LUCAS QALLTA ARUNAKA
QALLTA ARUNAKA
Lucas qillqatax Jesusarux taqi jaqinakan Qhispiyiripat uñstayi. Lucas qillqiristi qallta arunakapan qhanañcharakiwa, Jesusan sarnaqäwipata, luräwinakapata, yaqha qillqatanak tuqi yatxatañar uchasitapata, ukatsti ukarjamarakiw yäpar qillqawayi (1.1-4). Ukat Mateon qillqatapat sipansa juk'amp qhanañchäwinakax Jesusan yurïwipata, wawäkän ukkhatsa utji, ukhamarak Jesusan nayrap jutir Bautisir Juanatsa, (1.5—2.52). Uka qhanañchäwinakax Lucas jilatan qillqatapan jilpach jikxatasi. Mateo, Marcos jupanakan qillqatanakapar uñtatjamaxa, Bautisir Juanan luräwinakapat qhanañchasa (3.1-20), Jesusan bautismo katuqatapata, wasaran supayampi yant'atätapata (3.21—4.13), Jesusan Galilea uraqin luräwinakapat parlaraki (4.14—9.50). Ukatsti Mateo, Marcos uka qillqatanakjamaxa, Jesusan Galilea uraqita Jerusalenar qhip qhipa saräwipat parli (9.51—19.27), t'aqhisïwi urunakapata (19.28—23.56), jiwatat jaktatapata, mayninakar uñstatapata, ukhamarak alaxpachar sarxatapatsa (24).
Jesusan luräwinakapatxa, Lucas qillqirix Nazaret markan sinagogapar saratapat jilpach parli, ukansti Isaías profetan qillqatap uñxatäna, uka tuqitarak qhanañchäna; jupa pachpaw Tatitun Ajayupan jupxankatap qhanañcharakïna, ukhamat “suma yatiyäwinak t'aqhin jakirinakar churañataki”. Lucas jilatan qillqatapanxa khitinakatix aynacht'ata, juk'a yänakanikïpxi, jaqi masinakapansa jisk'achata, t'aqhisiyat jakapki taqi jupanakar arxatañat parli. Ukxarusti Jesusan yuritapasa, aka uraqin jaqinakar yanapt'as jakatapasa, jiwatapasa, jaktatapasa, alaxpachar sarxatapasa, taqinirus jach'a kusisiñ uñacht'ayaraki. Ukatsti Lucas qillqat sapanak utji samaritano chachan aski luräwipata, tutip tukuntir waynata. Tukuyarusti Tatitut mayisiñxata, Qullan Ajayxata, juchanak pampachañxata, ukhamarak Tatitun irnaqäwipan mä warmin lurañapat parli.
Currently Selected:
LUCAS QALLTA ARUNAKA: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996