1 Pita 3

Yidaannim’ mini yidaampaɣiba

1 # Ɛfɛs 5.22; Kol 3.18 Lala zuɣu yinim’ paɣiba, deemiya yi yidaannim’ noya, ka bɛ ni shɛb’ bɛn bi deei Naawuni yɛligu la ni niŋ Naawuni yɛda bɛ paɣiba biɛhigu zuɣu, ka pa ni yi ni yɛli shɛm zuɣu, 2amaa ka di ni nyɛla bɛ ni nyari yi biɛrisuŋ zaŋ tabili yi ni luri ba sizuura Naawuni zuɣu shɛm la zuɣu. 3#1 Tim 2.9 Di chɛliya ka yimaŋ’ malibu bela palɔni kaman zabiri pambu mini salima yɛri yɛbu bee situr’ viɛla yɛbu, 4amaa chɛliya ka yimaŋ’ malibu nyɛla binshɛli din be yi suhuri ni, ka pa ni din saɣinda. Dina n-nyɛ tarimtali mini suhumahili, dama dimbɔŋɔnima m-mali buchi pam Naawuni sani. 5Lala ka paɣ’ shɛb’ bɛn bebu daa be kasi, ka bɛ mali tahima Naawuni sani daa yi maani bɛmaŋa, ka deeri bɛ yidaannim’ noya. 6#Pil 18.12 Lala ka Zara daa be; o daa deei ti yab’ Ibrahimma noli, hal ka boon’ o la o duuma. Ka pumpɔŋɔ yi yi tumdi din viɛla ka bi chɛ ka yi suhuri zɔhiri shɛli zuɣu, dina n-ni wuhi ni yi nyɛla Zara yaansi. 7#Ɛfɛs 5.25; Kol 3.19 Lala mi n-nyɛ li, yinim’ yidaannima, benya yɛm biɛhigu ni yi paɣiba, ka mi ni bɛ kpiɔŋ bi paai yi dini, ka timiya ba jilima yi mini ba zaa ni ti yɛn laɣim deei pin’ suŋ din nyɛ nyɛvil’ la zuɣu. Niŋmiya lala ka shɛli ku gu yi wunsuhigu soli.

Wahaladibo din tuhi tumbu zuɣu

8Din bahindi nyaaŋa zaŋ chaŋ dimbɔŋɔnim’ polo nyɛla, di simdi ni yi zaa mali naŋgban’ yini, ka chɛ ka yi baɣa be nandahima ni paai shɛb’ yɛla ni, ka yumiya mabihili, ka maliya suhuballi, ka siɣisimiya yimaŋa yi tab’ sani. 9Di bɔhiya so biɛri bee n-tu so labisi, amaa lee niŋmiyala alibarika niŋmi bɛn niŋdi ya zaɣ’ biɛɣu ni, dama dimbɔŋɔ zuɣu ka Naawuni daa boli ya ni di chɛ ka yi tooi nya o daalibarika. 10Di bemi kaman di ni sab’ Naawuni Kundi ni yɛli shɛm la:

“Ŋunkam bɔri ni o di nyɛvili ŋɔ nyaɣisim

ka nya dabisi’ suma,

ŋun’ gbaam’ o zilinli ni yɛtɔɣ’ biɛri tɔɣisibu,

ka mi di chɛ ka yɛmbimbiɛri yɛtɔɣa

yir’ o nol’ ni na.

11Di simdi ni o ŋmaligi ka chɛ zaɣ’ biɛɣu

ka tumdila din tuhi.

Di simdi ni o bola suhudoo,

ka kul biɛhiri di naba hal ti nya li.

12 # Yila 34.12-16 Dama ti Duuma nina kul kpala wuntizɔriba,

ka o tiba kul wumdi be suhigu.

Amaa ti Duuma kul lihirila bɛn tumdi tuumbiɛri nimbiɛɣu.”

13Yi suhuri yi ye din tuhi tumbu zuɣu, ŋuni n-lee ni tooi niŋ ya shɛli? 14Amaa hal yi yi di wahala wuntia zuɣu, yi mal’ alibarika. Di zɔriya ninsalinima bee n-chɛ ka yi suhuri zɔhira. 15#Mat 5.10; Aiz 8.12-13 Amaa zaŋmiya Masia niŋ yi suhuri ni ka o nyɛ yi Duuma. Ka kul malimiya shili guri ni yi garigi ŋunkam bɔhi ya bɔhigu zaŋ chaŋ yi ni mali tahima shɛli yi ni la polo, 16amaa lee niŋmiya lala la biɛribaalimtali mini sizuura lubu puuni. Kul chɛliya ka yi suhuri ni tɛha ku mali galimi, ka di chɛ ka ninvuɣ’ shɛb’ bɛn turi ya ka tɔɣisiri yɛtɔɣ’ biɛri dalindiri yi biɛrisuntali yi ni doli Masia la zuɣu di vi. 17Dama yi yi diri wahala din tuhi tumbu zuɣu ka di nyɛla Naawuni yubu m-bala, di so ni yi di wahala din bi tuhi tumbu zuɣu. 18Dama Masia daa kpi ti daalahichi zuɣu yim, ka di yɛla naai zaa. Ŋuna ŋun nyɛ wuntizɔra daa kpi bɛn pa wuntizɔriba zuɣu ni di chɛ ka o zaŋ ti tahi Naawuni sani. Bɛ daa kula o niŋgbuŋ, amaa ka Naawuni Shia daa lee neeg’ o n-chɛ ka o mali nyɛvili 19n-chaŋ ti moli o nasara dibu molo shihi bɛn be sarika ni la sani. 20#Pil 6.1—7.24 Bɛna n-nyɛ bɛn daa bi deei Naawuni yɛligu saha shɛl’ o ni daa di suɣilo guhiri ba Anabi Nuhu ʒiɛman’ ni la. Di saha ka Anabi Nuhu daa kpahiri ŋariŋ shɛli niriba biɛla bɛn nyɛ niriba anii kɔŋko ni daa kpe n-tiligi kom dibu ni la. 21Kom maa daa nyɛla kom baptaizibu shɛli din tiligi ya pumpɔŋɔ ŋɔ ŋmahinli. Kom baptaizibu pala din yihiri niŋgbuŋ ni daɣiri, amaa di nyɛla din ʒe alikauli lɔbu shɛli din yi suhu ni tɛha din ka galimi Naawuni sanna nyaaŋa. Yisa Masia kum ni neebu zuɣu ka di tiligi ya. 22Ŋuna n-nyɛ ŋun chaŋ alizanda ni nti be Naawuni nudirigu polo n-su malaikanim’ mini bɛn su fukumsi ni bɛn nyɛ yikolaannim’ la.

Currently Selected:

1 Pita 3: DBwDB

Highlight

Copy