Tom 21

A Pɔɔl Naŋ Gaa Gyɛruzɛlɛm

1Te naŋ da wa te bare ba baare, te da kpɛ la a gbori a tu a sori daadaa a te ta Kose, a nyaazie gaa Urode, a yi be gaa Patara. 2Te naŋ da wa nyɛ gbori kaŋ a be ka o gɛrɛ Foniseya, te da kpɛ o la a gɛrɛ. 3Te naŋ da wa te peɛlɛ Sapuru teŋɛ a nyɛ o ka o te saa, te da bare o la te nugɔɔ seŋ, kyɛ gaa Seeriya, a yi be gaa Taaya a te are be, bonso, a gbori da taa la tuobu a na yage a be. 4Te da bɔ nyɛ la potuuribo a be, a zeŋ a be beri ayopoĩ. A Vooroŋ Soŋ da eɛɛ la ka ba yeli ko a Pɔɔl ka o ta wa gɛrɛ Gyɛruzɛlɛm. 5A te beri naŋ da wa baare a be, te da bare la a be kyɛ da kyogi a te sori gɛrɛ; ka ba zaa laŋne ba pɔgeba ane ba biiri da beɛle te a te yi a teŋkpoŋ poɔ. Te naŋ da wa te ta a mane noɔreŋ, te da gbi la dumo a be a puori 6kyɛ da bare taa. Te pãã da kpɛ la a gbori kyɛ ka bana eŋ da leɛ kuli ba yie.

7Te naŋ da wa kpɛ a gbori yi a Taaya teŋɛ a te ta a Potolemese teŋɛ baare, te da te puori la a yelderebɛ kyɛ zeŋ ba zie bebi-gbuli. 8A nyaazie daare, te da yi gaa la Sezaareya; a da gaa Filipi, a Ŋmen-yelnoore kankanna naŋ da waa a bayopoi na kaŋ yiri a da te kpeɛrɛ a be. 9O da taa la pɔgeyaare banaare naŋ ba kuli serebɛ, kyɛ ka ba da taa Ŋmen-yelmanna yelyelii kyɔɔtaa. 10Te naŋ da be a be ka a kɔɔre belaa, Ŋmen-yelmanna kaŋ yuori naŋ da di Agabu da yi la Gyudiya sigi wa a be. 11O da wa la te zie, a wa de a Pɔɔl kpagre a leŋ ne o meŋɛ gbɛɛ ane o nuuri kyɛ yeli, “Ŋaa ka a Vooroŋ Soŋ yeli, ‘A ŋaa ne o zu la ka a Gyuumine naŋ be a Gyɛruzɛlɛm poɔ na leŋ a kpagre ŋa soba, a de o eŋ a Nemboore-yobo#21:11 Nemboore-yobo: Noba na zaa naŋ da ba waa Gyuumine la a Nemboore-yobo. nuuriŋ.’ ” 12Te naŋ da wa woŋ a yeli ŋa, te ne a noba naŋ da be a be da sɔre la a Pɔɔl ka o ta do gaa a Gyɛruzɛlɛm. 13Lɛ la ka a Pɔɔl da yeli sɔge, “Boŋ la ka yɛ erɛ, a kono a saana n poɔ? Maa eŋ, N ba nare ka ba leŋ ma yoŋ, kyɛ N narɛɛ la ka N kpi a Gyɛruzɛlɛm poɔ a Daana Yeezu yuori eŋɛ.” 14O naŋ da ba sage na de a te yɛlɛ, te da ba taa yeli zaa na yeli ka a yeluu ŋa yoŋ naane, “Ka a Daana poboɔbo nyɛ eebo.”

15A beri ama puoriŋ, te da narɛɛ la a yi gɛrɛ a Gyɛruzɛlɛm. 16A potuuribo mine naŋ da yi Sezaareya da tu te la, a taa te gaa ne Maason naŋ yi Sapuru yiri ka te na te kpeɛrɛ a be. A Maason da waa la a dɛndɛŋ potuuro na kaŋ.

Pɔɔl Naŋ Gaa Te Nyɛ Gyimisi A Gyɛruzɛlɛm Poɔ

17Te naŋ da wa te ta Gyɛruzɛlɛm, a yɔɔmine da tuori de te la ne popeɛloŋ. 18A nyaazie daare, te ne a Pɔɔl da gaa la Gyimisi zie, ka a nembɛrɛ zaa da be a be. 19Te naŋ da wa puori ba baare, a Pɔɔl da manne la nɛnɛ, a yɛlɛ na zaa a Daana naŋ da tu a o toma poɔ a e a Nemboore-yobo zie 20Ba naŋ da wa woŋ a, ba da puu la Naaŋmen. Lɛ la ka ba da yeli ko o, “Yɔɔ, fo nyɛ la noba turi turi naŋ be a Gyuumine poɔ a sage de a yɛlɛ, kyɛ ka ba zaa eŋɛ kyerɛ ne a Naaŋmen begɛ. 21Ba da yeli la fo yɛlɛ ko ba, ka fo wullo la a Gyuumine naŋ kpeɛrɛ a Nemboore-yobo poɔ, ka ba zagre a wuluu a Moozul naŋ biŋ. Kyɛ naŋ yele ka ba ta maŋ ire a ba bibiiri dɛgre, a ta tuuro a te saamine yelwulii. 22Wola ka te pãã na e? Ba sereŋ na woŋ la ka fo wa la a kyɛ. 23Azuiŋ, e bonna te naŋ na yeli ko fo. Te taa la noba banaare a kyɛ naŋ polle noɔre. 24Poɔ a noba bama poɔ ka fo ne ba maale yɛmenne, kyɛ ka fo yɔɔ a yɛ zuri pommu sane. A lɛ ka ba zaa na baŋ ka a yɛlɛ ba naŋ woŋ a kyaare ne fo ba waa yelmeŋɛ, kyɛ ba na nyɛ la ka fo meŋɛ tuuro la a Naaŋmen begɛ kyɛ guuro a. 25Kyɛ a Nemboore-yobo na naŋ sage de a Kirista yɛlɛ, te sɛge la gane ko ba a yeli te poteɛrɛ ko ba, ka ba kyiire bagmaale boma, ane zẽẽ, ane donne ba naŋ feere ko nɛne, a kyɛ ta tonɔ peɛ̃mo toma.” 26Lɛ la ka a zie naŋ da wa nyaa, ka Pɔɔl da de a noba banaare na, ka o ne ba da te peere ba dɛgre kyɛ kpɛ a Naaŋmen die a te moɔle a ba dɛgre peeroo baaroo bebiri kyɛ ka ba na maale bagre ko ba yeni yeni zaa.

