Matiu 25

Paɣipiɛlisi pii yɛla ŋahili

1 # Luk 12.35 Ka Yisa daa ŋahi ŋahili ŋɔ yɛli ni: Di saha maa alizanda nam ni ti ŋmanila paɣipiɛlisi pia bɛn daa zaŋ bɛ firilanim’ chaŋ ni bɛ ti tuhi amiliya aŋgo soli. 2Bɛ ni niriba anu daa nyɛla yɛnnima, ka niriba anu la mi nyɛ jɛra. 3Bɛn daa nyɛ jɛra maa daa zaŋla bɛ firilanima, ka lee bi ʒi kpam pahi ni bɛ ti gu bɛmaŋa; 4amaa ka bɛn daa mali yɛm la bɛn’ daa ʒi kpam pahi bɛ firilanim’ zuɣu. 5Ka amiliya aŋgo maa daa ti yuui kandina, ka gom gbahi bɛ zaa ka bɛ gbihi.

6 Ka kuŋ’ daa ti ŋme yuntisuɣu yɛli, “Aŋgo maa paana! Yimiyana ti tuh’ o soli!” 7Di saha ka paɣipiɛlisi maa zaa daa yiɣisi malimali bɛ firilanima. 8Ka jɛra la daa yɛli bɛn nyɛ yɛnnim’ la, “Niŋmiya yi kpam ŋɔ shɛli ti ti, dama tinim’ firilanim’ maa kpirimi.” 9Ka yɛnnim’ maa daa garigi yɛli ba, “Di pa shɛli di ku saɣ’ ti mini ya zaa; dinzuɣu chamiya kpakɔhiriba sani nti da yi dintol’ dini na.” 10Bɛ ni daa chaŋ ni bɛ ti da kpam maa ka amiliya aŋgo maa dii paana, ka o mini bɛn daa pun mali shili gu o maa kpe amiliya lɔbu yili maa ni, ka bɛ kpari di dunoli.

11 Di nyaaŋa ka bɛn’ la daa ti labina ti yɛra, “Ti Duuma, ti Duuma, kparigim’ ka ti gari.” 12#Luk 13.25 Amaa ka aŋgo maa garigi yɛli ba, “Yɛlimaŋli ka n yɛri ya, n ʒin ya.”

13Ka Yisa daa naai ŋahili ŋɔ ka yɛli ba, “Dinzuɣu di gbihiriya, dama yi bi mi dindali bee di saha.”

Yil’ ni bih’ ata yɛla ŋahili

(Luk 19.11-27)

14Yisa daa lan ŋahi ŋahili ŋɔ yɛli, “Naawuni nam ŋmanila yil’ yidan’ so ŋun daa yɛn go, ka bol’ o yiŋbihi na ti zaŋ o liɣiri pirigi ti ba ni bɛ deei wolimma. 15O daa ti bɛ ni yino la pɔŋ’ tusaanu, ka ti yino pɔŋ’ tusaayi, ka ti ŋun kpalim la mi pɔŋ’ tuhili. O daa ti bɛ zaa la kaman bɛ yaa tariga ni nyɛ shɛm ka naanyi chaŋ. 16Ka ŋun daa daŋ deebu la daa dii zaŋ o yiŋlan’ maa ni ti o laɣ’ shɛli maa wolim nya nyɔri ka di min’ o laɣidaya saɣi taba. 17Ka ŋun paya la gba daa niŋ lala nya nyɔri ka di min’ o gba laɣidaya saɣi taba. 18Amaa ka ŋun pah’ ata la ŋun’ daa zaŋ o yiŋlan’ maa ni ti o laɣ’ shɛli maa ti gaai bɔɣili zaŋ li pi.

19 Ka bɛ yiŋlan’ maa daa yuug’ o gɔrim maa polo hal ti kuna, ka bɛ min’ o daa ti laɣim ni bɛ mal’ o liɣiri maa laasabu. 20Ka ŋun daa deei pɔŋ’ tusaanu la zaŋ pɔŋ’ tusaanu pahi di zuɣu na ti yɛl’ o yiŋlan’ maa, “N dana, pɔŋ’ tusaanu ka a daa zaŋ ti ma, ka n nya pɔŋ’ tusaanu nyɔri pahi di zuɣu.” 21Ka o yiŋlan’ maa yɛl’ o, “Mbo n-faaŋa, bi’ suŋ ni n yɛdalana ŋun ʒe ma yim! A pal’ alikauli ni bin’ din pɔra, dinzuɣu n ni zaŋ a leei bin’ din zooi pam zuɣulana; chɛ ka a suhu piɛli kaman n suhu ni piɛli shɛm ŋɔ.” 22Ka ŋun daa deei pɔŋ’ tusaayi la yiɣisi zani yɛli, “N dana, a daa zaŋla pɔŋ’ tusaayi ti ma, ka n nya pɔŋ’ tusaayi nyɔri pahi di zuɣu.” 23Ka o yiŋlan’ maa yɛl’ o, “Mbo n-faaŋa, bi’ suŋ ni n yɛdalana ŋun ʒe ma yim! A pal’ alikauli ni bin’ din pɔra, dinzuɣu n ni zaŋ a leei bin’ din zooi pam zuɣulana; chɛ ka a suhu piɛli kaman n suhu ni piɛli shɛm ŋɔ.” 24Amaa ka ŋun mi daa deei pɔŋ’ tuhili la ŋun’ daa yiɣisi zani yɛli, “N dana, m pun mi a halli ni nyɛ shɛm, dama a dirila a ni bi di binshɛli wahala, ka kpuɣiri a ni bi di atam shɛli wahala; 25lala zuɣu ka man’ daa zo a dabiɛm, ka zaŋ a pɔŋ’ tuhili maa ti pi tiŋgban’ ni; dinzuɣu n-nyɛ a bini.” 26Ka o yiŋlan’ maa yɛl’ o, “Nyin’ bi’ biɛ’ vinnyaɣilan’ ŋɔ! A mi ni n dirila n ni bi di binshɛli wahala, ka kpuɣiri n ni bi di atam shɛli wahala bebɔ? 27Di di daa simdi ni a zaŋ n liɣiri maa ti sɔŋ banki ni, n ni di kuli ŋɔ na, n naan nya nyɔri pahi n laɣidaya maa zuɣu.” 28Ka ŋmaligi yɛli, “Dinzuɣu deemiya liɣiri maa o sani n-zaŋ pahi ŋun mali pɔŋ’ tuhi’ pia ŋɔ; 29#Mat 13.12; Maak 4.25; Luk 8.18 dama ŋunkam mali ni lan nya m-pahi mali pam, ka ŋun mi ka ni ti bahi kɔŋ o ni mali biɛla shɛl’ la. 30#Mat 8.12; 22.13; Luk 13.28 Amaa zaŋmiya bi’ biɛ’ yoli ŋɔ ti bahi kpaŋ’ ha, zibisim ni be shɛl’ la. Nimaani ka niriba ni ti fabili ka dim bɛ nyina.”

