GÉNESIS 15
15
Diosax mä arust'äwi Abram chachamp luri
1Ukanak qhipatsti Tatitux Abram chacharuw mä unañchäwi tuqi uñstäna, ukatsti sarakïnwa:
—Abram, jan axsaramti, juman arxatirimax nayätwa, juman katuqäwimax wali jach'apunïniwa —sasa.
2-3Ukampis Abram chachax sarakïnwa:
—Dios Tatay, ¿kunatakirak walïni uka churatamasti? Jumax askiw yattax nayan jan wawanïtaxa. Jumax janiw mä wawsa churkistati, taqi kunatix utjkitu ukxa, Damasconkir Eliézer uywataxakiw katxani —sasa.
4Tatitusti sarakïnwa:
—Juman tuti katuqirimax juman pachpa wawamäniwa, janiw mä jaya jaqïkaniti —sasa.
5Ukatsti Tatitux Abram chacharux anqaruw irpsu, ukat saraki:
—Alaxpach sum uñtam, ukatsti jakt'añjamächi ukkhaxa, taqi warawaranak jakt'am. Jïsa, ukhamäniw juman wawanakamaxa —sasa.#15.5 Ro 4.18; Heb 11.12.
6Abram chachasti Tatiturux iyawsänwa, ukat Tatitux jupar aski jaqit katuqäna, 7sarakïnwa:
—Nayätwa Tatituxa; nayaw Ur sata Caldea uraqit irpsunsma, aka uraqi jumar tutit churañataki —sasa.
8Abram chachasti sarakïnwa:
—Ukampis Dios Tatitu, ¿kunjämatarak yatiriststi aka uraqi nayan tutit katuqañaxsti? —sasa.
9Tatitusti ukxarux sarakïnwa:
—Mä qachu vaca qallumpi, mä cabrampi, mä urqu ovejampi apanim, ukanakasti kimsa marankamäñapawa, ukhamarak mä qhurukutu, mä paloman chhiwchhipa kuna —sasa.
10Abram chachasti taqi uka animalanak Diosan nayraqatapar apanïna, ukatsti payar jaljtayasaw purapat uñthapisita pä chiqar uchäna, ukampisa jamach'inakxa janiw jaljtaykänti. 11Uka aychanak uñjasinsti, jach'a pakanakaw ukawjar jutapxäna, Abram chachasti ukanakarux jark'arakïnwa. 12Kunapachatix arumäxän ukkhasti, Abram chachax ikt'asxänwa. Ukatsti akatjamat mä jach'a ch'amakan muyuntat uñjasïna, ukatsti Abram chachax wal axsarayasïna. 13Tatitusti ukapachax sarakïnwa:
—Jichhax yatiñamaw wakisi, wawanakamax yaqha markan jakapxani, ukansti irnaqañampi t'aqhisiyatäpxaniwa, pusi patak maraw#15.13 Pusi patak mara: Uka maranakax israelitanakan Egipto markan t'aqhisiyat jakapxatanakapawa. Ex 1.1-14; 12.40-41; Hch 7.6. ukan t'aqhisiyatäpxani. 14Ukampis nayarakiw t'aqhisir jaqir tukuyir markarux mutuyä, ukatsti wawanakamax qhispiyataw mistunxapxani, walja qamir yänakampi phuqt'ataw jutxapxarakini.#15.13-14 Hch 7.6-7. Jdt 5.9-12. 15Jumasti wali chuymanïxäta ukkhaw mä suma samarañan jiwxarakïta, ukhamaw jumax nayra awkinakamamp chikachasxäta. 16Pusi patak mara qhipatsti, wawanakamax aka chiqaruw kuttanxapxani, ukkhakamasti amorreonakan jucha luratanakapax janïraw sinti jan walïkaniti.
17Kunapachatix arumäxäna, wali ch'amakäxarakïna, ukapachax mä hornow wali jiq'iskir uñstäna, mä nina wiyarakiw uka jaljat animalanak taypi sarakipäna.#15.17 Hornosa, nina wiytatasa, Tatitux jupanakampïskatap yatiyäna, kunjämtix Abrahamarux juramentompi siskatayna ukhama. 18Uka pachpa uruw Tatitux Abram chachampix mä amtäwir mantäna, sarakïnwa:
—Wawanakamaruw aka uraq churä, Egipto jawirata, Éufrates sata jach'a jawirkama. 19Quenita, quenizita, cadmoneo, 20hitita, ferezeo, refaíta, 21amorreo, cananeo, gergeseo, jebuseo taqi ukanakan uraqinakap wawanakamar churä#15.19-21 Uka markanakax janïra israelitanakax uka chiqar purinipkäna uka Palestina uraqin utjirinakäpxiwa; Ex 3.17; 13.5; 23.23,28; 33.2; 34.11; Dt 7.1; 20.17; Jos 3.10. —sasa.
Currently Selected:
GÉNESIS 15: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
