Māla̍kāī 2
2
1Mi̍ Mɛ̄lɛ̄ka̍ Ya̍a̍wɛ̄ɛ̄, nɔ̍ kpāāyāa̍ kpo̍u̍ wo̍ o̍ dīmu̍l wānāā sōlīāā lāsa̍lāa̍ āā, “Nya̍ wānāā sōlīāā lāsa̍lāa̍ sāwa̍ ya̍ I̍ do̍u̍ nya̍ wo̍ ndu̍ cho̍ ho̍ō ni̍. 2Lā ya᷄ŋ ni᷅la̍ŋ o̍ dīōmndā nīla̍ŋ, ndu̍yɛ̍ mī lā kɛ̄si̍ŋ nda̍ŋ o̍ lākɔ̄l, mī lā ke̍ ya̍ Mɛ̍lɛ̄ka̍ bɛ̄ɛ̄le̍ŋ. Tē lā tōsa̍ le̍nde̍ le̍, I̍ ha̍ndu̍ nya̍ sēndi̍o̍o̍ chōo̍, a̍ tɔ̄nɔ̄ o̍ tɔ̄nɔ̄ nya̍ nɔ̄ mī lā sɔ̄la̍ mā. Ndu̍yɛ̍ I̍ chi̍i̍ ni᷅ŋ bɛ̍ɛ̍ se᷅ndi̍ kālāa̍ hāndɔ̄ɔ̄ o̍ nyɛ̄m nyāa̍ŋ chōo̍, fo̍ndōle̍, le̍ mɛ̄ɛ̍ nya̍ chūe̍ sa̍wa̍ nūu̍ mbō wa̍ nya̍ o̍ lākɔ̄l māā sūɛ̍i̍ kpe̍e̍kpe̍i̍ le̍ yɛ̍. 3I̍ cho̍ chūāūwāā nyāa̍ nyɛ̄ pālāa̍ tūsī chōo̍, ndu̍yɛ̍ chɔ̄lūāā nyāa̍ nya̍ hūŋ ka̍ŋ sa̍lāla̍ŋ sōlīo̍o̍ o̍ ya̍lo̍ wa̍, mī su̍i̍ nya̍ pōōlā ndāla̍ŋ o̍ lāhɔ̄l kpo̍u̍, ndu̍yɛ̍ mī to̍ū nya̍ mī fa̍ŋa̍ nya̍ ya̍ o̍ hɔ̄l a̍ pōōlā lāŋ lēkɔ̄ɔ̍. 4O̍ ko̍ŋ, mī lā sīna̍ māā ya̍ kpe̍e̍kpe̍i̍ do̍u̍ nya̍ sāwāa̍ ho̍ō ni̍, le̍ mī kpe̍ma̍ ya̍ I̍ yi̍i̍ a̍ yu̍ŋgu̍ Li̍va̍īyo̍ wo̍ mbō hīōū lāchī a̍ wāa̍.
5“O̍ kpe̍ma̍ ya̍ I̍ yi̍i̍ a̍ yu̍ŋgu̍ Li̍va̍īyo̍ wo̍ ni᷄ŋ, mi̍ chu̍e̍l nda̍ būŋgɛ̄i̍ le̍ mī to̍sa̍ mā hīōū lāchī a̍ wāa̍ yōōmū, ndu̍yɛ̍ mā wa̍ a̍ kɔ̄l nyūlū. Ndu̍yɛ̍ mi̍ to̍sā mɛ̄ɛ̍ ya̍ I̍ chu̍e̍l nda̍ būŋgɛ̄i̍ yɛ̍. Nda̍ a̍a̍ nɔ̍ mī nda̍ a̍a̍ ke̍ ya̍ bɛ̄ɛ̄le̍ŋ, ndu̍yɛ̍ a̍ te̍le̍ŋ ko̍ŋ, ā wa̍ ya̍ bɛ̄ɛ̄le̍ŋ kīo̍o̍, ma̍ nɔ̄ sīōōŋīī nīi̍. 6Ā wa̍ wāŋnda̍ pɛ̄ɛ̄kūlā tōnya̍la̍ŋ, ndu̍yɛ̍ dīōm o̍ dīōm hūīyāā ndu̍ o̍o̍ fu̍lā nda̍ o̍ lāsōndō le̍. Ā wa̍ sa̍kpō ya̍ Mɛ̍lɛ̄ka̍ o̍ hɔ̄l, ndu̍yɛ̍ mi̍ kɔ̄l nyūlōo̍ wā na̍a̍ tɛ̄ɛ̄ŋ na̍a̍ nda̍ā. O̍ ko̍ŋ kɔ̍ɔ̍lī, ma̍ mālā wānāā bɔ̄ɔ̍ bɔ̍ɔ̍ ma̍ māl yɔ̄ŋndā ndāla̍ wɔ̍ɔ̍ŋnda̍ŋ. 7Ndu̍yɛ̍ wa̍li̍ wānāā sōlīāā lāsa̍lāa̍ ā nɔ̄ le̍ tōsāa̍ wo̍, ndu̍ cho̍ le̍ wāŋnda̍ tōnya̍ cho̍ a̍ ya̍ Mɛ̄lɛ̄ka̍ o̍kɔ̄ɔ̄ wo̍ pɛ̄ɛ̄kōo̍ ni̍. Wāŋnda̍ ā nɔ̄ mā kūɛ̄ nāa̍ nda̍ chūā le̍ mā pɛ̄ɛ̄ku̍ nda̍ nyɛ̄ ya̍ I̍ hɛ̍na̍ŋ nda̍ mā tōsa̍ wo̍. Kāni̍ fo̍ndōle̍, nda̍ cho̍ ki̍i̍la̍a̍ ya̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ wa̍ ni̍.”
8Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍, mbo̍ dīmī āā, “Kɛ̍ nya̍ wānāā sōlīāā lāsa̍lāa̍ lā bīī mi̍ lā fāŋa᷄ŋ o̍ nɛ̄i̍ tōnya̍a̍ chōo̍, ndu̍yɛ̍ mi̍ pɛ̄ɛ̄kūlā nyāla̍ wɔ̍ɔ̍ŋnda̍ŋ lā tōsā mi̍ wānāā bɔ̄ɔ̍ bɔ̍ɔ̍ a̍ sīmnu᷄ŋ wa̍nāā yɔ̄ŋ wɔ̄ɔ̍ŋ. Lā tɛ̄ɛ̄mbu̍u̍ kpe̍ma̍ ya̍ I̍ yi̍i̍ a̍ Li̍va̍ī fi̍nyā nyā māma̍ wo̍. 9Le̍la̍ŋ ya̍ Mɛ̄lɛ̄ka̍ chō tōsā mī wāŋnda̍ I̍sɔ̄lūɛ̄ī a̍ pɛ̍ɛ̍sa̍ nya̍ ndu̍yɛ̍ mā tūsi̍ nya̍ si̍ɔ̍mbu̍la̍ŋ, kāni̍ fo̍ndōle̍, le̍ mɛ̄ɛ̍ nya̍ tu᷄l ka̍a̍lā nīla̍ŋ kɔ̄ɔ̄lī le̍ yɛ̍, mi̍ lā wā yɛ̍ yi̍ɔ̍ɔ̍ chɔ̄mndo̍ wāŋnda̍ tɛ̄ɛ̄ŋ o̍ sɔ̄ɔ̍ŋ ni᷄ŋ.”
A̍ mɛ̄ɛ̍ wāŋnda̍ Chu̍dā a̍ kɛ̍ɛ̍ wāa̍ sa̍kpō a̍ Mɛ̄lɛ̄ka̍ yɛ̍ o̍kɔ̄ɔ̄
10Na̍a̍ kpo̍u̍ fi̍nyāa̍ ō pīlɛ̍ le̍ na̍a̍ ŋ̄ nɔ̄ le̍? Mɛ̄lɛ̄ka̍ pīlɔ̍ɔ̍ kpe̍ le̍ to̍o̍si̍a̍a̍ na̍a̍ le̍? Kɛ̍ vɛ᷅ mi̍ ŋ̄ kɛ̄ɛ̄ le̍ wāa̍ sa̍kpō a̍ na̍a̍ pi̍la̍, ndu̍yɛ̍ mi̍ ŋ̄ wā kpe̍ma̍ Mɛ̄lɛ̄ka̍ yīi̍ a̍ fi̍nyā nāā ma̍māa̍ wo̍ tɛ̄ɛ̄mbūūwo̍? 11Wāŋnda̍ Chu̍dā a̍ kɛ̍ɛ̍ wāa̍ sa̍kpō a̍ Mɛ̄lɛ̄ka̍ ma̍ tōsā sɔ̄ɔ̍ŋ su̍ma̍ŋgɛ̍ɛ̍ma̍ŋ bɛ̍ndo᷄ŋ Chūlu̍sɛ̄lɛ̄m chi̍e̍e̍ a̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍. Ā lo̍ o̍ ko̍ŋ ma̍ tɛ̄ɛ̄mbūū chīɛ̄ī Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wo̍, ndu̍yɛ̍ wānāa̍ pi̍ɛ̍ī mɛ̍lɛ̄ka̍a̍ chēle̍ŋnda̍ wa̍, ma̍ chūā chūāūwāā ndāa̍ o̍ nɔ̄la̍ŋ ni᷄ŋ. 12Kɛ̍ wānāa̍ cho̍ sɔ̄ɔ̍ŋ mu᷅ŋ tōsāa̍ wa̍, ā yɔ᷄ŋ bɛ̍ɛ̍ mā hīŋ a̍ sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ lo̍, mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ fāŋa̍ nda̍ o̍ yu̍ŋgu̍ Che̍kɔ̍pū wo̍ chōo̍ fɔ̍.
