋaa zuiŋ la ka a Saa nɔŋ ma, bonso, N de la N nyɔvore tere ka ka N na leɛ de o. 18Neɛzaa kontoɔ̃ de a N nyɔvore, kyɛ maa meŋɛ la boɔrɔ a de o tere. N taa la kpeɛ̃õ ka N de o tere, kyɛ la taa a kpeɛ̃õ ka N la leɛ de o. N nyɛ la a noɔre ŋa yi a N Saa zie.”

19Wɛltaa da la maaleŋ kpɛ la a Gyuumine sogɔ a Yeezu yelbie ama zuiŋ. 20A noba yaga da yele la, “O taa la sefaa ka O zu ba kyebe. Bonso ka yɛ kyɛllɛ o yɛlɛ?” 21Ka a noba mine meŋ da yele, “A yɛlɛ ama ba e neɛ naŋ taa sefaa yelbie. Sefaa na toɔ̃ yuo la zɔŋ nimie be?”

A Gyuumine Naŋ Zagre Yeezu Bare

22A saŋ na poɔ ba da dire la a Naaŋmen die Maaloo tigri. A ɔɔkpoŋ saŋ poɔ da la, 23ka a Yeezu da yɔ kyɛnɛ a Naaŋmen die poɔ, a kyaaraa na ba naŋ da boɔlɔ a Solomɔn Kyaaraa. 24Lɛ la ka a Gyuumine da wa ŋmaagyili O kyɛ da soore O, “Fo mɔɔ boɔrɔ la ka te be bonnoo poɔ a kɔɔre seŋ wola? Ka fõõ wa la a Mɛzaaya,#10:24 Mɛzaaya: A Mɛzaaya tɛgɛ la a ‘Kirista.’ yeli weliweli ko te wɛ.” 25Ka a Yeezu da yeli sɔge, “N da yeli ko yɛ la kyɛ ka yɛ ba sage de. A toma N naŋ tonɔ a N Saa yuori eŋɛ dire la N danseɛ. 26Kyɛ yɛ ba sage de, yɛ naŋ ba poɔ a N peere poɔ zuiŋ. 27A N peere maŋ woŋ la a N kɔkɔre. N baŋ a la, ka a maŋ tuuro ma. 28N ko a la nyɔvore naŋ ba taa baaroo, ka a daŋ koŋ kpi zaa. Neɛzaa koŋ baŋ faa a yi ne a N nuuri poɔ. 29Bonna N Saa naŋ ko ma waa la kpoŋ gaŋ ama zaa, ka neɛzaa koŋ baŋ faa o yi a Saa nuuri poɔ. 30Maa ne a Saa waa la yeni.”

31A Gyuumine da laboreŋ de la kubo ka ba za ne a Yeezu. 32Ka a Yeezu da soore ba, “N toŋ la tonsonne yaga naŋ yi a Saa zie wuli yɛ. A toma ŋa buo soba eŋɛ la ka yɛ na za ma ne a kubo?” 33Ka a Gyuumine da yeli sɔge, “A ba e a toŋ soŋ fo naŋ toŋ la so ka te na za fo ne kubo, kyɛ fo naŋ to Naaŋmen zone zuiŋ la. Fo waa la nensaala yoŋ, kyɛ de fo meŋɛ boɔlɔ Naaŋmen.” 34Ka Yeezu da yeli sɔge, “Ba ba sɛge ŋaa eŋ a yɛ Naaŋmen begɛ poɔ be, ‘N da yelee la, yɛ waa la ŋmemɛ’? 35Ka ba naŋ da boɔlɔ a banaŋ zie a Naaŋmen yelbiri naŋ da wa, ‘ŋmemɛ’, kyɛ ka neɛ kontoɔ̃ leɛre a gansoŋ poɔ yɛlɛ bare, 36wola ka yɛ na baŋ yeli ka a soba na a Saa naŋ maale ka O waa soŋ, ka O toŋ O a teŋɛzu, toorɔ la Naaŋmen zone. N naŋ da yeli, ‘N waa la Naaŋmen Bie zuiŋ’? 37Ka maa ba tonɔ a N Saa toma, ka lɛ yɛ ta sage de N yɛlɛ. 38Kyɛ ka maa wa tonɔ a N Saa toma, aneazaa ka yɛ ba sage de N yɛlɛ, kyɛ yɛ sage de a N tontonne, ka a lɛ vɛŋ ka yɛ woŋ kyɛ baŋ a tɛgɛ ka a Saa be la N poɔ ka N meŋ be a Saa poɔ.” 39Lɛ la ka ba da la boɔrɔ ka ba nyɔge O kyɛ ka O da faa yi ba nuuri poɔ gaa.

40A Yeezu da la leɛ gaŋ gaa la a Gyɔɔdan maŋgaŋne, a lambori benee a Gyɔɔn naŋ da korɔ noba suobu, a da te be a be. 41Noba yaga da wa la O zie, a da yele, “A Gyɔɔn da ba e yelwulaa zaa, kyɛ yɛlɛ na zaa a Gyɔɔn naŋ da yeli kyaare ne a dɔɔ ŋa waa la yelmeŋɛ.” 42Noba yaga da sage de la a Yeezu yɛlɛ a be.

Currently Selected:

Gyn 10: DNTTP

Highlight

Copy