LUCAS 12

Jesusax k'ari chuymaninakat yatichi

1Ukchañkamasti walja jaqinakapuniw tantthaptäna, kayunakatsa takirasipxänwa. Jesusasti nayraqatax yatiqirinakaparuw säna: “Fariseonakan k'ari yatichäwipat amuyasipxam, jupanakax taqi kunas chiqäkaspa ukham yatichasaw jaqinakar sallqjapxi. 2Janiw kuna jamasankiris jan qhanstirix utjkiti, janirakiw kuna imantatas jan yatisirix utjkiti. 3Ukhamax taqi kuntix ch'amakan arsupkta ukaxa, uru qhanan ist'asini; kuntix punku jist'antat jamasan arsupkta ukasti, uta patanakat art'atäniwa.

Khitir axsarañas wakisi

(Mt 10.28-31)

4“Munat jilatanakaxa, jumanakaruw sapxsma, janchir jiwayirirux jan axsarapxamti, janiw jupax ukat juk'amp lurkaspati. 5Ukampis khitirutix axsarapxañamäki uk sapxäma: khititix jakañ apaqasax infiernor jaquntañatak ch'amanïki uka Diosar axsarapxam. Jïsa, jupar axsarapxam.

6“¿Janit phisqa jamach'inakax pä qullqiruk aljaskixa? Ukampis Diosax janiw mayatsa armt'askiti. 7Jumanakan ñik'utamas taqpach jakhutawa. Ukhamax jan axsarapxamti; jumanakax walja jamach'inakat sipansa jila alanïpxtawa.

Jaqinak nayraqatan Jesucristot qhanañchirinaka

(Mt 10.32-33; 12.32; 10.19-20)

8“Nayax sapxsmawa, khititix jaqinak nayraqatan nayat arsunixa, jaqin Yuqapax Diosan angelanakap nayraqatan jupanakat arsurakini; 9ukampis khititix jaqinak nayraqatan nayar jan uñt'ir tukki ukanakarux, Diosan angelanakap nayraqatan jan uñt'iriw tukurakï.#12.9 Mc 8.38; Lc 9.26; 2 Ti 2.12.

10“Khititix Jaqin Yuqapxat jan wal parlkani ukax pampachatakïniwa; ukampis khititix Qullan Ajayur ñanqhachkani ukax janiw pampachatäkaniti.

11“Kunapachatix sinagoganakaru, jan ukax taripirinak nayraqataru, jilïrinak nayraqatar apapkätam ukkhaxa, jan llakisipxamti ukan kunjäm arsuñamatsa; 12ukapachasti Qullan Ajayuw kunatix arsuñamäkani uk sasipkätam.”#12.12 Mt 10.19-20; Mc 13.9-11; Lc 21.12-15; Hch 4.1-13.

Jan amuyt'an qamir jaqi

13Jaqinakat mayniw Jesusar säna:

—Yatichiri, kunatix tuti katuqañax nayar wakt'kitu uk churxitpan sarapit jilaxaru —sasa.

14Jesusasti juparux sänwa:

—Jilata, ¿khitirak jumanakar taripirit uchitusti, jan ukax yänak jaljirit utt'ayitusti? —sasa.

15Ukampis saskakïnwa:

—Amuyasipxam jumanakatakik taqi kunsa munañxata; jaqin jakañapax janiw kunatix utjarapki uka walja yänakapankkiti —sasa.

16Ukatsti aka uñtasïwit parläna:

“Mä qamir jaqiw utjäna, yapunakapasti walja achu churäna. 17Ukat uka qamirix lup'ïna: ‘¿Kuns luräxa? Janiw kawkhar uka juyranak imañaxas utjkituti’ sasa. 18Ukat amuyt'asirakïna: ‘Jichhax yatxtwa, kuntix lurkä uka. Juyra imañ utanak q'al tinkurayä, ukat juk'amp jach'anak lurä, ukaruw taqi juyranakaxsa, taqi yänakaxsa imä. 19Ukatsti naya pachpaw sarakï: Jilata, walja yänakaw utjtam walja maratak imata; jichhasti samart'am, manq'asim, umt'asim, kusisirakim’ sasa. 20Diosasti juparux sänwa: ‘Pisi amuyt'an jaqi, jichha arumpachaw jiwxäta; kuntix imasiskta ukasti ¿khititakirakïnisti?’ sasa. 21Ukhamaw jupatakik taqi kun arkuntasir jaqimpix lurasini, ukampis Dios nayraqatan jan kunan jaqiwa.”

