GÉNESIS 17
17
Diosan Abram chachampi arust'äwi luratapa
1Kunapachatix Abram chachax llätunk tunka llätunkani maranïxän ukkhaw Tatitux jupar uñstäna, ukatsti sarakïnwa:
—Taqi ch'amani Diosax nayätwa; jumasti nayan nayraqataxan askipun sarnaqam, 2nayasti jumampix mä arust'äwi lurä; wawanakamax waljanipunïniwa —sasa.
3Ukapachasti Abram chachax ajanup uraqir puriñkamaw alt'äna, Diosasti ukchañkamax parlxayaskakïnwa:
4—Jumampi mä suma amtäwiru mantataxaxa akawa: Jumax walja markanakan awkipäyätawa, 5janirakiw Abram satäkxätati. Jichhat uksarux Abraham satäxätawa,#17.5 Abram: uka sutix Awkixax jach'ar aptatawa sañ muni. Abraham sutisti walja markanakan awkipa sañ munaraki. walja markanakan awkiparuw tukuyäma. 6Wawanakamsti waljanirupuniw tukuyä; jumatsti reyinakampi, markanakampiw mistuni. 7Kuna arust'äwtix jumampix lurktxa, ukhamarak akat qhiparusa wawanakamampi lurkä ukax akawa: Nayax juman Diosamapunïyäwa, wawanakaman Diosaparakïyäwa. 8Canaán uraqisti, kawkhantix jichhax jakkta uka uraqix jumampiru, wawanakamampir wiñayatak churatäniwa,#17.8 Hch 7.5-6. nayasti jupanakan Diosaparakïyäwa —sasa.
9Diosasti Abraham chacharux saskakïnwa:
—Jumampi, wawanakamampix nayan arust'äwixarux phuqhapxapunim. 10Akaw jumanakampi arust'äwiru mantataxaxa, ukatsti wawanakaman uka arust'äwi phuqhañapapunïniwa: Taqi chachanakaw circuncisión katuqapxäta. 11Jumanakasti chhuxurasiñaman lip'ich janchip kharirasipxäta, ukaw mä chimpüni kuna arust'äwirutix jumanakampi nayampi mantapktan ukatxa. 12Jichhat uksarusti taqi yuqall wawaw yuritapat kimsaqallqu urur circuncisión katuqañapa, uka kipkarakiw utaman yurki uka yuqall wawasa, qullqimpi alasit uywataman yuqall wawapasa, jaya markat jutir jaqin yuqall wawapas circuncisión katuqañapa. 13Taqi yuqall wawapuniw circuncisión katuqañapa. Ukhamaw nayan arust'äwixax jumanakan janchiman chimpuntatäni, wiñayataki mä arust'äwjama. 14Ukampisa khititix circuncisión jan katuqkani ukax jumanak taypit apsutäxañapawa, nayan arust'äwixaru jan phuqhatap layku.
15Diosasti Abraham chacharux sarakïnwa:
—Warmimax janiw jichhat uksarux Sarai sutinïkxaniti. Jan ukasti Sara sutinïxaniwa. 16Nayaw juparux aski waxt'äwinak churä, jupa tuqsti mä wawa churarakïma. Jupasti walja markanakan taykapäniwa, wawanakapasti walja markanakan reyiparakïniwa —sasa.
17Ukatsti Abraham chachax uraqir p'iqip puriyañkamaw alt'asïna, ukatsti akham sasaw larusïna: “¿Patak maran jaqisti wawanirakïspati? ¿Sarasti llätunk tunka maranirusti wawanirakïspati?” sasa. 18Ukatsti Diosarux sarakïnwa:
—¡Ismael wawaxax aski waxt'äwimampi jakaspa ukaxa walïspawa! —sasa.
19Tatitusti sarakïnwa:
—Sara warmimax mä wawa wawacharapïtam, jumasti Isaac#17.19 Isaac sutix larusiña sañ muni. sutimpiw uchäta. Jupampiw arust'äwix sum sayt'ayä, wawanakapampisti wiñayatakiw arust'äwix utjayarakï. 20Ismael tuqitsti mayisitam ist'araksmawa, juparux aski waxt'äwinak churarakïwa; wawanakapas waljanipunïniwa. Ismael chachasti tunka payani jach'a jilïrin awkipäniwa, jupatsti mä jach'a marka tukuyarakï. 21Ukampis nayan arust'äwix Isaac wawamampikiw utjayä, kawkïri wawtix akat mä mararux Sara warmimax wawacharapkätam ukampi.
22Diosasti Abraham chachampi parlañ tukuyasinxa, uka chiqat sarxänwa. 23Ukürpacharakiw Abraham chachax Ismael wawaparux circuncisión katuqayäna, ukhamarak qawqha uywatanakapatix utapan yurkatayna, kawkïri jaqinaktix qullqipampi alaskatayna jupanakarus circuncisión katuqayäna. Utapan jakapkäna taqi uka chachanakasa, yanapapkän ukanakas taqiniw circuncisión katuqapxäna, kunjämtix Tatit Diosax siskatayna ukhamarjama. 24-25Abrahamax llätunk tunka llätunkani maranïnwa, Ismaelasti tunka kimsani maranirakïnwa, kunapachatix chhuxurasiñapan lip'ichipax khariqatäkän ukapachaxa. 26Abraham chachasa, Ismael wawapasa ukürpacharakiw circuncisión katuqxapxäna, 27utapan utjir taqi jaqinakampi, utapan yurir uywatanakapampi, qullqimpi alat jaya jaqinakamp chika.
Currently Selected:
GÉNESIS 17: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
