Gyn 11

A Laazoro Kũũ Yɛlɛ

1Dɔɔ kaŋ da bebe la a beɛrɛ, ka o yuori di Laazoro. O da yi la Bɛtani, a Mareya ane o yɔɔ Maata teŋɛ. 2A Mareya ŋa la da sɔ a Yeezu ne kãã-nyunoɔ kyɛ da de o zukɔɔloŋ meele ne a Yeezu gbɛɛ. A o yɔɔdɔɔ Laazoro da beɛrɛ la. 3Lɛ la ka a Laazoro yɔɔpuuli da toŋ ka ba te yeli a Yeezu, “Daana, a soba na fo naŋ nɔŋ beɛrɛ la.” 4Kyɛ Yeezu naŋ da wa woŋ a duoro, O da yelee la, “A baaloŋ ŋa ba e o kũũ baaloŋ, kyɛ o beɛrɛ la ka Naaŋmen yuori na nyɛ puubu, ka a Naaŋmen Bie na tu a be a nyɛ puubu.” 5Aneazaa ka Yeezu da nɔŋ la Maata ane o yɔɔ Mareya ane a Laazoro, 6kyɛ O naŋ da wa woŋ a Laazoro baaloŋ yɛlɛ, O da naŋ be la a be O naŋ be beri ayi.

7A ŋaa puoriŋ la ka a Yeezu da yeli ko a O potuuribo, “Yɛ e ka te la gaa a Gyudiya paaloŋ.” 8A potuuribo da yeli ko O la, “Wulwullo, daare yɛŋyɛŋ ŋa naane ka a Gyuumine da boɔrɔ ka ba za fo ne kubo, kyɛ ka fo la maaleŋ gɛrɛ a be?” 9Ka a Yeezu da yeli sɔge, “Gbelli pie ne ayi naane be a ŋmenaa saŋ be? Banaŋ naŋ kyɛnɛ ŋmenaa saŋ ba ŋmeɛrɛ gbɛɛ, bonso, ba maŋ nyɛrɛ la a teŋɛ ŋa zu kyaane. 10Kyɛ banaŋ naŋ kyɛnɛ tensogɔ saŋ maŋ ŋmeɛrɛ la gbɛɛ, bonso, a kyaane ba kye ba poɔ.” 11A Yeezu naŋ da wa yeli a ŋaa baare, O da yeli ko ba la, “A te ba Laazoro gbiree la, kyɛ N gɛrɛ la a be ka N te seŋ o.” 12Ka a potuuribo da yeli ko O, “Daana, ka o naŋ wa gbiri, o na leɛ nyɛ la laafeɛ wɛ.” 13A Laazoro kũũ yɛlɛ la ka a Yeezu da yele korɔ a potuuribo kyɛ ka ba da teɛre ka goɔŋ la ka o sereŋ gbiri. 14Lɛ la ka Yeezu da yeli weliweli ko ba, “A Laazoro kpie la. 15Kyɛ a yɛ zuiŋ, a e ma la noɔ ne N naŋ da ba kyebe, ka a lɛ na vɛŋ ka yɛ na sage de a N yɛlɛ. Yɛ e ka te gaa o zie.” 16A Tɔmaase ba naŋ da boɔlɔ Yeebaa da yeli ko la a o potuur-taaba, “Yɛ e ka te meŋ gaa, ka te ne O te laŋ kpi.”

