Tom 9

Sɔɔl Naŋ Leɛ O Eebo

(Tom 22:6-16; 26:12-18)

1A Sɔɔl naŋ da naŋ kyɛnɛ iri o nimiri zaa eŋ a Daana potuuribo dɔ̃ɔ̃mo ane ba koobo eŋɛ, o da gaa la a Naaŋmen bagmaalkare neŋkpoŋ zie 2a te sɔre o ka o ko o gama naŋ na ko o sori ka o gaa Damasko a te kpɛ a puoruuderi poore, ka o naŋ wa nyɛ neɛzaa, dɔbɔ bee pɔgeba naŋ tuuro a Sori#9:2 Sori: A ‘Sori’ tɛgɛ la banaŋ zaa naŋ tuuro a Yeezu Kirista gbɛɛ. ŋa, ka o nyɔge ba leŋ a taa wa ne a Gyɛruzɛlɛm. 3O naŋ da gɛrɛ a te tara a Damasko, a paretɛloŋ lɛ, kyaane da yi la sazu a nyegre sigi wa laare o. 4Ka o da le teŋɛ kyɛ woŋ kɔkɔre kaŋ naŋ yele korɔ o, “Sɔɔl, Sɔɔl, bonso ka fo dɔgrɔ ma lɛ?” 5Ka a Sɔɔl soore, “Nembuo la fo, Daana?” Ka o yeli sɔge, “Maa Yeezu la, a soba na fo naŋ dɔgrɔ. 6Kyɛ vaa-iri kpɛ a teŋɛ poɔ, ba na yeli ko fo la bonna fo naŋ na e.” 7A noba na o naŋ da laŋ gɛrɛ ne nɔɛ da kpɛ la kpore, bonso, ba da woŋ la a kɔkɔre kyɛ da ba nyɛ neɛzaa. 8A Sɔɔl da vaa-iri la a teŋɛsogɔ, aneazaa ka o nimie da yuoe la, kyɛ o da kontoɔ̃ nyɛ bonzaa. Lɛ la ka ba da nyɔge o nu a tage o te kpɛ ne a Damasko teŋɛ poɔ. 9Bebi-gbulo ata ka o da ba nyɛrɛ, a da ba di bee a nyu bonzaa.

10A potuuro kaŋ da be la a Damasko poɔ ka o yuori di Ananeɛ. A Daana da yeli ko o la o nyaabo poɔ, “Ananeɛ.” Ka o sage, “Daana N be la kyɛ.” 11Ka a Daana yeli ko o, “Iri gaa a sori na ba naŋ boɔlɔ So-toraa, a te kpɛ Gyudase yiri a soore dɔɔ kaŋ naŋ yi Taasu teŋɛ, ka o yuori di Sɔɔl yɛlɛ. O be la a be a puoro. 12O nyɛ la dɔɔ kaŋ yuori naŋ di Ananeɛ o nyaabo poɔ ka o wa de o nuuri pare o zu ka o na la leɛ nyɛrɛ.” 13Kyɛ ka Ananeɛ leɛ yeli sɔge, “Daana, N woŋ la a dɔɔ ŋa yɛlɛ noba yaga zie, ane lɛ o naŋ dɔgre a fo nensonne naŋ be a Gyɛruzɛlɛm teŋɛ poɔ. 14A Naaŋmen bagmaalkare ko o la sori ka o wa a kyɛ a wa nyɔge a banaŋ zaa naŋ boɔlɔ a fo yuori a leŋ.” 15Kyɛ a Daana da yeli ko o la, “Gaa, bonso, a neɛ ŋa e la n tontombone ka N kaa-iri, ka o taa N yuori gaa ne a Nemboore-yobo#9:15 Nemboore-yobo: Noba na zaa naŋ da ba waa Gyuumine la a Nemboore-yobo. ane a namine ane a Izerayɛl noba zie. 16Maa meŋɛ na wuli o la lɛ o naŋ na di dɔgɛɛ seŋ a N zuiŋ.” 17Lɛ la ka a Ananeɛ da gaa te kpɛ a yiri poɔ a de o nuuri pare a Sɔɔl zu kyɛ yeli, “N yɔɔ Sɔɔl, a Daana Yeezu, a soba na naŋ da de O meŋɛ wuli fo, fo naŋ da waana a kyɛ; ona la toŋ ma fo zie ka ka fo na la leɛ nyɛrɛ kyɛ paale ne a Vooroŋ Soŋ.” 18A daadaalɛ ka boma mine naŋ da waa ŋa zompɛgɛ deɛ yi a o nimie poɔ le kyɛ ka o da leɛ nyɛrɛ. Lɛ la ka o da iri ka ba ko o suobu. 19Kyɛ o naŋ da wa di bondirii baare, o da leɛ nyɛ la faŋ.

A Sɔɔl Naŋ Moɔle A Yelnoore Damasko Poɔ

A Sɔɔl da be la a potuuribo zie a Damasko poɔ ka a kɔɔre belaa. 20O da piili la a daadaalɛ a moɔlɔ a Yeezu yɛlɛ a puoruuderi poore, a yele, “A Yeezu la a Naaŋmen Bie.” 21Banaŋ zaa naŋ da woŋ a yɛlɛ o naŋ yeli nɔɛ da maaɛ la, ka ba da yeli, “A dɔɔ ŋa naane da ba bara a banaŋ zaa naŋ da boɔlɔ a yuori ŋa a Gyɛruzɛlɛm poɔ be? A yɛlɛ ŋa naane so ka o wa a kyɛ ka o wa nyɔge ba leŋ gaa ne a Naaŋmen bagmaalkare zie be?” 22A Sɔɔl kannoo da naŋ kyɛnɛ duoro la saa kpeɛŋaa zaa, ka a lɛ e ka a Gyuumine naŋ da be a Damasko poɔ nɔɛ da kpɛ kpore ne o naŋ da kanna a wullo ka a Yeezu la a Mɛzaaya.#9:22 Mɛzaaya: A Mɛzaaya tɛgɛ la a ‘Kirista.’