Zuliya kam saria karibu

31 # Mat 16.27; 19.28 Yisa daa yɛliya, “Daadam Bia yi ti labina ni o jilima m-pahi malaikanim’ zaa, o ni ti ʒin’ o nam ʒiishee din mali jilima pam, 32ka zuliya kam ti laɣim zan’ o tooni, ka o woligi ba kaman piɛgul’ ni woligiri piɛri mini buhi shɛm la. 33O ni ti zaŋ o ni woligi shɛb’ kaman piɛri la zal’ o nudirigu polo, ka zaŋ o ni woligi shɛb’ mi kaman buhi la zal’ o nuzaa polo. 34Di saha ka Naa maa ni ti yɛli bɛn ʒe o nudirigu polo la, ‘Yinim’ bɛn mal’ alibarika m Ba Naawuni sani ŋɔ, kamiyana ti di nam shɛli o ni daa pun zaŋ zali ya tum dunia piligu ni la ha. 35Dama kum daa mali ma, ka yi ti ma bindirigu; ka kɔnyuri daa mali ma, ka yi ti ma kom; n daa nyɛla sana, ka yi deei ma kpɛhi yi yinsi; 36n daa chani gbinfini, ka yi ti ma situra; n daa biɛra, ka yi kaari ma; ka n daa ti be sarika ni, ka yi kani n sanna ti kaari ma.’

37 Di saha ka wuntizɔriba maa ni ti garigi bɔh’ o, ‘Ti Duuma, bɔ saha ka ti daa lee nya a ka kum mal’ a, ka ti ti a bindirigu? Bee ka kɔnyuri daa mal’ a, ka ti ti a kom? 38Bee bɔ saha ka ti daa lee nya a ka a nyɛ sana, ka ti deeg’ a kpɛhi ti yinsi bee ka a chani gbinfini, ka ti ti a situra? 39Bee bɔndali ka ti daa nya o ka a biɛra bee nti be sarika ni, ka ti ka a sanna ti kaag’ a?’

40 Ka Naa maa mi ni ti garigi yɛli ba, ‘Yɛlimaŋli ka n yɛri ya, yi ni daa niŋdi m mabihi ŋɔ nirilim hal zaŋ tabili bɛ ni bɛn daa pɔri la, mani ka yi daa niŋdi maa.’

41 Dimbɔŋɔ nyaaŋa o ni ti ŋmaligi yɛli bɛn ʒe o nuzaa polo la mi, ‘Yinim’ bahiyolinim’ ŋɔ, wariya ti kpe azaaba buɣim shɛl’ ni Naawuni ni daa mali gu Sintani min’ o malaikanim’ la. 42Dama kum daa mali ma, ka yi mɔŋ ma bindirigu; ka kɔnyuri daa mali ma, ka yi bi ti ma kom; 43n daa nyɛla sana, ka yi bi deei ma kpɛhi yi yinsi; n daa chani gbinfini, ka yi bi ti ma situra; n daa biɛra, ka daa ti lan be sarika ni, ka yi bi kana ti kaai ma.’

44 Di saha ka bɛ ni ti garigi bɔh’ o, ‘Ti Duuma, bɔ saha ka ti daa lee nya a ka kum bee kɔnyuri mal’ a bee ka a nyɛ sana bee n-chani gbinfini bee ka a biɛra bee m-be sarika ni, ka ti baɣa ka a ni?’

45 Di saha ka o ni ti garigi yɛli ba, ‘Yɛlimaŋli ka n yɛri ya, yi ni daa bi niŋ m mabihi ŋɔ nirilim hal zaŋ tabili bɛ ni bɛn daa pɔri la, mani ka yi daa bi niŋ maa.’ 46#Dan 12.2 Bɛmbɔŋɔnim’ ni ti chaŋ ti be azaaba din ka bahigu ni; amaa ka wuntizɔriba la bɛn’ ti kpe nyɛvili din ka bahigu ni.”

Currently Selected:

Matiu 25: DBwDB

Highlight

Copy