MARCOS 16

Jesusan jaktäwipa

(Mt 28.1-10; Lc 24.1-12; Jn 20.1-10)

1Sábado uru qhipatsti, Magdalankir Mariampi, Santiagon taykap Mariampi, Salomé warmimpix, q'apkir qullanak alapxäna Jesusan amayapar jawintir sarañataki. 2Domingo qhantatisti, wali willjtaw sarapxäna, kawkharutix Jesusan amayapax imt'atäkän ukkharux niya inti jalsuw puripxäna, 3ukatsti jupanakkamaw parlakipasipxäna:

—¿Khitirak sepultur punkut uka qal atiqarapistanisti? —sasa.

4Purisinsti sepulturat qala atiqat uñjapxäna. Uka qalasti wali jach'änwa. 5Sepulturar mantasinsti, janq'u isin mä waynaruw kupïxan qunt'atäskir uñjapxäna.#16.5 Janq'u isin mä wayna: jupax mä angelänwa. Warminakasti wal mulljasipxäna, 6ukampis uka waynax jupanakarux sänwa:

—Jan mulljasipxamti. Ch'akkatatäkän uka Nazaretankir Jesusaruw thaqhasipktaxa. Jupax jaktawayxiwa; janiw akankxiti. Uñjapxam kawkharutix uchatäkän uka. 7Jichhax sarapxam, yatiqirinakaparu, ukhamarak Pedrompir kuna yatiyanipxam: ‘Jesusax Galilearuw jumanakat nayra sarki; ukan jikisipxäta, kunjämtix sawayapktam ukhama’ —sasa.#16.7 Mt 26.32; Mc 14.28; Jn 21.1-22.

8Warminakasti sepulturat mistusinxa, jalakamakiw sarapxäna; jupanakax mulljasiñat wal khathatisipkäna. Janirakiw khitirus kuns arsupkänti axsarapxatap layku.

Jesusax Magdalankir Mariaruw uñsti

(Jn 20.11-18)

9Jesusax domingo qhantati jaktxasax, Magdalankir Mariaruw nayraqat uñstäna, khitirutix jupax paqallq ñanqha ajayunak alisskäna ukaru.#16.9 Lc 8.2. 10Warmisti sarasinxa, Jesusamp chik sarnaqapkän ukanakaruw yatiyäna, jupanakasti llakitäpxänwa, jachasipkarakïnwa. 11Jupanakax Jesusan jakaskatap ist'asina, Marian uñjatap yatisinsa, janiw iyawsapkänti.#16.11 Mt 28.17; Lc 24.11.

Jesusax pani yatiqiriparuw Emaús thakhin uñsti

(Lc 24.13-35)

12Uka qhipatsti Jesusax pani yatiqiriparuw uñstäna, kunapachatix jupanakax thakhinjam sarasipkän ukkha. 13Ukatsti jupanakax mayninakar yatiyiriw sarapxäna, ukampis mayninakax ukham yatiykatpachas janipuniw iyawsapkänti.

Jesusax yatiqirinakaparuw lurañ katuyi

(Mt 28.16-20; Lc 24.36-49; Jn 20.19-23)

14Uka qhipatsti Jesusax tunka mayan yatiqiriparuw uñstäna manq'añatak qunt'atäsipkiriru. Jupanakarusti pisi iyawsañanïpxatapata, qala chuymanïpxatapat tuqinuqäna, Jesusan jaktatap yatiyirinakar jan iyawsapxatap layku. 15Ukxarusti Jesusax jupanakarux sarakïnwa: “Taqi akapachar sarapxam taqi jaqinakar qhispiyasiñ arunak yatiyanipxam.#16.15 Mt 28.19; Hch 1.8. 16Khititix iyawskani, bautisaskarakini ukax qhispiyatäniwa, jan iyawsiristi, juchañchatäniwa.#16.16 Jn 3.18; Hch 2.38; 16.31-33. 17Aka chimpunakaw iyawsirinak taypin utjani: Sutixan ñanqha ajayunak alissupxani; machaq arunak parlapxarakini;#16.17 Chimpunaka: Hch 5.12. Ñanqha ajayunaka: Mc 3.15; Hch 8.7; 16.16-18. Machaq arunaka: Hch 2.4-11; 10.46; 19.6; 1 Co 12.28. 18amparanakaparusti katarinak wayxarupxani, jiwayir qulla umantasas janirakiw kamachatäpkanisa; usutanakarusti amparampi luqxatasaw k'umaraptayapxani” sasa.

Jesusax alaxpacharuw makhatxi

(Lc 24.50-53)

19Jupanakar parlatap qhipatsti, Tatit Jesusax alaxpachar aptatäxänwa.#16.19 Hch 1.9-11. Jupasti Diosan kupïxaparuw qunt'asxäna.#16.19 Sal 110.1; Mt 22.44; 26.64; Hch 2.33-34; Ef 1.20; Heb 1.3; 10.12; 12.2. 20Ukatsti yatiqirinakapax qhispiyasiñ arunak taqi tuqin yatiyapxäna; pachpa Tatituw jupanakarux yanapaskäna, kunayman muspharkañanak lurayasa, ukhamat arunakapan chiqätap uñacht'ayäna.

Currently Selected:

MARCOS 16: AYOPD

Highlight

Copy