Matiu 24

Yisa yɛli Naawuni jɛmbu duu wurimbu yɛla

(Maak 13.1-2; Luk 21.5-6)

1Yisa ni daa yi Naawuni jɛmbu duu maa ni na chana, ka o nyaandoliba ka o sanna nti tiriti wuhir’ o Naawuni jɛmbu duu maa duri. 2Ka o daa bɔhi ba, “Yi nya dimbɔŋɔnim’ zaa bee yi bi nya li? Yɛlimaŋli ka n yɛri ya, di zaa ni ti wurim hal ka di kuɣ’ yini gba ti ku lan pa di kpee zuɣu.”

Wahala mini nahiŋgu yɛla

(Maak 13.3-13; Luk 21.7-19)

3Yisa daa ti ʒi Olivi Tihi Zoli zuɣu, ka o nyaandoliba ka o sanna ashilɔni ti bɔh’ o, “Ti Duuma, bɔ saha ka dimbɔŋɔnim’ ti yɛn niŋ, ka bɔ nti yɛn nyɛ a kandina mini dunia ŋɔ yiɣisibu shihira? Ti bɔri ni a yɛl’ ti.”

4Ka Yisa garigi yɛli ba, “Miriya ka yi ti chɛ ka so birigi ya; 5dama niriba pam ni ti zaŋ n yuli kana ti yɛra, ‘Mani n-nyɛ Masia! Mani n-nyɛ Masia!’ Bɛ ni ti birigi niriba pam. 6Yi ni ti wum ni bɛ tuhiri tɔbu, ka wumdi ŋumaŋuma ni tɔb’ shɛŋa na yɛn tuhi, amaa di ti chɛliya ka yi suhuri zɔhira, dama faashee dimbɔŋɔnim’ zaa bahi niŋ, amaa di ti bi yɛn wuhi ni dunia yiɣisibu saha paami maa. 7Dama zuliya kam ni ti tuhiri taba, ka tiŋgbana zuɣulaannim’ ti yiɣisi tuhiri taba, ka kum mini tiŋgbani dambu ti be bɔb’ shɛŋa polo, 8amaa dimbɔŋɔnim’ zaa ti yɛn bemi kaman paɣipuulan’ wolisibu piligu biɛrim la.

9 # Mat 10.22 Di saha bɛ ni ti gbahi ya n-niŋ ya alaka, ka kun ya; ka zuliya kam ti jɛn ya n yuli zuɣu. 10Di saha maa niriba pam ni ti zaɣisi ma dolibu, ka yi tab’ nyaansi, ka je taba. 11Ka anab’ ʒirinim’ pam ni ti yi palo m-birigi niriba pam. 12Ka tuun’ biɛri ni ti yɛn zooi zuɣu ni chɛ ka niriba pam yurilim filim. 13#Mat 10.22 Amaa ŋunkam ti niŋ suhukpeeni hal ni wahala ŋɔ bahigu ni ti tiligi. 14Ka Naawuni nam lahibal’ suŋ ŋɔ waazu ni ti yihi gili dunia ŋɔ zaa n-lee shɛhira zuliya kam sani pɔi ka dunia yiɣisibu saha naanyi paai.

Azaaba din ti yɛn kana

(Maak 13.14-23; Luk 21.20-24)

15 # Dan 9.27; 11.31; 12.11 Yisa daa yɛliya, “Yi yi ti nya binshɛli din chihiri Naawuni sani la, ka di ʒe Naawuni jɛmbu duu Luɣ’ Kasi Shee, kaman Anabi Daniɛl ni daa pun yɛli di yɛla la, ŋunkam ti karim sabbu ŋɔ, ŋun’ baŋmi di ni wuhi shɛm! 16di saha maa bɛn ti be Judia, bɛn’ zom’ ti du zoya. 17Ka ŋunkam ti be dufahirili zuɣu, ŋun di lan siɣina ni o ti kpe o duu kah’ o nɛma; 18#Luk 17.31 ka so yi ti be puu ni, ŋun’ di lan kuli yiŋa ni o ti zaŋ o binyɛrigu. 19Di saha paɣipuhinim’ mini biliɛrinim’ yɛla ni ti mali nambɔɣu pam. 20Dinzuɣu suhimiya Naawuni ka o chɛ ka yɛla ŋɔ ti ku niŋ tu kikaa saha bee Vuhim Dabisili dali. 21#Dan 12.1; Kah 7.14 Dama Naawuni ni nam dunia ŋɔ hal ni zuŋɔ ka ti nini na bi nya wahala shɛŋa zaa ni ti beni, ka di tatabo mi ku lan niŋ. 22Ti Duuma Naawuni yi ti bi filim di dabisa maa, so ti ku tiligi, amaa o ninvuɣ’ gahinda la zuɣu ka o ni ti filim di dabisa maa.

23 Di saha maa so yi ti yɛli ya ni Masia be kpe bee kpe ha, yin’ di niŋya li yɛda. 24Dama Masia ʒirinim’ mini anab’ ʒirinim’ ni ti yi palo n-wuhiri shihir’ kara, ka tumd’ alahiziba tumtumsa ni bɛ birigi niriba; ka hal di yi ni ti nani, bɛ ni birigi Naawuni ninvuɣ’ gahinda la gba. 25Nyamiya, di zuɣu ka n daŋ yɛri ya ka di saha na bi paai maa.

