Māla̍kāī 1

1Yōōŋgōo̍ ho̍ō Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ Māla̍kāī le̍ wāŋnda̍ I̍sɔ̄lūɛ̍i̍ dīmūllo̍ ni̍.

A̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ I̍sɔ̄lūɛ̍i̍ya̍ yɛ̍ o̍kɔ̄ɔ̄

2Nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ a̍ wānāā ndūa̍a̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, “Wāŋnda̍ I̍sɔ̄lūɛ̄ī, I̍ ka̍a̍la̍ nya̍ kāni̍ ma̍si̍ndɛ̄.”

Kɛ̍ mi̍ lā nyūnā Mɛ̄lɛ̄ka̍ āā, “Kāālā yɛ̄ɛ̍nɛ̍ ŋ̄ kāāla̍ yɛ̄ na̍a̍?”

Mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī āā, “Che̍kɔ̍pū nda̍ I̍īsɔ̄ pɔ̄mbɔ̄ɔ̍ a̍ bɛ̄ndōo̍ nda̍ wa̍ ni̍. Ndu̍yɛ̍ mi̍ ka̍a̍lā Che̍kɔ̍pū nda̍ yu̍ŋgu̍ ndɔ̄ɔ̍. 3Kɛ̍ mi̍ tu᷅l I̍īsɔ̄ lēyɛ̄ nda̍ yu̍ŋgu̍ ndɔ̄ɔ̍. Mi̍ lo᷅ o̍ ko̍ŋ mi̍ tɛ̍ɛ̍mbūū lɛ̄ŋndē ndɔ̄le̍ ŋ̄pēmbūle̍ŋ, mi̍ lē sīmnu᷄ŋ po̍llo̍ nāa̍ tūŋāā yōndūa̍a̍ ā wā wa̍.”

4Mī wāŋnda̍ I̍dɔ̄m, nda̍ yɔ̍nūŋ māā yu̍ŋgu̍ I̍īsɔ̄ wo̍ ni̍, mā di̍mi̍ dɔ̍ɔ̍ āā, “Chi̍e̍e̍ŋ nāa̍ŋ ŋ̄ tāmbu̍, kɛ̍ ŋ̄ chō mu̍ŋ mīŋgī tāŋgūl.” Kɛ̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ āā, “Lā chō mu̍ŋ mīŋgī tāŋgūl, kɛ̍ I̍ cho̍ mu̍ŋ vɛ̄lɛ̄ mīŋgī tɛ̄ɛ̄mbūū. Wāŋnda̍ ā vēēlū ni̍ŋ chi̍e̍e̍ŋ nyāa̍ŋ āā, ‘Lɛ̄ŋndē dɛ̍nɛ̍ wɔ̍ɔ̍ŋnde̍ŋ,’ ndu̍yɛ̍ mā vēēlu̍ nya̍ āā, ‘Wānāā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ tu̍mbe̍ a̍ nda̍ le̍ fɛ̍ɛ̍ŋ a̍ fɛ̍ɛ̍ŋ nda̍.’ ”

5Nya̍ wāŋnda̍ I̍sɔ̄lūɛ̄ī, nya̍ pi̍la̍ chō chɔ̄ a̍ hɔ̄ltā nyāla̍ŋ pɛ̍ɛ̍ŋ nyɛ᷅ yɔ̍nūŋ ni̍ŋ wāŋndā I̍dɔ̄m ndo̍ mī lā dīmi̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ ō bɛ̄ndū, lɛ̄ŋīi̍ chēle̍ŋnde̍ bɛ̍ɛ̍, i̍ cho̍ bɛ̍ɛ̍ lɛ̍ŋīī I̍sɔ̄lūɛ̍i̍le̍ ve̍, ō nɔ̄ ndi̍ kpāāyāa̍ chōo̍.”

A̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ɔ̍nu᷄ŋ tu̍mbe̍ a̍ wānāā sōlīāā lāsa̍lāa̍ yɛ̍ o̍kɔ̄ɔ̄

6Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l wānāā sōlīāā lāsa̍lāa̍ āā, “Pōo̍ nɔ̄ mbo̍ ke̍ fi̍nyā ndɔ̍ bɛ̄ɛ̄le̍ŋ, ndu̍yɛ̍ mi̍ bu̍ɛ̍i̍yo̍ ō ke̍ māsānɔ̍ ndɔ̄ɔ̍ bɛ̄ɛ̄le̍ŋ. Ya̍ cho̍ fi̍nyā nyā ni̍, vɛ᷅ lā ke᷅ ya̍ bɛ̄ɛ̄le̍ŋ te̍? Ya̍ cho̍ māsānɔ̍ nyāa̍ ni̍, vɛ᷅ lā nɔ̍ i̍si̍o̍o̍ŋ le̍ ya̍ le̍? Lā lo̍ o̍ ko̍ŋ mi̍ lā pɛ̄ɛ̄sā ya̍ mī lā nyūnā ya̍ āā, ‘Vɛ̄ɛ̍nɛ̍ na̍a̍ ŋ̄ lōōku̍ yɛ̄ nu̍m pɛ̄ɛ̄sā?’ 7Lā bīī pɛ̍ lā sōli̍ nyɛ̄ dīa̍a̍ bɛ̍nda̍ le̍ wo̍ sa̍lāla̍ŋ o̍ ma̍āŋ nūu̍ chōo̍. Ndu̍yɛ̍ mī lā nyūna̍ ya̍ āā, ‘Vɛ̄ɛ̍nɛ̍ na̍a̍ ŋ̄ chō yɛ̄ nyɛ̄ dīa̍a̍ bɛ̍nda̍ le̍ sa̍lāa̍ sōlīo̍o̍?’ Le̍ mɛ̄ɛ̍ nya̍ yīya᷄ŋ māā ma̍āŋ nūu̍ ō cho̍ nyɛ᷅ o̍ nyɛ̄ le̍ yɛ̍. 8Tē lā sōli̍ chɔ̄lūāā sūmɛ̍i̍ya̍, a̍ chɔ̄lūāā nāmtāa̍, a̍ chɔ̄lūa̍a̍ cho̍ a̍ nāāla̍ŋ nda̍ sa̍lāla̍ŋ pɛ̍, ō cho̍ yɔ᷅ŋ wɔ̄ɔ̍ŋndo̍ le̍ nya̍ wā ko̍ŋ to̍sāa̍ le̍? Tē lā chu̍a̍ chɔ̄lūāā wāā le̍nde̍ pɛ̍ mī lā ke̍ māsa̍ nya̍ ībūŋgāa̍, tē ō nāŋ ni̍ŋ kɔ̍l a̍ nya̍ mbō mīŋgu̍l nya̍ kɛ̄ndɛ̄i̍ ke̍ŋ? Ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, ya̍ so̍ō ni̍.

