Tom 22

1“N saamine ane n yɔɔmine, yɛ kyɛllɛ a n yelbie N naŋ yele na faa n meŋɛ.”

2Ba naŋ da wa woŋ ka o yele yɛlɛ korɔ ba ane a Hiburu kɔkɔre, ba da la maaleŋ e la gbilli lɛ. Lɛ la ka a Pɔɔl yeli:

3“N waa la Gyuu neɛ, ka ba dɔge ma Taasu naŋ be Selusiya paaloŋ poɔ. Kyɛ a teŋkpoŋ ŋa poɔ la ka N baa a Gamaleɛ#22:3 Gamaleɛ: O da waa la Naaŋmen begɛ wulwulberemɛ a Gyuumine poɔ. nuuri poɔ, ka ba wuli ma a te sããkommine begɛ yɛlɛ zaa kyeretete. N eŋɛ da kyerɛ la ne a Naaŋmen yɛlɛ a seŋ yɛ zaa naŋ waa lɛ a zenɛ bebiri. 4N da dɔgre la noba naŋ tu a Sori ŋa ka ba te tɔgle kũũ, a da maŋ leŋ dɔbɔ ane pɔgeba a taa te eŋ nempagdie poɔ, 5a Naaŋmen bagmaale neŋkpoŋ ane a sɛrediribe nembɛrɛ zaa na toɔ̃ di la n danseɛ. N da de la gama meŋ ba naŋ da sɛge yi ba zie a te ko a yɔɔmine naŋ be Damasko poɔ. N da gaa la be ka N te nyɔge banaŋ naŋ da be a be a leŋ ba taa wa ne a Gyɛruzɛlɛm ka ba wa dɔgre ba.”

Pɔɔl Naŋ Manne O Meŋɛ-leɛbo Yɛlɛ

(Tom 9:1-9; 26:12-18)

6N naŋ da naŋ be a sori poɔ a da te peɛle Damasko, aŋa ŋmentantuo saŋ, veɛloŋ kaŋ da yi la sazu a deɛ wa uri kyaane ma. 7N da le la teŋɛ kyɛ woŋ kɔkɔre kaŋ naŋ yele korɔ ma, ‘Sɔɔl, Sɔɔl, bonso ka fo dɔgrɔ ma?’ 8Ka N yeli sɔge, ‘Aŋ la fo, Daana?’ Lɛ la ka O yeli ko ma, “Maa la Yeezu, a Naazɛrɛ Bie, a soba na fo naŋ dɔgrɔ.” 9A noba naŋ da be a n zie da nyɛ la a veɛloŋ kyɛ ba da ba woŋ a kɔkɔre na naŋ da yele a yɛlɛ korɔ ma. 10Ka N soore, ‘Daana, boŋ ka N na e?’ Ka a Daana yeli ko ma, ‘Iri, a gaa a Damasko poɔ, be la ka ba na yeli ko fo bonna fo naŋ na e.’ 11N naŋ da ba la nyɛrɛ a veɛloŋ naŋ da kyaane eŋ ma zuiŋ, a banaŋ naŋ da be n zie da nyɔge la n nu a tage ma te kpɛ ne a Damasko poɔ.

12A puoruu nimizeɛ neɛ kaŋ naŋ da tuuro a Naaŋmen begɛ, ka o yuori di Ananeɛ, ka a Gyuumine zaa naŋ kpeɛrɛ a be da porɔ o yosoŋ, 13da wa la n zie a wa are peɛle ma kyɛ yeli, ‘N yɔɔ Sɔɔl, leɛ nyɛrɛ!’ Ka a gogo na poɔ ka N deɛ leɛ nyɛrɛ, a nyɛ a Ananeɛ. 14Lɛ la ka o yeli, ‘A te sããkommine Naaŋmen la kaa-iri fo ka fo baŋ O poboɔbo, a nyɛ a Nemmeŋɛ Na kyɛ woŋ O kɔkɔre; 15bonso, fo na di la O danseɛ a tendaa zaa poɔ a kyaare ne bon fo naŋ nyɛ kyɛ woŋ. 16Pampana ŋa, boŋ ka fo la kyɛllɛ? Iri, a de suobu, a boɔlɔ O yuori a fo yelbebe pɛgebo eŋɛ.’