Diosax wawanakapar uñjaskiwa

(Mt 6.25-34)

22Ukxarusti Jesusax yatiqirinakaparux siwa: “Sapxsmawa: Manq'añatsa, isisiñatsa jan llakisipxamti. 23Jakañax manq'at sipansa juk'amp askiwa, janchisti isit sipansa juk'amp askirakiwa. 24Uñtapxam jamach'inakaru: ukanakax janiw phawapkisa, apthapipkisa, juyra imasiñanakapas utjkarakiti, ukampis Diosaw ukanakarux manq'ayi. ¡Jumanakax uka jamach'inakat sipansa juk'amp munatäpxtawa! 25¿Jumanakat khitis wal llakisisin mä jisk'amp jakañapar jilxatayaspasti? 26Jumanakatix mä jisk'äki uksa jan lurirjamäpksta ukasti, ¿kunatarak mayanakat llakisipxtasti?

27“Amuyapxam, kunjämsa panqaranakax jilapxi: janiw irnaqapkiti, janirakiw qapupkisa. Ukampis sapxsmawa, janiw Salomón reyis taqi qamir kankañapampix uka panqaranakat sipan juk'amp sum isthapiskänti. 28Diosatix ukham qurarux isthapiychixa, jichhürux pampankaski, qharürusti phichhantatarakïni ukasti, ukampis ¡jumanakarux juk'amp sum isthapiyapxätam pisi iyawsañan jaqinaka! 29Ukhamasti kuntix manq'apkäta, umapkäta ukanakat jan llakit sarnaqapxamti. 30Diosar jan uñt'ir jaqinakakiw taqi ukanakat llakisipxi; jumanakansti mä Awkiw utjapxtam, jupasti taqi ukanak jumanakan munapxatam yati.#12.30 Mt 6.8,32. 31Ukhamasti Diosan qhapaq markap thaqtapxam, ukatsti taqi kunas jumanakarux churatäskaniwa.

Alaxpach yänaka

(Mt 6.19-21)

32“Jisk'a tama ovejanakaxa, jan axsarapxamti, Dios Awkimax khuyapayasiñapan qhapaq markap churañ munapxtam. 33Kunatix utjapktam uk aljapxam, ukatsti jan kunanïpki ukanakar churxapxam; ukhamat jan mirq'isir wayaqanak lurasipxäta, alaxpachansti jan tukuskir yänak imasipxäta, kawkhantix lunthatas jan apskani, kharus janirak kharuntkani ukkharu.#12.33 Mt 19.21; Mc 10.21; Lc 18.22. 34Ukhamax kawkhankkitix jumanakan yänakamax ukkhankarakiniw chuymanakamaxa.

Wakicht'asit suyt'aña

35-36“Kunjämatix uywatanakax uywiripar jaqichasïwit kutt'aniñap jank'ak punku liqt'anipan jist'arañatak suyt'apki ukhamay jumanakax suyt'apxam.#12.35-36 Mc 13.34-36. 37Kawkïr uywatanakarutix uywiripax suykir jikxatki ukanakax kusisiñanïpxiwa. Qhanak sapxsma, uka uywiripax jupa pachpaw manq'añatak uywatanakapar qunt'ayani, ukatsti sapa maynir manq'a luqtarakini. 38Chika arumas purinpan, jan ukax willjtarusa, ukham wakicht'at suyt'askirtix jikxatanixa, uka uywatanakax kusisiñaniwa. 39Ak yatipxam: Mä utanitix kunapacha lunthatan jutañap yatispa ukkhaxa, lunthatarux janiw utaparux kun lunthatsuñatakis mantaykaspati. 40Ukhamasti jumanakax wakicht'atäpxam; jaqin Yuqapasti kunapachatix jan amuyasipkäta, ukapachaw jutani.”#12.40 Mt 24.43-44; cf. 1 Ts 5.2; 2 P 3.10; Ap 3.3; 16.15.