9“Nya̍ wānāā sōlīāā lāsa̍lāa̍ ha̍ā, lā chō ya̍ Mɛ̍lɛ̄ka̍ dīōmndo̍ nyūnāa̍ le̍ mī chē vɛ̄lɛ̄ nya̍ nyīnā, mi̍ to̍sa̍l nya̍ kɛ̄ndɛ̄i̍. Kɛ̍ tē lā wa̍ sa̍lālā wāā nu̍a̍ā sōlīo̍o̍ pɛ̍, vɛ̄ɛ̍nɛ̍ ya̍ I̍ cha᷅ yɛ̍ ni̍ŋ nya̍ nyīnā? Ya̍ Mɛ̍lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ nyɛ̄ ya̍ I̍ di̍mi̍ wo̍ cho̍ ko̍ŋ ni̍. 10Tē ya̍ i̍i̍ sɔ̍la̍ pɛ̍ wa᷅ŋndo̍ nya̍ tɛ̄ɛ̄ŋ, mī ndu̍ o̍o̍ ki̍i̍ndi̍a̍a̍ dīōla̍ŋ o̍ chīɛ̍i̍ Mɛ̄lɛ̄ka̍a̍, le̍ māā wānā o̍ wānā lu̍e̍ī lɛ̍ lo̍ŋ mbō ki̍i̍su̍u̍ yīŋnde̍ŋ o̍ ma̍āŋ nūu̍ chōo̍ fo̍ndō fu̍u̍ le̍. Kāni̍ fo̍ndōle̍, I̍ hi̍ni̍ lɛ̍ kɔ̄l a̍ nya̍ le̍. Ndu̍yɛ̍ I̍ ye̍e̍ma̍ lɛ̍ sa̍lā o̍ sa̍lā nya̍ o̍ bā le̍. 11Wāŋnda̍ o̍ chi̍e̍ēŋndo̍ ni᷄ŋ kpo̍u̍, chɔ̍ŋ nāa̍ pāa̍le̍ŋ lē chāŋ nda̍ mbo̍ kūā nāa̍ le̍ de᷅l la̍, ā chō ya̍ bɛ̄ɛ̄le̍ŋ kīo̍o̍. Wāŋnda̍ chō nyɛ̄m chūŋ kɛ̄ndɔ᷄ŋ lōmɔ̄ɔ̍ o̍ ya̍lo̍, ndu̍yɛ̍ mā sōlī sa̍lālā kɛ̄ndɛ̄ kɛ̍ndɛ̄la̍ŋ o̍ ya̍lo̍ bā o̍ bā fe̍e̍. Nda̍ kpo̍u̍ ā chō ya̍ bɛ̄ɛ̄le̍ŋ kīo̍o̍. 12Kɛ̍ nya̍ wānāā sōlīāā lāsa̍lāa̍ I̍sɔ̄lūɛ̄ī, mī nya̍ nya̍ wā ya̍ bɛ̄ɛ̄la̍ŋ tɛ̄ɛ̄mbūūwo̍ mi̍ lā sōlī sa̍lālā nīla̍ŋ o̍ ba̍a̍ ni᷄ŋ, fo̍ndōle̍, le̍ mɛ̄ɛ̍ nya̍ chu̍e̍ ma̍āŋ nūu̍ nyɛ̄ o̍ nyɛ̄ le̍ yɛ̍, le̍la̍ŋ nya̍ sōlī nyɛ̍ dīa̍a̍ bɛ̍nda̍ le̍ wo̍ sa̍lāla̍ŋ lēchōo̍ ni̍. 13Lā chō dīmīo̍o̍ āā, ‘Ŋ̄ sāŋga̍ ni᷅ŋ a̍ sɔ̄ɔ̍ŋ mu᷅ŋ,’ ndu̍yɛ̍ mi̍ lā wā bōllē kālāle̍ŋ tōsāa̍ a̍ ya̍. Chɔ̄lūāā nya̍ chō chīīmbūūwo̍ wa̍, a̍ chɔ̄lūāā nāmtāa̍, ndu̍yɛ̍ a̍ chɔ̄lūa̍a̍ cho̍ a̍ nāāla̍ŋ nda̍, nda̍ nya̍ hūŋ sa̍lāla̍ŋ sōlīo̍o̍ o̍ ya̍lo̍ ni̍. Bāā lā yīya̍ŋ māā mī bi̍ī sa̍lālā nyāla̍ la̍ŋ? 14Wāna̍ lāka̍fāa̍ chu̍ā ho̍ō būŋgɛ̄i̍ le̍ chɔ̄lū pīāāndōo̍ sa̍lāa̍ sōlīo̍o̍ o̍ ya̍lo̍, kɛ̍ mbō sōli̍ sa̍lā kōŋ a̍ chɔ̄lū nāmtāa̍ wo̍, sēndi̍o̍o̍ chō ndu̍ chōo̍. Kāni̍ fo̍ndōle̍, ya̍ cho̍ Māsā Bɛ̍ndōo̍ ni̍, wāŋnda̍ o̍ lɛ̄ŋnde̍ ni᷄ŋ kpo̍u̍ ā nɔ̄ mā ke̍ ya̍ bɛ̄ɛ̄le̍ŋ.”

Currently Selected:

Māla̍kāī 1: YM

Highlight

Copy