1 Pita 4

1Masia ni daa di wahala o niŋgbuŋ ni shɛm la zuɣu, di simdi ni yi gba zaŋ o tɛha maa tatabo kpaŋsi yimaŋa, dama ŋunkam diri wahala o niŋgbuŋ ni, o bi lan zaŋd’ o nuu kpɛhiri alahichi tumbu ni. 2Dinzuɣu pumpɔŋɔ zaŋ chana, di simdi ni yi chɛ ka Naawuni yubu n-su yi dunia ŋɔ ni biɛhigu, ka pa ni daadamtali kɔr’ biɛri. 3Di lan doliya yimaŋmaŋ’ suhu yubu n-niŋdi kaman bɛn pa Yɛhudianim’ ni niŋdi shɛm la. Dina n-nyɛ: Kɔr’ biɛri tuma mini niŋgbuŋ kɔre ni danyubo ni vuyɔbo yiriŋ ni tab’ laɣim nyuri dam ni buɣijɛmbo din chihiri zaligu ni wuhi shɛm la. 4Ka pumpɔŋɔ di niŋ bɛn daa nyɛ yi tab’ la alahiziba, yi ni bi lan doli ba tumdi tuun’ yoya ŋɔ zuɣu, dina n-chɛ ka bɛ saɣindi yi yuya, 5amaa ŋun mali shili ni o kari nyɛvilinim’ mini bɛn kpi saria la ni ti bɔhi ba di zuɣu. 6Lala zuɣu ka lahibal’ suŋ waazu daa yihi ti bɛn kpi la, ka hal bɛ ni nya saria karibu bɛ niŋgbuna ni kaman daadam kam la zaa yoli, bɛ shihi lee ni nya nyɛvili m-be kaman Naawuni ni be shɛm.

Bɛn mali Naawuni pina tumdi viɛnyɛliŋga

7Binshɛɣukam tariga paabu saha miriya, dinzuɣu gbibiya yimaŋa, ka yirigimiya yimaŋ’ zuɣu suhiri Naawuni. 8#Ŋaha 10.8 Din gari shɛlikam nyɛla, kul yumiya taba ni yɛlimaŋli, dama yurilim limsiri taali balibu pam. 9Niŋmiya saani ka kparima ni ŋumbu ka di puuni. 10Di simdi ni bɛnkam mali Naawuni ni ti ba pina balibubalibu shɛŋa tumdi viɛnyɛliŋga zaŋdi li sɔŋdi bɛ taba. 11Ŋun tɔɣisiri yɛtɔɣa, ŋun’ tɔɣisimila Naawuni ni zaŋ yɛtɔɣ’ shɛŋa ti o, ka ŋun tumdi tuma, ŋun’ zaŋmi Naawuni ni ti o ya’ shɛli tummi li, ka di chɛ ka Naawuni nya paɣibu binshɛɣukam ni Yisa Masia ŋun nyɛ ŋun su yiko mini jilima hal ni saha din ka bahigu la zuɣu. Ami!

Ŋun diri wahala o ni nyɛ Yisa nyaandola zuɣu

12M mabiyurisi, yi yi nyari wahala din be kaman buɣim ka di paari ya ni di buɣisi ya, yin’ di chɛliya ka di gari ya kaman di nyɛla din na ʒi n-niŋ so n-niŋdi ya maa. 13Amaa lee maliyala suhupiɛlli yi mini Masia ni laɣim di wahala ni di chɛ ka yi suhuri ti paligi, ka yi tooi mali suhupiɛlli pam saha shɛl’ o jilima yi ti yi palo la. 14#Ŋaha 11.31 Bɛ yi galim ya Masia yuli zuɣu, yi mal’ alibarika, dama Naawuni Shia Kasi min’ o jilima be yi ni. Niriba ŋɔ nyɛla bɛn tɔɣisiri yɛtɔɣ’ biɛri dalindiri Masia, amaa yinim’ sani o nyɛla ŋun nyari tibigibu. 15Ka yi ni so miri ka o nyɛ ŋun kuri niriba bee tayiɣa bee tuumbiɛ’ tumda bee ŋun kpɛri niriba yɛla ni n-nyari wahala di zuɣu. 16Amaa nir’ yi di wahala la o ni nyɛ Kristiɛn zuɣu, ŋun’ di chɛ ka vi mal’ o, amaa ŋun’ naɣ’ paɣimila Naawuni bɛ ni zaŋ Masia yuli pa o yupaa la zuɣu. 17Saha paaya ni saria karibu piligi; Naawuni niriba mi n-nyɛ bɛn yɛn daŋ tooni saria karibu maa ni. Ka di yi piligi ti sani, wula ka di ni ti bahindi ninvuɣ’ shɛb’ bɛn bi deeri Naawuni lahibal’ suŋ la sani? 18Di bemi kaman di ni sab’ Naawuni Kundi ni yɛli shɛm la:

“Di yi nyɛla din to ni wuntizɔra tiligi,

wula ka di ni be bɛn bi luri Naawuni sizuura

mini alahichinim’ la sani?” 19Dinzuɣu di simdi ni bɛn diri wahala ka di nyɛ Naawuni yubu la kul tumdi din tuhi, ka zaŋ bɛ nyɛviya niŋ bɛ Namda ŋun kul ʒe o daalikauli nyaaŋa la nuu ni.

Currently Selected:

1 Pita 4: DBwDB

Highlight

Copy