Yeezu La A Kuuni Poɔ Leɛ-iruu Ane Nyɔvore

17A Yeezu naŋ da wa ta, O da nyɛɛ la ka ba ũũ a Laazoro ka a ta beri anaare. 18A Bɛtani teŋɛ da peɛle la Gyɛruzɛlɛm, a e ŋa mɛlɛ ayi. 19A Gyuumine yaga da yi la a Gyɛruzɛlɛm a wa ka ba moore ko a Maata ane Mareya a ba yɔɔdɔɔ kũũ eŋɛ. 20A Maata naŋ da wa woŋ ka a Yeezu waana la, o da yi te tuori O la, kyɛ ka Mareya eŋ da be a yiri poɔ. 21A Maata da yeli ko la Yeezu, “Daana, ka fõõ da be kyɛ, a N yɔɔdɔɔ da koŋ kpi. 22Kyɛ a pampana ŋa, N baŋ ka Naaŋmen na ko fo la bonzaa fo naŋ sɔre yi O zie.” 23A Yeezu da yeli ko o la, “A fo yɔɔdɔɔ na leɛ-iri la.” 24Ka a Maata da yeli ko O, “N baŋɛɛ la ka a n yɔɔdɔɔ na leɛ-iri la a kuuni leɛ-iruu poɔ a bebi-baaraa daare.” 25Ka a Yeezu da yeli ko o, “Maa la a kuuni poɔ leɛ-iruu ane a nyɔvore. Banaŋ naŋ sage de N yɛlɛ, ka ba naŋ kpi gba, ba na leɛ voorɔ la, 26ka neɛzaa naŋ voorɔ kyɛ sage de N yɛlɛ daŋ koŋ kpi zaa. Fo sage de la a ŋaa bee?” 27Ka a Maata da yeli ko O, “Õõ, Daana, N sage deɛ la ka fõõ la a Mɛzaaya,#11:27 Mɛzaaya: A Mɛzaaya tɛgɛ la a ‘Kirista.’ a Naaŋmen Bie na naŋ waana a teŋɛzu.”

Yeezu Naŋ Ŋma Nentaŋ

28A Maata naŋ da wa yeli a ŋaa, o da leɛ gaa te boɔle la o yɔɔ Mareya a waale yeli ko o, “A wulwullo be la kyɛ, a boɔlɔ fo.” 29A Mareya naŋ da wa woŋ a ŋaa, o da vaa-iree la wieouŋ zaa a gaa a Yeezu zie. 30A Yeezu da naŋ ba kpɛ a teŋɛ poɔ sɛre. O da naŋ kyɛnɛ be la a be a Maata naŋ da tuori O. 31A Gyuumine na naŋ da be a Mareya zie a yiri poɔ a moorɔ korɔ o da nyɛ o la ka o vaa-iri wieouŋ zaa a te yi yeŋ. Ba da iri tuuro o la, bonso, ba da teɛre ka o gɛrɛ la a yaa zie ka o te koŋ. 32A Mareya naŋ da wa ta a be a Yeezu naŋ be, a da nyɛ O, o da gbi la dumo a Yeezu gbɛɛ puliŋ kyɛ da yeli ko O, “Daana, ka fõõ da be kyɛ, a N yɔɔdɔɔ da koŋ kpi.” 33A Yeezu naŋ da wa nyɛ a Mareya ka o kono, ka a Gyuumine na naŋ da tuuro o meŋ da kono, a da dɔ̃ɔ̃ la O sukyiri yaga zaa ka O da nyɔge O meŋɛ fãã. 34A Yeezu da soore ba la, “Yeŋ la ka yɛ ũũ o?” Ka ba da yeli ko O, “Daana, wa nyɛ.” 35A Yeezu da piili ŋmaara la nentaŋ. 36A lɛ la ka a Gyuumine da yeli, “Yɛ nyɛ O naŋ nɔŋ o lɛ!” 37Kyɛ ka a noba mine da yeli, “Ka lɛ O naŋ da toɔ̃ yuo a dɔɔ zɔŋ nimie, O mɔɔ da kontoɔ̃ e ka a dɔɔ ŋa da ta kpi be?”