Ba Naŋ Toŋ A Pɔɔl A Nemboore-yobo Zie

17“N naŋ da leɛ wa a Gyɛruzɛlɛm a puoriŋ, N da puoro la a Naaŋmen die poɔ, a wa nyɛ nyaabo kaŋ, 18ka a nyaabo poɔ, ka N da nyɛ Yeezu ka O yele korɔ ma, ‘Page wieouŋ a zo yi a Gyɛruzɛlɛm poɔ, bonso, ba koŋ sage de a N danseɛ fo naŋ na di ko ba.’ 19Ka N yeli, ‘Daana, bamenne baŋ ka a puoruudie zaa poɔ N da maŋ nyɔge la banaŋ naŋ sage de fo yɛlɛ a ŋmɛ kyɛ de ba eŋ nempagdie poɔ. 20Kyɛ a saŋ na ba naŋ da ko a fo dansedire Stefanuu, N meŋ da are la a be a da kaara a banaŋ naŋ da koorɔ o na bonsuuri.’ 21Lɛ la ka O yeli ko ma, ‘Gɛrɛ, bonso, N na toŋ fo la zitɔɔre zaa, a Nemboore-yobo#22:21 Nemboore-yobo: Noba na zaa naŋ da ba waa Gyuumine la a Nemboore-yobo. zie.’ ”

A Pɔɔl Ane A Uroma Sogyɛre Turi Neŋkpoŋ Yɛlɛ

22A noba da kyɛllɛ la a o yɛlɛ a te ta a saŋ ŋa, kyɛ pãã zɛge ba kɔkɔɛ a yeli, “Yɛ ta vɛŋ ka a neɛ ŋa tɔ be a teŋɛzu! Bonso, a ba seŋ ka o voorɔ.” 23Kyɛ ba naŋ da kyeerɛ kyɛ yagra ba kparre lɔɔrɔ, a lɔɔrɔ tɛne sazu a erɛ uuruŋ, 24a sogyɛre turi neŋkpoŋ da tere la noɔre ka ba taa o gaa ne a sogyɛre kpeɛbozie ka ba te feɛ o ka o yeli yelmeŋɛ, bon naŋ so ka a noba suuri iri ne o. 25Kyɛ ba naŋ da wa leŋ a Pɔɔl, o da soore la a sogyɛre kɔɔ neŋkpoŋ naŋ da are peɛle a be, “Sori bebe la ka ba feɛ Uroma deme neɛ kyɛ ba nyɛ o saanaa be?” 26A sogyɛre kɔɔ neŋkpoŋ naŋ da wa woŋ a yeli ŋa, o da gaa la a sogyɛre turi neŋkpoŋ zie a te yeli ko o, “Boŋ la ka fo boɔrɔ ka fo e? A dɔɔ ŋa waa la Uroma deme neɛ.” 27A sogyɛre turi neŋkpoŋ da wa soore la a Pɔɔl, “Yeli ko ma, fo waa la Uroma deme neɛ be?” Ka o yeli, “Õõ.” 28A sogyɛre turi neŋkpoŋ da sɔge yelee la, “N yɔɔ la libie yaga kyɛ toɔ̃ e a Uroma deme neɛ.” Ka a Pɔɔl yeli, “Kyɛ maa eŋ, ba dɔge ma la ka N waa ba kaŋ.” 29A daadaalɛ, a banaŋ naŋ da boɔrɔ ka ba gyɛle a Pɔɔl yɛlɛ nyɛ da bare o la. Dabeɛ̃ meŋ da kpɛ la a sogyɛre turi neŋkpoŋ, bonso o pãã da baŋɛɛ la ka a Pɔɔl waa la Uroma deme neɛ kyɛ ka o e ka ba leŋ o.

Pɔɔl Naŋ Are A Sɛrediribe Niŋesogɔ

30A sogyɛre turi neŋkpoŋ naŋ da boɔrɔ ka o baŋ a yeli na naŋ so ka a Gyuumine da de saanaa duoro a Pɔɔl, a zie naŋ da wa nyaa, o da lori o la bare kyɛ tere noɔre ka a Naaŋmen bagmaalkare ane a sɛrediribe zaa lantaa. O pãã da taa la a Pɔɔl sigi wa ne, a e ka o are ba niŋesogɔ.

Currently Selected:

Tom 22: DNTTP

Highlight

Copy