Tom 8

1A Sɔɔl da sage ne la a banaŋ naŋ da ko a Stefanuu.

A Sɔɔl Naŋ Dɔgre A Puoruu Laŋne Deme

A bebiri na ne o zu, dɔgroŋ kpoŋ da le la a puoruu laŋne deme zu a Gyɛruzɛlɛm poɔ, ka a noba zaa da zo yaare a Gyudiya ane a Samareya paaloŋ poɔ, kyɛ te kyɛre a apostoliimine yoŋ. 2A puoruu nimizeɛ noba mine da ũũ la a Stefanuu kyɛ da koŋ o yaga zaa. 3Kyɛ Sɔɔl da iri la o nimiri eŋ a puoruu laŋne deme. O da maŋ kpɛ la yiri ŋa poɔ a yi te kpɛ yiri ŋa poɔ a nyɔgrɔ dɔbɔ ane pɔgeba vuuro a te eŋ nempagdie poɔ.

Filipi Naŋ Moɔle A Yelbiri Samareya Poɔ

4A banaŋ naŋ da zo yaare da yi yoɔrɔ la, a moɔlɔ a yelbiri. 5Filipi da sigi gaa la a Samareya teŋkpoŋ poɔ a te moɔle a Mɛzaaya#8:5 Mɛzaaya: A Mɛzaaya tɛgɛ la a ‘Kirista.’ yɛlɛ ko ba. 6A nembeɛoŋ naŋ da wa woŋ kyɛ nyɛ a yelwulii a Filipi naŋ da erɛ, ba da laŋ la noɔre a wa kyɛllɛ a yɛlɛ na o naŋ da yele, 7bonso, sefaare da kyeerɛ la yaga zaa kyɛ yire a noba enneŋ; ka noba yaga naŋ da waa gbɛrɛɛ bee wɔɔre da nyɛ sammo. 8A lɛ zuiŋ popeɛloŋ kpoŋ da be la a teŋkpoŋ na poɔ.

9Dɔɔ kaŋ yuori naŋ da di Saamon da daŋ erɛ la yelbeere a teŋkpoŋ poɔ, ka a Samareya teŋɛ noba nɔɛ da maa, kyɛ ka o da yele ka o waa la gandaa. 10A noba zaa, a yi ba bile a te tɔ ba kpoŋ soba da eŋ la toori a kyɛllɛ a o yɛlɛ, a yele, “A dɔɔ ŋa la a Naaŋmen kpeɛ̃õ na ba naŋ boɔlɔ Gandaa.” 11Ba da eŋ la toori a kyɛllɛ o yɛlɛ, bonso, o da toŋ la nɔmaa toma ka a maa ba nɔɛ ka a kɔɔre. 12Kyɛ a Filipi naŋ da wa moɔlɔ a Naaŋmen naaloŋ yelnoore ane a Yeezu Kirista yuori yelnoore, ba da sage de la a Filipi yɛlɛ a de suobu, dɔbɔ ane pɔgeba. 13A Saamon meŋ gba da sage de la a yɛlɛ. O naŋ da wa de a suobu baare, o da be la a Filipi zie tegitegilɛ. A dɔɔ ŋa noɔre da maaɛ la ne a yelwulii ane a toŋseɛlɛ o naŋ da nyɛ.

14A apostoliimine naŋ da wa woŋ a Gyɛruzɛlɛm poɔ ka a Samareya noba sage de la a Naaŋmen yelbiri, ba da toŋ la Piita ane Gyɔɔn ba zie. 15A ba bayi da sigi la a Samareya a te puori ko ba, ka ka ba na toɔ̃ de a Vooroŋ Soŋ, 16(bonso, a Vooroŋ Soŋ da naŋ ba sigi wa ba kanzaa zie sɛre. Suobu yoŋ la ka ba da de a Daana Yeezu yuori eŋɛ). 17Lɛ la ka a Piita ane a Gyɔɔn da de ba nuuri pare ba zuri ka ba da de a Vooroŋ Soŋ. 18A Saamon naŋ da wa nyɛ ka a apostoliimine de ba nuuri pare a noba zuri ka ba nyɛ a Vooroŋ Soŋ, o da ko ba la libie, 19a yele, “Yɛ ko n meŋ a kpeɛ̃õ ŋa ka maa meŋ wa de n nuuri pare neɛzaa zu ka o soba meŋ nyɛ a Vooroŋ Soŋ.” 20Kyɛ ka a Piita da yeli ko o, “Ka fõõ ne a fo libiri zaa wɛ, bonso, fo teɛre ka fo na toɔ̃ da la a Naaŋmen kyɔɔtaa ne libiri! 21Fo nu kye a toma ŋa poɔ, bonso, fo poteɛrɛ ba veɛlɛ Naaŋmen zie. 22Leɛ a fo eebo yi a fo potuyɛlɛ poɔ, kyɛ sɔre a Daana ka anaŋ wa taa eebo ka O di a fo poteɛre faare suuri ko fo. 23Bonso, N nyɛɛ la ka fo taa la pokpegri kyɛ ka potuoloŋ bɔnzɔlɔ leŋ fo taa.” 24Ka a Saamon da yeli sɔge, “Yɛ puori sɔre a Daana ko ma ka a yɛlɛ ama kanzaa fo naŋ yeli ta page ma.”