Yeezu Naŋ E Ka Laazoro Leɛ-iri A Kuuni Poɔ

38Lɛ la ka a Yeezu sukyiri da la dɔ̃ɔ̃ O, ka O da la gaa a yaa zie. A yaa da waa la taŋ bogi ka kuuri furi o noɔre. 39A Yeezu da yelee la, “Yɛ billi a kuuri bare.” Ka Maata, a kũũ yɔɔpuulee da yeli ko a Yeezu, “Daana, o faa nyuuro la, bonso, ba naŋ ũũ o a beri anaare la zenɛ.” 40A Yeezu da leɛ yeli ko o la, “N da ba yeli ko fo ka ka fõõ wa sage de, fo na nyɛ la a Naaŋmen puubu be?” 41Lɛ la ka ba da billi a kuuri bare. A Yeezu pãã da gbole kaa la sazu kyɛ yeli, “N Saa, N puori fo la bareka ne fo naŋ kyɛlle woŋ a N puoruu. 42N baŋɛɛ la ka fo maŋ kyɛlle woŋ la N puoruu tegitegilɛ, kyɛ a noba bama naŋ are a kyɛ zuiŋ la so ka N yeli a ŋaa ka ka ba na sage de ka fõõ la toŋ ma.” 43O naŋ da wa yeli a ŋaa, O da ŋmɛ la kpɛlle ne kɔkɔkpeɛŋaa a yeli, “Laazoro, iri yi wa!” 44A kũũ da iri yi waɛ la, ka pɛmɛ leŋ o gbɛɛ ne o nuuri, ka pɛne vili pɔge o niŋe. Ka a Yeezu da yeli ko ba, “Yɛ lori a pɛmɛ kyɛ bare o ka o gɛrɛ.”

Ba Naŋ Bo Ka Ba Ko Yeezu

45A Gyuumine yaga naŋ da tu a Mareya wa, a da wa nyɛ bonna a Yeezu naŋ da e, da sage de la O yɛlɛ. 46Kyɛ a noba mine da leɛ gaa la a Faraziimine zie a te manne ko ba bonna a Yeezu naŋ e. 47Lɛ la ka a bagmaalkare ane a Faraziimine da boɔle a sɛrediribe lantaa a soore ba, “Wola ka te na e? A dɔɔ ŋa erɛ la yelwulii yaga. 48Ka tenee bare O ka O naŋ erɛ a ŋaa, a noba zaa na sage de la a O yɛlɛ, ka a lɛ vɛŋ ka a Uroma noba wa sãã a te zisoŋ ane a te teŋɛ bare.” 49Kyɛ a ba kaŋ yuori naŋ da di Kayefa kyɛ da e a Naaŋmen bagmaalkare neŋkpoŋ a yuoni na poɔ, da yelee la, “Yɛ deɛ ba baŋ yelzaa togitogi! 50Yɛ ba baŋ a tɛgɛ ka a na soma la ka yɛ e ka neŋyeni kpi a noba zuiŋ a gaŋ a noba zaa naŋ na kpi.” 51O meŋɛ naane da baŋ a yeli ŋa a yele, kyɛ o naŋ da e a Naaŋmen bagmaalkare neŋkpoŋ a yuoni na poɔ la so ka o da yele a Ŋmen-yelmanna yelyelii a kyaare ne a Yeezu, ka Ona la na kpi a faa a paaloŋ noba. 52A paaloŋ faabo yoŋ naane, kyɛ O waɛ la ka O laŋ a Naaŋmen biiri naŋ yaare ziiri zaa taa ziyeni. 53Azuiŋ, a yi a lɛ daare gɛrɛ, ba da narɛɛ la ka ba ko a Yeezu.

54A lɛ zuiŋ, Yeezu da ba la sagra kpeɛrɛ a Gyuumine poɔ. O da yi la a be gaa teŋɛ kaŋ ba naŋ boɔlɔ Eferem naŋ be a paaloŋ kaŋ naŋ peɛle a wɛgyɛŋ ka O ne a O potuuribo da te be a be.

55A Gyuumine Ista tigri da peɛlɛ la, ka noba yaga da yi a tembilii poore gaa Gyɛruzɛlɛm ka ba te peere bamenne kyɛ ka a tigri pãã ta. 56Ba da yɔ boɔrɔ la a Yeezu, a soorɔ taa, ba naŋ da are a Naaŋmen die poɔ, “Wola ka yɛ teɛre? Yelmeŋɛ zaa, O na wa la a tigri zie be?” 57A Naaŋmen bagmaalkare ane a Faraziimine da tere la noɔre ka neɛzaa naŋ baŋ zie na a Yeezu naŋ be, o wa yeli ko ba ka ba te nyɔge O.

Currently Selected:

Gyn 11: DNTTP

Highlight

Copy