A Sɔɔl Naŋ Zo Yi A Gyuumine Zie

23Beri mine naŋ da wa tɔle, a Gyuumine da boɛ la ka ba ko a Sɔɔl, 24kyɛ a lɛ ba naŋ da bo da ta la a Sɔɔl. A Gyuumine da guuro la a teŋɛ dendɔɛ ŋmenaa ne tensogɔ, ka ka ba na toɔ̃ ko o; 25kyɛ a Sɔɔl potuuribo da de o la eŋ gbɔge poɔ tensogɔ saŋ a turi o bare voɔre kaŋ naŋ be a daŋkyini eŋɛ ka o te sigi.

Sɔɔl Naŋ Be Gyɛruzɛlɛm Poɔ

26A Sɔɔl naŋ da wa ta a Gyɛruzɛlɛm, o da erɛ la aneɛ ka o laŋ ne a potuuribo; kyɛ ba zaa da zoro la o dabeɛ̃, bonso, ba da ba sage de ka o sereŋ waa la a potuuro kaŋ. 27Kyɛ Banabase da taa la a Sɔɔl wa ne a apostoliimine zie, a wa manne ko ba lɛnɛɛ a Sɔɔl naŋ da nyɛ a Daana a sobiri poɔ ka a Daana da yeli yɛlɛ ko o, ane lɛnɛɛ o naŋ da ba zo dabeɛ̃ kyɛ kanna a Yeezu yuori eŋɛ a Damasko teŋɛ poɔ. 28Lɛ la ka a Sɔɔl pãã da poɔ a apostoliimine poɔ, ka ba da laŋ tonɔ a Gyɛruzɛlɛm teŋɛ poɔ. A Sɔɔl da kanna la a Daana yuori eŋɛ a ba zoro dabeɛ̃. 29O da yele la yɛlɛ, a ŋmeɛrɛ nɔkpeɛne ne a Hɛllɛni noba; ka ba da boɔrɔ ka ba ko o. 30A yelderebɛ naŋ da wa te baŋ ne a, ba da taa o la sigi wa ne Sezaareya teŋɛ a te e ka o gaa Taasu teŋɛ.

31A puoruu laŋne deme naŋ da be Gyudiya, Galili ane a Samareya paaloŋ da taa la emmaaroŋ kyɛ da yɛllɛ. A puoruu laŋne da yɛllɛ la, a da taa a Daana dabeɛ̃ kyɛ ka a Vooroŋ Soŋ mooreteroo da be ba zie.

Ɛnease Sammo Yɛlɛ

32A Piita naŋ da yɔ yoɔrɔ a yelderebɛ zaa zie, o da sigi wa la a nensonne meŋ naŋ da be a Lida teŋɛ poɔ. 33O da nyɛ la dɔɔ kaŋ a be ka o yuori di Ɛnease, ka o gbɛre gaŋ teŋɛ yuomo anii. 34A Piita da yeli ko o la, “Ɛnease, vaa-iri, maale a fo boŋganaa biŋ, Yeezu Kirista saŋ fo la!” Ka o da vaa-iri a daadaalɛ. 35Ka a noba zaa naŋ da kpeɛrɛ a Lida ane Saaron tenne da nyɛ o, a da sage de a Daana yɛlɛ.

Piita Naŋ Gaa Lida Ane Gyopa Tenne

36A potuuro kaŋ da be la a Gyopa poɔ ka o yuori di Tabita kyɛ ka ba boɔlɔ o Dɔɔkase#9:36 Dɔɔkase: A Dɔɔkase tɛgɛ la walpieluu. a Giriki kɔkɔre poɔ. O da kpi mare la tonsonne eebo ane nɔmmo toma. 37A saŋ na poɔ, o da beɛrɛ la a kpi. Ba naŋ da wa so o koɔ̃ baare, ba da de o la do te gaale a peɛzu die poɔ. 38A Lida naŋ da peɛle a Gyopa zuiŋ, a potuuribo naŋ da wa woŋ ka a Piita be la a be, ba da toŋ la noba bayi ka ba te sɔre o, “Te sɔrɔ fo la, wa te zie wieouŋ zaa.” 39Lɛ la ka a Piita da iri tu ba gaa. O naŋ da wa te ta, ba da taa o la do ne a peɛzu die. A pɔgkɔbɔ zaa da are la a Piita lamboriŋ a kono kyɛ wullo a kparre ane a wagyɛre a Dɔɔkase naŋ da wuo o vore saŋ. 40A Piita da eɛɛ la ka ba zaa yi, kyɛ ka o pãã da gbi dumo a puori. O da leɛ kyaare la a kũũ kyɛ yeli, “Tabita, vaa-iri.” Lɛ la ka o da yuo o nimie, kyɛ o naŋ da wa nyɛ a Piita o da iri zeŋɛɛ la. 41A Piita da nyɔge la o nu a tage o ka o iri are. O pãã da boɔle la a nensonne ane a pɔgkɔbɔ, a da wa de a Dɔɔkase naŋ da leɛ voorɔ ko ba. 42A yeli ŋa da yaare la a Gyopa teŋɛ zaa ka noba yaga da sage de a Daana yɛlɛ. 43A Piita da be la a Gyopa teŋɛ poɔ ka a te kɔɔre. O da kpeɛrɛ la dɔɔ kaŋ naŋ nɔnɔ gama yiri poɔ, ka ba boɔlɔ o Saamon.

Currently Selected:

Tom 9: DNTTP

Highlight

Copy