13O̍ ko̍ŋ kɔ̍ɔ̍lī, nyɛ̄ nya̍ chō vɛ̄lɛ̄ tōsāa̍ wo̍ ndu̍ cho̍ ho̍ō ni̍. Lā chō mɔ̍nɔ̍ŋ bīyɔ̄ɔ̄, mī lā chāŋ, mī mɛ̍mɛ̍ma̍ nyāa̍ŋ mā līīvīāā ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ yɔ̍ yɔ̍. Kāni̍ fo̍ndōle̍, Mɛ̄lɛ̄ka̍ bu̍u̍la̍ŋ ndɛ̍ a̍ kēlā nyāla̍ŋ te̍, kɛ̄lɛ̄ŋgāāle̍ mbō bīī la̍ŋ nya̍ o̍ lābā a̍ kɔ̄l kɛ̄ndɛ̄. 14Mi̍ lā lō o̍ ko̍ŋ mi̍ lā nyūnā āā, “Vɛ᷅ ō bi̍ī lɛ̍ kēlā nāā la̍ŋ te̍?” Le̍ sa̍bū ke̍ŋ cho̍ yɔ̄nɔ᷄ŋndo̍ wo̍ cho̍ ni̍, Mɛ̄lɛ̄ka̍ sīnā māā nya̍ pūa̍a̍ lā lo̍ o̍ ko̍ŋ mi̍ lā kɛ̄ɛ̄ wāa̍ sa̍kpō a̍ lāāndāā nyāa̍ nya̍ chūa̍ o̍ chūāā pīāāndūyɛ̍ī nyɛ̄i̍ ni᷄ŋ nda̍. Kpe̍ma̍la̍ŋ nya̍ yīi̍ nda̍ Mɛ̍lɛ̄ka̍ o̍ hɔ̄l māā lā chō wā sa̍kpō a̍ nda̍ la̍ŋ, mi̍ lā tɛ̄ɛ̄mbūū kpe̍ma̍la̍ la̍ŋ, mi̍ chē bɛ̍ɛ̍ mi̍ lāāndāā nyāā ka̍ŋ ā wā sa̍kpō a̍ nya̍. 15Mɛ̄lɛ̄ka̍ le̍ to̍o̍si̍a̍a̍ nu̍m a̍ la̍nɔ̍ ko̍ŋ dīālle̍ ī pīlɛ̍ a̍ nyi̍nāā ō pīlɛ̍, ndu̍yɛ̍ mbo̍ wā nyi̍nā kōŋ māndāa̍ le̍? Le̍ sa̍bū o̍ to̍sa̍ he̍ī yo̍ cho̍ ni̍, ō yēēma̍ nya̍ mī lā vēlū chūāūwa̍, a̍ wa᷅ wānāā sa̍kpō Mɛ̄lɛ̄ka̍ o̍ hɔ̄l la̍. Le̍la̍ŋ lā mānda̍ŋ o̍ sūɛ̍i̍ he̍ī ni᷄ŋ, wānā o̍ wānā kɛ̍ɛ̄ wāa̍ sa̍kpō a̍ la̍nɔ̍ ŋ̄ chūa̍ o̍ chūā pīāāndūyɛ̍ī nūmnde̍ ni᷄ŋ ndo̍ le̍. 16Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ dīmī āā, “I̍ hɛ̍na̍ŋ mī wānā pɔ̍nɔ̍ɔ̍ ō kɛ̄ɛ̍ la̍a̍ ndɔ̍ le̍. I̍ tu̍l wānā pɔ̍nɔ̍ bi̍ī ho̍ō wānā la̍nɔ̍ɔ̍ bīyɔ̄ɔ̄ wɔ̄ɔ̍ŋndo̍ wo̍ lēyɛ̄. Le̍la̍ŋ lā mānda̍ŋ, nya̍ pūa̍a̍ lā wa̍ sa̍kpō a̍ lāāndāā nyāa̍.”
Pāa̍le̍ Mɛ̄lɛ̄ka̍ kīlūl ni̍ŋ wa᷅ŋnda̍ yāmɛ̍i̍ le̍ŋ lē chō ni᷅ŋ kpɛ̍ɛ̍lūŋ
17Lā tōsa̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ sa̍ŋgā a̍ sūɛ̍i̍ nyɛ̄i̍. Kɛ̍ mi̍ lā nyūnā āā, “Vɛ̄ɛ̍nɛ̍ na̍a̍ ŋ̄ tōsa̍ yɛ̄ mbo̍ sāŋgā a̍ sūɛ̍i̍ nɛ̄i̍?” Mɛ̄ɛ̍ nya̍ tōsa̍ yɛ̍ cho̍ ho̍ō ni̍. Le̍ mɛ̄ɛ̍ nya̍ dīmī māā, wānā to̍sa̍ bɛ̍ɛ̍ yɔ᷅ŋ wɔ̄ɔ̍ŋndo̍, chūa̍a̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ā nu̍m sa̍kpō ni̍, ndu̍yɛ̍ Mɛ̄lɛ̄ka̍ hīni̍ kɔ̄l a̍ wānā wa̍ā le̍nde̍, yɛ̍. Kɛ̄lɛ̄ŋgāā le̍ mɛ̄ɛ̍ nya̍ dīmi̍ āā, “Mbɔ̄ Mɛ̄lɛ̄ka̍ cho̍ wāna̍ bu̍u̍la̍ŋ a̍ īsa̍kpōya̍ le̍?”
Currently Selected:
Māla̍kāī 2: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
