Gyn 12

Mareya Naŋ Sɔ Yeezu Kããsoŋ

(Mat 26:6-13; Mak 14:3-9)

1A naŋ da kyɛre beri ayoɔbo kyɛ ka a Ista tigri na ta, Yeezu da gaa la Bɛtani teŋɛ. Be la ka Laazoro, a neɛ na Yeezu naŋ da e ka o leɛ-iri yi a kuuni poɔ da kpeɛrɛ. 2Ba da maale la bondirii ko O a be. Maata la da kaara a bondirii yɛlɛ, ka Laazoro da e a neɛ na kaŋ naŋ da laŋ zeŋ a diibu zie ne a Yeezu. 3Mareya da de la turaali mine daaroŋ naŋ ba wono zaa, a wa sɔ ne a Yeezu gbɛɛ, kyɛ de a o zukɔɔloŋ meele ne. A turaali da nyu laare la a yiri zaa. 4Kyɛ ka Gyudase, a Yeezu potuuribo kaŋ (a onaŋ naŋ da na yi a Yeezu puori a de O tere) da yeli: 5“Bonso ka ba da koŋ de a turaali ŋa koɔre a nyɛ yuoni gbuli san-yɔɔ, a da de a libie soŋ ne nembaalba?” 6(A ba e ŋa o naŋ da taa a nembaalba yɛlɛ la so ka o da yeli a ŋaa, kyɛ o naŋ da waa nannyige la so. Ona la da maŋ taa a ba libie woɔ, a da maŋ zuuro a libie mine.) 7Ka a Yeezu da yeli, “Yɛ bare a pɔge zomm. O da da la a turaali ŋa ka o nare kyaare ne N ũũmu daare. 8Yɛ na maŋ taa la a nembaalba ka ba be yɛ zie tegitegilɛ kyɛ maa eŋ koŋ be yɛ zie tegitegilɛ.”

Ba Naŋ Bo Ka Ba Ko Laazoro

9A Gyuumine yaga naŋ da wa woŋ ka Yeezu da be la a be, ba da ba wa a Yeezu yoŋ zuiŋ kyɛ ba da waɛ la ka ba wa nyɛ a Laazoro. Ona la ka Yeezu da e ka o leɛ-iri yi a kuuni poɔ. 10Lɛ la ka a Naaŋmen bagmaalkare da nare ka ba ko a Laazoro meŋ. 11Bonso, a Laazoro kuuni poɔ leɛ-iruu yɛlɛ la so ka a Gyuumine yaga da sagra derɛ a Yeezu yɛlɛ kyɛ zagra a ba yɛlɛ.

Yeezu Naŋ Kpɛ A Gyɛruzɛlɛm Ne Gandaaloŋ

(Mat 21:1-11; Mak 11:1-11; Luk 19:28-40)

12A nyaazie daare, a nembeɛoŋ naŋ da wa a tigri zie da woŋ ka Yeezu waana la a Gyɛruzɛlɛm. 13Azuiŋ ba da ŋmaa la kpaakpaa vaare, a yi ka ba te tuori O. Ba da kyaara la a yele:

“Hozaana!

A soba na naŋ waana a Daana yuori eŋɛ nyɛ la maaloo;

A Izerayɛl Naa!”

14A Yeezu da nyɛ la boŋlee a do zɔŋ. Ka a deɛ tu lɛ ba naŋ da sɛge a gansoŋ poɔ:

15“Zaayɔn pɔgeyaa, ta zoro dabeɛ̃.

Nyɛ, a fo naa waana la,

a zɔŋ boŋlee!”

