Tom 23

1A Pɔɔl da kaara la a sɛrediribe polipoli kyɛ yeli, “N yɔɔmine, N toŋ la a Naaŋmen toma ne teɛroŋ velaa a wa tɔ a zenɛ bebiri.” 2Lɛ la ka a Naaŋmen bagmaalkare neŋkpoŋ Ananeɛ da ko a banaŋ naŋ are peɛle o sori ka ba ŋmɛ o noɔreŋ. 3Lɛ la ka a Pɔɔl yeli ko o, “Naaŋmen na ŋmɛ fo la, fõõ veɛlɛyeŋ ŋa! Fo zeŋ la a be, a yeli ka fo dire la n sɛrɛɛ ne a begɛ, kyɛ saana a begɛ ne fo naŋ tere sori ka ba ŋmɛ ma?” 4A banaŋ naŋ da are peɛle a be da yelee la, “Fo ba zoro dabeɛ̃ kyɛ toorɔ a Naaŋmen bagmaalkare neŋkpoŋ be?” 5Ka a Pɔɔl da yeli, “N yɔɔmine, N da ba baŋ ka o waa la Naaŋmen bagmaalkare neŋkpoŋ, bonso, ba sɛgɛɛ la, ‘Ta wa yele yelfaa kyaara ne a noba wederɛ.’ ”

6A Pɔɔl naŋ da wa te baŋ ka a noba mine waa la Sadusii ka ba mine meŋ waa Farazii, o da ŋmɛ la kpɛlle a sɛrediribe poɔ, a yele, “N yɔɔmine, Farazii la dɔge ma, ka N waa Farazii. Ba dire la n sɛrɛɛ a kyaare ne a teɛretɔroo#23:6 Teɛretɔroo: A Dagaaba mine maŋ yeli ka ‘Kyelloo.’ N naŋ taa ka a kuuni na leɛ-iri la.” 7O naŋ da wa te yeli a yeli ŋa, nɔkpeɛne da kpɛ la a Faraziimine ane a Sadusiimine sogɔ, ka a kpaaroŋ da kya. 8(A Sadusiimine da ba sage de ka kuuni na leɛ-iri la, bee malekere bee boma na naŋ e vooroŋ meŋ bebe la, kyɛ a Faraziimine eŋ da sage deɛ la ka a ama ata zaa bebe la.) 9Lɛ la ka gɔnne pãã da iri yaga zaa, ka a Naaŋmen bege wulwulibo mine naŋ da be a Faraziimine laŋne poɔ da iri kyɛ yeli, “Te ba nyɛ a dɔɔ ŋa yelsaanaa zaa. A mine kaŋ, a vooroŋ bee maleke kaŋ la yeli a yɛlɛ ama ko o?” 10A tage taa naŋ da wa e faa lɛ, a sogyɛre turi neŋkpoŋ da zoro la dabeɛ̃ ka ba na wa tage la a Pɔɔl kyore. O da tere la noɔre ka a sogyɛre sigi te nyɔge a Pɔɔl ne kpeɛ̃õ, a taa o wa kpɛ ne a sogyɛre kpeɛbozie.

11A tensogɔ na zaa, a Daana da wa are peɛle la a Pɔɔl kyɛ yeli, “Di kannyiri! Aŋa lɛ fo naŋ da di a N danseɛ a Gyɛruzɛlɛm poɔ, a lɛ meŋ la ka fo na la di n danseɛ a Uroma poɔ.”

A Pɔɔl Koobo Yɛlɛ

12Bebie saŋ, a Gyuumine da boɛ la kyɛ pɔ ka ba koŋ di bee a nyu kyɛ te ta lɛ saŋ ba naŋ ko a Pɔɔl. 13Ba da gaŋ la noba lezaayi naŋ da bo a boore ŋa. 14Ba da gaa la a Naaŋmen bagmaalkare ane a noba nembɛrɛ zie a te yeli, “Te pɔɛ la ne te poɔ zaa ka te koŋ di bee a nyu bonzaa kyɛ te ta lɛ saŋ te naŋ ko a Pɔɔl. 15Azuiŋ, yɛnee ane a sɛrediribe seŋ ka yɛ yeli ko a sogyɛre turi neŋkpoŋ ka o taa a Pɔɔl sigi wa ne. Yɛ e ŋa yɛ naŋ boɔrɔ ka yɛ la maaleŋ gyɛle o yɛlɛ nyɛ. Tenee eŋ, te narɛɛ la ka te gaŋ gu a ko o a sobiriŋ kyɛ ka o naŋ ba ta a kyɛ sɛre.”

