1 Pita 2
2
Kuɣ’ nɛɔŋ mini zuliya shɛb’ bɛn be kasi
1Dinzuɣu yihimiya biɛr’ biɛɣu zaa mini yɛmbimbiɛri ni bilikɔnsi ni nyuli zabbu zaa ni munaafichi niŋbu zaa yi biɛhigu ni. 2Benya kaman biliɛri la din ni chɛ ka yi suhuri kul ye Naawuni yɛligu din ŋmani bihim alal’ la zuɣu, ka di chɛ ka yi tooi zooi nya tiliginsim, 3#Yila 34.8 dama yi pun baŋ ti Duuma nirilim nyaɣisim ni nyɛ shɛm yɛla. 4Kamiya ti Duuma ŋun nyɛ kuɣ’ nɛɔŋ shɛli ninsalinim’ ni zaɣisi ka lih’ o ka o ka buchi, amaa ka Naawuni ŋun’ piig’ o ka lih’ o ka o mali buchi la sanna. 5Yimaŋmaŋ’ gba benya kaman kuɣ’ nɛma la kana, ka Naawuni zaŋ ya me o jɛmbu duu ka yi leei Naawuni maligumaaniba bɛn be kasi, ka maani sara maligu shɛŋa Naawuni ni deeri Yisa Masia zuɣu. 6#Aiz 28.16 Dama di sab’ Naawuni Kundi ni yɛli:
“Nyama, n zaŋ kuɣ’ shɛli sɔŋ Ziɔn.
Di nyɛla kuɣ’ gahindili shɛli Naawuni ni pii
ka lihi li ka di mali buchi.
Ka ŋunkam niŋ o yɛda ku di vi.”
7 #
Yila 118.22
Zaŋ chaŋ yinim’ bɛn niŋ yɛda sani, o mali buchi; amaa zaŋ chaŋ bɛn bi niŋ o yɛda la sani, o nyɛla bɛ ni booni so:
“Kuɣ’ shɛli tammɛriba ni zaɣisi,
ka di yipa leei kuɣ’ gahindili la.”
8 #
Aiz 8.14-15
Di lan yɛli:
“Kuɣili maa nyɛla kuɣ’ shɛli din ni chɛ ka niriba tuui;
di lan nyɛla kuɣ’ shɛli din ni chɛ ka bɛ tuui lu.” Din chɛ ka bɛ tuui lu maa nyɛla bɛ ni bi niŋ Naawuni yɛligu yɛda la zuɣu, ka di mi nyɛla Naawuni ni zal’ li shɛm m-bala.
9 #
Yibu 19.5-6; Aiz 43.20, 21; Zal 4.20; 7.6; 14.2; Tait 2.14; Aiz 9.2 Amaa yinim’ nyɛla Naawuni ni pii zuliya shɛba, ka nyɛ o ni dihi shɛb’ nam n-zaŋ ba leei maligumaaniba, ka lan nyɛ zuliya shɛb’ bɛn be kasi ni Naawuni maŋmaŋ’ niriba ni di chɛ ka yi moli ŋun yihi ya zibisim ni n-zaŋ ya kpɛh’ o neesim din ne pam ni la tuun’ kara yɛla molo. 10#Hoz 2.23 Saha shɛli ha yi daa pala ninvuɣ’ maŋa. Amaa pumpɔŋɔ yi yipa nyɛla Naawuni niriba; ka saha shɛli ha yi daa bi nya Naawuni nambɔzɔbo, amaa pumpɔŋɔ yi yipa nya nambɔzɔbo o sani.
Naawuni daba
11M mabiyurisi n suhiri ya, yi ni nyɛ saamba be tinzun tinsi ni la zuɣu, zomiya niŋgbuŋ kɔr’ biɛri tuma din mini yi biɛhigu tuhiri tɔbu la. 12Maliya biɛrisuŋ bɛn pa Yɛhudianim’ sani, ka di chɛ ka bɛ yi tɔɣisiri n-dalindi ya ni yi nyɛla tuumbiɛtumdiba, bɛ ni bahi nya yi tuun’ suma ka ti Naawuni jilima o kandina dali. 13Ti Duuma zuɣu, doliya dunia ŋɔ fukumsinim’ zaa yɛligu, di yi nyɛla nazuɣu ŋun su fukumsi 14bee gomnanim’ bɛn nyɛ o ni tim shɛb’ ni be ti darigi bɛn tumdi taali tibili, ka paɣi bɛn tumdi tuun’ suma la. 15Dama di nyɛla Naawuni yubu ni yi tum din tuhi, ka di chɛ ka yi mum jɛra bɛn tɔɣisiri ʒilinsi yɛtɔɣa la noya. 16Maliya biɛhigu din wuhiri ni yi mali yolisim, amaa lee di zaŋya yi yolisim maa tumdi tuumbiɛri; kul maliyala biɛhigu din wuhiri ni yi nyɛla Naawuni daba. 17Timiya sokam zaa jilima. Yumiya mabihili. Lumiya Naawuni sizuura. Timiya Nazuɣu jilima.
Masia wahala dibu naba dolibu
18Yinim’ bɛn nyɛ daba la, deemiya yi duumanim’ noya ka luri ba sizuura zaa, ka di pala bɛn niŋdi nirilim ka mali biɛribaalimtali la kɔŋko, amaa zaŋ tabili bɛn mali hal’ biɛɣu la gba. 19Ka yi yi bi tum taali ka diri wahala, ka mali suɣilo di puuni Naawuni zuɣu, yi ni nya paɣibu Naawuni sani. 20Ka yi yi tum taali ka bɛ fiɛbi ya di zuɣu, paɣiri bɔ ka yi lee yɛn nya di zuɣu? Amaa yi yi tum din tuhi ka bɛ niŋ ya wahala di zuɣu ka yi niŋ suɣilo dee’ li, yi ni nya paɣibu Naawuni sani di zuɣu. 21Dimbɔŋɔ zuɣu ka Naawuni daa boli ya, dama Masia daa di wahala yi zuɣu, ka o niŋsim maa nyɛ di ni simdi ni yi zaa dol’ shɛli. 22#Aiz 53.9 O daa bi tum alahichi, ka yɛmbimbiɛri yɛtɔɣa mi daa ka o nol’ ni. 23#Aiz 53.7 Bɛ ni daa tu o la, o daa bi tu so labisi; o ni daa di wahala la, o daa bi tɛhi’ biɛri bɔhibu yɛla, amaa o daa chɛla shɛlikam niŋ ŋun kariti saria dɛde la nuu ni, 24#Aiz 53.6 Ŋun’ Masia maŋmaŋa n-nyɛ ŋun daa ʒi ti daalahichi o niŋgbuŋ ni dapulli zuɣu ni di chɛ ka ti kpi zaŋ chaŋ alahichi tumbu polo, ka lee mali nyɛvili zaŋ chaŋ wuntia polo. O fiɛbbu bɔba ni dansi la zuɣu ka yi nyari dɔriti tibi kpaŋ. 25#Aiz 53.6 Yi daa bɔrigimi kaman piɛr’ la, amaa pumpɔŋɔ yi yipa ŋmaligi labila yi Piɛgula ŋun nyɛ ŋun gbibi ya la sanna.
Currently Selected:
1 Pita 2: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