Ba Naŋ Nyɔge Pɔɔl A Naaŋmen Die Poɔ

27A bebie ayopoĩ naŋ da wa te tara baaroo, a Gyuumine naŋ yi Ezeya naŋ da wa nyɛ a Pɔɔl a Naaŋmen die poɔ, ba da ŋmaa la dɔɔne eŋ a nembeɛoŋ poɔ. Ba da nyɔge la a Pɔɔl, 28a kyeerɛ yele, “Te taaba Izerayɛl biiri, yɛ soŋ! A dɔɔ ŋa la wullo a noba zaa, a ziiri zaa ka ba kyiire a te noba ane a Naaŋmen begɛ ane a zie ŋa. A lɛ yoŋ naane, o taa la Giriki noba wa kpɛ ne a Naaŋmen die, a sãã a zisoŋ ŋa.” 29Bonso, ba da nyɛ la Terofimu naŋ yi Efesu ka o be a Pɔɔl zie a teŋkpoŋ poɔ, ka ba da teɛre ka a Pɔɔl da taa o la kpɛ ne a Naaŋmen die poɔ. 30Lɛ la ka a teŋkpoŋ zaa da dɔ̃ɔ̃ ka a noba da zo lantaa. Ba da nyɔge la a Pɔɔl a vu o yi ne a Naaŋmen die poɔ, kyɛ da pɔge a dendɔɛ a paretɛloŋ lɛ. 31Ba naŋ da erɛ aneɛ ka ba ko o, a duoro da ta la a sogyɛre turi neŋkpoŋ ka dɔɔne be la a Gyɛruzɛlɛm zaa poɔ. 32A daadaalɛ, ka a sogyɛre turi neŋkpoŋ da taa sogyɛre ane a sogyɛre kɔɔ neŋkponni a zo sigi a noba zie. Ba naŋ da wa nyɛ a sogyɛre neŋkpoŋ ane a sogyɛre, ba da bare la a Pɔɔl ŋmeɛbo. 33Lɛ la ka a sogyɛre turi neŋkpoŋ da wa nyɔge o, a da tere noɔre ka ba leŋ o ne banzɔlɔ ayi. A sogyɛre turi neŋkpoŋ da soorɛɛ la ka o baŋ neɛ na naŋ la a Pɔɔl ane bon o naŋ e. 34Kyɛ a nembeɛoŋ poɔ, a noba mine da maŋ yeli ka ŋaa, ka ba mine meŋ yele yelyuo. O naŋ da kontoɔ̃ baŋ a yelmeŋɛ a dɔɔne zuiŋ, o da eɛɛ la ka ba taa a Pɔɔl gaa ne a sogyɛre kpeɛbozie. 35A Pɔɔl naŋ da wa te ta a dɛre, a dɔɔne naŋ da te zuo a noba poɔ da vɛŋɛɛ la ka a sogyɛre da zɛle o. 36A nembeɛoŋ naŋ da tuuro da kyeerɛ la a yele, “Yɛ ko o!”

Pɔɔl Naŋ Yeli Yɛlɛ Ka O Faa O Meŋɛ

37Ba naŋ deɛ da wa boɔrɔ ka ba taa a Pɔɔl wa ne a sogyɛre kpeɛbozie, o da yeli ko la a sogyɛre turi neŋkpoŋ, “N na toɔ̃ yeli la yeli kaŋ ko fo bee?” Ka o soore o, “Fo wono la Giriki kɔkɔre be? 38Ka lɛ fõõ naane a Igyipiti neɛ na naŋ da iri dɔ̃ɔ̃ a dɔɔne a daare ŋa kyɛ da taa a noba turi anaare na naŋ e neŋkooreba a kpɛ ne a wɛgyɛŋ poɔ bee?” 39Ka Pɔɔl yeli sɔge, “N waa la Gyuu neɛ, a yi Taasu naŋ be Selusiya paaloŋ poɔ, teŋɛ naŋ taa yuori bie la ma. N sɔrɔ fo la, sage ka N yeli yɛlɛ ko a noba.” 40O naŋ da wa ko a Pɔɔl sori, o da are la a dɛbie zu a zɛge o nu kyaare a noba ka ba bare gɔnne. Kyɛ ba naŋ da wa te bare a gɔnne, o da yeli la yɛlɛ ko ba ne Hiburu kɔkɔre a yele:

Currently Selected:

Tom 21: DNTTP

Highlight

Copy