16Kyɛ a Pɔɔl yɔɔpuulee bidɔɔ naŋ da woŋ a lɛ ba naŋ da bo; o da gaa te kpɛ la a sogyɛre kpeɛbozie a te yeli ko a Pɔɔl. 17A Pɔɔl da boɔle la a sogyɛre kɔɔ neŋkpoŋ kaŋ a yeli ko o, “Taa a pɔlbile ŋa gaa ne a sogyɛre turi neŋkpoŋ zie, bonso, o taa la yeli kaŋ a na yeli ko o.” 18Lɛ la ka o da taa a pɔlbile a gaa ne a sogyɛre turi neŋkpoŋ zie a te yeli, “Pɔɔl, a nempɔgraa na boɔle ma la a yeli ka N taa a pɔlbile ŋa wa ne fo zie, ka o taa la yeli kaŋ a na yeli ko fo.” 19A sogyɛre turi neŋkpoŋ da nyɔge la o nu a taa o gyɛŋ yi ne o ne o yoŋ zie, a te soore o, “Boŋ la ka fo boɔrɔ ka fo yeli ko ma?” 20Ka o yeli sɔge, “A Gyuumine laŋ la noɔre ka ba wa sɔre fo ka fo taa a Pɔɔl sigi wa ne a sɛrɛɛdiibu zie bieu, a ŋa ba naŋ maaleŋ boɔrɔ ka ba gyɛle a o yɛlɛ nyɛ. 21Kyɛ ta wa sagra a ba yɛlɛ, bonso, ba noba gaŋ la noba lezaayi naŋ sɔgle gaŋ gu o. Ba pɔɛ la ka ba koŋ di bee a nyu bonzaa kyɛ te ta lɛ saŋ ba naŋ na ko a Pɔɔl. Ba narɛɛ la pampana ŋa kyɛ pãã kyɛllɛ ka fo sage.” 22A sogyɛre turi neŋkpoŋ da bare la a pɔlbile kyɛ kpãã o a yele, “Ta wa yele korɔ neɛzaa ka fo yeli la a yeli ŋa ko ma.”

Ba Naŋ Taa Pɔɔl Gaa ne Fɛlise A Gɔbena Zie

23Lɛ la ka a sogyɛre turi neŋkpoŋ da boɔle a sogyɛre kɔɔ neŋkponni bayi a yeli ko ba, “Yɛ nare a gaa Sezaareya tensogɔ gbelli awae saŋ. Yɛ taa sogyɛre kɔɔraayi ane wirizɔɔnema lezaata ne pie ane kpama deme kɔɔraayi. 24Yɛ ko a Pɔɔl meŋ wie ka o zɔŋ, kyɛ ka yɛ taa o velaa te ko Fɛlise a gɔbena.” 25O da sɛge la gane a yeli ŋa zuiŋ, a yele:

26“Maa Keladeo Lisiya la sɛge a gane ŋa a puoro fõõ n Neŋkpoŋ Fɛlise, a gɔbena. 27A Gyuumine da nyɔge la a dɔɔ ŋa a da boɔrɔ ka ba ko, kyɛ N naŋ da wa woŋ ka o waa la Uroma deme neɛ, N da gaaɛ la ane sogyɛre a te faa o. 28N naŋ da boɔrɔ ka N baŋ a yeli na o naŋ sãã ka ba de duori ne o, N da taa o la wa ne a ba sɛrediribe zie. 29N da nyɛɛ la ka a waa la ba begɛ yɛlɛ, kyɛ ba da ba de yeli naŋ seŋ ne kũũ bee pɔgebo a tuo o. 30Kyɛ ba naŋ da wa yeli ko ma ka ba boɔrɔ la a dɔɔ ŋa beɛbeɛ eebo, N deɛ toŋɛɛ daadaalɛ ka ba taa o wa ne fo zie, kyɛ ko a banaŋ naŋ duoro ne o a yɛlɛ noɔre ka ba wa manne bonna yeli naŋ la ka ba taa a kyaare ne o.”

31Lɛ la ka a sogyɛre da e seŋ a noɔre ba naŋ ko ba lɛ, a taa a Pɔɔl a tensogɔ na a gaa ne Antipatere. 32A nyaazie daare, ba da bare la a wirizɔɔnema ka ba taa a Pɔɔl gɛrɛ ne, kyɛ ka ba da leɛ gaa a sogyɛre kpeɛbozie. 33Ba naŋ da wa ta Sezaareya a de a gane ko a gɔbena, ba da taa la a Pɔɔl meŋ wa ne o zie. 34O naŋ da wa kanne a gane baare, o da soore la a Pɔɔl paaloŋ na o naŋ yi, kyɛ o naŋ da wa te baŋ ka o yi la Selusiya, 35o da yelee la, “N na kyɛlle la a fo yɛlɛ a saŋ a banaŋ naŋ de a saanaa duoro ne fo wa ta.” Lɛ la ka o da tere noɔre ka ba eŋ o Hɛrɔde yikpoŋ poɔ a kyɛ guuro o.

Currently Selected:

Tom 23: DNTTP

Highlight

Copy