16A Yeezu potuuribo da naŋ ba baŋ a yeli ŋa tɛgɛ. Kyɛ O naŋ da wa leɛ-iri yi a kuuni poɔ a nyɛ puubu baare la ka ba pãã da leɛ-teɛre ka a lɛ ba naŋ da sɛge a gansoŋ poɔ kyaare ne O la da nyɛ eebo O zie. 17Lɛ la ka a nembeɛoŋ na naŋ da bebe kyɛ ka a Yeezu da boɔle a Laazoro ka o yi a yaa poɔ, a leɛ voorɔ, da dire a yɛlɛ danseɛ. 18A noba naŋ da woŋ ka a Yeezu e la yelwulaa ŋa la so ka a nembeɛoŋ da gaa ka ba te tuori O. 19A Faraziimine pãã da yele korɔ la taa, “Yɛ nyɛɛ la, yɛ koŋ baŋ e yelzaa. Nyɛ, a tendaa zaa la tuuro O!”

Giriki Noba Mine Da Boɔrɔ la Ka Ba Nyɛ A Yeezu

20Giriki noba mine da poɔ la a noba na naŋ da gaa a tigri zie ka ba te puori. 21Ba da wa la Filipi zie. A Filipi da yi la Bɛsaada teŋɛ naŋ da be Galili paaloŋ. A Giriki noba da yeli ko la a Filipi, “Neŋkpoŋ, te boɔrɔ la ka te nyɛ a Yeezu.” 22A Filipi da gaa te yeli ko la Anduru, ka a Anduru ane a Filipi zaa da gaa te yeli ko a Yeezu. 23Ka a Yeezu da yeli sɔge ba, “A saŋ taɛ la ka a Nensaala Bie na nyɛ puubu. 24Yelmeŋɛ zaa la ka N yele korɔ yɛ, ka kabiri ba le teŋɛ a poɔ̃, o maŋ e la kabi-yeni. Kyɛ ka o naŋ wa poɔ̃, o maŋ buli la a eŋ bie yaga. 25Banaŋ naŋ nɔŋ ba nyɔvoɛ maŋ kɔŋ la ba nyɔvoɛ, kyɛ ka banaŋ naŋ ba nɔŋ ba nyɔvoɛ a teŋɛzu kyɛ, na taa la ba nyɔvoɛ a nyɔvo-babaaraa poɔ. 26Soba na zaa naŋ tonɔ korɔ ma, a ferɛɛ la ka o tuuro ma. Zie N naŋ be la ka N tontonɔ meŋ na be. Soba na zaa naŋ tonɔ korɔ ma, a N Saa na eŋ la o soba.”

Yeezu Naŋ Yeli O Kũũ Yɛlɛ

27“Pampana ŋa N teɛroŋ zaa gyɛrɛɛ la. Boŋ ka N na yeli, ‘N Saa, faa ma yi a tuo ŋa poɔ be’? Ai, a ŋaa zuiŋ la ka N bebe wa ta a tuo ŋa saŋ. 28N Saa, e ka a fo yuori nyɛ puubu.” Lɛ la ka kɔkɔre kaŋ yi sazu a yele, “N eɛɛ la ka a N yuori nyɛ puubu, kyɛ N na la e ka o la nyɛ puubu.” 29A nembeɛoŋ naŋ da are a be a woŋ a yɛlɛ ŋa, da yeli ka saa la tanne. Ka ba mine meŋ da yeli, “Maleke la yeli yɛlɛ ko O.” 30Ka a Yeezu da yeli sɔge, “A yɛ zuiŋ la ka a kɔkɔre ŋa yeli a yɛlɛ, maa eŋ zuiŋ naane. 31A tendaa deme sɛrɛɛdiibu la a ŋaa. Pampana ba na digi la a tendaa naa bare. 32Kyɛ maa eŋ, ka ba naŋ wa zɛge ma a teŋɛ ŋa zu ka N do saa, N na tage la nensaalba zaa wa ne N zie.” 33A Yeezu da yeli la a ŋaa ka O wuli bonna tɔ kũũ O naŋ na kpi. 34A nembeɛoŋ da yeli sɔge O la, “Te da woŋee la yi a Naaŋmen begɛ poɔ ka a Mɛzaaya#12:34 Mɛzaaya: A Mɛzaaya tɛgɛ la a ‘Kirista.’ na bebe la tegitegilɛ. Wola ka fo pãã yele ka a ferɛɛ la ka ba zɛge a Nensaala Bie ka o do saa? Nembuo la a Nensaala Bie ŋa?” 35Ka a Yeezu da yeli ko ba, “A kyaane be la yɛ zie ka a kɔɔre belaa. Yɛ naŋ taa a kyaane, yɛ kyɛnɛ a kyaane poɔ, ka ligruŋ ta wa ligi pɔge yɛ. Ka yɛnee wa kyɛnɛ lige poɔ, yɛ ba maŋ baŋ zie yɛ naŋ gɛrɛ. 36Yɛ naŋ taa a kyaane, yɛ sage de a kyaane yɛlɛ, ka a lɛ e ka yɛ leɛ a kyaane biiri.”