25A Piita ane a Gyɔɔn naŋ da wa di a yɛlɛ ama danseɛ a kyɛ manne a Daana yelbiri baare, ba da la leɛ gaa la a Gyɛruzɛlɛm, a moɔlɔ a yelnoore a Samareya tembilii yaga poore.

Filipi Ane Etopiya Dɔɔ-varaa Yɛlɛ

26A Daana maleke pãã da yeli ko la a Filipi, “Iri tu a sapare nudoloŋ seŋ sori naŋ yi Gyɛruzɛlɛm a sigre Gaza.” (A sori ŋa e la a wɛgyɛŋ sori.) 27A lɛ la ka o da vaa-iri gaa. A Etopiya teŋɛ dɔɔ kaŋ naŋ da waa dɔɔ-varaa da e la Kandase sɛrediribe neŋkpoŋ. A dɔɔ ŋa da e la a Etopiya pɔgenaa tontonɔ naŋ da kaara a pɔgenaa libie zu. O da wa la Gyɛruzɛlɛm ka o wa puori 28kyɛ pãã da leɛ kulo. O da zeŋ la o wie toriko poɔ a kanna a ŋmen-yelmanna Azaaya gansɛgraa. 29Lɛ la ka a Vooroŋ Soŋ da yeli ko a Filipi, “Gaa a wie toriko ŋa zie a te do kpɛ zeŋ poɔ ba poɔ.” 30A Filipi pãã da zo ta la a wie toriko a woŋ a dɔɔ-varaa naŋ kanna a Ŋmen-yelmanna Azaaya gane. O da soore o la, “Fo baŋ la a yɛlɛ ama fo naŋ kanna tɛgɛ be?” 31Ka o yeli sɔge, “N na e la wola baŋ a tɛgɛ ka neɛ kaŋ ba wuli ma?” O pãã da boɔle la a Filipi ka o do kpɛ a wie toriko poɔ ka ba laŋ zeŋ. 32A gane zie na o naŋ da kanna la ŋa:

“O da waa ŋa peroo ba naŋ taa gaa ne o koobo zie,

aŋa pilee naŋ are neɛ naŋ ŋmaara o kɔɔloŋ niŋesogɔ gbilli lɛ,

o da ba haa o noɔre.

33Ba da eŋ O la vi poɔ a ba di O sɛrɛɛ ne yelmennoŋ.

Aŋ na toɔ̃ manne a O saŋ noba yɛlɛ?

Bonso, ba iri la o nyɔvore yi a teŋɛzu.”

34A dɔɔ-varaa da soore la a Filipi, “Nembuo yɛlɛ la ka a Ŋmen-yelmanna ŋa da yele? O meŋɛ yɛlɛ la ka o da yele bee neɛ kaŋ yɛlɛ la?” 35Lɛ la ka Filipi pãã da piili a manna a Ŋmen-yelmanna sɛgebo ŋa, a moɔle a Yeezu yelnoore ko o. 36Ba naŋ da naŋ be a sobiriŋ gɛrɛ, ba da wa ta la koɔ̃ mine; ka a dɔɔ-varaa yeli, “Nyɛ, koɔ̃ la be kyɛ! Boŋ la na pigi n suobu deebo?” 37[Ka Filipi yeli, “Fo na de la a suobu ka fõõ wa sage de a yɛlɛ ne fo poɔ zaa.” Ka a dɔɔ-varaa da leɛ yeli sɔge, “N deɛ la ka Yeezu Kirista la a Naaŋmen Bie.”] 38O da eɛɛ la ka a toriko are ka ba zaa bayi sigi te kpɛ a koɔ̃ poɔ ka a Filipi ko o a suobu. 39Ba naŋ da wa yi a koɔ̃ poɔ, a Daana Vooroŋ da de la a Filipi gaa ne ka a dɔɔ-varaa da ba la nyɛ o, kyɛ o pãã da de la o sori gɛrɛ ne popeɛloŋ. 40Kyɛ a Filipi da nyɛ la o meŋɛ ka o be Azotu teŋɛ poɔ, kyɛ o naŋ da tɔlɔ a paaloŋ na poɔ, o da moɔlɔ la a yelnoore a tenne zaa poore a te ta a Sezaareya teŋɛ.

Currently Selected:

Tom 8: DNTTP

Highlight

Copy