1 Pita 1
1
1Man’ Pita ŋun nyɛ Yisa Masia tumo la n-sabiri gbaŋ ŋɔ tiri Naawuni ninvuɣ’ gahinda bɛn wurim kpe tinzun tinsi ni m-be Pɔntus mini Galɛshia ni Kapadɔsia ni Ɛsha ni Bitinia, 2ka nyɛ ti Ba Naawuni ni daŋ pii ninvuɣ’ shɛb’ o nia lɔbu ni, ka o Shia Kasi mali ba ka bɛ bebu be kasi, ka chɛ ka bɛ deei Yisa Masia noli, ka o ʒim kpihim bɛ daalahichi la. Naawuni niŋm’ alibarika niŋ yi ni, ka tin ya suhudoo din kul zoori pahiri soya balibu pam ni!
Tahima nɛɔŋ malibu
3Paɣimiya Naawuni ŋun nyɛ ti Duuma Yisa Masia Naawuni min’ o Ba ŋɔ! Ŋun’ Naawuni nambɔzɔbo din galisi la puuni ka ti nya nyɛvili palli o ni daa neei Yisa Masia kum ni la zuɣu, ka di chɛ ka ti mali tahima nɛɔŋ 4din nyɛ Naawuni ni zaŋ shɛli zali ya alizanda ni, ka di nyɛ din ku tooi pooi bee n-saɣim bee n-kpaai la. 5Yi yɛda niŋbu zuɣu ka Naawuni guli ya o yiko puuni n-gu tiliginsim shɛli din mali shili gu ni di ti kahigi wuhi palo ni ʒiɛmana din bahindi nyaaŋa puuni la. 6Maliya suhupiɛlli dimbɔŋɔ zuɣu, hal di pa shɛli yi ni yɛn nya wahala din ku yuui zahimbu balibu shɛŋa din yɛn paai ya la zuɣu la zaa yoli; 7di nyɛla din ni wuhi yi yɛda niŋbu alalitali ni nyɛ shɛm. Hal buɣim ka bɛ mali buɣisiri salima din ni tooi saɣim la, lala ka di simdi ni yi gba yɛda niŋbu din mali buchi gari salima la gba nya buɣisibu, ka di chɛ ka di tooi ba n-zani, ka yi ti nya paɣibu mini jiri ni jilima dabisi’ shɛli dali Yisa Masia ni ti yɛn yi palo la. 8Yi nini na bi nya o, amaa ka yi kul yur’ o; ka hal yi nini ni na kul bi nya o maa zaa yoli, yi niŋ o yɛda ka kul mali suhupiɛl’ shɛli din galisi hal ka so ku tooi zaŋ yɛtɔɣa kahigi li wuhi gba. 9Yi ni niŋ yɛda shɛli maa nyɔri nyɛla yi ni nya tiliginsim shɛl’ la. 10Tiliginsim ŋɔ yɛla zuɣu ka anabinim’ daa vihi, ka bo ni bɛ baŋ li. Bɛ daa tɔɣisi anabitali yɛtɔɣa yɛlila anfaan’ shɛli Naawuni ni yɛn zaŋ tin ya la yɛla. 11Masia Shia ŋun daa be anabinim’ maa ni n-daa kahigiri wuhiri ba ka bɛ yɛri Masia ni ti yɛn di wahala shɛŋa mini jilima shɛli din ti yɛn dol’ di nyaaŋa yɛla; ka bɛ daa kpaŋ bɛmaŋ’ ni bɛ baŋ di saha mini di ni ti yɛn niŋ shɛm yɛla. 12Naawuni daa kahigi wuhi anabinim’ maa ni bɛ tuma maa pala bɛmaŋmaŋ’ sɔŋsim zuɣu, amaa ni di nyɛla yinim’ sɔŋsim zuɣu. Bɛna n-daa tɔɣisi yɛl’ shɛŋa yi ni wumdi ka lahibal’ suŋ molomooniba mooni Naawuni Shia Kasi ŋun yi alizanda ni na la yiko ni la. Hal malaikanim’ gba bɔri ni bɛ baŋ dimbɔŋɔnim’ gbinni.
Biɛr’ kasi biɛhigu
13Dinzuɣu malimiya shili yi tɛha ni ka gbibi yimaŋa, ka zaŋ yi tahima niŋ anfaan’ shɛli Naawuni ni ti yɛn niŋ niŋ yi ni Yisa Masia ni ti yɛn yi palo dabisi’ shɛli dal’ la. 14Yi ni nyɛ bɛn deei Naawuni noli zuɣu, di chɛliya ka kɔr’ biɛri be yi biɛhigu ni kaman di ni daa be yi ni shɛm yi ni daa na be ʒilinsi puuni la, 15amaa benyala kasi yi biɛhigu zaa puuni kaman Naawuni ŋun boli ya la ni be kasi shɛm. 16#Lɛv 11.44-45; 19.2 Di sab’ Naawuni Kundi ni ni Naawuni yɛliya, “Benya kasi, dama n nyɛla ŋun be kasi.” 17Yi yi ti suhiri Naawuni, yi boon’ o la yi Ba. Ŋun’ Naawuni n-nyɛ sariakarita ŋun kariti sokam zaa yinoyino saria kaman o tuma ni nyɛ shɛm, ka bi yaari so yuri ka chɛ so, dinzuɣu lumiy’ o sizuura saha shɛli yi ni be dunia ŋɔ ni ŋɔ. 18Dama yi mi ni Naawuni ni daa zaŋ shɛli pa talima n-tiligi ya biɛr’ yo’ shɛli yi ni daa deei yi yaannim’ san’ la ni pala din nyɛ binshɛŋa din saɣindi kaman anzinfa bee salima. 19Amaa di nyɛla Yisa Masia ŋun nyɛ piɛbil’ so ŋun ka galimi bee liɣisibu la ʒim din mali shaara la ka o daa zaŋ pa talima tiligi ya. 20Naawuni daa pun daŋ piig’ o mi pɔi ka naanyi ti nam dunia ŋɔ, amaa ka o daa lee ti yi palo la ʒiɛmani din bahindi nyaaŋa ŋɔ puuni yi zuɣu. 21O zuɣu ka yi niŋ Naawuni ŋun daa neeg’ o kum ni ka ti o jilima la naani ni di chɛ ka yi yɛda niŋbu mini yi tahima niŋbu zaa bela Naawuni ni. 22Yi ni doli yɛlimaŋli soli mali yimaŋa ka yi biɛhigu be kasi, ka di chɛ ka yi yuri yi mabihi yurilim maŋli ni la zuɣu, kul yumiya taba yi suhuri ni ni yɛlimaŋli. 23Naawuni yɛligu din mali nyɛvili ka ni be hal ni saha din ka bahigu la zuɣu ka yi nya dɔɣim palli, ka yɛligu maa ŋmanila bimbiɛlim din bi kpira, ka mi ku pooi. 24#Aiz 40.6-8 Di bemi kaman di ni sab’ shɛm Naawuni Kundi ni la:
“Ninsalinim’ zaa ŋmanila mɔri,
ka bɛ jilima zaa ŋmanila mɔpuma.
Mɔri kpira, ka di puma kpahiri lura.
25Amaa ti Duuma yɛligu din’ kul ni be
hal ni saha din ka bahigu.” Yɛligu maa nyɛla lahibal’ suŋ molomooniba ni tahi shɛl’ na ti tin ya.
Currently Selected:
1 Pita 1: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