A Noba Naŋ Ba Sage De a Yeezu Yɛlɛ

A Yeezu naŋ da wa yeli a ŋaa baare, O da yi la a noba poɔ a te sɔgle O meŋɛ. 37Aneazaa ka Yeezu da e la yelwulii yaga ba niŋesogɔ, ba da ba sage de O yɛlɛ. 38A ŋaa da eɛɛ la ka ka a lɛ a Ŋmen-yelmanna Azaaya naŋ da yeli na tu a tuubu:

“Daana, aŋ la da sage de a te yɛlɛ,

ka nembuo la ka a Daana da wuli a O ganda-nu?”

39Kyɛ a lɛ zuiŋ ba da koŋ baŋ sage de, bonso, a Azaaya da la yelee la:

40“O eɛɛ la ka ba nimie zɔŋ

kyɛ ka ba sukyie dare,

ka ka ba kontoɔ̃ kaa nyɛ ne ba nimie,

a na baŋ a tɛgɛ ne ba yɛŋ a leɛ ba eebo,

ka N saŋ ba.”

41A Azaaya da yeli la a yɛlɛ ŋa kyaare ne a Yeezu, bonso, o da nyɛ la O puubu. 42Kyɛ anealɛzaa, a noba yaga, a laŋ ne a nembɛrɛ mine da sage de la a Yeezu yɛlɛ. Kyɛ a Faraziimine zuiŋ ba da ba sage na yeli ka a yi, ba naŋ da zoro dabeɛ̃ ka ba na digi ba la bare a puoruu die poɔ zuiŋ, 43bonso, ba da nɔŋ la puubu naŋ yire nensaalba zie a gaŋ puubu naŋ yire Naaŋmen zie.

A Yeezu Kannoo Zukpulluu

44A Yeezu pãã da yeli ne la kɔkɔkpeɛŋaa, “Soba na zaa naŋ sage de N yɛlɛ, ba sage de N yoŋ yɛlɛ kyɛ a soba na naŋ toŋ ma yɛlɛ la ka o sage de. 45Neɛ na zaa naŋ nyɛ ma, nyɛ la soba na naŋ toŋ ma. 46N waa la kyaane naŋ wa a teŋɛzu, ka ka neɛ na zaa naŋ wa sage de N yɛlɛ koŋ la be lige poɔ. 47N ba dire neɛzaa naŋ woŋ a N yɛlɛ kyɛ ba tuuro a sɛrɛɛ, bonso, N ba wa ka N di a andonɛɛ sɛrɛɛ. Kyɛ N waɛ la ka N faa a andonɛɛ. 48Soba na naŋ zagre ma, a ba sage de N yɛlɛ taa la sɛredire. A bebi-baaraa daare, a yɛlɛ na N naŋ yeli la na di a o sɛrɛɛ. 49N meŋɛ yɛlɛ naane ka N yele, kyɛ a Saa naŋ toŋ ma meŋɛ la ko ma noɔre kyaare ne yɛlɛ N naŋ na yeli ane yɛlɛ anaŋ naŋ seŋ ka N manne. 50Kyɛ N baŋ ka a noɔre O naŋ ko ma terɛ la nyɔvore naŋ ba taa baaroo. Azuiŋ, a yɛlɛ N naŋ yele, a lɛ zomm N Saa naŋ ko ma la ka N yele.”

Currently Selected:

Gyn 12: DNTTP

Highlight

Copy