26 # Luk 17.23-24 Dinzuɣu bɛ yi ti yɛli ya, ‘Nyamiya, o be mɔɣu ni,’ yin’ di chaŋya; ka bɛ mi yi ti yɛli ya, ‘O be duu puuni,’ yin’ di niŋya li yɛda. 27Dama saa ni yi nyaɣisi wulimpuhili polo m-mali ti ba wulinluhili polo shɛm la, lala ka Daadam Bia kandina maa ti yɛn be.

28 # Luk 17.37 Ka o daa yɛli ba, “Bin’ kpiŋ ni be luɣ’ shɛli, nimaani ka juri laana.”

Daadam Bia labbuna

(Maak 13.24-27; Luk 21.25-28)

29 # Aiz 13.10; 34.4; Ɛzɛk 32.7; Joɛl 2.10, 31; 3.15; Kah 6.12-13 Yisa daa lan yɛli, “Amaa wahala dabisa ŋɔ nyaaŋa saha, di ku yuui ka wuntaŋ’ dii zibigi, ka goli ti ku lan piɛla, ka yiko din gbib’ zuɣusaa ni ti dam ka saŋmarisi yi zuɣusaa luna. 30#Dan 7.13; Zak 12.10-14; Kah 1.7 Di saha maa ka Daadam Bia shihirili ni ti be zuɣusaa, ka zuliya kam bɛn be dunia ŋɔ ni ni ti fabili, ka nya Daadam Bia ka o be sagbana ni kanna ni yiko mini jilima pam. 31Ka kikaa ni ti tahi pam, ka o ti tim malaikanima ka bɛ chaŋ ti laɣim’ o ninvuɣ’ gahinda bɛn be dunia ŋɔ ni luɣ’ shɛlikam zaa na.

Fiig tia kpahimbu

(Maak 13.28-31; Luk 21.29-33)

32Yisa daa lan yɛli yaha, “Kpahimmiya fiig tia: Yi yi ti kul nya ka di wula puhiri va’ mama, di saha yi baŋya ni siɣili miriya. 33Lala mi n-nyɛ li, yi yi ti nyari shihira ŋɔ zaa, yin’ baŋmiya ni di saha miriya hal ka di ku lan yuui gba. 34Yɛlimaŋli ka n yɛri ya, dimbɔŋɔnim’ zaa ni niŋ ka ʒiɛmani ŋɔ na bi vuui. 35Zuɣusaa mini dunia ŋɔ ni ti yiɣisi, amaa man’ yɛligu ku yiɣisi.

So bi mi dindali bee di saha

(Maak 13.32-37; Luk 17.26-30, 34-36)

36Yisa daa lan yɛli, “So bi mi dindali bee di saha, hal malaikanim’ bɛn be alizanda ni mini Naawuni Bia la gba bi mi li; faashee o Ba maa kɔŋko n-naɣ’ mi li. 37#Pil 6.5-8 Di ni daa niŋ shɛm Anabi Nuhu saha la, lala ka Daadam Bia gba kandina ti yɛn be. 38Di ni daa be shɛm hal ka kom ti kana ti di bɛ zaa ha la: Bɛ daa diri ka nyura; ka kpuɣiri paɣiba, ka zaŋdi bɛ bipuɣinsi tiri dɔbba hal ti paai Anabi Nuhu ni daa kpe ŋariŋ ni dahin’ shɛli, 39#Pil 7.6-24 ka bɛ daa bi baŋ hal ka kom ti kana ti di bɛ zaa ha la, lala ka Daadam Bia gba kandina ti yɛn be. 40Dindali maa dɔbba ayi ni ti be puu ni; ka Naawuni ti kpuɣ’ yino ka chɛ ŋun’ la. 41Ka paɣiba ayi ni ti laɣim niɛmda; ka Naawuni ti kpuɣ’ yino ka chɛ ŋun’ la. 42Dinzuɣu di gbihiriya, dama yi gba bi mi yi Duuma ni yɛn labina dahin’ shɛli. 43Amaa lee baŋmiya dimbɔŋɔ: Yili yidana yi di mi tayiɣ’ ni yɛn ka o yiŋ’ na yuŋ saha shɛli, o naan ne n-ʒiya gu o, ka ku chɛ o yili maa bahi ka tayiɣ’ maa kab’ li kpe. 44#Luk 12.39-40 Dinzuɣu yi gba malimiya shili sahakam; dama Daadam Bia ni ti labina saha shɛli yi ni bi yuun’ o soli.

Yiŋbia ŋun ʒe o duuma yim

(Luk 12.41-48)

45Yisa daa lan yɛli yaha, “Yiŋbi’ ŋuni n-lee pal’ alikauli ka nyɛ yɛndana? Di nyɛla yiŋbi’ so ŋun yiŋlana zaŋ o yili fukumsi niŋ o nuu ni ni o bahiri mɔni mɔni bahibu saha. 46Yiŋbia maa yiŋlan’ maa yi ti kuna nya o ni lala, o ni nya suhupiɛlli. 47Yɛlimaŋli ka n yɛri ya, o ni ti zaŋ o binshɛɣukam fukumsi niŋ o yiŋbia maa nuu ni. 48Amaa yiŋbia maa yi nyɛla bi’ biɛɣu, ka yɛl’ o suhu ni ni o yiŋlan’ yuui kundina, 49ka piligi bur’ o taba, ka pahi danyuriba zuɣu diri ka nyura, 50di yiŋbia maa yiŋlan’ maa ni ti kuna o ni bi yuun’ o soli dahin’ shɛli bee saha shɛli 51nti darig’ o tibili darigiri biɛɣu, ka zaŋ o pahi bilikɔɣinim’ ni. Nimaani ka niriba ni ti fabili ka dim bɛ nyina.

Currently Selected:

Matiu 24: DBwDB

Highlight

Copy