Pä uywatanakxata

(Mt 24.45-51)

41Pedrox Jesusaruw jiskt'äna:

—Tatay, ¿aka amuyt'äwix nanakatakikiti, jan ukax taqinitakicha? —sasa.

42Tatitusti sänwa: “¿Khitirak suma phuqhiri amuyt'an uta yänak apnaqiristi, khitirutix utanipax utapankirinakar wakisitapar manq'añ churañapatak jaytki ukasti? 43Kawkïr uywatarutix utanix purinisin taqi lurañanakap phuqhaskir jikxatki uka uywatax kusisiñaniwa. 44Qhanak sapxsma, utanix uka uywatarux taqi yänakap apnaqirit uchani. 45Ukampis uka uywatatix utanin jayat purisinkañap amuyaspa, ukat uywat masinakarus nuwaraspa, chachäpasa warmïpasa, ukatsti manq'añaru, umañaru, machantañaru uchasispa, 46ukapachaw utanipax jan suykis uka uru kutt'anxani; ukat uka uywatarux mutuyaniwa, jan iyawsirinakamp chikaw t'aqhisiyani.

47“Mä uywatatix uywiripan munañap yatkasin jan wakiyaskani, janirak uywiripan munañaparjam lurkanixa, uka uywatax mutuyäwi katuqani. 48Ukampis jan yatir uywatatix jan walinak lurchi ukaxa, juk'a mutuyäwik katuqani.#12.48 Dt 25.2-3. Khitirutix walja churatäki ukarux waljarakiw mayitäni; khitirutix walja katuyatäki ukarusti, juk'ampirakiw mayitäni.

Jesús layku t'aqanuqtañ utjatapa

(Mt 10.34-36)

49“Nayax akapachar nina naktayiriw jutta; ¡nayax wal munirista uka ninan niya nakhaskañapa! 50Nayraqatasti mä jach'a yant'ampi yant'atäñaxaw wakisi, ¡uk phuqhasiñapkamasti walpun t'aqhista! 51¿Jumanakasti nayan akapachar sumankañ apanitaxti amuyapxta? “¡Janiwa!” Jan ukasti t'aqanuqtañak apantxa. 52Jichhat uksarusti, mä utan phisqan utjirix jaljtapxaniwa, kimsanix panitakiw sayt'ani, paninisti kimsanitakiw sayt'arakini. 53Awkix yuqapatakiw sayt'ani, yuqasti awkipatakiw sayt'arakini; taykasti phuchhapatakiw sayt'ani, phuchhasti taykapatakiw sayt'arakini; taykch'isti yuxch'apataki, yuxch'asti taykch'ipatakiw sayt'arakini.”

Urunakan unañchanakapa

(Mt 16.1-4; Mc 8.11-13)

54Jesusasti jaqinakarux sarakïnwa: “Kunapachatix jumanakax inti jalanta tuqit qinayanak sartanir uñjapxta ukkhaxa: ‘Jalluw purini’ sapxtawa, jallux puripuniwa. 55Aynach tuqit thayan thayt'anipansti: ‘Jichhürux lupintaniwa’ sapxtawa, ukatsti lupintapuniwa.#12.55 Inti jalanta thayanakax Midetarraneo qutat Palestina uraqiruw jallu jutayi; aynach thayasti wasar tuqit junt'u puriyaniraki. 56¡K'ari chuyman jaqinaka! Jumanakatix alaxpachana, uraqin uñnaqap amuyt'añ yatipxsta ukaxa, ¿kunatarak aka urunakan jakapkta uksti jan amuyt'añ yatipxaraktasti?

Uñisirinakampi sumankthapiñxata

(Mt 5.25-26)

57“¿Kunatsa jumanakpach jan uñjasipxta kunatix chiqäki ukxa? 58Ch'axwir masimatix tumpantstamxa, ukat jilïrinakar uñstiritix jupamp sarstaxa, thakhin sarkasa jupampi sumankthapxam, taripirin nayraqatapar jumar jan apañapataki, taripiristi katuntirinakar katuyasin carcelt'ayätam. 59Nayasti sismawa, janiw ukat mistkätati taqpach qullqi churañamkama.”

Currently Selected:

LUCAS 12: AYOPD

Highlight

Copy