GÉNESIS 16
16
Agar warmimpi, Ismael wawapampi
1Sarai warmisti Abram chachapatakix janiw wawanïrjamäkänti, ukampis mä egipcia uywatapaw utjäna, Agar sata. 2Ukat Abram chachaparux säna:
—Tatitux janiw wawa apaykituti, ukampisa Agar uywatasampi mayachasiñamatakiw maysma, inach ukhamat jupa tuqi wawanïrista#16.2 Khaya urunakanxa, mä warmix jan wawachasirïtapatxa, wali p'inqachjatapuniw uñjasirïna (1 S 1.5). Jan ukham uñch'ukiyasiskañatakisti, chachaparux uywatapampi ikintañapatakiw mayirïna, ukhamat uka uywatapan wawapa wawapäkaspas ukham katuqañataki. Gn 30.1-13. —sasa.
Abram chachasti kuntix Sarai warmipax siskatayna uk phuqhäna, 3ukatsti Sarai warmix Egiptonkir Agar uywataparuw Abram chachaparux warmipäñapatak irpkatäna, kunapachatix jupanakax niya tunka mara Canaán uraqin jakxapxäna, ukapachaw ukax lurasïna. 4Abram chachasti Agar warmimpiw mayachasxäna, ukatsti Agar warmix usur jaqiptxänwa, ukampisa kunapachatix jupax usur jaqiptxatap amuyasxän ukkhaxa, Sarai warmirux jisk'achañampiw uñjxäna.#16.4 1 S 1.6-7. 5Ukatsti Sarai warmix Abram chachaparuw säna:
—¡Jumaw juchanïta Agar warmin nayar jisk'achañapatakixa! Naya kipkaw juparux warmimat chursma, jichhasti wawanïxasin nayatsa juk'ampïkxaspas ukham amuyasxi. Tatituy sispan khitis juchanïtan ukxa, jumati jan ukax nayacha —sasa.
6Abramasti warmiparux sarakïnwa:
—Akaxay uywatamax amparamankiwa, kuntix munta uk jupampix luraskakim —sasa.
Sarai warmisti uywataparux sinti jan walpun uñjxäna, ukat Agar warmix sarxäna. 7Ukampis Tatitun mä angelapaw wasaran juparux jikxatäna, Sur satäkis ukar sarki uka thakhi jak'ana mä uma jalsu thiyana, 8ukat jiskt'arakïna:
—Agar, Sarai warmin uywatapa, ¿kawkitsa jutaskta, kawkirus saräta? —sasa.
Agar warmisti sarakïnwa:
—Sarai uywirixan utapat jaltanta —sasa.
9Ukatsti Tatitun angelapax sarakïnwa:
—Uywiriman utapar kuttam, ukatsti taqi kunansa jupar ist'arakim —sasa.
10Ukxarusti Tatitun angelapax saskakïnwa:
“Wawanakamax waljanïniwa,
jan khitinsa jakt'kayarakïniwa.
11Usur jaqïtawa,
ukatsti mä yuqall wawa wawachasïta,
juparusti Ismael#16.11 Ismael sutix hebreo arunxa, Tatitux ist'iriwa sañ muni. sasaw sutichäta,
Tatitun juman t'aqhisitam ist'atap layku.
12Jupasti pampankir uri caballjamäniwa,
taqinimpiw nuwasini,
taqinis jupampirakiw nuwasini;
ukampisa jupax utap sum utt'ayani,
jilanakapax janisay munkpan ukasa” sasa.
13Kunjämatix Agar warmix Tatitumpi parlkatayna ukkhaxa, “Uñjiri Dios” sasaw sutichäna, jupasti sarakïnwa: “Diosaw nayarux uñjitu, ukat jichhas jakaskarakta” sasa. 14Ukat uka uma phuch'ux: “Jakir Tatitun phuch'upa, taqi kun uñjirin phuch'upa” sataxa. Uka phuch'usti Cadés, Béred uka markanak taypinkiwa.
15Agar warmisti Abramatakix mä yuqall wawa wawachasïna,#16.15 Gl 4.22. Abram chachasti “Ismael” sasaw sutichäna. 16Kunapachatix Ismael wawapax yurkän ukkhaxa, Abram chachax kimsaqallq tunka suxtan maranïnwa.
Currently Selected:
GÉNESIS 16: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
